Otuerọn̄ Kiet, Ekpemerọn̄ Kiet
Otuerọn̄ Kiet, Ekpemerọn̄ Kiet
“Mbufo emi ẹtienede mi ẹyesụhọde n̄ko ẹtie ke ebekpo duopeba, ẹkpe ikpe ẹnọ esien Israel duopeba.”—MATT. 19:28.
1. Didie ke Jehovah akanam n̄kpọ ye ubon Abraham, edi ntak emi oro mîwọrọke ke enye ama esịn mbon oro mîkotoho Israel?
JEHOVAH ama ama Abraham, onyụn̄ ama ubon esie. Ke se ibede isua 1,500, enye ama emek idụt Israel, oro edi, nditọ nditọ Abraham ete ẹdi “ata ikọt imọ.” (Kot Deuteronomy 7:6.) Ndi oro ọwọrọ ke Jehovah ama esịn mbon oro mîkotoho Israel? Baba-o. Ẹma ẹsiyak mbon oro mîdịghe nditọ Israel, edi emi ẹkeyomde ndinam n̄kpọ Jehovah ẹtiene ikọt esie ẹnam ntre. Ẹkesida mmọ ẹnyụn̄ ẹnam n̄kpọ ye mmọ nte nditọ Israel. (Lev. 19:33, 34) Akana mmọ n̄ko ẹnam kpukpru Ibet oro Jehovah ọkọnọde.—Lev. 24:22.
2. Nso ikọ oro akakpade owo idem ke Jesus eketịn̄, ndien nso mbụme ke ikọ oro anam ẹbụp?
2 Jesus ama etịn̄ ikọ oro akakpade mme Jew emi ẹkedude uwem ke eyo esie idem ete ke “ẹyebọ [mmọ] obio ubọn̄ Abasi ẹnyụn̄ ẹyak enye ẹnọ idụt oro on̄wụmde mfri esie.” (Matt. 21:43) Mmanie ẹdi obufa idụt emi, ndien nso ufọn ke ukpụhọde emi enyene ọnọ nnyịn mfịn?
Obufa Idụt
3, 4. (a) Didie ke apostle Peter akanam ẹdiọn̄ọ obufa idụt emi? (b) Mmanie ẹdi obufa idụt emi?
3 Apostle Peter ama anam ẹdiọn̄ọ obufa idụt emi. Enye ekewet ọnọ ekemmọ mme Christian ete: “Mbufo ẹdi ‘orụk eke ẹmekde, otu mme oku emi ẹdade ubọn̄, edisana idụt, mbon emi ẹdide akpan inyene, man mbufo ẹkpetan̄a nti ido’ enye emi okokotde mbufo osio ke ekịm esịn ke utịbe un̄wana esie.” (1 Pet. 2:9) Nte ẹma ẹketetịn̄, ata mme Jew oro ẹkenyịmede ke Jesus edi Messiah ke ẹkeda ẹtọn̄ọ obufa idụt emi. (Dan. 9:27a; Matt. 10:6) Edi nte ini akakade, ediwak mbon oro mîdịghe mme Jew ẹma ẹditiene ẹbuana ke obufa idụt emi. Peter ama ọsọn̄ọ emi ke ndidọhọ nte: “Mbufo [ikedịghe] ikọt owo baba kiet ini kiet ko, edi idahaemi ẹdi ikọt Abasi.”—1 Pet. 2:10.
4 Mmanie ke Peter eketịn̄ aban̄a ke itien̄wed emi? Ke ntọn̄ọ ntọn̄ọ leta esie, enye ọkọdọhọ ke “[Abasi okobon mmimọ] obufa ete inyene odu-uwem idotenyịn ebe ke ediset Jesus Christ ke otu mme akpan̄kpa, ete inyene udeme eke mîkemeke ndibiara mînyụn̄ isabakede mînyụn̄ ikemeke ndibe mfep. Ẹnịm enye ke heaven ẹnọ [mmimọ].” (1 Pet. 1:3, 4) Mmọdo, mme Christian emi ẹyetde aran, emi ẹdikade heaven, ẹdi obufa idụt emi. Mmọ ke ẹkot “Israel Abasi.” (Gal. 6:16) Ẹma ẹwụt apostle John ke n̄kukụt ke mmọ ẹdi owo 144,000. “Ẹkedep mmọ emi ẹsio ke otu ubonowo nte akpa mbun̄wụm ẹnọ Abasi ye Eyenerọn̄” man mmọ ẹkedi “mme oku” ẹnyụn̄ “ẹkara nte ndidem ye [Jesus] ke isua tọsịn kiet.”—Edi. 5:10; 7:4; 14:1, 4; 20:6; Jas. 1:18.
Ndi Mbon En̄wen Ẹtiene Ẹsịne?
5. (a) Mmanie ke ẹkot “Israel Abasi”? (b) Ntak emi ikọ oro “Israel” mîdaha iban̄a mme Christian oro ẹyetde aran kpọt?
5 An̄wan̄a ndien ke mme Christian oro ẹyetde aran ke ẹkot “Israel Abasi,” ke Galatia 6:16. Edi, ndi Jehovah esitiene okot mme Christian oro owo mîyetke aran, Israel? Ibọrọ odu ke se Jesus eketịn̄de ọnọ mme anam-akpanikọ apostle esie mi ete: “[Mmanam] ediomi ye mbufo, kpa nte Ete mi akanamde ediomi ye ami, kaban̄a obio ubọn̄, man mbufo ẹkpedia ẹnyụn̄ ẹn̄wọn̄ n̄kpọ ke okpokoro mi ke obio ubọn̄ mi, ẹnyụn̄ ẹtie ke mme ebekpo ẹkpe ikpe ẹnọ esien Israel duopeba.” (Luke 22:28-30) Emi editịbe ke ini “ẹdifiakde ẹbot mme n̄kpọ,” m̀mê ke Tọsịn Isua Ukara Christ, emi ẹdinamde kpukpru n̄kpọ ẹkabade ẹdi mbufa.—Kot Matthew 19:28.
6, 7. Mmanie ke Matthew 19:28 ye Luke 22:30 ẹkot “esien Israel duopeba”?
6 Owo 144,000 ẹdidi ndidem, mme oku, ye mme ebiereikpe ke heaven, ke ini Ukara Tọsịn Isua. (Edi. 20:4) Mmanie ke mmọ ẹdikpe ikpe inọ inyụn̄ ikara? Matthew 19:28 ye Luke 22:30, ẹdọhọ ke ẹdikpe inọ “esien Israel duopeba.” Mmanie idedi “esien Israel duopeba” emi? Edi kpukpru mbon oro ẹdidude nsinsi uwem ke isọn̄ emi, oro ẹbuọtde idem ke uwa Jesus, edi emi mîsịneke ke otu mbon oro ẹdikade heaven. (Esien Levi ikesịneke ke otu esien Israel 12.) Mbon oro ẹkotde esien Israel 12 mi, ẹdibọ ufọn eke spirit ẹto utom oro owo 144,000, emi ẹdide mme oku, ẹdinamde. Mmọ n̄ko ẹdi ikọt Abasi, ndien enye ama, onyụn̄ enyịme mmọ. Enen̄ede enen ndida mmọ ndomo ye ikọt Abasi ke eset.
7 Apostle John ama okụt nte ẹfịkde Israel Abasi emi ẹdide owo 144,000 idiọn̄ọ ẹma mbemiso akwa ukụt. Ke oro ebede, enye ama okụt n̄ko “akwa otuowo” emi baba owo kiet mîkemeke ndibat, emi “ẹtode ke kpukpru idụt.” (Edi. 7:9) Akwa otuowo emi ẹyebọhọ akwa ukụt ẹnyụn̄ ẹdu ke ini Christ edikarade ke tọsịn isua. Mmọ ẹyefiak ẹdiana ye ediwak biliọn owo oro ẹdinamde ẹset. (John 5:28, 29; Edi. 20:13) Mmọ ẹdidi “esien Israel duopeba” emi Jesus ye owo 144,000 ẹdikpede ikpe inọ.—Utom 17:31; 24:15; Edi. 20:12.
8. Didie ke se ẹkesinamde ke Usen Usio-Isop owụt se owo 144,000 ẹbuanade ye ubonowo eken?
8 Se ẹkesinamde ke Usen Usio-Isop owụt se owo 144,000 ẹbuanade ye ubonowo eken. (Lev. 16:6-10) Akana akwa oku ebem iso awa ayara enan̄ nte uwa idiọkido man “osio isop idem esie, ye eke ufọk esie.” Emi owụt ke mbon oro ẹbemde iso ẹdia ufọn uwa Jesus ẹdi mme oku oro ẹdinamde utom ye enye ke heaven. N̄ko, ẹma ẹsiwa okpo ebot iba ke Usen Usio-Isop man ẹsio isop idiọkn̄kpọ nditọ Israel eken. Sia esien oro mme oku ẹketode adade aban̄a owo 144,000, nditọ Israel eken ẹda ẹban̄a mbon oro ẹdidude nsinsi uwem ke isọn̄ emi. Emi owụt ke “esien Israel duopeba” ke Matthew 19:28 idaha iban̄a mbon oro ẹdikade heaven ikedi mme oku ye Jesus, edi ke ada aban̄a kpukpru mbon eken oro ẹbuọtde idem ke uwa Jesus. *
9. Ke n̄kukụt oro Ezekiel okokụtde, mmanie ke mme oku ẹda ẹban̄a, ndien mmanie ke nditọ Israel eken ẹda ẹban̄a?
9 Uwụtn̄kpọ en̄wen edi emi. Ẹma ẹwụt prọfet Ezekiel temple Jehovah ke n̄kukụt. (Ezek., ib. 40-48) Enye ama okụt nte mme oku ẹnamde utom ke temple oro, ẹtemede mme owo se ẹkpenamde ẹnyụn̄ ẹbọde ndausụn̄ ye nnen̄ede ẹto Jehovah. (Ezek. 44:23-31) Enye ama okụt n̄ko nte mme owo emi ẹtode nsio nsio esien ẹdide ẹdituak ibuot ẹnyụn̄ ẹwa uwa. (Ezek. 45:16, 17) Ke n̄kukụt emi, mme oku oro ẹda ẹban̄a mme Christian oro ẹyetde aran, edi nditọ Israel eken ẹda ẹban̄a mbon oro ẹdidude nsinsi uwem mi ke isọn̄. N̄kukụt emi owụt ke mme oku ye mbon oro mîdịghe mme oku ẹnam utom ọtọkiet, ndien ke mme oku ẹda usụn̄ ke utuakibuot akpanikọ.
10, 11. (a) Ewe ikọ Jesus oro anamde itetịm inyene mbuọtidem ke ikụt nte osude mfịn? (b) Nso mbụme ke ẹbụp ẹban̄a mme erọn̄ en̄wen?
10 Jesus ama etịn̄ aban̄a “mme erọn̄ en̄wen,” oro mîsịneke ke otu “ekpri otu erọn̄” emi ẹyetde aran. (John 10:16; Luke 12:32) Enye ọkọdọhọ ete: “[Nyada] mmọ oro n̄ko ndi, ndien mmọ ẹyekop uyo mi, mmọ ẹyenyụn̄ ẹkabade ẹdi otuerọn̄ kiet, ekpemerọn̄ kiet oyonyụn̄ odu.” Ndikụt nte mme n̄kpọ emi osude anam itetịm inyene mbuọtidem. Ẹdian otu mbiba emi ọtọkiet, oro edi, ibat ibat mbon emi ẹyetde aran ye akwa otuowo emi ẹsịnede ke otu mme erọn̄ en̄wen. (Kot Zechariah 8:23.) Mme erọn̄ en̄wen ke ẹtiene ẹnam utom ke ndamban̄a temple eke spirit oro, okposụkedi emi utom mmọ mîdịghe ke esịt okụre temple.
11 Edi, ndi Jehovah ndisidọhọ ndusụk ini ke nditọ Israel emi mîkedịghe mme oku ẹda ẹban̄a mme erọn̄ en̄wen, ọwọrọ ke ana mbon oro ẹdidude ke isọn̄ ẹsitiene ẹta uyo ẹnyụn̄ ẹn̄wọn̄ wine Editi? Mbụme emi ke iyom ndibọrọ idahaemi.
Obufa Ediomi
12. Ewe obufa ndutịm ke Jehovah eketịn̄ aban̄a?
12 Jehovah ama etịn̄ aban̄a obufa ndutịm oro enye edinamde inọ ikọt esie, enye ọkọdọhọ ete: “Emi [edi] ediomi eke ndidiomide ye ufọk Israel, ke mme usen oro ẹma ẹbe. . . . Nyesịn mmọ mbet mi ke esịt, nnyụn̄ n̄wet mmọ ke ọwọn̄ esịt; nyonyụn̄ ndi Abasi mmọ, ndien mmọ ẹyedi ikọt mi.” (Jer. 31:31-33) Ediomi emi edinam ẹnam se Jehovah ọkọn̄wọn̄ọde ọnọ Abraham osu, onyụn̄ ebịghi ke nsinsi.—Kot Genesis 22:18.
13, 14. (a) Mmanie ẹbuana ke obufa ediomi? (b) Mmanie idia ufọn obufa ediomi emi, ndien didie ke mmọ ‘ẹmụm enye ẹkama’?
13 Jesus eketịn̄ aban̄a obufa ediomi emi, ke ini enye ọkọdọhọde ke okoneyo emi ekesierede usen oro ẹkewotde enye ete: “Cup emi ada aban̄a obufa ediomi eke ebede ke iyịp mi, emi ẹdiduọkde kaban̄a mbufo.” (Luke 22:20; 1 Cor. 11:25) Ndi ẹkenam obufa ediomi emi ye kpukpru mme Christian? Ih ih! Ibat ibat owo kpọt, utọ nte mme apostle emi ẹken̄wọn̄de wine oro ẹkenọde mbubreyo oro, ẹbuana ke obufa ediomi oro. * Jesus ama odiomi ediomi en̄wen ye mmọ, oro edi, ndinam mmọ ẹtiene enye ẹkara ke Obio Ubọn̄ esie. (Luke 22:28-30) Mmọ ẹyetiene Jesus ẹkara ke Obio Ubọn̄ esie.—Luke 22:15, 16.
14 Nso kaban̄a mbon oro ẹdidude ke ini Jesus edikarade isọn̄? Mmọ edi mbon oro ẹdidiade ufọn obufa ediomi emi. (Gal. 3:8, 9) Kpa ye oro mmọ mîtieneke ibuana ke obufa ediomi emi, mmọ ‘ẹmụm enye ẹkama,’ sia mmọ ẹnyịme ndinam se ẹyomde mmọ ẹnam kpa nte prọfet Isaiah eketịn̄de mi ete: “Ama edi isen owo n̄ko emi ẹdiande idem ye Jehovah, ẹnyụn̄ ẹmade enyịn̄ Jehovah, ẹnyụn̄ ẹdide ikọt esie: kpukpru mmọ eke ẹnịmde sabbath, mbak ẹdibiat enye, ẹnyụn̄ ẹmụmde ediomi mi ẹkama: nyada mmọ ndi ke edisana obot mi, nnyụn̄ nnam mmọ ẹdat esịt ke ufọk akam mi.” Ndien Jehovah ama adian ete: “Koro ufọk mi eyekere, ete, Ufọk akam kpukpru mme idụt.”—Isa. 56:6, 7.
Mmanie Ikpata Uyo Inyụn̄ In̄wọn̄ Wine?
15, 16. (a) Apostle Paul ọkọdọhọ ke mme andibuana ke obufa ediomi ẹdinyene nso? (b) Ntak emi mbon oro ẹdidude uwem ke isọn̄ mîkpataha uyo inyụn̄ in̄wọn̄ wine Editi?
15 Mme andibuana ke obufa ediomi oro “[ẹnyene] uko ndibe ndụk edisana ebiet.” (Kot Mme Hebrew 10:15-20.) Mmọ ẹyenyene “obio ubọn̄ eke n̄kpọ mîkemeke ndinyen̄e.” (Heb. 12:28) Mmọdo, n̄kukụre mbon oro ẹkpen̄wọn̄de wine obufa ediomi emi, ẹkpedi mbon oro ẹdikade heaven ikedi oku ye ndidem ye Jesus Christ. Mmọ ke ẹken̄wọn̄ọ ndida nnọ Eyenerọn̄ ke ndọ. (2 Cor. 11:2; Edi. 21:2, 9) Mbon eken oro ẹsidụkde Editi ẹsitetie ukpono ukpono ẹse se ikade iso, edi itieneke ita uyo inyụn̄ in̄wọn̄ wine Editi.
16 Paul anam ifiọk nte ke mbon oro ẹdidude uwem mi ke isọn̄ inyeneke ndita uyo nnyụn̄ n̄n̄wọn̄ wine Editi. Enye ọkọdọhọ mme Christian oro ẹyetde aran ete: “Koro adan̄a nte mbufo ẹtade uyo ẹnyụn̄ ẹn̄wọn̄de cup emi, mbufo ẹtan̄a n̄kpa Ọbọn̄, tutu enye edisịm.” (1 Cor. 11:26) Ini ewe ke Ọbọn̄ ‘edidi’? Edi ke ini enye edidide idimen akpatre owo ke otu mbon oro ẹyetde aran inyọn̄ heaven. (John 14:2, 3) Emi owụt ke owo idinịmke Editi ke nsinsi nsinsi. Edi “mbon oro ẹsụhọde” ke otu mfri ndamban̄a n̄wan Abasi, emi ẹdude ke isọn̄, ẹyeka iso ẹta uyo ẹnyụn̄ ẹn̄wọn̄ wine Editi tutu kpukpru mmọ ẹset ẹkebọ utịp mmọ ke heaven. (Edi. 12:17) Edieke ẹkpenyịmede mbon oro ẹdidude nsinsi uwem ke isọn̄ ẹtiene ẹta uyo ẹnyụn̄ ẹn̄wọn̄ wine Editi, oro ọkpọwọrọ ke ẹdisụk inenịm Editi ke nsinsi nsinsi.
“Mmọ Ẹyenyụn̄ Ẹdi Ikọt Mi”
17, 18. Didie ke ntịn̄nnịm ikọ oro ke Ezekiel 37:26, 27 osu?
17 Jehovah ama owụt ke mme asan̄autom esie ẹyenen̄ede ẹdiana kiet. Enye ọkọdọhọ ete: “Nyonyụn̄ nnam ediomi emem ye mmọ; eyedi nsinsi ediomi ye mmọ; ndien nyenịm mmọ ke itie, nnyụn̄ n̄wụk mmọ edisana ebiet mi ke ufọt ke nsinsi. Idụn̄ mi oyonyụn̄ odu ye mmọ: ndien ami nyedi Abasi mmọ, mmọ ẹyenyụn̄ ẹdi ikọt mi.”—Ezek. 37:26, 27.
18 Ediomi emem emi ẹkenamde mi ẹnọ mme Christian osu, ndien kpukpru ikọt Abasi ẹkeme ndidia ufọn. Jehovah ọn̄wọn̄ọ ke mme anam-akpanikọ asan̄autom imọ kiet kiet eyenyene emem. Mmọ ẹn̄wụm mbun̄wụm spirit esie, ndien edisana ebiet esie, emi adade aban̄a utuakibuot akpanikọ, odu ke otu mmọ. Ndien sia mmọ ẹkpọn̄de nsunsu ido ukpono ẹdituak ibuot ẹnọ Jehovah kpọt, mmọ ẹdi ata ikọt esie.
19, 20. Mmanie ke Jehovah etiene okot “ikọt mi,” ndien nso ke obufa ediomi anam ẹnyene?
19 Nso edinem n̄kpọ ke edi ntem ndikụt nte ẹdiande otu iba emi ọtọkiet! Kpa ye oro akwa otuowo emi ẹkade-ka iso ndiwak mîdikaha heaven, mmọ ẹnen̄ede ẹkop inemesịt ndidiana kiet ye mbon oro ẹdikade. Mmọ ẹdiana kiet ye Israel Abasi. Emi anam Jehovah etiene okot mmọ “ikọt mi.” Ntịn̄nnịm ikọ emi osu mmọ ke idem: ‘Ediwak mme idụt ẹyedian idem mmọ ye Jehovah ke usen oro, ẹyenyụn̄ ẹdi ikọt esie; ndien enye oyodụn̄ ke ufọt mmọ.’—Zech. 2:11; 8:21; kot Isaiah 65:22; Ediyarade 21:3, 4.
20 Jehovah anam kpukpru emi ke ntak obufa ediomi oro. Ediwak miliọn ndamban̄a isenowo ke ẹdian idem ye idụt emi Jehovah amade. (Mic. 4:1-5) Mmọ ẹbiere ndika iso nnam se obufa ediomi oro oyomde mmọ ẹnam.(Isa. 56:6, 7) Emi anam mmọ ẹdiana ye Israel Abasi ẹka iso ẹnyene emem Abasi. Afo akpakam etiene enyene emem emi ke emi ye ke nsinsi nsinsi!
[Mme Ikọ Idakisọn̄]
^ ikp. 8 N̄ko-n̄ko, mme Christian oro ẹyetde aran ke ẹsikot “esop.” (Heb. 12:23) Edi, “esop” ekeme n̄ko ndida mban̄a kpukpru mme Christian, ẹdide mmọ ẹdika heaven m̀mê ẹdidu ke isọn̄.—Se Enyọn̄-Ukpeme eke April 15, 2007, page 21-23.
^ ikp. 13 Jesus itieneke ibuana ke ediomi emi, enye akam edi esịne-ufọt obufa ediomi emi. Sia enye edide esịne-ufọt, anaedi enye ikataha uyo inyụn̄ in̄wọn̄ke wine oro.
Nte Afo Emeti?
• Mmanie ẹdi “esien Israel duopeba” emi owo 144,000 ẹdikpede ikpe inọ?
• Nso ke mbon oro ẹyetde aran ye mme erọn̄ en̄wen ẹbuana ke obufa ediomi?
• Ndi kpukpru mme Christian ẹkpeta uyo ẹnyụn̄ ẹn̄wọn̄ wine Editi?
• Ewe edidianakiet ke ẹkedọhọ ke ẹdidu ke eyo nnyịn?
[Mme Mbụme Ukpepn̄kpọ]
[Ekebe/Ndise ke page 25]
(Ama oyom ndikụt nte enye enen̄erede etie, se idem n̄wed)
Ediwak owo ẹdiana ye Israel Abasi ẹnam n̄kpọ Abasi
7,313,173
4,017,213
1,483,430
373,430
1950 1970 1990 2009