“Justukunaqa chipapäyanqa intinow[mi]”

“Justukunaqa chipapäyanqa intinow Teytanpa reynunchow.” (MAT. 13:43, QKW.)

1. ¿Imakunatataq Reinopaq Jesus yachatsikurqan igualatsikïkunawan?

REINOPAQ parlarmi Jesucristu atska igualatsikïkunawan yachatsikurqan. Bibliachö ninqannöpis, “tuqui iwalatsiquicunawan[mi] Jesus tsecho atsca nunacunata yachatserqan. Y mana iwalatsiquiwanqa manam imatapis yachatsicorqantsu” (Mat. 13:34). Reinopa murumpaq parlanqanchömi, rikätsikurqan Diospita wiyakuyänan o mana wiyakuyänampis nunakunapa shonqumpitaraq kanqanta, y Jehová yanapaptinraq más yachakuyänantapis (Mar. 4:3-9, 26-29). Huk igualatsikïchönam Diospa Reinompaq rurayanqan más miranqanta parlarqan, y nunakuna mana mäkïkäyaptin winanqantam rikätsikurqan (Mat. 13:31-33). Y wakinchönam nirqan, manam llapan wiyaqkunatsu Diospa Mandädonchö kayanqa (Mat. 13:47-50). *

2. Jesus trïgopaq y mana alli qorapaq parlarnin, ¿pikunatataq alli murutawan igualatsin?

² Marcos libropa 13 kaq capïtulonchömi, yachakuntsik trïgopaq y mana alli qora cizäñapaq. Këchöqa Jesus Reinonchö pëwan gobernayänampaq kaqkuna imanöpis ëllukänampaqmi willakurqan. Huk igualatsikïchö tsë murupaq ‘reynupa palabranmi’ nirpis, këchöqa manam tsëtanatsu nikan, antis murutam “reynupa tsurinkunam” nin (Mat. 13:19, 38, QKW). Alli tanteashqaqa, këkunaqa Diospa ‘tsurinkuna’ o Jesuswan gobernayämunampaq kaqkunam kayan, manam kë Patsachö täraqpaq kaq nunakunatsu (Rom. 8:14-17; lei Galatas 4:6, 7).

Trïgopaq y mana alli qorapaq igualatsikï

3. Kë igualatsikïchö, ¿imataq huk nunapa chakranchö pasakushqa, y imatataq ruran?

³ Kë igualatsikïta leirishun: “Diospa mandaquinincho queqa quenomi: Juc nunam chacranman alli muruta murucorqan. Peru muroqcuna punucuyanqanyaqnam, chiqueqnin nuna ewecur, tse murushqa jananman balliguta [“sisañata”, QKW] maqtsicur cuticorqan. Trigu winar espigar qallecuptinnam, jina balligupis espigaramorqan. Tsenam uryaqnincunaqa patronnincunaman ewar, queno tapuyarqan: ‘Wiraqtsa, qamqa alli murutataq murutsiyämarqequi, peru ¿imanepataq balligoqa jeqamorqon?’ nir. Tseno niyaptinnam, patronnincunaqa queno nerqan: ‘Tsetaqa chiquimaqnïmi maqtsicushqa’ nir. Uryaqnincunanam queno tapuyarqan: ‘¿Munanquicu ewar tse mana alli qorata llupicacharcuyanata?’ nir. Peru patronnam nerqan: ‘Ama llupiyëtsu. Paqtam tseno rurayanqequita trigutawan llupicacharcuyanquiman. Mejor triguwan iwal poqucuyätsun. Cosecha chäramuptinnam, segaqcunata nishaq tse balliguta watar, watar puntata ellurir cayecuyänanpaq. Tsepitana trigüta ellurir winanäman [churakunäman] churayänanpaq’” (Mat. 13:24-30).

4. a) ¿Pitaq murupakoq kë igualatsikïchö? b) ¿Imëtaq y imanötaq Jesus murupakur qallëkurqan?

⁴ ¿Pitaq alli muruta murun? Kikin Jesusmi  qateqninkunata willarqan: “Tse alli muruta muroq caqqa Diospita Shamushqa Nunam” (Mat. 13:37). Jesus o “Diospita Shamushqa Nunam”, kima wata hoqta killa murunampaq chakrata alistaqnö yachatsikurqan (Mat. 8:20; 25:31; 26:64). Pentecostés 33 watachönam, alli muruta murur qallëkurqan ‘reynupa tsurinkunata’. ¿Imanötaq rurarqan? Teytampa rantin, Diospa tsurinkunana kayänampaq qateqninkunaman santo espïrituta ramarmi, y tsëpitanam kë muru winëkurqan poqu trïgoman tikranqanyaq (Hech. 2:33). * Cristuqa kënö murupakurqan, 144.000 nunakuna pëwan ciëlochö herenciata chaskiyänampaq y rey këman chäyänampaq.

5. ¿Pitaq chikikoqqa, y pikunataq mana alli qorakuna kayan?

⁵ ¿Pitaq chikikoqqa? “Dyablum” nirqanmi Jesusqa. ¿Y pikunataq kayan mana alli qoraqa? “Mana allipa tsurinkunam” (Mat. 13:25, 38, 39, QKW). Mana alli qorapaq parlarqa, ballïconö wanutsikoq cizaña qorapaqchi parlëkarqan, kë qora tsëraq winarqa trïgoniraqmi. Kënö parlanqanqa rasunmi, wakinkunaqa Reinopa tsurinkunam kayä nirpis, ardëllam cristiänotukuyan y manam allikunataqa rurayantsu. Tsëmi, Satanaspa “murun” o “mirënin” kayan (Gén. 3:15; La Biblia griega. Septuaginta).

6. ¿Imëtaq mana alli qorakuna yurirqan, y ‘muroqcuna punucuyanqanqa’ ima ninantaq?

⁶ ¿Imëtaq kë mana alli murunö nunakuna  yuriyarqan? “Muroqcuna punucuyanqanyaq[mi]” nirqanmi Jesus (Mat. 13:25). ¿Këqa imëtaq kashqa? Efeso markachö anciänokunatam Pablu kënö nirqan: “Musyämi eucushqächo imeca mallaqashqa atoq üshacunata micoq cuenta, mana alli yachatsicoqcuna Teyta Jesusman creyicoqcunata ushacätsita munar shayämunanpaq caqta. Qamcunapitam waquinniquicuna llutan camanta yachatsicur qallaquicuyanqa Jesusman creyicoqcuna qaticurcuyänanpaq” (Hech. 20:29, 30). Tsëpitanam anciänokunata alkäbu alkäbulla kayänampaq nirqan. Pero mana alli yachatsikï mirananta michaq apostolkuna “punuyanqanchö” o wanuyanqanchönam, atskaq cristiänokuna punukäyarqan o Diospita yachakïta haqiriyarqan (lei 2 Tesalonicenses 2:3, 6-8). Tsënöpam mana alli yachatsikoqkuna qallakïkorqan.

7. ¿Trïgoku mana alli qoraman tikrarqan? ¿Y imanirtaq tsënö ninki?

⁷ Jesusqa manam, trïgom mana alli qoraman tikranqa nirqantsu, sinöqa mana alli qora trïgopa hananman murukanqantam willakurqan. Tsëqa, kë igualatsikïchö manam rasumpa cristiänokuna alli kaq yachatsikïpita rakikäyänantatsu parlëkan. Tsëpa rantinqa, Satanás mana alli nunakunata congregacionman tukïnöpa yëkatsir mana alliman ishkitsinampaqmi parlëkarqan. Y Jesus ninqannömi, apóstol Juan wanukunan witsankunaqa, ‘Diosnintsikpa contran’ yachatsikoqkuna atskaqna kayarqan (2 Ped. 2:1-3; 1 Juan 2:18).

“Triguwan iwal poqucuyätsun”

8, 9. a) ¿Imanirtaq Jesus parlëkanqampaq llapampis musyayaq? b) ¿Imanötaq trïgowan cizaña puntapitana winayashqa?

⁸ Trabajaqkuna mana alli qora winanqanta rikarmi, patronninman ëwar kënö tapuyarqan: “¿Munanquicu ewar tse mana alli qorata llupicacharcuyanata?” (Mat. 13:27, 28). Pëqa mana munarqantsu, sinöqa cosecha tiempochöraq llupiyänampaq mandakurqan. Noqantsik itsa imanir tsëta ninqantapis musyashwantsu, pero pëkunaqa musyayaqmi tsë qora llullullaraq karnin trïgopita horqanan alläpa sasa o aja kanqanta. Y chakrata muroqkunaqa musyayarqanchi, cizaña qorapa matsun o sipin trïgopa sipinman awrikanqanta. * ¡Kë patrón ninqanqa allim karqan!

⁹ Jesus ninqannömi, watakuna pasanqanmannö kë mana alli qoraqa mirar qallëkurqan puntata Iglesia Católica Romänachö, Ortodoxa iglesiachö y wakin iglesiakunachöpis. Hina tsë witsanmi, chakraman o kë mundoman huk ishkë trïgopis murukarqan. Kë igualatsikïchö patronqa, qorakuna winananta y mikï poqunantaraqmi shuyararqan, y mikï poquriptin cosëchaqa ichik tiempollanam usharin.

Cosecha tiempo chäramushqanam

10, 11. a) ¿Imëpitataq cosecha witsan qallashqa? b) ¿Imanötaq gränota churakunanman cristiänokunata Jehová ëllïkashqa?

¹⁰ Hina këtapis Jesus ninmi: “Cosecha tiempunam que patsa ushacanan[paq] [“ichikllana pishinqan”, NM] junaqwan iwalan. Cosecha elloqcunanam anjelcuna cayan” (Mat. 13:39). Awmi, kë ushanan witsanchömi Reinopa tsurinkunata cizäñapita o mana alli cristiänokunapita rakinqa. Apóstol Pëdrum këpaq parlarnin nirqan: “Porqui Teyta Jesusman creyicoqcuna sufriyänan tiempu chäramushqanam. Tseno noqantsicpita qallecaptenqa, ¿imanoraq calläyanqa Diospa alli willaquininman mana creyicoqcuna?” (1 Ped. 4:17).

¹¹ ‘Que patsa ushacanan junaqkuna’ qallarinqanllachömi, ‘reynupa tsurinkunata’ y  “mana allipa tsurinkunatapis” Dios juzgar qallëkurqan. ¿Imataq pasakorqan cosecha qallarinqanllachö? Jesus willakunqannömi, cosecha qallarinqanllachö Hatun Babilonia ishkirerqan y ‘reynupa tsurinkuna’ ëllukarqan (Mat. 13:30). Y, ¿imanötaq Jehová grano churakunanman cristiänokunata ëllïkan o gorïkan? Këtaqa rurashqa kuyakïninchö y tsapäkïninchö kayänampaq mushoq congregacionninman chaskirmi, hina ciëlochö kawayänampaq chaskirmi.

12. ¿Ëka tiempotaq cosëchaqa?

¹² ¿Ëka tiempotaq juicio kanqa? Jesusqa cosëchapaqmi parlarqan y musyanqantsiknöpis cosecha witsanqa manam rasllatsu usharin (Apo. 14:15, 16). Ciëlopaq kaqkunata akrë o juicioqa ushakë chämunqanyaqmi kanqa, y këqa kanqa ciëlopaq kaqkunata llapanta señalar ushanqanyaqmi (Apo. 7:1-4).

13. ¿Imanötaq cristiänotukoqkuna nunakunata ishkitsiyan, y ima mana allikunataq rurayan?

¹³ Hina, mana allita rurarnin cristiänokunata ishkitseqtaqa Reinopitam horquyanqa ninmi Jesusqa. ¿Pikunapaqtaq këchö parlëkan? (Mat. 13:41.) Mana alli qoranöqa këkan católica religionpa pushaqninkunam, pëkunam nunakunata pantatsiyashqa mana alli yachatsikïkunawan, Diosqa kima Dioschö hukllëllam nishpa, mana alli nunakunataqa ninachömi Dios imëyaqpis rupatsinqa nishpa. Hina atskaq yachatsikoq religiösokunam, mana alli rurëkunata nunankunata yachatsiyashqa lluta purikoq warminö imëkamampis takukarnin, y wakinkunanäqa warmiwan ollquwan melanëpaq rakchakunata rurarnin (Sant. 4:4). Hinamampis tukï rakchakunata nunankuna rurakuyänantapis rikaräkuyanmi (lei Judas 4). Tsënö këkarnimpis, hananllapaqa alli cristiano kayanqantanömi rikätsikuyan. Pero ‘reynupa tsurinkunaqa’ alläpam kushikuyan tsë mana alli cristiänokunapita Diosnintsik rakinqampita.

14. ¿Imanirtaq ‘mana allipa tsurinkuna’ waqayan y kirunkunatapis uchuriyan?

¹⁴ Mana alli qora o ‘mana allipa tsurinkunaqa’ pasëpam waqayan y kirunkunatapis uchuriyanmi. ¿Imanirtaq tsënöqa rurayan? (Mat. 13:42, QKW.) Wanutsikoq o mana alli qora kayanqanta ‘reynupa tsurinkuna’ musyatsikuyaptinmi. Hinamampis religionninkunachö nunankuna wallkäyanqanta, y manana wiyakuyanqanta rikarmi (lei Isaías 65:13, 14 *).

15. ¿Imanötaq mana alli cristiänokuna kayakäyanqa?

¹⁵ ¿Imataq mana alli qorata ëllurir kayëkuyanqanqa? (Mat. 13:40.) ‘Jitayanqa nina jornumanmi’ nimarnintsikqa, rikätsimantsik  mana alli cristiänokuna chipyëpa ushakäyänantam (Apo. 20:14; 21:8, QKW). Kë mana alli cristiänokunaqa ‘allapa jipaqui’ hunaqchömi ushakäyanqa (Mat. 24:21).

“Chipapäyanqa intinow[mi]”

16, 17. ¿Jehoväpa templonchö ima pasakunampaqtaq Malaquías willakurqan y imanötaq cumplikashqa?

¹⁶ ¿Imëtaq “chipapäyanqa intinow” allita ruraq nunakuna? (Mat. 13:43, QKW.) Këta alli käyinapaqqa yanapamäshun Diospa wayin limpiakänampaq Malaquías qellqanqanmi: “‘Mana mäkuyanqëkiyaqmi ashiyanqëki rasumpa Teytaqa Templonman shamunqa, y conträtopita willakoq kaqpis shamunqam. ¡Rikäyë! Rasumpam shamunqa’, ninmi [...] Jehová. ‘¿Pero shamunqan hunaq piraq alli tsarakunqa? Y ¿pë yuriramuptin piraq shëkanqa? Pëqa, metalta tsullutseq ninanö y taqshakoqkunapa lejiannömi kanqa. Y täkurirqa, metalta tsullutseq y qellëta limpiaq nunanömi Levïpa tsurinkunata limpianqa. Y örotanö, qellëtanö chipapäratsiptinmi, Jehoväpaq alli qarë ofrenda kayanqa’” (Mal. 3:1-3).

¹⁷ Llapan rikëkanqantsikmi musyatsimantsik 1918 watapita patsë kë textochö ninqan cumplikanqanta. Tsë watachömi Jehová y ‘conträtopita willakoq’ Jesuswan mushoq kaq templota rikaq y limpiaq ëwayarqan. Tsëpita ima pasakunantapis Malaquías willakurqanmi: “Yapëmi cuentata qokuriyanki pï alli ruraq kanqanta y pï mana alli ruraq kanqantapis, Diosta pï adoranqanta y pï mana adoranqantapis” (Mal. 3:18). Tsëpita patsam cristiänokuna llapan kallpankunawan Jehoväta servir qallayarqan, tsënöpam musyantsik tsë witsan cosecha qallanqanta.

18. ¿Kanan witsan ima pasakunampaqtaq Daniel willakurqan?

¹⁸ Profeta Danielmi kë witsampaq këta willakurqan: “Yachëyoq nunakunaqa atsikyaq ciëlonömi atsikyäyanqa, alli rurëman atska nunakunata apamoqkunanam atsikyaq qoyllurkunanö imëyaqpis kayanqa” (Dan. 12:3). ¿Pikunataq tsënö chipapäyan? Këkunaqa ciëlota ëwaqpaq kaq cristiänokunam kayan, pëkunatam Jesus trïgotawan igualatsirqan. Y kë patsachö kawayänampaq kaq atskaq nunakunam yanapayan. Pëkunapis cuentata qokuyashqanam mana alli qorata o uli cristiänokunata horqëkäyanqantana. Ciëlopaq kaqkuna y Patsachö kawayänampaq kaqkunam, paqaschönö këkaq nunakunata aktsipaq cuenta yachëkätsiyan (Zac. 8:23; Mat. 5:14-16; Fili. 2:15).

19, 20. ¿Imatataq ‘reynupa tsurinkuna’ shuyaräyan, y imataraq huknin artïculochö yachakushun?

¹⁹ ‘Reynupa tsurinkunaqa’ ciëlochö kawakïtam kushishqa shuyaräyan (Rom. 8:18, 19; 1 Cor. 15:53; Fili. 1:21-24). Pero ëwayanqanyaqqa, ‘mana allipa tsurinkunapita’ hukläya kayanqantam rikätsikuyänan (Mat. 13:38; Apo. 2:10). ¡Kushikïpaqmi mana alli qorapita Diospa nunankuna rakikäyanqan witsanchö kawëkanqantsikqa!

²⁰ ¿‘Reynupa tsurinkuna’ y kë Patsachö kawayänampaq kaq atska nunakuna tsë kastallatsuraq kayan? Huknin semänapaq artïculochömi tsëpita yachakushun.

[Päginapa ura kuchunchö willakïkuna]

¿Yarpankiku?

Jesus igualatsikïwan parlanqanchö:

• ¿Pikunataq alli muru kayan?

• ¿Pitaq alli muruta muroq nuna?

• ¿Imataq murupakïqa?

• ¿Pitaq chikikoqqa?

• ¿Pikunataq mana alli qora o cizaña cuenta kayan?

• ¿Imataq cosecha cuentaqa?

• ¿lmataq Jehoväpa grano churakunanqa?

• ¿Ima ninantaq waqar kirunkunatapis uchuriyanqanqa?

• ¿Imataq tsë ‘nina jornuqa’?

[Yachakunapaq kaqpa tapukïninkuna]

[21 kaq päginachö dibüjukuna]

Pentecostés 33 watachömi alli muru murukar qallakarqan

[24 kaq päginachö dibüju]

Trïgonö alli cristiänokunatam, Jehová grano churakunanman ëllïkan

[Pikunapa kanqan]

Pictorial Archive (Near Eastern History) Est.