“Me Pwung kan Pahn Lingalingla Duwehte Ketipin”

“Ahnsowo me pwung kan pahn lingalingla duwehte ketipin nan wehin Samarailo.”​—MAD. 13:43, NW.

1. Soangen ire tohrohr dah kan me pid duwen Wehio me Sises ketin kawehwehda nan sapwellime karasaras kan?

 SISES KRAIS ketin doadoahngki karasaras tohto pwehn kawehwehda ire kan me pid duwen Wehio. E “kin ketin padahkihong pokono ni karasaras; pwe ihte ni karasaras me e kin mahsanihong irail mehkot, ni eh kin ketin wia sapwellime padahk.” (Mad. 13:34) Nan karasaras en kamwerehdi weren tuhke me pid padahk mehlel en Wehio, Sises ketin kasalehda duwen irair en mohngiong en aramas ni arail pwungki padahk en Wehio, oh pil duwen Siohwa eh ketin kahrehiong aramas en kekeirda. (Mark 4:3-9, 26-29) Sises pil ketin karasahda tohtohlahn aramas akan me kin peikiong padahk en Wehio mendahki soangen kekeirda wet eh sohte nohk sansal nin tapio. (Mad. 13:31-33) Patehng met, e ketin kasalehda me kaidehn koaros me kin mwekidki padahk en Wehio pahn warohng wia tohn Wehin Koht.​—Mad. 13:47-50. *

2. Dahme war mwahu kin kasalehda nan sapwellimen Sises karasaras en wihd oh dihpw suwed kan?

² Ahpw ehu sapwellimen Sises karasaras kin kasalehda duwen kihpenehn irail kan me pahn iang ih kakaun nan sapwellime Wehio. Met kin kahdaneki karasaras en wihd oh dihpw suwed kan me kileldi nan Madiu irelaud 13. Nan ehu karasaras tohrohr, Sises mahsaniong kitail me werentuhke me kamweremwerdi iei “mahsen duwen Wehin Koht,” ahpw nan karasaras wet e mahsaniong kitail me war mwahu kin kasalehda mehkot tohrohr me iei “seri kan en wehio.” (Mad. 13:19, 38, NW) Irail pwukat kaidehn tohn Wehio ahpw “sapwellime seri kan” de irail me sohsohki Wehio.—Rom 8:14-17; Kal. 4:6, 7.

 Karasaras en Wihd oh Dihpw Suwed kan

3. Ia kahpwal me aramas en nan karasaraso lelohng oh ia duwen eh apwalihala kahpwal wet?

³ Iet karasaraso: “Wehin Koht rasehng aramas emen me kamwerediong kisin war mwahu kei nan eh mwaht. Nipwong ehu, nindokon aramas koaros ar memeir, eh imwintihti men ahpw kohla kamwerehdi weren dihpw suwed kei nanpwungen war mwahu ko, oh kohkohlahsang. War mwahu ko lao wosada oh keirda, oh wa kan pwerla, dihpw suwed ko ahpw pil pwarada. En ohlo eh ladu ko ahpw pwarodo reh oh patohwanohng, ‘Maing, kaidehn war mwahu kei me komw kamwerediong nan omwi mwahto? A ia duwe, dihpw suwed ko kohsang ia?’ Ih eri sapengkin irail, ‘Imwintihti men me wiahda met.’ A ladu ko ahpw idek reh, ‘Komw soh kupwurki se en kolahng usadahsang dihpw suwed ko?’ A e sapengkin irail, ‘Soh, ieremen; pwe kumwail dehr pil iangahkihsang kisin tuhke mwahu ko, ma kumwail pahn mwatihasang dihpw suwed ko. Kumwail mweidohng pwe irail koaros, dihpw suwed ko oh kisin tuhke mwahu ko, en keirda lao lel ahnsoun rahk. Eri, ni ahnsowo I nek ndaiong soundolung kan re en usada mahs dihpw suwed kan oh kihpene ni kapakap kei pwe en isihsla; a wahntuhke mwahu kan en kohpene oh nekinekla nan imwei imwen nahk.’”​—Mad. 13:24-30.

4. (a) Ihs aramaso nan karasaraso? (b) Iahd oh ia duwen Sises eh ketin tapihada kamwerehdi war wet?

⁴ Ihs aramaso me kamwerehdi war mwahu nan eh mwahto? Sises ketikihda pasapeng mwuhr ni eh ketin kawehwehiong sapwellime tohnpadahk kan: “Sounkamwarak war mwahwo, iei Nein-Aramas.” (Mad. 13:37) Sises, “Nein-Aramas,” ketin kaunopada mwahto ong poad erein sounpar siluh elep en sapwellime  doadoahk en kalohk. (Mad. 8:20; 25:31; 26:64) Eri, e ketin tapihada kamwerehdi war mwahu me iei “seri kan en wehio” sang pahr 33 en Pendekos. Kamwarak en war wet kin wiawi, ni Sises, nin duwen wiliepen Siohwa, eh tapihada kamwerehdi sapwellimen Koht manaman pohn sapwellime tohnpadahk kan, ih duwen arail wiahla sapwellimen Koht seri keidi kan. * (Wiewia 2:33) War mwahu kin kekeirda oh wiahla wihd. Eri, mehn akadei en kamwerehdi war mwahu iei en kihpene irail kan koaros me pahn iang Sises oh kaunda nan sapwellime Wehio.

5. Ihs imwintihtio nan karasaraso, oh ihs dihpw suwed ko?

⁵ Ihs imwintihtio, oh ihs dihpw suwed ko? Sises mahsanihong kitail me imwintihtio “iei Tepil.” Dihpw suwed ko kin wehwehki “aramas akan me iengen Sehdan.” (Mad. 13:25, 38, 39) Dihpw suwed ko me Sises mahsanih duwe iei soangen dihpw ehu me pwoisin oh kereniong duwehte wihd ni ahnsou eh tikitik oh saikinte wa. Ia uwen karasaras wet eh kin pwungiong Kristian likamw akan me dene irail seri kan en Wehio ahpw sohte kin wiahda wa mwahu! Irail Kristian mwalaun pwukat me dene irail sounidawehn Krais iei uhdahn kisehn kadaudok en Sehdan me Tepil.​—Sen. 3:15.

6. Iahd dihpw suwed ko tepida pwarada, oh ia duwen aramas akan arail “memeir” ahnsowo?

⁶ Iahd Kristian me duwehte dihpw pwukat pwarada? Sises mahsanih: “Nindokon aramas koaros ar memeir.” (Mad. 13:25) Iahd met wiawi? Kitail diarada pasapeng sang dahme wahnpoaron Pohl koasoiaiong elder kan nan Episos: “I ese me mwurin ei pahn mwesel kidien wel kan pahn kohdo nanpwungamwail oh re sohte pahn mweidohng pelin sihpwo en pitla. Pil mie ekei aramas me pahn pwarada sang nanpwungamwail me pahn pitiheki me pwoson akan lokaia likamw, pwe re en idawehnirailla.” (Wiewia 20:29, 30) E pousehlahte kaukaweid elder pwukat en pepehd ong arail pwukoa. Wahnpoaron ko kin wia “mehkot me kin keremwpwahla” padahk likamw akan en pedolong nan mwomwohdisohn Kristian. Ahpw mwurin arail mehla, Kristian tohto solahr kin pepehd pwehn kapwaiada arail pwukoa. (Wadek 2 Deselonika 2:3, 6-8.) Ih ahnsou me padahk likamw tohto tepida pedolong nan mwomwohdisohn Kristian.

7. Ekei wihd ko wiahla dihpw suwed kan? Menlau kawehwehda.

⁷ Sises sohte mahsanih me wihd pahn wiahla dihpw suwed ahpw e mahsanih me dihpw suwed ko kamweremwerdi nanpwungen wihd ko. Eri, karasaras wet sohte kin koasoia duwen Kristian mehlel kan me kesehla padahk mehlel. Ahpw e kin kasalehda me Sehdan kin nsenkihte kasaminehla mwomwohdisohn Kristian sang ni eh kahrehiong aramas suwed kan en pedolong loale. Ni ahnsou me Sohn me wia kaimwiseklahn wahnpoaron mahla, sounpadahk likamw tohto me kin padahngki padahk likamw kan mieier.​—2 Pit. 2:1-3; 1 Sohn 2:18.

Mweidohng Pwe Irail Koaros en Keirda Lao Lel Ahnsoun Rahk’

8, 9. (a) Dahme kahrehda en Soumwet eh kehkehlik ong nah ladu kan me wehwe mwahu ong irail kan me kin rong Sises? (b) Nan pweidahn karasaraso, ia duwen wihd ko oh dihpw suwed ko ara kekeirda?

⁸ Nein Soumweto nah ladu ko kehsehkin ih duwen kahpwalo oh idek: “Komw soh kupwurki se en kolahng usadahsang dihpw suwed ko?” (Mad. 13:27, 28) Eh pasapengo ele mwomwen kapwuriamwei pwe e padahkihong irail en mweidohng wihd ko en iangete dihpw suwed ko keirda lao lel ahnsoun rahk. Sapwellimen Sises tohnpadahk ko kin wehwehki kehkehlik wet. Re pahn wehwehki ia uwen apwal en kilang wekpeseng en wihd oh dihpw suwed kan. Irail soumwet koahiek kan pil ese me kalewen dihpw suwed wet kin tengala nan kalewen wihd kan oh ma re pahn song en usada dihpw suwed ko mwohn ahnsoun rahk, wihd kan pahn kakete  ohla. * Ih kahrepen Soumweto eh padahkihong irail en awih.

⁹ Ni ahlohte, sounpar epwiki kei dower powe, soangsoangen pwihnen Kristian likamw akan kin kahrehiong aramas tohto en wia iengen Sehdan me rasehng dihpw suwed ko. Irail pwukat keieu kohsang nanpwungen Roman Kadolik oh Orthodox, oh mwuri nanpwungen soangsoangen palien Prohs kan. Ahnsowohte, ekei war mwahu kan pil kin kamweremwerdiong nan sampah pwon. Soumwet en karasaraso kin kanengamah awiawih erein arail kekeirda lao lel ahnsoun rahk.

Ahnsoun Rahk Leledohr

10, 11. (a) Iahd ahnsoun rahk wiawi? (b) Ia duwen tohnleng kan arail kapokonepene aramas akan me rasehng wihd kan ong nan sapwellimen Siohwa imwen nahk?

¹⁰ Sises mahsanih: “Ahnsoun rahk, iei imwin kawa; oh tohndoadoahk kan, iei tohnleng kan.” (Mad. 13:39) Erein imwin koasoandi suwed wet, seri kan en Wehio kapokonepene oh katohreirailweisang me rasehng dihpw suwed ko. Duwen met, wahnpoaron Piter padahkihong kitail: “E leledohr ahnsoun kadeik, oh e pahn tepida sang rehn sapwellimen Koht [Kristian] kan. Eri, ma e pahn tepida sang rehtail, ia pahn imwilahn irail kan me sohte pwoson Rongamwahwo sang rehn Koht?”​—1 Pit. 4:17.

¹¹ Mwurinte tepidahn imwin rahn akan, de kaimwiseklahn koasoandi en mehkan, ahnsoun kadeik tepida ong irail kan me dene irail Kristian mehlel kan, ma irail uhdahn “seri kan en wehio” de “aramas akan me iengen Sehdan.” Ni tepin ahnsoun rahk, Papilon Lapalap me pwupwudi “mahs,” oh mwuri seri kan en Wehio kin kapokonpene. (Mad. 13:30) Ahpw ia duwen tohnleng kan nan rahn pwukat arail kin kapokonepene aramas akan me rasehng wihd ong nan sapwellimen Siohwa imwen nahk? Irail pwukat me pokonpenehr wiahlahr kisehn mwomwohdisohn Kristian me kin wia kaudok min oh pil wia wasa me irail kak ale kupwuramwahu en Koht oh sapwellime epwel mwahu. De irail pwukat aleier ketingpen mour nanleng.

12. Ia uwen werei en ahnsoun rahk pahn wiawi?

¹² Ia uwen werei en ahnsoun kadeik? “Ahnsoun” rahk me Sises mahsanih kin wiawi erein ahnsou ehu. (Kaud. 14:15, 16) Ahnsoun kadeik ong emenemen irail me keidi kan pahn wiawihki erein kaimwiseklahn koasoandi wet. E pahn wiawi lao lel ahnsou me irail keidi kan uhdahn pahn kileldier.​—Kaud. 7:1-4.

13. Ia duwen irail kan me rasehng dihpw suwed arail kin kahrehiong aramas en dipekelekel? Ia duwen arail kin wia sapwung kan?

¹³ Ihs irail kan me pahn pokonpene sang nan Wehio, oh ia duwen arail kin kahrehiong aramas akan en dipekelekel oh wia sapwung kan? (Mad. 13:41) Irail kaunen pelien lamalam en Kristian likamw akan me rasehng dihpw suwed kin pitipitih aramas rar kei erein sounpar epwiki kei. Irail kin wia met sang arail kin wiahda padahk kan me kin kasohwe Koht, me kin kadipekelekele aramas kan, soangen padahk me dene mie wasahn kalokolok en kisiniei me sohte kin kunla oh padahk sawehwe oh kapwonopwon me dene Koht wiawihkihda meh silimen. Kaunen pelien lamalam tohto kin wia kahlemeng suwed ong tohn arail pwihn ni arail kin kompoakepahnki sampah wet oh ekei pak sang arail tiahk samin kapwuriamwei  kan. (Seims 4:4) Patehng met, pelien lamalam pwukat kin mweidohng towe kan en wiewiahte tiahk samin. (Wadek Sud 4.) Mendahki mepwukat, re kin mwomwehdahte me re sarawi oh kin poadidi ong Koht. Ia uwen seri kan en Wehio arail kin perenkihda ni arail tohrohreweisang irail kan me rasehng dihpw suwed, arail wiewia samin kan oh padahk likamw akan me kin kahrehiong aramas en dipekelekel!

14. Ia duwen irail kan me rasehng dihpw suwed arail kin sengiseng oh ngihrail kan kin tehtehrek?

¹⁴ Ia duwen irail kan me rasehng dihpw suwed arail kin sengiseng oh ngihrail kan kin tehtehrek? (Mad. 13:42) “Aramas akan me iengen Sehdan” weikekilahr pwehki “seri kan en wehio” kin kasansalehda duwen wiewia samin oh padahk likamw akan en irail me rasehng dihpw suwed. Re pil kin pahtoukihla pwehki utuht sang tohn arail mwomwohdiso kan wie tikitikla oh pil solahr arail manaman pohrail.​—Wadek Aiseia 65:13, 14.

15. Ia wehwehn irail kan me rasehng dihpw suwed ar kin isihsla?

¹⁵ Ia wehwehn irail kan me rasehng dihpw suwed ar kin oaroahrpene oh isihsla? (Mad. 13:40) Met kin dokedoke imwiseklahn irail kan me rasehng dihpw suwed. Arail kin lekdekla nan kisiniei ni karasaras kin wehwehki me irail kohkohlahng kasohrala soutuk. (Kaud. 20:14; 21:8) Kristian likamw pwukat me rasehng dihpw suwed pahn kasohrala erein “kahn kamakam kowahlap.”​—Mad. 24:21, NW.

Irail ‘Pahn Lingalingla Duwehte Ketipin’

16, 17. Dahme Malakai kohpada me pid sapwellimen Koht koasoandi ong kaudok min?

¹⁶ Iahd me irail me rasehng wihd kin ‘lingalingla duwehte ketipin’? (Mad. 13:43) Malakai kohpada duwen kamwakel en sapwellimen Koht tehnpas: “‘Kaun me kumwail kin kasikasik ahpw pahn mwadangete ketidohng nan Tehnpese Sarawio. Meninkeder me kumwail pil inenen kasikasik oh men kilang pahn pwarodo oh kalohki ei inou.’ Ahpw ihs me pahn kakohng rahno me e pahn ketido? Ihs me pahn kak momour ni eh pahn ketido? E pahn ketin rasehng kisiniei me kin kamwakele mete, oh pil rasehng sohpw kehlail. E pahn ketidohn wia kopwung, rasehng me kin inim oh kamwakelehda silper. Sapwellimen KAUN-O meninkeder pahn ketin kamwakelehda samworo kan, duwehte souninim mete eh kin kamwakelehda silper oh kohl. Eri, re ahpw pahn wadohng KAUN-O soangen meirong me konehng.”​—Mal. 3:1-3.

¹⁷ Nan atail ahnsou, e sansal me kokohp wet tepida pweida nan pahr 1918 ni ahnsou me Siohwa, iangahki “meninkeder” en inou, Sises Krais, ketin kasawih sapwellimen Koht koasoandi ong kaudok min. Malakai padahkihong kitail dahme pahn wiawi ahnsou me kamwakel wet imwisekla: “Kumwail eri pahn pwurehng kilang wekpeseng en aramas pwung kan oh aramas suwed kan, me kin papah ie oh me sohte kin papah ie.” (Mal. 3:18) Kristian mehlel kan pwurehng kehlailda oh arail doadoahk uhdahn lalaudla, met kin kasalehda me ahnsoun kamwakel wet wiawi ni tepin ahnsoun rahk.

18. Dahme Daniel kohpada me pahn wiawi nan atail ahnsou?

¹⁸ Soukohp Daniel kin koasoia duwen atail ahnsou ni eh kohpada: “Kaun kupwurokong kan pahn lingalingki marain en pahnlahng. Oh irail kan me padahkihongehr aramas tohto en wia dahme pwung pahn lingaling rasehng usu kan kohkohlahte.” (Dan. 12:3) Ihs irail me wie lingaling? Irail pwukat iei Kristian keidi kan me wia wihd mehlel kan me Sises mahsanih  duwe nan karasaras en wihd oh dihpw suwed kan. Pokon kalaimwun me rasehng sihpw kan me wie tohtohla kin uhdahn kilang duwen ‘kapokonepene sang Wehio’ irail Kristian likamw akan me rasehng dihpw suwed. Irail me pahn kakete wia towe kan en Wehio, ni arail iangala luhwen me keidi kan, re pil kin kasalehda arail marain nan sampah rotorot wet.​—Sek. 8:23; Mad. 5:14-16; Pil. 2:15.

19, 20. Dahme “seri kan en wehio” kin kasikasik? Dahme kitail pahn koasoiapene nan iren onop en mwuhr?

¹⁹ Rahnwet, “seri kan en wehio” kin kasikasik ketingparail nanleng me lingan. (Rom 8:18, 19; 1 Kor. 15:53; Pil. 1:21-24) Ahpw lao lel ahnsowo, irail anahne kolokol arail lelepek, pousehlahte wie lingaling oh kasalehda me irail uhdahn weksang “aramas akan me iengen Sehdan.” (Mad. 13:38; Kaud. 2:10) Ia uwen kaperen ong kitail koaros ma kitail ahneki pwais kaselel en kilang imwilahn ‘kapokonepene sang Wehio’ irail me rasehng dihpw suwed kan nan atail ahnsou!

²⁰ Ia mwomwen nanpwungen irail seri kan en Wehio oh pokon kalaimwun me wie tohtohla, me ahneki koapworopwor en mour kohkohlahte nin sampah nin duwen towe kan en Wehio? Iren onop en mwuhr pahn sapengla peidek wet.

[Nting tikitik me mi pahs]

Ke Tamataman?

Nan sapwellimen Sises karasaras en wihd oh dihpw suwed kan, ia wehwehn mepwukat?

• War mwahu

• Aramaso me kamwerehdi waro

• Kamweremwerdi en waro

• Imwintihtio

• Dihpw suwed kan

• Ahnsoun rahk

• Imwen nahk

• Sengiseng oh ngihrail kan tehtehrek

• Kisiniei

[Peidek en Onop]

[Kilel kan nan pali 22]

Pendekos nan pahr 33 wia kilelepen tepidahn kamwarak en war mwahu

[Kilel nan pali 25]

Wihd nan karasaraso wisikdohngehr nan sapwellimen Siohwa imwen nahk

[Credit Line]

Pictorial Archive (Near Eastern History) Est.