En sel troupo ek en sel berze
En sel troupo ek en sel berze
“Zot ki’n swiv mwan pou osi asiz lo douz tronn pour ziz sa douz tribi Izrael.”—MAT. 19:28.
1. Ki mannyer Zeova ti konsider desandans Abraam e akoz sa pa ti vedir ki i pa ti enterese avek tou lezot nasyon?
ZEOVA ti kontan Abraam, alor I ti demontre lanmour fidel anver desandans Abraam. Pour plis ki 15 syek, i ti konsider nasyon Izrael, ki ti sorti dan desandans Abraam, konman son pep swazir, andotmo, son “propriyete spesyal.” (Lir Deterononm 7:6. *) Eski sa ti vedir ki Zeova pa ti enterese avek bann dimoun dan lezot nasyon? Non. Sa letan, bann dimoun ki pa ti en Izraelit e ki ti anvi ador Zeova ti kapab zwenn avek son nasyon spesyal. Zot ti konverti dan larelizyon Zwif, alor zot ti form parti sa nasyon. Zot ti ganny trete konman bann frer. (Lev. 19:33, 34) Zot ti merit obeir tou lalwa Zeova.—Lev. 24:22.
2. Ki parol Zezi ki ti sirprann bann Zwif e ki kestyon sa i souleve?
2 Par kont, Zezi ti dir en parol ki ti sirprann bann Zwif dan son letan: “Zot pou ganny arase Rwayonm Bondye, e i pou ganny donnen avek en lot nasyon ki pou prodwi son fri.” (Mat. 21:43) Lekel ki pou form sa nouvo nasyon e ki mannyer nou benefisye avek sa sanzman ozordi?
Sa nouvo nasyon
3, 4. (a) Dapre zapot Pyer, lekel sa nouvo nasyon? (b) Lekel ki form sa nouvo nasyon?
3 Zapot Pyer ti idantifye klerman lekel sa nouvo nasyon. I ti ekrir son bann frer ek ser Kretyen sa parol swivan: “Me zot, zot en ras ki’n ganny swazir, en group pret rwayal, en nasyon sen, en pep ki pour Bondye, ki i’n swazir pour proklanm bann keksoz merveye konsernan sa enn ki’n apel zot pour sorti dan fernwanr pour vin dan son lalimyer merveye.” (1 Pyer 2:9) Parey i ti’n ganny predir, bann Zwif ki ti aksepte Zezi konman Mesi ti bann premye manm sa nouvo nasyon. (Dan. 9:27a; Mat. 10:6) Pli tar, plizyer dimoun ki pa ti bann Izraelit ti ganny aksepte dan sa nouvo nasyon, akoz apre sa Pyer ti dir: “Ti annan en letan ki zot pa ti son pep, me aprezan zot in vin pep Bondye.”—1 Pyer 2:10.
4 Avek lekel Pyer ti pe koze la? O konmansman son let i ti dir: “[Bondye in] donn nou en nouvo lavi avek en lesperans vivan par rezireksyon Zezi-Kri, dan en leritaz ki i’n rezerve pour zot dan lesyel, ki pa kapab ni gate, ni sali, ni fletri.” (1 Pyer 1:3, 4) Alor, bann Kretyen ki’n ganny swazir par lespri sen ki form sa nouvo nasyon, e zot zot annan lespwar pour viv dan lesyel. Zot ganny apele “Izrael Bondye.” (Gal. 6:16, NW) Dan en vizyon, zapot Zan ti vwar ki i annan 144,000 Izraelit spirityel. Zot in “ganny sove parmi bann zonm pour ganny ofer konman bann premye fri devan Bondye e devan Lanyo,” pour servi konman “pret” ek lerwa ki pou “renny avek [Zezi] pandan 1000 an.”—Rev. 5:10; 7:4; 14:1, 4; 20:6; Zak 1:18.
Eski i annan ankor lezot ki enplike?
5. (a) Sa lekspresyon “Izrael Bondye” i refer avek lekel? (b) Akoz sa term “Izrael” pa refer zis avek en group dimoun?
5 I kler alor ki sa lekspresyon “Izrael Bondye” dan Galat 6:16 (NW), i refer zis avek bann Kretyen swazir. Par kont, eski i annan bann moman kot Zeova i servi nasyon Izrael konman en reprezantasyon ouswa legzanp, ki pa zis enplik bann Kretyen swazir me bann lezot Kretyen osi? Larepons i kapab ganny trouve dan parol ki Zezi ti dir son bann zapot fidel: “Parey mon Papa in donn mwan pouvwar pour gouvern son Rwayonm, mwan osi, mon donn zot menm pouvwar; pour ki zot osi zot a manze e bwar atab avek mwan dan mon Rwayonm, e zot ava asiz lo tronn pour ziz douz tribi Izrael.” (Lik 22:28-30; nou ki’n met an italik.) Sa pou arive dan “monn nouvo” ouswa letan kot tou keksoz pou ganny refer a nef, pandan Renny Milener Kris.—Lir Matye 19:28.
6, 7. Dan Matye 19:28 ek Lik 22:30, sa lekspresyon “douz tribi Izrael” i refer avek lekel?
6 Sa 144,000 Kretyen swazir pou servi konman lerwa, pret ek ziz dan lesyel pandan sa Mil An ki Kris pou dirize. (Rev. 20:4) Zot pou ziz e diriz lekel? Dan Matye 19:28 ek Lik 22:30, nou ganny dir ki zot pou ziz sa “douz tribi Izrael.” Dan sa konteks, lekel ki pe reprezant sa “douz tribi Izrael”? Sa 12 tribi Izrael i reprezant tou sa bann ki annan lespwar pour viv lo later, andotmo, sa bann ki annan lafwa dan sakrifis Zezi, me ki pa parmi sa group pret rwayal. (Tribi Levi pa ti ganny enkli dan lalis sa 12 tribi Izrael.) Sa bann ki ganny reprezante dan sa konteks konman sa 12 tribi Izrael i sa bann ki pou resevwar bann benediksyon spirityel atraver travay ki sa 144,000 pou fer konman pret. Sa bann ki pou benefisye e ki pa bann pret, zot osi form parti pep Bondye, i kontan zot e aksepte zot. I toutafe apropriye alor ki zot ganny konpare avek son pep dan letan lontan.
7 I fer sans alor, akoz, apre ki zapot Zan ti vwar sa 144,000 Izraelit spirityel ganny sele dan en fason permanan, avan gran ladetres, i ti osi vwar en “gran lafoul” ki pa kapab ganny konte sorti dan “tou nasyon.” (Rev. 7:9) Sa gran lafoul pou sirviv gran ladetres, e pandan Renny Milener Kris, plizyer bilyon dimoun ki pou resisite pou zwenn ansanm avek zot. (Zan 5:28, 29; Rev. 20:13) Zot tou zot pou form sa “douz tribi Izrael” senbolik ki Zezi ek sa 144,000 ki pou diriz ansanm avek li pou zize.—Akt 17:31; 24:15; Rev. 20:12.
8. Dan sa ki ti arive Zour Propisyasyon, ki nou kapab aprann lo relasyon ant sa 144,000 ek larestan limanite?
8 Sa relasyon ant sa 144,000 ek larestan imen an zeneral i ganny reprezante par sa ki ti arive tou le-z-an Zour Propisyasyon. (Lev. 16:6-10) Premyerman, gran pret ti devret sakrifye en toro konman en sakrifis pour pese, “pour li e osi pour son fanmir.” Se pour sa rezon ki dan sa menm fason, sakrifis Zezi i premyerman aplik avek sa bann pret ki par anba li ki pou servi avek li dan lesyel. Dan letan lontan, pandan sa menm levennman, Zour Propisyasyon, de kabri ti ganny ofer pour pese lezot Izraelit. Dan sa konteks kot tribi pret i reprezant sa 144,000, lezot Izraelit i reprezant tou sa ki annan lespwar pour viv lo later. Sa i fer alor ki sa lekspresyon “douz tribi Izrael” dan Matye 19:28, pa pe refer avek bann pret ki’n ganny swazir par lespri sen, me avek tou sa bann ki annan lafwa dan sakrifis Zezi. *
9. Lekel ki sa bann pret dan vizyon Ezekyel dan tanp ti pe reprezante e lekel ki reprezant lezot Izraelit?
9 Egzamin en lot legzanp. Profet Ezekyel ti ganny en vizyon ekstraordiner dan tanp Zeova. (Ezek., sapit 40-48) Dan sa vizyon, bann pret ti travay dan tanp, zot ti donn lenstriksyon e resevwar konsey ek koreksyon sorti kot Zeova. (Ezek. 44:23-31) Dan sa menm vizyon, bann dimoun sorti dan diferan tribi ti vin ador Bondye e ofer bann sakrifis. (Ezek. 45:16, 17) Alor, dan sa konteks, bann pret ti pe reprezant bann Kretyen swazir, tandis ki lezot Izraelit ti pe reprezant sa bann ki annan lespwar pour viv lo later. Sa vizyon pe montre ki sa de group pe travay ansanm dan larmoni, me bann pret ki responsab pour vre ladorasyon.
10, 11. (a) Ki parol Zezi ki ranforsi nou lafwa nou’n vwar akonplir? (b) Ki kestyon konsernan lezot mouton ki ganny souleve?
10 Zezi ti koz lo “lezot mouton” ki pa ti pou dan menm “berkay” avek sa “pti troupo” son bann disip swazir. (Zan 10:16, NW; Lik 12:32) I ti dir: “Mon bezwen anmenn zot osi, zot a ekout mon lavwa. Alor i ava annan en sel troupo e en sel berze.” Pa nou lafwa i vreman ganny ranforsi lefet ki nou’n vwar lakonplisman sa parol! Sa pti group Kretyen swazir ek en gran lafoul lezot mouton in zwenn ansanm. (Lir Zekarya 8:23. *) Menm si dan en sans senbolik lezot mouton pa servi dan lakour enteryer sa tanp spirityel, zot servi dan lakour eksteryer sa tanp.
11 Me, si Zeova ti parfwa servi bann Izraelit ki pa ti pret pour reprezant lezot mouton, eski sa bann ki annan lespwar pour viv lo later i devret pran lanblenm zour Memoryal? Aprezan nou pou egzamin larepons sa kestyon.
Sa nouvo lalyans
12. Ki nouvo laranzman Zeova ti predir?
12 Zeova ti predir konsernan en nouvo laranzman pour son pep kan i ti dir: “Sa i lalyans ki mon pou fer avek lakaz Izrael apre sa bann zour. Mon pou met mon lalwa dan zot, e mon pou ekrir li dan zot leker. Mon pou vin zot Bondye, e zot pou vin mon pep.” (Zer. 31:31-33) Atraver sa nouvo lalyans, promes ki Zeova ti fer avek Abraam ti pou ganny akonplir dan en fason merveye e dirab.—Lir Zenez 22:18. *
13, 14. (a) Lekel bann partisipan dan sa nouvo lalyans? (b) Lekel bann ki benefisye e dan ki sans zot “tyonbo” sa nouvo lalyans?
13 Pandan lannwit avan son lanmor, Zezi ti refer avek sa menm lalyans kan i ti dir: “Sa lakoup i nouvo lalyans ki’n ganny sele par mon disan, verse pour zot.” (Lik 22:20; 1 Kor. 11:25) Eski tou Kretyen i enplike dan sa nouvo lalyans? Non. Serten, parey bann zapot ki ti bwar sa lakoup sa zour swar, i bann partisipan dan sa nouvo lalyans. * Zezi ti fer en lot lalyans avek zot. I ti dir zot ki zot pou dirize ansanm avek li dan son Rwayonm. (Lik 22:28-30) Zot pou travay ansanm avek Zezi dan son Rwayonm.—Lik 22:15, 16.
14 Me ki nou kapab dir konsernan sa bann ki pou reste lo later anba dominasyon son Rwayonm? Zot benefisye avek sa nouvo lalyans. (Gal. 3:8, 9) Menm si zot pa bann partisipan, “zot tyonbo” sa lalyans ler zot soumet avek son bann lalwa, zis parey profet Izai ti predir: “Bann etranze ki’n zwenn avek Zeova pour servi li e kontan non Zeova, pour ki zot vin son serviter, tou sa ki obzerv saba pour ki zot pa mank respe pour li e ki pe tyonbo mon lalyans. Mon pou osi fer zot vin kot mon montanny sen e mon pou fer zot kontan dan mon lakaz lapriyer.” Apre sa, Zeova ti dir: “Mon lakaz pou ganny apele en lakaz lapriyer pour tou bann pep.”—Iza. 56:6, 7.
Lekel ki devret pran lanblenm?
15, 16. (a) Avek kwa zapot Pol i relye sa nouvo lalyans? (b) Akoz sa ki annan lespwar pour viv lo later pa devret pran lanblenm Memoryal?
15 Bann Kretyen swazir ki partisip dan sa nouvo lalyans i “annan konfyans pour antre dan sangtyer.” (Lir Ebre 10:15-20.) Zot sanmenm sa bann ki pou “resevwar en rwayonm ki pa kapab ganny ebranle.” (Ebr. 12:28) Alor, zis sa bann ki pou vin pret ek lerwa dan lesyel avek Zezi Kri ki devret bwar sa “lakoup” ki reprezant sa nouvo lalyans. Sa bann partisipan dan sa nouvo lalyans in ganny promet pour marye avek Lanyo. (2 Kor. 11:2; Rev. 21:2, 9) Tou larestan ki asiste memoryal tou le-z-an konman bann obzervater, zot pa pran lanblenm.
16 Pol osi i ed nou pour konpran ki sa bann ki annan lespwar pour viv lo later pa pran lanblenm zour Memoryal. I ti dir bann Kretyen swazir: “Parski sak fwa ki zot manz sa dipen e bwar sa lakoup zot anons lanmor Senyer Zezi ziska ki i vini.” (1 Kor. 11:26; nou ki’n met an italik.) Kan ki Senyer i “vini”? Sa pou arive kan i pou vini pour pran bann dernyen manm sa nouvel marye e anmenn zot dan lesyel. (Zan 14:2, 3) I kler alor ki Repa Senyer ki ganny fer tou le-z-an pou arete en zour. “Leres desandans sa fanm,” ki ankor lo later pou kontinyen pran sa repa ziska ki zot tou zot ganny zot rekonpans dan lesyel. (Rev. 12:17) Me, si sa bann ki pou viv pour touzour lo later ti kapab pran lanblenm, savedir sa Memoryal ti pou bezwen kontinyen ganny fer pour touzour.
“Zot pou sirman vin mon pep”
17, 18. Ki mannyer sa profesi dan Ezekyel 37:26, 27 in ganny akonplir?
17 Zeova ti predir konsernan linite son pep kan i ti dir: “Mon pou fer en lalyans lape avek zot; zot pou annan en lalyans ki pou dire pour en letan endefini. Mon pou met zot la e miltipliy zot e mon pou met mon sanktyer o milye zot pour en letan endefini. Mon tabernak pou vreman parlao zot e mon pou sirman vin zot Bondye e zot pou vin mon pep.”—Ezek. 37:26, 27.
18 Pep Bondye antye i annan sa privilez pour benefisye avek lakonplisman sa promes merveye, setadir, sa lalyans konsernan lape. Wi, Zeova in garanti ki i pou annan lape parmi son bann serviter obeisan. Fri son lespri sen i evidan parmi zot. Son sanktyer, ki la i pe ganny reprezante par vre ladorasyon Kretyen i parmi zot. Zot in vreman vin son pep, akoz zot in abandonn tou form idolatri e zot ador zis Zeova tousel.
19, 20. Lekel ki enkli parmi sa bann ki Zeova i apel “mon pep” e kwa ki posib atraver sa nouvo lalyans?
19 Pa i vreman gou pour vwar linite sa de group dan nou letan! Menm si sa gran lafoul ki kontinyelman ogmante napa lespwar pour al dan lesyel, zot fyer pour asosye avek sa bann ki pou al dan lesyel. Zot reste atase avek Izrael Bondye. Ler zot fer sa, zot osi zot ganny enkli parmi sa bann ki Zeova i apel “mon pep.” Zot pe akonplir sa profesi ki dir: “Bokou nasyon pou zwenn avek Zeova e zot pou sirman vin mon pep; mon pou reste parmi zot.”—Zeka. 2:11; 8:21; lir Izai 65:22 *; Revelasyon 21:3, 4.
20 Zeova in fer tou sa la posib atraver sa nouvo lalyans. Plizyer milyon etranze spirityel sorti dan lezot nasyon in form parti sa nasyon ki Zeova i kontan. (Mik. 4:1-5) Zot determinen pour kontinyen tyonbo sa lalyans, par aksepte son bann provizyon e obeir sa ki i demann nou pour fer. (Iza. 56:6, 7) Ler zot fer sa, ansanm avek Izrael Bondye, zot ganny beni en kantite avek lape eternel. Nou swete ki se sanmenm ki ou pe eksperyanse, la konmela e pour touzour!
[Not anba lo paz]
^ par. 1 Deterononm 7:6: “Akoz ou en pep sen pour Zeova ou Bondye. Zeova ou Bondye in swazir ou pour vin son pep, en propriyete spesyal, parmi tou sa bann pep ki lo later.”
^ par. 8 “Kongregasyon” i premyerman refer avek bann Kretyen swazir. (Ebr. 12:23, NW) Par kont, sa mo kongregasyon i osi kapab annan en lot sinifikasyon, i refer avek tou Kretyen, nenport ki lespwar zot annan.—Vwar Latour Veyer le 1 Me 2007 paz 8-12.
^ par. 10 Zekarya 8:23: “La sa ki Zeova bann larme in dir, ‘Dan sanmenm sa bann zour dis zonm sorti dan tou langaz bann nasyon pou tyonbo, wi zot pou vreman tyonbo rob en zonm ki en Zwif, an dizan: “Nou pou al avek zot, akoz nou’n tande ki Bondye i avek zot.”’”
^ par. 12 Zenez 22:18: “Atraver ou desandans tou nasyon lo later pou sirman ganny beni, parski ou’n ekout mwan.”
^ par. 13 Zezi i Medyater sa lalyans, i pa en partisipan. Konman Medyater, byensir i pa ti pran lanblenm.
^ par. 19 Izai 65:22: “Zot pa pou konstri pour en lot reste, e zot pa pou plante pour en lot manze. Parski lakantite letan ki mon pep pou viv pou parey lakantite letan ki en pye dibwa i viv; e sa bann ki mon’n swazir pou profit plennman travay zot lanmen.”
Eski ou rapel?
• Lekel ki ganny reprezante par sa “douz tribi Izrael” ki sa 144, 000 pou zize?
• Ki relasyon i annan ant bann Kretyen swazir ek lezot mouton an rapor avek sa nouvo lalyans?
• Eski tou Kretyen i devret pran lanblenm zour Memoryal?
• Ki linite ki ti ganny predir pour nou letan?
[Kestyon]