‘⁠E Susulu Atu o Ē e Amiotonu e Pei o le Malamalama o le Lā’

“I lenā taimi e susulu atu ai o ē e amiotonu, e pei o le malamalama o le lā i le malo o lo latou Tamā.”—MATA. 13:43.

1. O ā vala eseese o le Malo na faataʻitaʻia e Iesu i ana talafaatusa?

NA FAAAOGĀ e Iesu Keriso le tele o talafaatusa po o faataoto, e faamatala ai vala eseese o le Malo. Na “fetalai atu Iesu i le motu o tagata . . . e ala i talafaatusa. O le mea moni, e fetalai atu o ia iā i latou i taimi uma i talafaatusa.” (Mata. 13:34) I talafaatusa e uiga i le lūlūina o fatu o le upu moni o le Malo, na faamamafa e Iesu le vaega fai a le loto o le tagata i le taliaina o le feʻau, atoa ma le matafaioi a Ieova i le tuputupu aʻe faaleagaga o le tagata. (Mare. 4:3-9, 26-29) Na faia foʻi e Iesu se talafaatusa e uiga i le faatelega mataʻina o mea e tau i le Malo i le lalolagi, e ui lava e lē o taimi uma e iloa gofie ai lenā tuputupu aʻe. (Mata. 13:31-33) E lē gata i lea, na ia faamatilatila mai e lē o i latou uma e taliaina le feʻau o le Malo, o ni tagatānuu lelei o le Malo.—Mata. 13:47-50. *

2. I le talafaatusa a Iesu i le saito ma le vao leaga, o le ā o loo faatusaina i ai le fatu lelei?

² Ae peitaʻi, e taulaʻi atu se tasi o talafaatusa a Iesu, i le aoaoina o i latou o le a pule faatasi ma ia i lona Malo. E masani ona taʻua o le faataoto i le saito ma le vao leaga, ma o loo faamauina i le Mataio mataupu e 13. I se isi talafaatusa na taʻua ai e Iesu e faapea, o le fatu na lūlūina o “le upu o le malo,” ae i lenei talafaatusa, ua ia taʻu mai ai e ese le mea o loo faatusaina i ai fatu lelei —“o atalii ia o le malo.” (Mata. 13:19, 38) O i latou ia e lē o ni tagatānuu o le Malo, ae o “atalii,” po o suli o le Malo.—Roma 8:14-17; faitau le Kalatia 4:6, 7.

Le Talafaatusa i le Saito ma le Vao Leaga

3. Faamatala le faafitauli na feagai ma le tamāloa i le talafaatusa, ma le auala na ia taulimaina ai.

³ O le talafaatusa lenei: “Ua faatusaina le malo i le lagi i le tagata na lūlū le fatu lelei i lona fanua. A o momoe tagata, ona alu ane ai lea o lona fili ma lūlū vao leaga i le saito, ona alu ese ai lea. Ina ua tupu ma fua mai, ona tupu mai ai foʻi lea ma le vao leaga. O lea ua ō mai ai pologa a le matai ma faapea mai iā te ia, ‘⁠Le alii e, e te leʻi lūlūina ea le fatu lelei i lou fanua? A ua faapefea ona tutupu mai ai vao leaga?’ A ua faapea atu o ia iā i latou, ‘⁠Na faia lenei mea e se tagata, o ia o se fili.’ Ua latou fai mai iā te ia, ‘⁠E te manaʻo matou te ō atu e vele ese?’ A ua fai atu o ia, ‘⁠E leai, ina neʻi outou liaʻi ese ai ma le saito, a o vele ese le vao leaga. Tuu ai pea e tutupu faatasi seʻia oo i le seleselega; pe a oo i le tau e selesele ai, ona ou fai atu lea i ē selesele, Ia vele ese muamua le vao leaga e fusifusi ma susunu i le afi, ona ao mai ai lea o le saito ma tuu i loʻu fale saito.’ ”—Mata. 13:24-30.

4. (a) O ai le tamāloa i le talafaatusa? (e) O anafea ma na faapefea ona amata ona lūlūina e Iesu lenei fatu?

⁴ O ai le tamāloa na lūlūina le fatu lelei i  lona fanua? Na taʻua e Iesu le tali mulimuli ane, ina ua ia faamatala atu i ona soo: “O lē na lūlūina le fatu lelei, o le Atalii lea o le tagata.” (Mata. 13:37) Na saunia e Iesu, o le “Atalii o le tagata,” le fanua mo le totōina o fatu, a o faagasolo le tolu ma le ʻafa tausaga o lana faiva i le lalolagi. (Mata. 8:20; 25:31; 26:64) Na amata mai i le Penetekoso o le 33 T.A., ona ia lūlūina le fatu lelei—“o atalii ia o le malo.” E manino la, na amata lenei lūlūina ina ua liligi ifo e Iesu, o le sui lea o Ieova, ia le agaga paia i ona soo, ma faauuina ai i latou e avea ma atalii o le Atua. * (Galu. 2:33) Na oo ina avea le fatu lelei ma saito ua matua. O lea la, o le sini i le lūlūina o le saito lelei, ia iʻu i le aoaoina o le aofaʻiga atoa, o i latou o le a avea ma suli ma pule faatasi ma Iesu i lona Malo.

5. O ai le fili i le talafaatusa, ma o ai o loo faaataina e vao leaga?

⁵ O ai le fili, ma o ai vao leaga? Ua taʻu mai e Iesu, o le fili “o le Tiapolo.” Ua faamatalaina vao leaga, “o atalii ia o lē o loo leaga.” (Mata. 13:25, 38, 39) Pe a tautala i le vao moni, o vao leaga na fetalai i ai Iesu atonu o vao ia e taʻua o titania. O lenei vao oona e taitutusa ma le saito a o lāiti, a o leʻi oo ina matutua. Maʻeu se ata talafeagai o Kerisiano faatagāfai, o ē ua faapea mai o i latou o atalii o le Malo ae e lē o fuaina mai ni fua lelei! O nei Kerisiano pepelo ua faapea mai o loo mulimuli iā Keriso, ae o le mea moni o i  latou o le “fanau” a Satani le Tiapolo.—Kene. 3:15.

6. O anafea na amata ona aliali mai ai vao leaga, ma o le ā le auala na “momoe” ai tagata i lenā taimi?

⁶ O anafea na aliali mai ai Kerisiano e pei o ni vao leaga? Ua taʻua e Iesu, “a o momoe tagata.” (Mata. 13:25) O anafea? E tatou te maua le tali i upu a Paulo i toeaina i Efeso: “Ua ou iloa pe a ou alu ese, ona ō mai lea o luko feʻai iā te outou, ma latou te lē faapelepeleina le lafu, ma e maua foʻi iā te outou ni tane latou te faauiga sesē mea, ina ia fetoso ese ai soo e mulimuli atu iā i latou.” (Galu. 20:29, 30) Na ia timaʻia na toeaina ia faaauau ona mataala faaleagaga. A o faasolo ina momoe i le oti le ʻauaposetolo, o ē na avea ma “taofiofiga” i le fouvalega, po o le fulitua i le upu moni, e toʻatele Kerisiano na momoe faaleagaga. (Faitau le 2 Tesalonia 2:3, 6-8.) O inā na amata ai le fulitua ma le liliuese mai le upu moni.

7. Pe na suia nisi o saito e avea ma vao leaga? Faamatala.

⁷ E leʻi fetalai Iesu e faapea, o le a suia le saito e avea ma vao leaga, ae na lūlūina vao leaga i le saito. E lē o faasino atu la lenei talafaatusa i Kerisiano moni, o ē e paʻuʻū ese mai i le upu moni. Nai lo lea, o loo faasino atu i taumafaiga ma le loto i ai a Satani, e faaleagaina le faapotopotoga Kerisiano e ala i le faaofi mai i ai o tagata amioleaga. E oo ane i le taimi ua matuā matua le aposetolo mulimuli o Ioane, ua matuā manino mai lenei fulitua i le upu moni.—2 Pete. 2:1-3; 1 Ioa. 2:18.

“Tuu ai Pea e Tutupu Faatasi Seʻia Oo i le Seleselega”

8, 9. (a) Aiseā na malamalama lelei ai soo o Iesu i faatonuga a le Matai i ana pologa? (e) I le faataunuuga o le talafaatusa, na faapefea ona tutupu faatasi le saito ma vao leaga?

⁸ Na logo atu e pologa a le Matai iā te ia le faafitauli ma fesili atu: “E te manaʻo matou te ō atu e vele ese [le vao leaga]?” (Mata. 13:27, 28) Atonu o lana tali o se mea e faateʻia ai. Ua ia fai atu iā i latou e tuu ai pea le saito ma le vao leaga e tutupu faatasi, seʻia oo i le seleselega. Na malamalama soo o Iesu i lenā faatonuga. Na latou iloa le faigatā ona iloa le eseesega o le saito ma le titania. O i latou e malamalama i mea tau faatoʻaga, e latou te iloa foʻi, o aa o le titania e masani ona fili faatasi ma aa o le saito. * E lētioa a faatonu i latou e le matai e faatali!

⁹ I se tulaga tutusa, a o faagasolo senituri, ua maua mai i le tele o lotu eseese ua faapea mai o Kerisiano, le anoanoaʻi o vao leaga—muamua o le Katoliko Roma ma lotu Orthodox, ma mulimuli ane o le tele o lotu Porotesano. I le taimi e tasi, na lūlūina ai ni nai fatu o le saito moni i le lalolagi. Na faatalitali ma le onosai le tagata i le talafaatusa mo se taimi umi a o tuputupu aʻe le saito, seʻia oo i se taimi puupuu e faia ai le seleselega.

Le Seleselega ua Leva Ona Faatalitalia

10, 11. (a) O le ā le taimi o le seleselega? (e) E faapefea ona tuu le saito faafaatusa i le fale saito o Ieova?

¹⁰ Ua taʻua e Iesu: “O le seleselega, o le taufaaiʻuiʻuga lea o le faiga o mea a le lalolagi, ma o ē e selesele, o agelu ia.” (Mata. 13:39) A o faagasolo aso mulimuli o lenei faiga amioleaga o mea, ua faia ai se tuueseesega—ua aoaoina atalii o le Malo ma tuuesea mai iā i latou e pei o ni vao leaga. E tusa ai o lenei mea, ua taʻu mai e le aposetolo o Peteru iā i tatou: “Ua oo mai le taimi atofaina e amata ai le faamasinoga i le aiga o le Atua. O lenei, afai e amata muamua iā i tatou, o le ā la le iʻuga o i latou o ē e lē usiusitaʻi i le tala lelei a le Atua?”—1 Pete. 4:17.

¹¹ I le amatamataga o aso e gata ai, po o le “taufaaiʻuiʻuga . . . o le faiga o mea a le  lalolagi,” na amata le faamasinoga o i latou o ē faapea mai o Kerisiano moni—po o i latou moni o ni ‘⁠atalii o le malo’ po o ‘⁠atalii o lē o loo leaga.’ E “muamua,” ona paʻū Papelonia le Aai Tele, “ona” aoaoina ai lea o atalii o le Malo i le amataga o le seleselega. (Mata. 13:30) Ae ua faapefea ona tuu le saito faafaatusa i le fale saito o Ieova? O i latou nei ua seleseleina, a lē ua aumaia i latou i totonu o le faapotopotoga Kerisiano ua toe faafoʻisia, lea e latou te maua ai le finagalo malie ma le puipuiga a le Atua, po ua uma foʻi ona maua lo latou taui i le lagi.

12. O le ā le umi e faaauau ai le seleselega?

¹² O le ā le umi o le faamasinoga? Na taʻua e Iesu o le a iai le “tau” e fai ai le seleselega, o lea la e faaauau le seleselega mo se vaitaimi. (Faaa. 14:15, 16) O le a faaauau pea le faamasinoga o tagata taʻitoʻatasi o le vaega faauuina, a o faagasolo le taimi o le iʻuga. E faaauau pea seʻia oo ina latou maua lo latou faamaufaailogaina mulimuli.—Faaa. 7:1-4.

13. O le ā le auala ua faapogaia ai e vao leaga ona tausuai tagata, ma ua faapefea ona latou faia solitulafono?

¹³ O ai o le a ao ese mai le Malo, ma ua faapefea ona latou faapogaia mea e tausuai ai, ma faia solitulafono? (Mata. 13:41) E faitau miliona tagata ua faasesēina mo le tele o senituri, e faifeʻau o lotu ua faapea mai o Kerisiano, o ē ua pei o vao leaga. Ua latou faia faapea e ala i aʻoaʻoga e faalumaina ai le Atua, o “mea [ia] e māfua ai ona tausuai,” e pei o le aʻoaʻoga i le faasalaina e faavavau i le afi i seoli, ma le aʻoaʻoga fenuminumiaʻi e lē malamalama ai o le Tolutasi. Ua faataatia e le toʻatele o taʻitaʻi lotu se faaʻaoʻaoga leaga mo le ʻaulotu, i lo latou faifaimea faatasi ma le lalolagi, ma i nisi o taimi e latou te faia ai amioga lē mamā ma le lē popoi. (Iako. 4:4) E lē gata i lea, ua faatuutuu lotu o loo faapea mai o Kerisiano, i amioga lē mamā ua faia e a latou tagata lotu. (Faitau le Iuta 4.) E ui i nei mea uma, ae o loo latou faaalia uiga e pei o loo amiotonu ma amioatua. Maʻeu le fiafia o atalii o le Malo i le vavaeese o i latou, mai i taaʻiga a na vao leaga ma aʻoaʻoga leaga, lea e faapogaia ai ona tausuai nisi!

14. Ua faapefea ona tagiauē ma lilivau nifo o i latou e pei o vao leaga?

¹⁴ Ua faapefea ona tagiauē ma lilivau nifo o ē e pei o vao leaga? (Mata. 13:42) Ua faapuapuagatia “atalii . . . o lē o leaga,” ona ua faaalialia i lumamea taaʻiga ma aʻoaʻoga oona a nei tagata ua pei o ni vao leaga, e ‘⁠atalii o le malo.’ Ua latou ōi foʻi i le faaitiitia o le lagolagosua a tagata o le ʻaulotu, ma ua lē o toe malosi la latou pule iā i latou.—Faitau le Isaia 65:13, 14.

15. O le ā le uiga o le susunuina i le afi o ē e pei o vao leaga?

¹⁵ O le ā le uiga o le aoina o vao leaga ma susunu i le afi? (Mata. 13:40) E faatatau atu i le iʻuga mulimuli o nei vao leaga. O le lafoina i se auala faafaatusa o nei vao leaga i le ogaumu aasa, ua faamaonia ai lo latou iʻuga o le faaumatiaga e faavavau. (Faaa. 20:14; 21:8) O le a aveesea Kerisiano pepelo ma le faatagāfai o ē e pei o vao leaga, a o faagasolo le “puapuaga tele.”—Mata. 24:21.

 O le a Latou ‘⁠Susulu Atu e Pei o le Malamalama o le Lā’

16, 17. O le ā na valoia e Malaki e faatatau i le malumalu o le Atua, ma na faapefea ona amata ona faataunuuina?

¹⁶ O le ā le vaitaimi e ‘⁠susulu atu ai e pei o le malamalama o le lā’ i latou e pei o le saito? (Mata. 13:43) Na valoia e Malaki e faatatau i le faamamāina o le malumalu o le Atua e faapea: “ ʻE faafuaseʻi ona oo mai i Lona malumalu le Alii moni, o lē o loo outou saʻilia, ma o le avefeʻau o le feagaiga o lē ua outou fiafia i ai. Faauta! O le a afio mai lava o ia,” ua fetalai mai ai Ieova o ʻau. “A o ai sē e na te lavā tatali le aso o lona afio mai, o ai foʻi sē e tū atu pe a faaali mai o ia? Auā e tusa o ia ma le afi a lē e tunu auro, e pei foʻi o le fasimoli a le tagata tā ofu. E nofo o ia o lē e tunu ma faamamā i le siliva ma na te faamamāina atalii o Levi; e na te faamamāina i latou e pei ona faamamā o le auro ma le siliva, ona fai ai lea o i latou ma nuu o Ieova e avatuina le taulaga e fai ma meaalofa i le amiotonu.’ ”—Mala. 3:1-3.

¹⁷ I o tatou aso, na amata ona faataunuu lenei valoaga i le 1918, ina ua asiasia e Ieova faatasi ma “le avefeʻau o le feagaiga,” o Iesu Keriso, le malumalu faaleagaga. Ua taʻu mai e Malaki le mea e tupu pe a māeʻa lenei faamamāina: “O le a outou iloa ai lava le eseesega o le tagata amiotonu ma le tagata amioleaga, o le eseesega foʻi o lē o loo auauna i le Atua ma lē e lē o auauna iā te ia.” (Mala. 3:18) O le faateleina o galuega a Kerisiano moni na toe faamalosia, e faamaonia ai o le vaitaimi moni lenā na amata ai le seleselega.

18. O le ā na valoia e Tanielu e tupu i o tatou aso?

¹⁸ Na tautala le perofeta o Tanielu e faatatau i o tatou aso: “O ē ua iai le tofā mamao, o le a susulu atu e pei o le malamalama o le vanimonimo, o i latou foʻi ua faaliliu ai tagata e toʻatele i le amiotonu e pei o fetu i aso uma lava e oo i le faavavau.” (Tani. 12:3) O ai i latou nei o loo susulu atu e pei o le malamalama? O i latou ia o Kerisiano faauuina, o le saito moni lea na fetalai i ai Iesu i lana talafaatusa i le saito ma le vao leaga! Ua malamalama lelei le motu o tagata e toʻatele e pei o ni mamoe o loo faateleina pea, e uiga i le ʻaoeseina’ o Kerisiano pepelo e pei o vao leaga. O ē o le a avea ma tagatānuu o le Malo, o loo auaufaatasi atu i le vaega totoe o le Isaraelu faaleagaga, ma ua faapena foʻi ona susulu atu lo latou malamalama i lenei lalolagi pogisa.—Saka. 8:23; Mata. 5:14-16; Fili. 2:15.

19, 20. O le ā o loo faatalitali ma le naunau atu i ai ‘⁠atalii o le malo,’ ma o le ā o le a talanoaina i le mataupu o sosoo mai?

¹⁹ O loo faatalitali ma le naunau i le taimi nei, ‘⁠atalii o le malo’ i lo latou taui matagofie i le lagi. (Roma 8:18, 19; 1 Kori. 15:53; Fili. 1:21-24) Ae peitaʻi, e ao ona latou tumau ma le faamaoni, ma faaauau ona susulu atu lo latou malamalama, ma tuese ai i latou mai ‘⁠atalii o lē o loo leaga,’ seʻia oo i le taimi e maua ai lo latou taui. (Mata. 13:38; Faaa. 2:10) Maʻeu lo tatou fiafia, ona ua tatou maua le faaeaga e vāai atu i le iʻuga o lenei ʻaoeseina’ o vao leaga i o tatou aso!

²⁰ O le ā le fesootaʻiga a atalii o le Malo ma le motu o tagata e toʻatele o loo faatuputeleina, o ē e faamoemoe e ola e faavavau i le lalolagi o ni tagatānuu o le Malo? O le a tali lenei fesili i le mataupu o loo sosoo mai.

[Faamatalaga pito i lalo]

Pe E te Manatua?

I le talafaatusa a Iesu i le saito ma le vao leaga, o ā uiga o nei mea i le talafaatusa?

• Le fatu lelei

• Le tamāloa na lūlū le fatu

• Le lūlūina o le fatu

• Le fili

• Le vao leaga

• Le seleselega

• Le fale saito

• Le tagiauē ma le lilivau o nifo

• Le ogaumu aasa

[Fesili mo le Suʻesuʻega]

[Ata i le itulau 20]

O le Penetekoso o le 33 T.A. na faailogaina ai le amataga o le lūlūina o le fatu lelei

[Ata i le itulau 23]

O loo aumaia nei le saito faafaatusa i le fale saito o Ieova

[Ē Ana le Ata]

Pictorial Archive (Near Eastern History) Est