Le máaxoʼob meyajtik Diosoʼ, yaan u léembaloʼob jeʼex le kʼiinoʼ
Le máaxoʼob meyajtik Diosoʼ, yaan u léembaloʼob jeʼex le kʼiinoʼ
«Le máaxoʼob ku beetikoʼob baʼax u kʼáat Jajal Dioseʼ, yaan u léembaloʼob tu [reino] u Taataʼob jeʼel bix u léembal le kʼiinoʼ.» (MAT. 13:43)
1. ¿Baʼaxoʼob tu yaʼalaj Jesús yoʼolal le Reino tiʼ jujumpʼéel kettʼaanoʼoboʼ?
JESUCRISTOEʼ meyajnaj yaʼab kettʼaanoʼob tiʼ utiaʼal u tsolik jejeláas baʼaloʼob yaan yil yéetel le Reinooʼ. Jeʼex u yaʼalik le Bibliaoʼ, tu kaʼansaj le máakoʼob «yéetel kettʼaanoʼob, mix baʼal tu kaʼansajtiʼob wa maʼ yéetel kettʼaanoʼobiʼ» (Mat. 13:34). Ka tu ketaj u Reino Dios yéetel le semillaoʼ, Jesuseʼ tu yaʼaleʼ u puksiʼikʼal máak péeksik u kʼam wa maʼ u kʼamik le maʼalob péektsiloʼ, yéetel tu yeʼeseʼ Jéeoba áantik máak utiaʼal u tsʼáaik ichil u kuxtal le baʼax ku kanikoʼ (Mar. 4:3-9, 26-29). Tiʼ uláakʼ kettʼaaneʼ tu yeʼesaj bix kun maas yaʼabtal u kʼaʼaytaʼal le Reinooʼ, yéetel tu yaʼaleʼ tu káajbaleʼ óoliʼ maʼ chíikaʼan u yilaʼal bix kun bin u yaʼabtaliʼ (Mat. 13:31-33). Tiʼ uláakʼ kettʼaan xaneʼ, tu yaʼaleʼ maʼ tuláakal le máaxoʼob uʼuyik le maʼalob péektsil kun ookloʼob tu Reino Diosoʼ (Mat. 13:47-50). *
2. ¿Baʼax ku chíikbesik le semilla teʼ tu kettʼaanil le trigo yéetel le kʼaakʼas xíiwoʼ?
2 Teʼ capítulo 13 tiʼ Mateooʼ k-ilik u kettʼaanil le trigo yéetel le cizaña, wa le kʼaakʼas xíiwoʼ, teʼ kettʼaanaʼ Jesuseʼ tu tsolaj bix kun muchʼbil tuláakal le disipuloʼob kun gobernar tu yéetel teʼ Reinooʼ. Tiʼ yaanal kettʼaaneʼ tu ketaj le semilla yéetel «u maʼalob péektsilil» le reinooʼ, baʼaleʼ teʼ kettʼaanaʼ tu ketaj le semilla yéetel «u paalal le reinooʼ» (Mat. 13:38, NM). Tsʼoʼoleʼ maʼ táan u tʼaan tiʼ le máaxoʼob kun yantaloʼob yáanal le Reinooʼ, baʼaxeʼ tiʼ «u paalaloʼob Jajal Dios», lelaʼ u kʼáat u yaʼaleʼ letiʼe máaxoʼob kun gobernaroʼob xan teʼ Reinooʼ (Rom. 8:14-17; xokaʼak Galaciailoʼob 4:6, 7).
U kettʼaanil le trigo yéetel le kʼaakʼas xíiwoʼ
3. ¿Baʼax talmil yanchaj tiʼ u yuumil le kool teʼ kettʼaanoʼ, yéetel baʼax tu yaʼalaj ka beetaʼak?
3 Le kettʼaanoʼ ku yaʼalik: «U [reinoiʼ] kaʼaneʼ bey jeʼel bix juntúul máak tu pakʼaj maʼalob trigo tu kooleʼ; baʼaleʼ kaʼalikil tuláakal táan u weneloʼobeʼ taal juntúul u [enemigo] u yuumil le kooloʼ ka tu pakʼaj kʼaakʼas xíiwoʼob ichil le trigooʼ ka bini. Le ka chʼíij le trigo ka yanji u yiʼijeʼ ka chíikpaj xan le kʼaakʼas xíiwoʼ. Le palitsiloʼob túunoʼ binoʼob u yaʼaloʼob tiʼ u yuumil le kooloʼ: Tsʼuul ¿maʼ wa maʼalob le trigo ta pakʼaj ta kooloʼ? ¿Tuʼux túun u taal le kʼaakʼas xíiwoʼ? U yuumil le kooloʼ tu yaʼalajtiʼob: Juntúul [enemigo] beet lelaʼ. Le palitsiloʼob túunoʼ tu kʼáatchiʼitoʼobtiʼ: ¿A kʼáat [wa] ka xiʼikoʼon k-jok le kʼaakʼas xíiwoʼ? Baʼaleʼ letiʼeʼ tu yaʼalajtiʼob: Maʼ, tumen bik a jokeʼex le trigo paʼteʼ yéetel [le] kʼaakʼas xíiwoʼ. [Maas] maʼalob ka a pʼateʼex u múuchʼ chʼíijiloʼob tak tu kʼiinil le joochoʼ; le kʼiin túunoʼ bíin in waʼal tiʼ le j-meyajoʼoboʼ; moleʼex táanil le kʼaakʼas xíiwoʼ, ka a beeteʼex u kúukuchal utiaʼal tóokbil, ku tsʼoʼokoleʼ líikʼseʼex le trigo tin chʼiiloʼ» (Mat. 13:24-30).
4. 1) ¿Máax pakʼ le maʼalob semillaoʼ? 2) ¿Baʼax kʼiin yéetel bix káajik u paʼakʼal le semilla tumen Jesusoʼ?
4 ¿Máax pakʼ le maʼalob semillaoʼ? Jesuseʼ tu yaʼalaj: «U Paal Máak máax pakʼik le maʼalob trigooʼ» (Mat. 13:37). Ichil le óoxpʼéel jaʼaboʼob kʼaʼaytajnaj Jesusoʼ, tiʼ tu káajsaj u meyajtik le luʼumoʼ (Mat. 8:20; 25:31; 26:64). Teʼ Pentecostés tiʼ u jaʼabil 33 tiʼ le yáax siglooʼ, káaj u pakʼik le maʼalob semillaoʼ, wa káaj u yéeyik «u paalal le reinooʼ». ¿Bix úuchik u beetik? Yáanal u nuʼuktaj u Taataeʼ, káaj u pakʼik le maʼalob semilla le ka tu tsʼáaj le kiliʼich muukʼ yóokʼol u disipuloʼob utiaʼal u beetkubaʼob «u paalaloʼob Jajal Dios», ka tsʼoʼokeʼ le semillaoʼ nojochchaj tak ka kʼanchaji (Hch. 2:33). * Bey túunoʼ, le paakʼaloʼ ku beetaʼal utiaʼal u muʼuchʼul tuláakal le sukuʼunoʼob kun binoʼob reinar yéetel Cristo teʼ Reinooʼ.
5. ¿Máax le enemigooʼ, yéetel máaxoʼob ku chíikbesik le kʼaakʼas xíiwoʼ?
5 ¿Máax le enemigooʼ? Jesuseʼ tu yaʼaleʼ letiʼe «Kʼaasilbaʼaloʼ». ¿Máaxoʼob ku chíikbesik le kʼaakʼas xíiwoʼ? Ku chíikbesik «u paalal le Kʼaasilbaʼaloʼ, NM» (Mat. 13:25, 38, 39). Ka tʼaanaj Jesús tiʼ le kʼaakʼas xíiwoʼ, maʼ xaaneʼ táan u tuukul tiʼ upʼéel xíiw ku kʼaabaʼtik cizaña, lelaʼ upʼéel xíiw jach yaan u veneno, yéetel tu mejnileʼ jach chíikaʼan tiʼ le trigooʼ. Le kettʼaanaʼ jach maʼalob, tumen yaʼab máakoʼobeʼ ku yaʼalikubaʼob u paalaloʼob le reinooʼ, baʼaleʼ chéen ku yaʼalikoʼob táan u meyajtikoʼob Dios, maʼatech u beetkoʼob baʼax ku yaʼalik. Le máakoʼob chéen ku yaʼalikoʼob táan u meyajtkoʼob Diosoʼ letiʼob le «semilla» wa u «chʼiʼibal» Satanasoʼ (Gén. 3:15).
6. ¿Baʼax kʼiin ka káaj u chíikpajal le kʼaakʼas xíiwoʼ, yéetel baʼax u kʼáat u yaʼal le táan «kaʼalikil tuláakal táan u wenel»?
6 ¿Baʼax kʼiin ka káaj u chíikpajal le máakoʼob ku keʼetloʼob yéetel le kʼaakʼas xíiwoʼ? Jesuseʼ ku yaʼalik: «Kaʼalikil tuláakal táan u wenel» (Mat. 13:25). ¿Baʼax kʼiin ka úuch lelaʼ? Apóstol Pabloeʼ tu yaʼalaj tiʼ le ancianoʼob yanoʼob Efesooʼ: «In wojel le ken xiʼikeneʼ yaan u taal yaanal máakoʼob bíin u yóotoʼob u xuʼulsoʼob le [múuchʼuliloʼ], jeʼel bix le tsʼíitsʼik baʼalcheʼob ku xuʼulsikoʼob le tamanoʼoboʼ. Bey xan ichileʼex yaan u líikʼil tsʼeʼetsʼek máakoʼob ku bin u kaʼansoʼob tusoʼob utiaʼal ka tsaypachtaʼakoʼob tumen le j-oksaj óoloʼoboʼ» (Hch. 20:29, 30). Tsʼoʼoleʼ tu yaʼalajtiʼob maʼ u náayal u yóoloʼob. Baʼaleʼ ka joʼopʼ u kíimil le apostoloʼob «kʼatik u beel» le máaxoʼob kaʼansik baʼaloʼob maʼ jaajtakoʼ, yaʼab máaxoʼob meyajtik Dios kaʼacheʼ náay u yóoloʼob, jeʼel u páajtal u yaʼalaʼaleʼ bey weenoʼobeʼ (xokaʼak 2 Tesalonicailoʼob 2:3, 6-8). Bey úuchik u káajal u kaʼansaʼal baʼaloʼob maʼ jaajtak ichil le máaxoʼob meyajtik Diosoʼ.
7. ¿Letiʼe trigo wa suunaj kʼaakʼas xíiwiloʼ? Tsol baʼaxten bey a núukikoʼ.
7 Jesuseʼ maʼ tu yaʼalaj wa letiʼe trigo kun suut kʼaakʼas xíiwiloʼ, baʼaxeʼ tu yaʼalaj yaan u paʼakʼal kʼaakʼas xíiw ichil le trigooʼ. Bey túunoʼ le kettʼaanaʼ maʼ táan u yaʼalik wa le sukuʼunoʼob yaabiltmil Diosoʼ yaan u xuʼulul u meyajtikoʼob. Baʼaxeʼ táan u yeʼesik baʼaxoʼob ken u beet Satanás utiaʼal u yoksik kʼasaʼan máakoʼob ichil le múuchʼuliloʼ. Le taʼaytak u kíimil Juan, u tsʼook tiʼ le apostoloʼoboʼ, tsʼoʼokaʼaniliʼ u jach yaʼabtal le máaxoʼob kaʼansik baʼaloʼob maʼ jaajtakoʼ (2 Ped. 2:1-3; 1 Juan 2:18).
«Pʼateʼex u múuchʼ chʼíijiloʼob tak tu kʼiinil le joochoʼ»
8, 9. 1) ¿Baʼaxten le máaxoʼob uʼuy le kettʼaan tu beetaj Jesusoʼ maʼ jelaʼan úuchik u yuʼubikoʼob le baʼax tu yaʼalaj u yuumil le «kooloʼ»? 2) ¿Bix úuchik u múul nuuktal le trigo yéetel le kʼaakʼas xíiwoʼ?
8 Le palitsiloʼoboʼ bin u yaʼaloʼob tiʼ u yuumil le kooloʼ tsʼoʼok u jóokʼol kʼaakʼas xíiw ichil a paakʼal, ka tu yaʼaloʼobtiʼ: «¿A kʼáat [wa] ka xiʼikoʼon k-jok le kʼaakʼas xíiwoʼ?» (Mat. 13:27, 28). Letiʼeʼ tu yaʼalajtiʼob maʼ u jokikoʼob, baʼaxeʼ ka u páaʼtoʼob u kʼuchul u kʼiinil le joochoʼ. Maʼ xaaneʼ toʼoneʼ maʼ t-jach naʼatik baʼaxten tu yaʼalajtiʼob beyoʼ, baʼaleʼ letiʼobeʼ tu naʼatoʼob, tumen u yojloʼob óoliʼ upʼéeliliʼ u yilaʼal le kʼaakʼas xíiw yéetel le trigooʼ. Tsʼoʼoleʼ le j-kolnáaloʼoboʼ u yojloʼobeʼ u moots le cizañaoʼ jach ku kʼaxkuba tiʼ u moots le trigooʼ, le oʼolal wa ku joʼokleʼ yaʼab trigo kun jokbil xan. Le beetik maas maʼalob ka páaʼtaʼak u kʼiinil le joochoʼ. * ¿Máasaʼ jach maʼalob le baʼax tu chʼaʼatuklaj u beetik u yuumil le kooloʼ?
9 Jeʼex úuchik u yaʼalik Jesusoʼ, teʼ jaʼaboʼob tsʼoʼok u máanoʼ, tsʼoʼok u yantal yaʼab religionoʼob ku keʼetloʼob yéetel le kʼaakʼas xíiwoʼ, yáaxeʼ yanchaj le Iglesia Católica Romanaoʼ bey xan le Ortodoxaoʼ, tsʼoʼoleʼ tiʼ leloʼobaʼ jóokʼ u jejeláas religionoʼob protestanteʼobiʼ. Baʼaleʼ teʼ kʼiinoʼob xanoʼ, pakʼaʼab jujumpʼéel maʼalob semilla teʼ «kool» wa teʼ yóokʼol kaaboʼ. U yuumil le «kool» aʼalaʼab ichil le kettʼaanoʼ tu páaʼtaj u máan yaʼab kʼiinoʼob utiaʼal u kʼuchul u kʼiinil le joochoʼ, tumen u yojel u kʼiiniloʼob le joochoʼ maas maʼ kun xáantal.
Kʼuch u kʼiinil le jooch jach táan u páaʼtaʼaloʼ
10, 11. 1) ¿Baʼax kʼiin ka káaj le joochoʼ? 2) ¿Bix u líiʼsaʼal le trigo tu «chʼiil» Jéeobaoʼ?
10 Jesuseʼ seguernaj u yaʼalik: «Le joochoʼ u kʼáat yaʼaleʼ u kʼiinil u xuʼulul yóokʼol kaab, le máaxoʼob kun u moloʼob le joochoʼ letiʼ le angeloʼoboʼ» (Mat. 13:39). Lelaʼ ku yeʼesikeʼ teʼ tu tsʼook u kʼiiniloʼob le kʼasaʼan yóokʼol kaabaʼ yaan u jaʼatsal u paalal le Reino tiʼ le maʼ jaajil cristianoʼob ku chíikbesaʼaloʼob tumen le kʼaakʼas xíiwoʼ. Yoʼolal lelaʼ apóstol Pedroeʼ ku yaʼalik: «Tsʼoʼok u kʼuchul u kʼiinil u káajal le pʼis óoloʼ yéetel u yéet otochnáaloʼob Jajal Dios. Wa le pʼis óol táan u káajal bey t-éeteloʼ, ¿bix kun tsʼoʼokol le máaxoʼob maʼ táan u yuʼubajtʼantikoʼob u maʼalob péektsil Jajal Diosoʼ?» (1 Ped. 4:17).
11 Maʼ úuch káajak u «kʼiinil u xuʼulul yóokʼol kaab» wa u tsʼook kʼiiniloʼob le kʼasaʼan yóokʼol kaabaʼ, káaj u juzgartaʼal tuláakal le máaxoʼob ku yaʼalikoʼob táan u meyajtkoʼob Diosoʼ, ichil leloʼobaʼ táakpajaʼan «u paalal le reinooʼ» yéetel «u paalal le Kʼaasilbaʼaloʼ». ¿Baʼax túun úuch le ka káaj le jooch, jeʼex aʼalaʼabik teʼ kettʼaanoʼ? Yáaxeʼ lúub le Nojoch Babiloniaoʼ, ka tsʼoʼokeʼ káaj u muʼuchʼul u paalal le Reinooʼ (Mat. 13:30). ¿Bix túun u líiʼsaʼal tu «chʼiil» Jéeoba le sukuʼunoʼob ku keʼetloʼob yéetel le trigooʼ? Letiʼe u kʼaʼamloʼob yéetel u kanáantaʼaloʼob tumen Jéeoba ichil le múuchʼuliloʼ wa le ken kaʼa kuxkíintaʼakoʼob teʼ kaʼanoʼ.
12. ¿Bukaʼaj tiempo kun xáantal le joochoʼ?
12 ¿Bukaʼaj tiempo kun xáantal le pʼis óoloʼ? Jesuseʼ tu yaʼaleʼ «tak tu kʼiinil le joochoʼ», lelaʼ ku yeʼeskeʼ yaan u chan xáantal (Apo. 14:15, 16). Bey túunoʼ, le sukuʼunoʼob yéeyaʼanoʼob utiaʼal u binoʼob kaʼanoʼ yaan u pʼis óoltaʼaloʼob ichil u kʼiiniloʼob le kʼasaʼan yóokʼol kaabaʼ, le pʼis óolaʼ yaan u tsʼoʼokol le ken chúukpajak le jaytúul máaxoʼob kun binoʼob kaʼanoʼ (Apo. 7:1-4).
13. ¿Bix u beetkoʼob u tʼóochpajal máak le maʼ jaajil cristianoʼoboʼ, yéetel baʼax maʼ maʼalobtak ku beetkoʼobiʼ?
13 Jeʼex aʼalaʼabik teʼ kettʼaanoʼ yaan u jóoʼsaʼal ichil le Reino tuláakal le máaxoʼob ku beetkoʼob u tʼóochpajal u maasil yéetel ku beetkoʼob baʼaloʼob ku bin tu contra u ley Diosoʼ (Mat. 13:41). ¿Máaxoʼob le kun jóoʼsbiloʼoboʼ? Letiʼe máaxoʼob ku keʼetloʼob yéetel le kʼaakʼas xíiw, jeʼex u nuuktakil le religionoʼob ku kaʼanskoʼob tuusoʼob yéetel «ku beetikoʼob u kʼebantal uláakʼ máakoʼob[oʼ]», tumen ku kaʼanskoʼob baʼaloʼob maʼ jaajtak yoʼolal Dios, jeʼex le Trinidadoʼ yéetel le u tóokaʼal máak tiʼ le infiernooʼ. Tsʼoʼoleʼ yaʼab tiʼ u nuuktakil le religionoʼoboʼ ku beetkoʼob baʼaloʼob kʼaastak ikil u yokskubaʼob tiʼ u baʼalubaʼob le yóokʼol kaabaʼ, yéetel yaneʼeʼ ku núupkʼebankúunskubaʼob (Sant. 4:4). Ichil u maasil religionoʼob xaneʼ chéen ku yilaʼal u sen beetaʼal baʼaloʼob kʼaastakiʼ (xokaʼak Judas 4). Kex beyoʼ láayliʼ táan u yeʼeskoʼob bey jach u tsʼaamaj u yóol u meyajtoʼob Dioseʼ. U paalal le Reinooʼ jach kiʼimak u yóoloʼob úuchik u jóoʼsaʼaloʼob ichil le máakoʼob ku keʼetloʼob yéetel le kʼaakʼas xíiwoʼ bey xan tiʼ le kaʼansajoʼob ku beetkoʼob u tʼóochpajal máakoʼ.
14. ¿Baʼaxten ku yokʼol yéetel ku karachʼtik u koj «u paalal le Kʼaasilbaʼaloʼ»?
14 «U paalal le Kʼaasilbaʼal» ku keʼetel yéetel le kʼaakʼas xíiwoʼ ku yooʼloʼob yéetel ku karachʼtik u kojoʼob. ¿Baʼax oʼolal? (Mat. 13:42.) Tumen «u paalal le reinooʼ» táan u chíikbeskoʼob maʼ maʼalob baʼax ku beetkoʼobiʼ, baʼaxeʼ beyoʼob jeʼex le kʼaakʼas xíiwoʼ. Tsʼoʼoleʼ u nuuktakil le religionoʼoboʼ ku yaatal u yóoloʼob ken yiloʼob bix u lukʼul yaʼab máakoʼob yáanal u páajtaliloʼob (xokaʼak Isaías 65:13, 14).
15. ¿Baʼax u kʼáat u yaʼal u tóokaʼal le máaxoʼob chéen ku yaʼalikoʼob táan u meyajtkoʼob Diosoʼ?
15 ¿Baʼax u kʼáat u yaʼal u beetaʼal «u kúukuchal utiaʼal tóokbil» le kʼaakʼas xíiwoʼ? (Mat. 13:40.) Le u tóokaʼal le kʼaakʼas xíiwoʼ ku yeʼesik yaan u xuʼulsaʼal utiaʼal mantatsʼ tuláakal le máaxoʼob chéen ku yaʼalikoʼob táan u meyajtkoʼob Diosoʼ (Apo. 20:14; 21:8). Letiʼobeʼ yaan u xuʼulsaʼaltiʼob tu kʼiinil le «nojoch muʼyajil[oʼ]» (Mat. 24:21, NM).
Yaan u léembaloʼob jeʼex le kʼiinoʼ
16, 17. ¿Baʼax tu yaʼalaj Malaquías kun beetbil ichil u templo Dios, yéetel bix úuchik u káajal u beetaʼal le baʼax tu yaʼaloʼ?
16 ¿Baʼax kʼiin ken joʼopʼok «u léembaloʼob [...] jeʼel bix u léembal le kʼiin» le máaxoʼob ku keʼetloʼob yéetel le trigooʼ? (Mat. 13:43.) Le baʼax ku yaʼalik u profecíai Malaquías yoʼolal bix kun limpiartbil u templo Dioseʼ, ku yáantkoʼon k-naʼate: «Yuumtsil le máax ka kaxantikeʼexoʼ, séebaʼan bíin okok ichil [u templo]. ¡Táan u kʼuchul u bisaj tʼaanil le núuptʼaan ka tsʼíiboltikeʼexoʼ! Baʼaleʼ ¿máax jeʼel u páajtal u muʼyajtik u kʼiinil u taalbaleʼ? ¿Máax túun jeʼel u páajtal u pʼáatal waʼalakbaleʼ? Bíin kʼuchuk jeʼel bix u kʼuchul kʼáakʼ utiaʼal u yutskíint k-anileʼ; bey jojoolki jaʼ ku lukʼesik k-boonolileʼ. Yuumtsileʼ bíin kulak u yutskíint u yanil le j-kʼiinoʼob u chʼiʼibaloʼob Leví, jeʼel bix u máaytaʼal oro yéetel plata ich kʼáakʼeʼ. Ku tsʼoʼokoleʼ letiʼobeʼ jeʼel u páajtal u táambesikoʼob u [siibaloʼob] tiʼ Yuumtsil jeʼel bix u najmal u beetikoʼoboʼ» (Mal. 3:1-3).
17 Le baʼax ku yaʼalik le profecíaaʼ káaj u béeychajal tu jaʼabil 1918. Teʼ jaʼab jeʼeloʼ Jéeoba yéetel Jesucristo, «u j-bisaj tʼaanil le núuptʼaan[oʼ]» ookoʼob teʼ templo wa ichil u kaajal Jéeoba utiaʼal u limpiartkoʼob. Malaquíaseʼ ku yaʼalik baʼax úuch ka tsʼoʼokiʼ: «Teʼex túuneʼ, bíin a kʼaj óolteʼex u jelaʼanil máax uts tiʼ máax kʼasaʼan bey xan máax [adorartik] Yuumtsil tiʼ máax maʼ tu [adorartik]» (Mal. 3:18). Teʼ kʼiinoʼob jeʼeloʼ, le máaxoʼob meyajtik Diosoʼ jach tu tsʼáaj u yóoloʼob teʼ kʼaʼaytajoʼ, leloʼ ku yeʼeskeʼ teʼ jaʼab jeʼel káaj le joochoʼ.
18. ¿Baʼax tu yaʼalaj Daniel kun úuchul teʼ kʼiinoʼobaʼ?
18 Profeta Daniel xaneʼ tu yaʼalaj baʼax kun ilbil teʼ kʼiinoʼobaʼ: «Le j-ojeloʼoboʼ bíin léembalnakoʼob, jeʼel bix [u] léembal le kaʼanoʼ; le máaxoʼob ku kaʼambesikoʼob baʼax tubeel tiʼ yaʼabkach máakoʼobeʼ ¡bíin léembalnakoʼob jeʼel bix le eekʼoʼob maʼatech u tuʼupuloʼoboʼ!» (Dan. 12:3). ¿Máaxoʼob le kun sen léembaloʼoboʼ? Letiʼe sukuʼunoʼob yéeyaʼanoʼob utiaʼal u binoʼob kaʼan ku keʼetloʼob yéetel le trigooʼ. Tsʼoʼoleʼ yaʼabkach máakoʼob yanoʼob ichil le uláakʼ tamanoʼoboʼ tsʼoʼok u tsʼáaikoʼob cuenta táan u jóoʼsaʼal le kʼaakʼas xíiw wa le maʼ jaajil cristianoʼoboʼ, le oʼolal tsʼoʼok u chʼaʼatuklikoʼob u yáantkoʼob le sukuʼunoʼob yéeyaʼanoʼoboʼ. Le yaʼabkach máakoʼob táan u páaʼtik u kuxtaloʼob yáanal u Reino Diosoʼ táan u léembaloʼob u múuchʼ yéetel le sukuʼunoʼob yéeyaʼanoʼob teʼ yóokʼol kaab yaan ich éekʼjochʼeʼenilaʼ (Zac. 8:23; Mat. 5:14-16; Fili. 2:15).
19, 20. ¿Baʼax jach táan u páaʼtik «u paalaloʼob le reinooʼ», yéetel baʼax ken k-kan teʼ tuláakʼ xookoʼ?
19 «U paalal le reinooʼ» jach táan u páaʼtikoʼob u kʼuchul u kʼiinil u binoʼob teʼ kaʼanoʼ (Rom. 8:18, 19; 1 Cor. 15:53; Fili. 1:21-24). Baʼaleʼ le maʼ kʼuchuk le kʼiin jeʼeloʼ unaj u chúukpajal u yóoloʼob u meyajtoʼob Dios, unaj u maas juul u sáasiloʼob yéetel u yeʼeskoʼob maʼ beyoʼob jeʼex «u paalal le Kʼaasilbaʼaloʼ» (Mat. 13:38; Apo. 2:10). Toʼoneʼ jach kiʼimak k-óol tumen bejlaʼeʼ tsʼoʼok u jumpáaykuntaʼal le kʼaakʼas xíiw tiʼ le máaxoʼob meyajtik Diosoʼ.
20 Baʼaleʼ ¿baʼax yaan yil «u paalal le reino» yéetel le yaʼabkach máakoʼob páaʼtik u pʼáatloʼob kuxtal way Luʼum yáanal u gobierno Diosoʼ? Lelaʼ yaan núukaʼal teʼ tuláakʼ xookoʼ.
[Tsolajiloʼob]
^ xóot’ol 1 Utiaʼal u yilaʼal u maasil yoʼolal le kettʼaanoʼob tu beetaj Jesusoʼ, ilaʼak U Pʼíich Tulumil Kanan 15 tiʼ julio tiʼ 2008, táan juʼun 12 tak 21.
^ xóot’ol 4 Le paakʼal teʼ kool (wa teʼ yóokʼol kaab) teʼ kettʼaanaʼ, maʼ letiʼe u kʼaʼaytaʼal le maʼalob péektsil yéetel u kaʼansaʼal uláakʼ máakoʼob utiaʼal ka yéeyaʼakoʼob utiaʼal u binoʼob kaʼanoʼ. Baʼaxeʼ ku chíikbesik u yéeyaʼal «u paalal le reinooʼ». ¿Bix k-ojéeltik lelaʼ? K-ojéeltik tumen Jesuseʼ tu yaʼaleʼ le semillaoʼ «u paalal le reinooʼ», maʼ tu yaʼalaj wa «yaan u kʼuchul u beetubaʼob u paalal le reinooʼ».
^ xóot’ol 8 Utiaʼal u maas naʼataʼal lelaʼ ilaʼak Perspicacia para comprender las Escrituras, yáax libro, táan juʼun 1205.
¿Kʼajaʼan wa tech?
¿Baʼax u kʼáat u yaʼal le baʼaxoʼob tu yaʼalaj Jesús ichil le kettʼaanoʼ?
• Le maʼalob semillaoʼ
• Le máax pakʼ le semillaoʼ
• Le úuchik u paʼakʼal le semillaoʼ
• Le enemigooʼ
• Le cizaña wa le kʼaakʼas xíiwoʼ
• Le joochoʼ
• Le chʼiiloʼ
• U yokʼol yéetel u karachʼtik u koj le máakoʼoboʼ
• Le kʼáakʼoʼ
[U kʼáatchiʼiloʼob le xookoʼ]
[U tsolajil le oochel teʼ táan juʼun 20]
Le maʼalob semillaoʼ káaj u paʼakʼal teʼ Pentecostés tiʼ u jaʼabil 33 tiʼ le yáax siglooʼ
[U tsolajil le oochel teʼ táan juʼun 23]
Le trigooʼ táan u líiʼsaʼal tu chʼiil Jéeoba
[U tsolajil le oochel teʼ táan juʼun 23]
Pictorial Archive (Near Eastern History) Est.