Usa ka Panon, Usa ka Magbalantay
Usa ka Panon, Usa ka Magbalantay
“Kamo nga nagsunod kanako molingkod usab sa napulog-duha ka trono, nga magahukom sa napulog-duha ka tribo sa Israel.”—MAT. 19:28.
1. Unsay panglantaw ni Jehova sa kaliwat ni Abraham, ug nganong wala kana magpasabot nga gisalikway niya ang ubang katawhan?
SI Jehova nahigugma kang Abraham, mao nga gipakita niya ang iyang maunongong gugma sa kaliwat ni Abraham. Sulod sa kapig 15 ka siglo, iyang gilantaw ang nasod sa Israel, nga kaliwat ni Abraham, ingong iyang piniling katawhan, iyang “linaing katigayonan.” (Basaha ang Deuteronomio 7:6.) Nagpasabot ba kana nga gisalikway ni Jehova ang katawhan sa ubang mga nasod? Wala. Niadtong panahona, ang mga dili-Israelinhon nga gustong mosimba kang Jehova gitugotan nga makig-uban sa iyang piniling nasod. Ang maong mga kinabig, o mga proselita, giisip ingong bahin sa nasod. Sila isipong mga igsoon. (Lev. 19:33, 34) Ug sila kinahanglang motuman sa tanang balaod ni Jehova.—Lev. 24:22.
2. Unsang makapatingalang pahayag ang gihimo ni Jesus, nga motultol sa unsang mga pangutana?
2 Hinunoa, makapatingala ang giingon ni Jesus sa mga Hudiyo sa iyang adlaw: “Ang gingharian sa Diyos pagakuhaon gikan kaninyo ug igahatag ngadto sa usa ka nasod nga magpatunghag mga bunga niini.” (Mat. 21:43) Kinsay maglangkob niining bag-ong nasod, ug sa unsang paagi ang maong kausaban nakaapektar kanato?
Ang Bag-ong Nasod
3, 4. (a) Sumala ni apostol Pedro, kinsa kining bag-ong nasod? (b) Kinsay naglangkob niining bag-ong nasod?
3 Gipaila ni apostol Pedro kon kinsa kining bag-ong nasod. Siya misulat sa iyang mga isigka-Kristohanon: “Kamo maoy ‘usa ka piniling rasa, usa ka harianong pagkasaserdote, usa ka balaang nasod, usa ka katawhan alang sa linaing pagpanag-iya, aron kaylap ninyong ipahayag ang mga kahamili’ sa usa nga nagtawag kaninyo gikan sa kangitngit ngadto sa iyang katingalahang kahayag.” (1 Ped. 2:9) Sumala sa gitagna, ang kinaiyanhong mga Hudiyo nga midawat kang Jesus ingong Mesiyas mao ang unang mga membro nianang bag-ong nasod. (Dan. 9:27a; Mat. 10:6) Sa ulahi, daghang dili-Israelinhon ang nalakip usab niini, kay si Pedro nagpadayon sa pag-ingon: “Kanhi kamo dili usa ka katawhan, apan karon kamo maoy katawhan sa Diyos.”—1 Ped. 2:10.
4 Kinsay gisultihan ni Pedro niana? Sa sinugdan sa iyang sulat, siya miingon: ‘Kita gipahimugso pag-usab sa Diyos ngadto sa usa ka buhi nga paglaom pinaagi sa pagkabanhaw ni Jesu-Kristo gikan sa mga patay, ngadto sa usa ka dili-madunoton ug wala-mahugawi ug dili-malawos nga panulondon. Gitagana kini sa mga langit alang kaninyo.’ (1 Ped. 1:3, 4) Busa kining bag-ong nasod gilangkoban sa dinihogang mga Kristohanon, kinsa adunay langitnong paglaom. Sila mao ang “Israel sa Diyos.” (Gal. 6:16) Sa usa ka panan-awon, nakita ni apostol Juan nga kining espirituwal nga mga Israelinhon adunay gidaghanon nga 144,000. Sila “gipalit gikan sa katawhan ingong mga unang bunga ngadto sa Diyos ug sa Kordero” aron mag-alagad ingong “mga saserdote” ug “magamando ingong mga hari uban [ni Jesus] sulod sa usa ka libo ka tuig.”—Pin. 5:10; 7:4; 14:1, 4; 20:6; Sant. 1:18.
Duna Pa bay Laing Gihawasan?
5. (a) Kinsay gitumong sa pamulong nga “Israel sa Diyos”? (b) Nganong makaingon kita nga ang terminong “Israel” duna pay laing kahulogan?
5 Nan, tataw nga ang pamulong “Israel sa Diyos” sa Galacia 6:16 nagtumong lamang sa dinihogang mga Kristohanon. Apan, diha bay mga higayon nga gigamit ni Jehova ang nasod sa Israel sa paghulagway, o pag-ilustrar, dili lamang sa mga dinihogan kondili sa ubang mga Kristohanon usab? Atong masayran ang tubag niana diha sa gipamulong ni Jesus sa iyang matinumanong mga apostoles: “Nagahimo ako ug pakigsaad uban kaninyo, maingon nga ang akong Amahan naghimo ug usa ka pakigsaad kanako, alang sa usa ka gingharian, aron nga mangaon kamo ug manginom sa akong lamesa diha sa akong gingharian, ug magalingkod sa mga trono aron sa paghukom sa napulog-duha ka tribo sa Israel.” (Luc. 22:28-30) Mahitabo kini sa “paglalang-pag-usab,” o panahon sa pagbag-o, sulod sa Milenyal nga Pagmando ni Kristo.—Basaha ang Mateo 19:28.
6, 7. Kinsay gitumong sa ekspresyong “napulog-duha ka tribo sa Israel” diha sa konteksto sa Mateo 19:28 ug Lucas 22:30?
6 Ang 144,000 mag-alagad ingong langitnong mga hari, saserdote, ug mga maghuhukom sulod sa Usa ka Libo ka Tuig nga Pagmando. (Pin. 20:4) Kinsay ilang hukman, ug kinsay ilang mandoan? Ang Mateo 19:28 ug Lucas 22:30 nag-ingon nga sila magahukom sa “napulog-duha ka tribo sa Israel.” Niini nga konteksto, kinsay gihulagwayan sa “napulog-duha ka tribo sa Israel”? Sila naghawas niadtong tanan nga adunay yutan-ong paglaom—kadtong nagpasundayag ug pagtuo sa halad ni Jesus apan dili bahin sa harianon, saserdote nga matang. (Ang tribo ni Levi wala ilakip sa listahan sa 12 ka tribo sa kinaiyanhong Israel.) Niining kontekstoha, ang 12 ka tribo sa Israel naghulagway niadtong makadawat ug espirituwal nga benepisyo gikan sa pag-alagad sa 144,000 ingong mga saserdote. Kining dili-saserdoteng mga benepisyaryo maoy katawhan usab sa Diyos, ug siya nahigugma ug midawat kanila. Nahiangay lamang nga sila ipakasama sa iyang katawhan sa karaang panahon.
7 Haom usab nga human makita ni apostol Juan ang 144,000 ka espirituwal nga Israelinhon nga permanente nang natimbrehan sa wala pa ang dakong kasakitan, nakita niya ang dili-maihap nga “dakong panon . . . gikan sa tanang kanasoran.” (Pin. 7:9) Kini sila makalabang-buhi sa dakong kasakitan ngadto sa Milenyal nga Pagmando ni Kristo. Nianang panahona, sila duyogan sa binilyong mga binanhaw. (Juan 5:28, 29; Pin. 20:13) Silang tanan maoy maglangkob sa simbolikong “napulog-duha ka tribo sa Israel,” kinsa pagahukman ni Jesus ug sa iyang 144,000 nga kaubang mga magmamando.—Buh. 17:31; 24:15; Pin. 20:12.
8. Sa unsang paagi ang ginahimo sa tinuig nga Adlaw sa Pagtabon sa Sala naglandong sa relasyon tali sa 144,000 ug niadtong adunay yutan-ong paglaom?
8 Ang relasyon tali sa 144,000 ug sa katawhan gilandongan sa ginahimo panahon sa tinuig nga Adlaw sa Pagtabon sa Sala. (Lev. 16:6-10) Una sa tanan, ang hataas nga saserdote kinahanglang maghalad ug torong baka ingong halad-sa-sala “alang sa iyang kaugalingon ug sa iyang balay.” Busa, ang halad ni Jesus unang mapadapat sa iyang panimalay sa luyoluyong mga saserdote, kadtong mag-alagad uban kaniya sa langit. Dugang pa, sa Adlaw sa Pagtabon sa Sala, dihay duha ka kanding nga gitagana alang sa mga sala sa ubang mga Israelinhon. Niining kahimtanga, diin gihulagwayan sa saserdotehanong tribo ang 144,000, ang ubang Israelinhon naghulagway sa tanan nga adunay yutan-ong paglaom. Gipakita niini nga ang terminong “napulog-duha ka tribo sa Israel” sa Mateo 19:28 wala magtumong sa inanak-sa-espiritu nga luyoluyong mga saserdote, kondili sa uban nga nagpasundayag ug pagtuo sa halad ni Jesus. a
9. Sa panan-awon ni Ezequiel, kinsay gihawasan sa mga saserdote? Sa dili-saserdoteng mga Israelinhon?
9 Tagda ang laing pananglitan. Si manalagnang Ezequiel gihatagag detalyadong panan-awon sa templo ni Jehova. (Ezeq., kap. 40-48) Sa maong panan-awon, ang mga saserdote nag-alagad diha sa templo, nga naghatag instruksiyon ug nagdawat sa tambag ug pagtul-id ni Jehova. (Ezeq. 44:23-31) Sa samang kahimtang, ang mga membro sa lainlaing tribo nangadto sa templo aron sa pagsimba ug pagtanyag ug mga halad. (Ezeq. 45:16, 17) Nan, niini nga konteksto, ang mga saserdote naghulagway sa mga dinihogan, samtang ang mga Israelinhon gikan sa dili-saserdoteng mga tribo naghulagway niadtong adunay yutan-ong paglaom. Gipasiugda sa panan-awon nga ang duha ka grupo nagtambayayongay, diin ang saserdotehanong matang maoy nanguna sa putli nga pagsimba.
10, 11. (a) Unsang makapalig-on-sa-pagtuo nga katumanan sa gipamulong ni Jesus ang atong nakita? (b) Unsang pangutana ang motungha bahin sa ubang mga karnero?
10 Si Jesus naghisgot bahin sa “ubang mga karnero,” nga wala sa samang ‘toril’ sa “gamayng panon” sa iyang dinihogang mga sumusunod. (Juan 10:16; Luc. 12:32) Siya miingon: “Kinahanglan nga dad-on ko usab sila, ug sila magpatalinghog sa akong tingog, ug sila mahimong usa ka panon, usa ka magbalantay.” Makapalig-on gayod sa pagtuo nga makita ang katumanan nianang mga pulonga! Duha ka grupo ang gihiusa—ang gamayng grupo sa mga dinihogan ug ang dakong panon sa ubang mga karnero. (Basaha ang Zacarias 8:23.) Bisan tuod ang ubang mga karnero wala mag-alagad sa sulod nga sawang sa espirituwal nga templo, sila nag-alagad sa gawas nga sawang niana nga templo.
11 Apan kon si Jehova mogamit usahay sa dili-saserdoteng mga membro sa karaang Israel sa paghulagway sa ubang mga karnero, makig-ambit ba usab sa mga emblema sa Memoryal kadtong adunay yutan-ong paglaom? Atong hisgotan karon ang tubag nianang pangutanaha.
Ang Bag-ong Pakigsaad
12. Unsang bag-ong kahikayan ang gitagna ni Jehova?
12 Si Jehova nagtagna ug usa ka bag-ong kahikayan alang sa iyang katawhan sa dihang siya miingon: “Mao kini ang pakigsaad nga akong himoon uban sa balay sa Israel human niadtong mga adlawa. . . . Ibutang ko ang akong balaod sa sulod nila, ug isulat ko kini sa ilang kasingkasing. Ug ako mahimong ilang Diyos, ug sila mahimong akong katawhan.” (Jer. 31:31-33) Pinaagi niining bag-ong pakigsaad, ang saad ni Jehova kang Abraham makabatog mahimayaon ug dumalayong katumanan.—Basaha ang Genesis 22:18.
13, 14. (a) Kinsa ang mga umalambit sa bag-ong pakigsaad? (b) Kinsa ang mga benepisyaryo, ug sa unsang paagi sila “nangupot” niining bag-ong pakigsaad?
13 Si Jesus naghisgot niining bag-ong pakigsaad sa gabii una pa sa iyang kamatayon sa dihang siya miingon: “Kini nga kopa nagkahulogan sa bag-ong pakigsaad tungod sa akong dugo, nga igabubo alang kaninyo.” (Luc. 22:20; 1 Cor. 11:25) Ang tanan bang Kristohanon nalakip niining bag-ong pakigsaad? Wala. Ang pipila, sama sa mga apostoles nga miinom gikan sa kopa nianang gabhiona, maoy mga umalambit sa bag-ong pakigsaad. b Si Jesus mihimog laing pakigsaad kanila nga sila magmando uban kaniya sa iyang Gingharian. (Luc. 22:28-30) Sila makauban ni Jesus sa iyang Gingharian.—Luc. 22:15, 16.
14 Komosta kadtong mabuhi sa yuta ilalom sa iyang Gingharian? Sila maoy mga benepisyaryo sa bag-ong pakigsaad. (Gal. 3:8, 9) Bisag dili sila mga umalambit, sila “nangupot” niini nga pakigsaad pinaagi sa pagsunod sa mga kinahanglanon niini, sama sa gitagna ni Isaias: “Ang mga langyaw nga nakighiusa kang Jehova sa pag-alagad kaniya ug sa paghigugma sa ngalan ni Jehova, aron mahimong mga alagad niya, ang tanan niadtong nagtuman sa igpapahulay aron dili magpasipala niini ug nangupot sa akong pakigsaad, dad-on ko usab sila ngadto sa akong balaang bukid ug pamayaon sila sa sulod sa akong balay nga ampoanan.” Dayon miingon si Jehova: “Kay ang akong balay pagatawgon mismo nga usa ka balay nga ampoanan alang sa tanang mga katawhan.”—Isa. 56:6, 7.
Kinsay Angayng Makig-ambit?
15, 16. (a) Sumala ni Pablo, unsang pribilehiyo ang mabatonan sa mga umalambit sa bag-ong pakigsaad? (b) Nganong kadtong dunay yutan-ong paglaom dili makig-ambit sa mga emblema sa Memoryal?
15 Kadtong bahin sa bag-ong pakigsaad ‘adunay bug-os nga pagsalig nga mosulod ngadto sa balaang dapit.’ (Basaha ang Hebreohanon 10:15-20.) Kini sila mao ang ‘makadawat ug usa ka gingharian nga dili matay-og.’ (Heb. 12:28) Nan, kadto lamang mahimong mga hari ug mga saserdote sa langit uban ni Jesu-Kristo ang angayng moinom gikan sa “kopa” nga naghawas sa bag-ong pakigsaad. Kining mga umalambit sa bag-ong pakigsaad mao ang gikasaad sa kaminyoon ngadto sa Kordero. (2 Cor. 11:2; Pin. 21:2, 9) Ang ubang manambong sa tinuig nga Memoryal maoy matinahorong mga tigpaniid, kinsa dili makig-ambit sa mga emblema.
16 Gitabangan usab kita ni Pablo sa pagsabot nga kadtong dunay yutan-ong paglaom dili makig-ambit sa mga emblema sa Memoryal. Siya miingon sa dinihogang mga Kristohanon: “Kay ingon kamakanunayon sa inyong pagkaon niini nga tinapay ug pag-inom niini nga kopa, padayon ninyong gimantala ang kamatayon sa Ginoo, hangtod nga siya moabot.” (1 Cor. 11:26) Kanus-a “moabot” ang Ginoo? Sa dihang moanhi siya aron kuhaon ang nahibilin sa iyang dinihogang pangasaw-onon nga matang ug dad-on kini sa iyang langitnong pinuy-anan. (Juan 14:2, 3) Tin-aw nga ang tinuig nga pagsaulog sa Panihapon sa Ginoo dili magpadayon hangtod sa hangtod. Ang “mga nahibilin” sa binhi sa babaye nga ania pa sa yuta magpadayon sa pagpakig-ambit niini nga panihapon hangtod nga silang tanan makadawat sa ilang langitnong ganti. (Pin. 12:17) Kon kadtong mabuhi sa walay kataposan sa yuta tugotan sa pagpakig-ambit sa mga emblema, nan kining Memoryal nga panihapon magpadayon hangtod sa hangtod.
“Sila Mahimong Akong Katawhan”
17, 18. Sa unsang paagi natuman ang tagna sa Ezequiel 37:26, 27?
17 Gitagna ni Jehova ang panaghiusa sa iyang katawhan pinaagi niining mga pulonga: “Magahimo ako uban kanila ug usa ka pakigsaad sa pakigdait; usa ka pakigsaad nga mohangtod sa panahong walay tino uban kanila. Ug ipahiluna ko sila ug padaghanon ko sila ug ibutang ko ang akong sangtuwaryo sa ilang taliwala hangtod sa panahong walay tino. Ug ang akong tabernakulo maanaa sa ibabaw nila, ug ako mahimong ilang Diyos, ug sila mahimong akong katawhan.”—Ezeq. 37:26, 27.
18 Ang tanang katawhan sa Diyos makabenepisyo sa katumanan niining kahibulongang saad—kining pakigsaad sa Kristohanong pakigdait. Oo, si Jehova nagsaad ug pakigdait sa tanan niyang masinugtanong mga alagad. Ang bunga sa espiritu dayag nga makita diha kanila. Ang iyang sangtuwaryo, nga naghulagway dinhi sa putli nga pagsimba, anaa sa ilang taliwala. Sila nahimo gayong iyang katawhan, kay ilang gitalikdan ang tanang matang sa idolatriya ug nagsimba lamang kang Jehova.
19, 20. Kinsay nalakip niadtong gitawag ni Jehova nga “akong katawhan,” ug unsay gihimong posible sa bag-ong pakigsaad?
19 Makapalipay gayod nga masaksihan ang paghiusa niining duha ka grupo sa atong panahon! Bisan tuod ang nagkadaghang dakong panon wala makabaton sa langitnong paglaom, ilang giisip nga usa ka kadungganan ang pagpakig-uban sa mga dinihogan. Sila nakig-uban sa Israel sa Diyos. Sa pagbuhat niana, sila nalakip niadtong gitawag ni Jehova nga “akong katawhan.” Atong makita kanila ang katumanan niining tagnaa: “Nianang adlawa daghang kanasoran ang tinong mahiuban ngadto kang Jehova, ug sila mahimong akong katawhan; ug ako mopuyo taliwala kanimo.”—Zac. 2:11; 8:21; basaha ang Isaias 65:22; Pinadayag 21:3, 4.
20 Pinaagi sa bag-ong pakigsaad, gihimong posible ni Jehova kining tanan. Minilyon gikan sa lainlaing nasod ang nahimong bahin sa pinaborang katawhan ni Jehova. (Miq. 4:1-5) Determinado silang mangupot sa maong pakigsaad pinaagi sa pagsunod sa mga kahikayan ug mga kinahanglanon niini. (Isa. 56:6, 7) Sa pagbuhat niana, ilang matagamtam ang dagayang mga panalangin sa dumalayong pakigdait kauban sa Israel sa Diyos. Hinaot nga matagamtam nimo kana—karon ug hangtod sa kahangtoran!
[Mga footnote]
a Sa susama, ang mga dinihogan pangunang gitawag nga “kongregasyon.” (Heb. 12:23) Apan, ang pulong “kongregasyon” adunay laing kahulogan usab, nga nagtumong sa tanang Kristohanon, bisan unsa pay ilang paglaom.—Tan-awa Ang Bantayanang Torre, Abril 15, 2007, sa panid 21-23.
b Si Jesus mao ang Tigpataliwala sa maong pakigsaad, dili umalambit niana. Ingong Tigpataliwala, dayag nga wala siya makig-ambit sa mga emblema.
Nahinumdom Ka Ba?
• Kinsa ang “napulog-duha ka tribo sa Israel” nga pagahukman sa 144,000?
• Unsay papel sa mga dinihogan ug sa ubang mga karnero diha sa bag-ong pakigsaad?
• Makig-ambit ba ang tanang Kristohanon sa mga emblema sa Memoryal?
• Unsang panaghiusa ang gitagna sa atong adlaw?
[Mga Pangutana sa Pagtuon]
[Graph/Mga hulagway sa panid 25]
(Alang sa aktuwal nga pagkahan-ay, tan-awa ang publikasyon)
Daghan ang nag-alagad karon uban sa Israel sa Diyos
7,313,173
4,017,213
1,483,430
373,430
1950 1970 1990 2009