“Baluleme Bazoobala Mbuli Izuba”

“Lino baluleme bazoobala mbuli izuba mu-Bwami bwawisaabo”—MT. 13:43.

1. Jesu wakabelesya zikozyanyo kutegwa apandulule zibeela nzi zya Bwami iziindene-indene?

JESU KRISTO wakali kubelesya zikozyanyo zinji mukupandulula zibeela zya Bwami ziindene-indene. “Wakaambila makamu muzikozyano, takwakali kubaambila inkani niiba yomwe iitakwe cikozyano.” (Mt. 13:34) Muzikozyanyo zyakusyanga mbuto yakasimpe ka Bwami, Jesu wakakankaizya lubazu moyo wamuntu ndoujisi mukuzumina mulumbe, alimwi alubazu Jehova ndwajisi mukugwasya muntu kukomena kumuuya. (Mk. 4:3-9, 26-29) Jesu alimwi wakatondezya bantu ibamvwa mulumbe wa Bwami mbobayaabuvwula anyika nokuba kuti kumatalikilo ikuvwula ooku takulibonyi caantangalala. (Mt. 13:31-33) Kuyungizya waawo, wakatondezya kuti tabali boonse ibatambula mulumbe wa Bwami ibeelela kuba akati kabaabo ibayakulelwa a Bwami oobu.—Mt. 13:47-50. *

2. Mucikozyanyo ca Jesu camaila ansaku, ino imbuto mbotu yiiminina nzi?

² Nokuba boobo, cikozyanyo cimwi ncakaamba Jesu cijatikizya kuyobolola baabo ibayakulela anguwe mu Bwami bwakwe. Kanji-kanji eeci ciitwa kuti ncikozyanyo camaila ansaku alimwi cijanika kulugwalo lwa Matayo caandano 13. Nokuba kuti mucikozyanyo cimwi Jesu utwaambila kuti imbuto iisyangwa “makani aa Bwami,” mucikozyanyo eeci utwaambila kuti mbuto imbotu yiiminina cintu cimbi“ibana ba-Bwami.” (Mt. 13:19, 38) Aaba tabali baabo ibayakulelwa, pele ‘mbana,’ naa basikukona Bwami.—Rom. 8:14-17; amubale Ba-Galatiya 4:6, 7.

Cikozyanyo Camaila Ansaku

3. Amupandulule penzi ndyajisi muntu uuli mucikozyanyo alimwi ancaasala kucita.

³ Nciceeci cikozyanyo: “Bwami bwakujulu bulikozyene amuntu iwakaminza imbuto imbotu mumuunda wakwe, nkabela bantu nibakali kuona, kwakasika sinkondonyina, wakaminza insaku akati kamaila, wakainka. Lino maila naakasonsa akuzyala micelo, mpawo insaku zyakaboneka azyalo. Nkabela bazike bamwinimuunda bakeza, bakamwaambila kuti, Mwami, sa teewakaminza imbuto imbotu mumuunda wako? ino zyazwa kuli insaku ezi? Wakabaambila kuti, Ngusinkondoma wakacita obo. Nkabela bazike bamwaambila bati, Sa ulayanda kuti tuye, tuzinonkole? Wakati, Pe! Ambweni mwaakunonkola insaku mulazyula aalo maila. Amuzileke, zikule zyoonse antoomwe mane lumwi kuciindi cakutebula, lino kuciindi cakutebula nzooambila batebuzi kuti, Amusaangune kulundika insaku akuzianga misunta, zitentwe, pele maila amwaayobole mubutala bwangu.”—Mt. 13:24-30.

4. (a) Ino nguni muntu uuli mucikozyanyo? (b) Ino ndilili alimwi mbuti Jesu mbwaakatalika kusyanga mbuto eeyi?

⁴ Ino nguni muntu ooyu wakasyanga mbuto imbotu mumuunda wakwe? Jesu ulapa bwiinguzi ciindi napandulwida basikwiiya bakwe kuti: “Oyo uuminza imbuto  imbotu ngu-Mwana a-Muntu.” (Mt. 13:37) Jesu, “Mwana a-Muntu,” wakabamba muunda kuti usyangwe ciindi naakali kucita mulimo wakwe waanyika kwamyaka yotatwe acisela. (Mt. 8:20; 25:31; 26:64) Mpoonya kuzwa ciindi ca Pentecoste yamu 33 C.E. kuyakumbele, wakatalika kusyanga mbuto imbotu—“ibana ba-Bwami.” Eeyi imbuto yakatalika kusyangwa ciindi Jesu, kali mwiiminizi wa Jehova, naakatalika kutila muuya uusalala aali basikwiiya, ikubananika kuti babe bana ba Leza. * (Inc. 2:33) Mbuto imbotu yakakomena akuba maila. Aboobo, eeyi mbuto yakasyangwa kutegwa mukuya kwaciindi kukabe kuyobolola mweelwe uukkwene wabaabo ibakali kuyakuba basikukona akulelanyina a Jesu mu Bwami bwakwe.

5. Ino nguni sinkondo waambwa mucikozyanyo alimwi mbaani bakozyanisigwa ansaku?

⁵ Ino sinkondo nguni, alimwi ino nsaku yiiminina bani? Jesu utwaambila kuti sinkondo “ngu Diabolosi.” Insaku ziiminina “bana ba-Mubi.” (Mt. 13:25, 38, 39) Mubwini, insaku nzyaakali kwaamba Jesu nzeeziya ziitwa kuti bearded darnel. Eeci cisyango cikola ncaakali kwaamba Jesu cilakozyanya kapati amaila nocicili cisyoonto. Eelyo kaka cikozyanyo eeci cileelela kwaamba baabo ibalitama kuba bana ba Bwami pele ibatazyali micelo mibotu! Aaba Banakristo basikuupa-upa ameso ibalitama kuti mbaasikutobela Kristo masimpe “ndunyungu” lwa Saatani Diabolosi.—Matl. 3:15.

6. Ino ndilili insaku nozyakasyangwa, alimwi ino mbuti bantu mbobakali “kuona” aciindi eeci?

 ⁶ Ino ndilili Banakristo aaba ibali mbuli nsaku nobakasyangwa? Jesu wakaamba kuti bakasyangwa ciindi “bantu nibakali kuona.” (Mt. 13:25) Ino eeci cakacitika lili? Bwiinguzi bujanika mumajwi amwaapostolo Paulo kubaalu baku Efeso aakuti: “Ndilizi kuti, munsi lyakwiinka kwangu, kulanjila akati kanu baumpe babutambo, tabakoobuleka butanga. Alimwi akati kanu nobeni bayoobuka bantu abaamba zintu zyakulengawida kuti balikwelele basikwiiya.” (Inc. 20:29, 30) Wakazumanana kulailila baalu abaya kuti beelede kupakamana kumuuya lyoonse. Baapostolo, ibakali ‘kukasya’ luleyo nobakatalika koona mulufwu, Banakristo banji bakoona kumuuya. (Amubale 2 Ba-Tesalonika 2:3, 6-8.) Eeci nceciindi luleyo lupati nolwakatalika.

7. Sena maila amwi akasanduka kuba nsaku? Amupandulule.

⁷ Jesu tanaakaamba kuti maila ayakuba nsaku pele wakaamba kuti insaku zyakasyangwa mumuunda wamaila. Aboobo, cikozyanyo eeci tacaambi Banakristo beni-beni ibaleya kuzwa mukasimpe. Pele citondezya kuti Saatani acaali usoleka kusofwaazya mbungano ya Bunakristo kwiinda mukuleta bantu babyaabi mulinjiyo. Ciindi mwaapostolo wamamanino, Johane naakacembaala, busiluleyo bwakali kulibonya caantangalala.—2 Pet. 2:1-3; 1 Joh. 2:18.

“Amuzileke, Zikule Zyoonse Antoomwe Mane Lumwi Kuciindi Cakutebula”

8, 9. (a) Ino nkaambo nzi baswiilizi ba Jesu ncobakali kukonzya kumvwisya malailile Mwami ngaakapa bazike bakwe? (b) Mukuzuzikizigwa kwacikozyanyo eeci, ino mbuti maila alimwi ansaku mbozyakakomenena antoomwe?

⁸ Bazike ba Mwami bakamwaambila kujatikizya penzi eeli alimwi bakamubuzya kuti: “Sa ulayanda kuti tuye, tuzinonkole [nsaku]?” (Mt. 13:27, 28) Bwiinguzi mbwaakapa bulakonzya kugambya. Wakabalailila kuti bazileke nsaku kuti zikomenene antoomwe amaila kusikila kuciindi cakutebula. Basikwiiya ba Jesu bakakamvisya kaambo Mwami ooyu ncaakalailila boobu. Bakaibaluka mbocikatazya kwaandaanya maila ansaku iitegwa darnel. Aabo ibakajisi luzyibo lwabulimi abalo bakaibaluka mbuli miyanda yansaku eeyi kanji-kanji mboizambana amiyanda yamaila. * Nkakaambo kaako Mwami ncaakabalailila kuti balindile.

⁹ Mbubwenya buyo, mumyaanda yamyaka yainda, kwazwa nsaku zinji kapati muzikombelo ziindene-indene zya Bunakristo Bwanyika—kusaanguna mucikombelo ca Katolika amuzikombelo zya Orthodox, eelyo nokwakainda ciindi amutubunga twaba Protestanti itwakatalisyigwa. Aciindi ncemunya eeci, mbuto zisyoonto zyamaila aancobeni zyakasyangwa nyika yoonse. Mukamwini ŋanda iwaambwa mucikozyanyo wakalindila cakukkazyika moyo kwaciindi cilamfwu kutegwa zisyango zikomene kusikila kuciindi cifwaafwi cakutebula.

Ciindi Cakutebula Icakali Kulindilwa

10, 11. (a) Ino ciindi cakutebula cili lili? (b) Ino mbuti maila aacikozyanyo mbwaali mukuletwa muciyobwedo ca Jehova?

¹⁰ Jesu utwaambila kuti: “Kutebula ngimamanino aaciindi, batebuzi mbibaangelo. (Mt. 13:39) Mumazuba aamamanino aabweende bwazyintu oobu bubyaabi, kuli kwaandaanya ikucitika—ibana ba Bwami balayobololwa alimwi akwaandaanizigwa kuli baabo ibali mbuli nsaku. Kujatikizya ceeci, imwaapostolo Petro utwaambila kuti: “Casika ciindi calubeteko, nkabela lulatalikila kuciinga ca-Leza. Pele na lwatalikila kulindiswe,  ino balacitilwa buti abo batazumina ku-Makani aa-Leza?”—1 Pet. 4:17.

¹¹ Nokwakainda buyo ciindi cisyoonto kuzwa ciindi mazuba aakumamanino naakatalika, naa “mamanino aabweende bwazyintu,” lubeta lwakatalika kuli baabo ibakali kulitama kuti Mbanakristo beni-beni—kufwumbwa naa bakali “bana ba-Bwami” beni-beni naa bakali “bana ba-Mubi.” Kumatalikilo aakutebula, ‘cakusaanguna’ Babuloni Mupati wakawa ‘mpoonya’ ibana ba Bwami bakayobololwa. (Mt. 13:30) Pele ino mbuti maila aacikozyanyo mbwaali mukuletwa muciyobwedo ca Jehova? Aaba ibakatebulwa bakaletwa mumbungano ya Bunakristo yakapilusigwa, kwalo nkobakwabililwa a Leza, naa bakatambula lukono lwabo lwakujulu.

12. Ino ciindi cakutebula ncilamfwu buti?

¹² Ino ciindi calubeta ncilamfwu buti? Jesu wakaamba kujatikizya “ciindi” cakutebula, calo citola ciindi cili mbocibede. (Ciy. 14:15, 16) Ikubetekwa kwabananike aumwi kumugama kuli mukucitika muciindi camamanino. Kuyakuzumanana kucitika mane kuciindi nobayakumaninina kugwalwa.—Ciy. 7:1-4.

13. Ino mbuti aabo bali mbuli nsaku mbobalebya bantu, alimwi ino mbuti mbobacita zyintu ziteelede?

¹³ Ino mbaani ibayakubungikwa kuzwa mu Bwami, alimwi ino mbuti mbobalebya bantu alimwi akucita zyintu ziteelede? (Mt. 13:41) Basololi bazikombelo zya Bunakristo Bwanyika ibali mbuli nsaku bacenga bantu banji kwamyaanda yamyaka. Bacita oobu kwiinda mukuyiisya bantu njiisyo zyakubeja izitalemeki Leza, ‘zintu zilebya,’ mbuli njiisyo yamulilo uutamani, alimwi aya Butatu. Basololi bazikombelo banji bapa cikozyanyo cibi kubutanga bwabo kwiinda mukuba acilongwe anyika naa kulinjizya muzyintu zyanyika alimwi akutalilemeka. (Jak. 4:4) Kuyungizya waawo, bayaambele buya kuzumizya basizikombelo babo kutalilemeka. (Amubale Juda 4.) Nokuba boobo, balazumanana kulipa kaleza-leza. Eelyo kaka bana ba Bwami balikkomene kuti baandaanizigwa kuzyintu zisofwaazya alimwi akunjiisyo zyakubeja zyalo zilebya!

14. Ino mbuti bantu bali mbuli nsaku mbobalila akuluma ntwino?

¹⁴ Ino mbuti bantu ibali mbuli nsaku mbobalila alimwi akuluma ntwino? (Mt. 13:42) “Bana ba-Mubi” balapenzyegwa akaambo kakuti “bana ba-Bwami” baiyubununa micito mibi anjiisyo zisofwaazya zyabaabo ibali mbuli nsaku. Baluuside akaambo kakuti bantu ibakomba kuzikombelo zyabo baceya, alimwi akuti tabacijisi nguzu zyakubeendelezya.—Amubale Isaya 65:13, 14.

15. Ino mbuti aabo ibali mbuli nsaku mbobayakutentwa mumulilo?

¹⁵ Ino mbuti nsaku mbozibungikwa alimwi akutentwa mumulilo? (Mt. 13:40) Eeci caamba cintu ciyakucitikila nsaku kumamanino. Kusowelwa mubbila lyamulilo munzila yacikozyanyo caamba kuti bayakunyonyweedwa limwi. (Ciy. 20:14; 21:8) Banakristo bakubeja, ibali mbuli nsaku, basikulibeja, bayakunyonyoonwa ciindi  “[ca]mapenzi mapati.”—Mt. 24:21.

“Bazoobala Mbuli Izuba”

16, 17. Ino Malaki wakasinsima nzi kujatikizya tempele lya Leza, alimwi ino mbuti businsimi oobu mbobwakatalika kuzuzikizyigwa?

¹⁶ Ino ndilili aabo ibali mbuli maila “[noba]bala mbuli izuba”? (Mt. 13:43) Kujatikizya kusalazyigwa kwatempele lya Leza, Malaki wakasinsima kuti: “Nkabela Mwami ngumuli kuyandaula uyooyutukila kuntempele yakwe, ngonguwe mutumwa wacizuminano ngumuyandisya. Uyoosika ncobeni, mbwaamba Jehova wamakamu. Pele nguni uuti konzye buzuba bwakusika kwakwe? Nguni uuti ime nji naazooboneka? Nkaambo uli mbuli mulilo wamufuzi, ambuli insipa yasikusanzya. Uyookala mbuli mufuzi uusalazya insiliva. Uyoosalazya bana ba-Levi, akubabotya mbuli mbwiibotesegwa ingolida ansiliva, kuti baletele Jehova cituunzyo camubululami.”—Malk. 3:1-3.

¹⁷ Mumazuba aano, businsimi oobu bwakatalika kuzuzikizyigwa mu 1918, ciindi Jehova antoomwe a “mutumwa wacizuminano,” Jesu Kristo nobakalingula tempele lyakumuuya. Malaki utwaambila ciyakutobela lyamana kusalazyigwa tempele: “Muyooboola kwaandaanya mululami asizibi, muntu uuyoowa Leza amuntu uutamuyoowi.” (Malk. 3:18) Kuyungizigwa kwamilimo ya Banakristo bakasimpe ibakabukulusigwa ncitondezyo cakuti mulimo wakutebula wakatalika.

18. Ino ncinzi Daniele ncaakasinsima kuti ciyakucitika mumazuba eesu?

¹⁸ Imusinsimi Daniele wakaamba kujatikizya mazuba eesu naakasinsima kuti: “Basongo bayoobekema mbuli kubekema kwajulu, abaabo bapilusya bantu banji kubululami mbuli inyenyeezi mane kukabe kutamani.” (Dan. 12:3) Ino mbaani aaba ibabekema kapati? Kunyina bambi kuze lya Banakristo bananike, imaila meni-meni ngaakali kwaamba Jesu mucikozyanyo camaila ansaku! ‘Ibankamu mpati ibali mbuli mbelele—balo ibazumanana kuvwula—bakubona caantangalala ‘kubungikwa’ kwa Banakristo bakubeja ibali mbuli nsaku. Nobatalika kuyanzana aba Israyeli bakumuuya ibasyeede, aaba ibalangila kuya kulelwa mu Bwami abalo balamunika mumuni wabo munyika eeyi iili mumudima.—Zek. 8:23; Mt. 5:14-16; Flp. 2:15.

19, 20. Ino “bana ba-Bwami” balangila nzi, alimwi ino ncinzi ncotuyakubandika mucibalo citobela?

¹⁹ Mazuba aano, “bana ba-Bwami” calukkomano, balindila bulumbu bwabo bwakujulu. (Rom. 8:18, 19; 1 Kor. 15:53; Flp. 1:21-24) Mane cikasike ciindi eeco, beelede kuzumanana kusyomeka alimwi akumweka, kwiindana a “bana ba-Mubi.” (Mt. 13:38; Ciy. 2:10) Eelyo kaka cilakonzya kutukkomanisya toonse ikuti twaba acoolwe cakubona “bana ba-Bwami” mbobabala alimwi ambobaindene “[a]bana ba-Mubi” muciindi eeci ‘cakubungika’ nsaku!

²⁰ Pele ino ncilongwe nzi ciliko akati kabana aaba ba Bwami alimwi abankamu mpati ibazumanana kuvwula, balo ibalangila kuyakupona anyika mane kukabe kutamani kabali balelwa ba Bwami? Cibalo citobela ciyakuwiingula mubuzyo ooyu.

Bupanduluzi buyungizidwe

Sena Muciyeeyede?

Mucikozyanyo ca Jesu camaila alimwi ansaku, ino zibeela eezyi zyacikozyanyo ziiminina nzi?

• Mbuto imbotu

• Muntu iwakasyanga mbuto

• Mulimo wakusyanga mbuto

• Sinkondo

• Insaku

• Ciindi cakutebula

• Ciyobwedo

• Kulila akuluma ntwino

• Bbila lyamulilo

[Mibuzyo yaciiyo]

[Zifwanikiso izili apeeji 20]

Mbuto mbotu yakatalika kusyangwa lya Pentecoste 33 C.E

[Cifwanikiso icili apeeji 23]

Maila aacikozyanyo lino alimukuletwa muciyobwedo ca Jehova

[Kulumba]

Pictorial Archive (Near Eastern History) Est.