Savaatit katersat ataatsit, paarsisoq ataaseq
Savaatit katersat ataatsit, paarsisoq ataaseq
“Uannik malinnittusi issiavissaarsuarni aqqaneq-marlunni issiajumaarpusi Israelip naggueqatigiissortai aqqaneq-marluusut eqqartuullugit.” — MATTHÆUSI 19:28.
1. Jehovap Aaperaap kinguaavi qanoq isigai, aamma sooq imaanngila taassuma inuiaqatigiit allat tamaasa soqutiginngikkai?
JEHOVAP Aaperaat asavaa, taamaattumillu Aaperaap kinguaavi ilumoorfiginnilluni tunniusimaffigai. Ukiuni 1500-nit amerlanerusuni Jehovap Israelikkut, Aaperaap kinguaavi, innuttamisut toqqakkamisut, ‘immikkoortillugit pigisassarsiamisut’, isigai. (Atuaruk 2 Mosesi 19:5). Taava imaappa Jehovap inuiaqatigiit allat tamaasa soqutiginngilluinnarai? Naagga. Piffissami tamatumani Israelikkuunngitsut Jehovamik pallorfiginnikkumasut taassuma innuttaanut toqqagaanut ilaliussinnaatitaapput. Taakkununnga ilaliuttut innuttaanut ilaasutut isigineqartarput. Taakku qatanngutitut, Israelikkuittut, pineqartussaapput. (3 Mosesi 19:33, 34) Aamma taakkua Jehovap inatsisaanut tamanut naalannissartik pisussaaffigaat. — 3 Mosesi 24:22.
2. Jiisusi isumakululernartumik qanoq oqarpa, suullu apeqqutaalerpat?
2 Jiisusilli juutit nalimini inuusut isumakululernartumik ima oqarfigai: “Guutip naalagaaffia ilissinnit peerneqassaaq tunniunneqassallunilu inuiannut inerititaqartitsisinnaasunut.” (Matthæusi 21:43) Kikkut inuiannut taakkununnga ilaassappat, aamma taamatut allanngortoqarnera uagutsinnut ullumikkut inuusunut qanoq sunniuteqarpa?
Inuiaqatigiit nutaat
3, 4. (a) Apustilip Petrusip inuiaqatigiit nutaat kikkuunerat qanoq ililluni paasinarsisippaa? (b) Inuiaqatigiinnut nutaanut kikkut ilaappat?
3 Apustilip Petrusip inuiaqatigiit nutaat taakkua kikkuunerat paasiuminarsisippaa. Uppeqatini kristumiut ima allaffigai: “[Ilissi] tassaavusi eqqarleriit qinikkat, palaseqatigiit kunngikkormiuusut, inuit illernartut, innuttassarsiat, Guutip ilissinnik taartumit qaamasuminut tupinnaqisumut nooqqullusi qaaqqusisup pissaaneranik nalunaajaasussat.” (1 Petrusi 2:9) Inuiaqatigiinnut nutaanut taakkununnga ilaalersut siulliit, siulittuutigineqartutut, tassaapput uinikkut juutit Jiisusip Missiarsiuneranik akuerinnittut. (Danieli 9:27a; Matthæusi 10:6) Kingusinnerusukkut aamma Israelikkuunngitsorpassuit taakkununnga ilaalerput, Petrusimi ima nangippoq: “Ilissi siornagut innuttarineqanngitsusi, maannali Guutimut innuttaasusi.” — 1 Petrusi 2:10.
4 Matumani Petrusip kikkut saaffigai? Allakkami aallaqqaataatungaani ima allappoq: “[Guutip] Jiisusi-Kristusip toqusunit makinneratigut [ernioqqissippaatigut] neriugisamut uumasumut — kingornussassamut aserortussaanngitsumut, mingutsinneqartussaanngitsumut toquliortussaanngitsumullu qilanni paarineqartumut pisassarititaalluni ilissinnut.” (1 Petrusi 1:3, 4) Tassa inuiaqatigiinnut nutaanut ilaasut tassaapput kristumiut tanitat, qilaliarnissamik neriugisallit. Taakku tassaapput “Israeli Guutip pigisaa”. (Galatiamiut 6:16) Apustilip Johannesip takorruukkamini takuaa anersaakkut Israelikkuusut taakku 144.000-iusut. Taakku “[inunnit] immikkoortinneqarsimapput inereqqaataasutut Guutimut Savaaqqamullu akiliunneqarlutik”, aamma “[Guutimut] Kristusimullu palasiussapput kunngioqatigissallugulu ukiuni taakkunani 1.000-ini.” — Saqqummersitat 7:4; 14:1, 4; 20:6; Jaaku 1:18.
Aamma allat taakkununnga ilaappat?
5. (a) Taaguut “Israeli Guutip pigisaa” kikkunnut tunngava? (b) Qanoq ililluta nalunngilarput oqaaseq ‘Israeli’ aamma allanut tunngasinnaasoq?
5 Erseqqippoq taaguut “Israeli Guutip pigisaa” Galatiamiut 6:16-imiittoq taamaallaat kristumiunut tanitanut tunngasoq. Jehovalli Israelikkut tanitanuinnaanngitsoq, aammali allanut assersuutitut atortarpai? Apeqqummut tamatumunnga akissut Jiisusip apustiliminut aalajaatsunut oqaasiinit erserpoq: “Soorlu Ataatama naalagaaffik uannut pigitikkaa, taamatut uanga ilissinnut pigitippara uanga nerrivinni nerillusilu imersinnaaqqullusi naalagaaffinni issiavissaarsuarnilu issiaqqullusi Israelip naggueqatigiissortai aqqaneq-marluk eqqartuutissallugit.” (Lukasi 22:28-30) Matumani allassimasut Jiisusip ukiuni tusindini naalakkersuinerani “ernioqqissitaaffimmi”, imaluunniit ‘pinngoqqiffimmi’ (1936), pissapput. — Matthæusi 19:28.
6, 7. Oqariartaaseq “Israelip naggueqatigiissortai aqqaneq-marluk” Matthæusi 19:28-mi aamma Lukasi 22:30-mi atorneqartoq kikkunnut tunngatinneqarpa?
6 Ukiuni tusindini naalakkersuinermi 144.000-it qilammi kunngisut, palasitut eqqartuussisutullu kiffartussapput. (Saqqummersitat 20:4) Kikkut eqqartuutissavaat, aamma kikkut naalakkersussavaat? Matthæusi 19:28-mi aamma Lukasi 22:30-mi paasivarput “Israelip naggueqatigiissortai aqqaneq-marluk” eqqartuutissagaat. Tamatumunnga tunngatillugu “Israelip naggueqatigiissortai aqqaneq-marluk” kikkunnut assersuutaappat? Nunarsuarmi inuunissamik neriugisalinnut — Kristusip pilliutaanik upperinnittunut, palaseqatigiinnulli kunngikkormiuusunut ilaanngitsunut — tamanut assersuutaapput. (Uinikkut Israelikkut naggueqatigiissortaasa kisinneqarneranni naggueqatigiit palasiusut Levikkut ilanngunneqanngillat). Taakkua 144.000-it palasitut kiffartornerat anersaakkut iluaqutigissavaat. Palasiunngillat, Guutilli innuttaanut ilaapput, taassumalu taakku asallugillu akuerai. Taamaattumik taakkua itsaq Guutip innuttaanut assersuunneqarnerat pissusissamisoorluinnarpoq.
7 Tamatumunnga assingusumik apustilip Johannesip — anersaakkut Israelikkuusut 144.000-it annikilliornartussarsuaq sioqqullugu inaarutaasumik naqissuserneqartut takoreerlugit — takuai ‘amerlangaartut inuiaqatigiinnit tamanit pisut’ kisissaanngitsut. (Saqqummersitat 7:9) Taakku annikilliornartussarsuarmi aniguissapput Kristusillu ukiuni tusindini naalakkersuinera misigissallugu. Taamanikkussamut inuit milliardillit makititaasimasut taakkununnga ilaliutissapput. (Johannesi 5:28, 29; Saqqummersitat 20:13) ‘Amerlangaartut’ peqatigalugit taakku assersuutaasumik tassaassapput “Israelip naggueqatigiissortai aqqaneq-marluk”, Jiisusimit naalakkersueqataanillu 144.000-iusunit eqqartuunneqarumaartut. — Apustilit Suliaat 17:31; 24:15; Saqqummersitat 20:12.
8. Ullormi saammaannartitsivimmi ukiumoortumik pisartut 144.000-it inuiaallu sinnerisa attaveqatigiinnerannut qanoq assersuutaappat?
8 Ullormi saammaannartitsivimmi ukiumoortumik pisartut 144.000-it inuiaallu sinnerisa attaveqatigiinnerannut siumut assersuutaapput. (3 Mosesi 16:6-10) Siullermik palasiunerup ussik ajortaaruteqqussutitut pilliutigisarpaa “imminut saammaannartissalluni inoqutinilu saammaannartissallugit”. Tassa Jiisusip pilliutaa siullermik inoqutaasa, tassa palaseqataasa, qilammi kiffartoqatissaasa iluaqutissaannut atorneqarpoq. Ullormili saammaannartitsivimmi aamma savaasat angutivissat marluk Israelikkut sinnerisa ajortaat pillugit pilliutigineqartarput. Tamatumunnga tunngatillugu naggueqatigiit palasiusut 144.000-inut assersuutaasut, Israelikkuusut sinneri nunarsuarmi inuunissamik neriugisalinnut tamanut assersuutaapput. Tamatumani erserpoq oqariartaaseq “Israelip naggueqatigiissortai aqqaneq-marluk” Matthæusi 19:28-mi atorneqartoq Jiisusip palaseqataanut anersaakkut kinguaassiarititaasunut tunnganani, Kristusilli pilliutaanik upperinnittunut allanut tamanut tunngasoq. *
9. Ezekielip takorruugaani palasit kikkunnut assersuutaappat, Israelikkullu palasiunngitsut kikkunnut assersuutaappat?
9 Allamik assersuuteqariarta. Pruffiiti Ezekieli Jehovap naalaffia pillugu takorruuisinneqarpoq. (Ezekieli, kapitalit 40-48) Takorruukkami tamatumani palasit naalaffimmi sulipput. Ilinniartitsipput Jehovamillu siunnersorneqarlutik. (Ezekieli 44:23-31) Aamma takorruukkami tamatumani inuppassuit naggueqatigiinnit assigiinngitsuneersut pallorfiginnikkiartorlutillu pilliiartorput. (Ezekieli 45:16, 17) Tamatumunnga tunngatillugu palasit tanitanut assersuutaapput, Israelikkut naggueqatigiinnit palasiunngitsuneersut nunarsuarmi inuunissamik neriugisalinnut assersuutaasut. Takorruukkami erseqqissarneqarpoq eqimattat marluk taakkua suleqatigiilluarnerat palaseqatigiillu pallorfiginninnermi ilumoortumi siuttuunerat.
10, 11. (a) Jiisusip oqaasiisa suut uppernikkut nakussatsinnartumik eqquunnerannik takunnittuusimavugut? (b) Savanut allanut tunngatillugu suna apeqqutaalerpa?
10 Jiisusip ‘savat allat’, ‘savarpannguit’ taassuma ajoqersugaasa tanitat ‘ungalusamiiffigisaanniinngitsut’, eqqartorpai. (Johannesi 10:16; Lukasi 12:32) Ima oqarpoq: “Taakkuttaaq siulersussavakka, nipigalu tusassavaat; tassaalissappullu savaatit katersat ataatsit, paarsisoq ataaseq.” Oqaatsit taakkua eqquunnerat misigalugu uppernikkut nakussatsinnarsimaqaaq! Eqimattat marluk taakku — tanitat ikittunnguit savallu allat amerlangaartut — ataasiussuseqalersimapput. (Atuaruk Zakaria 8:23). Ilumoorpoq savat allat naalaffiup anersaakkut ittup silarliani ilorlermi kiffartunngitsut, naalaffiulli silarliani silarlermi kiffartorput.
11 Jehovalli itsaq Israelikkut palasiunngitsortai savanut allanut taakkununnga ilaannikkut assersuutaatittarpagit, taava aamma nunarsuarmi inuunissamik neriugisallit eqqaaniaalluni nalliuttorsiornermi assersuutinik ilangiisassannginnerpat? Apeqqummut tamatumunnga akissut paasiniariartigu.
Angeruseq nutaaq
12. Aaqqissuussaq nutaaq suna Jehovap siulittuutigaa?
12 Jehovap innuttaminut aaqqissuussaq nutaaq siulittuutigaa ima oqarami: “Angeruseq ullut nalliuppata Israelip kinguaavinut angeruseriumaagara mannaavoq. . . . Inatsisinnik ilumiulissavakka uummataannullu allallugit, taakkualu Guutigissavaannga, uangalu innuttarissavakka.” (Jeremia 31:31-33) Angeruseq nutaaq taanna iluaqutigalugu Jehovap Aaperaamut neriorsuutaa nuanningaartumik ataavartumillu eqquutissaaq. — Atuaruk 1 Mosesi 22:18.
13, 14. (a) Kikkut angerutsimut nutaamut peqataappat? (b) Kikkut taanna iluaqutigaat, aamma sooq oqartoqarsinnaava taakku angerutsimik tamatuminnga “aalajangiussisut”?
13 Toqunissani aqaguttoq Jiisusip angeruseq nutaaq taanna innersuussutigaa ima oqarami: “Ermuseq manna tassa angerusisaaq uanga aakkut pillusi kuineqartukkut.” (Lukasi 22:20; 1 Korinthimiut 11:25) Kristumiut tamarmik angerusisaamut tamatumunnga ilaappat? Naamik. Ilaat, apustilitut unnuk taanna ermutsimit imertutut, angerutsimut nutaamut peqataapput. * Jiisusip taakku naalagaaffimmini imminik naalakkersueqatiginninnissaat pillugu allamik angerfigeqatigai. — Lukasi 22:15, 16, 28-30.
14 Jiisusimmi naalakkersuinerani nunarsuarmi inuusussat? Taakkua angeruseq nutaaq iluaqutigissavaat. (Galatiamiut 3:8, 9) Taakku angerutsimut tamatumunnga peqataanngillat, ‘angeruserli’ nutaaq taanna ‘aalajangiuppaat’, tamatumani piumasaqaatinut naalatsigitinnermikkut, pruffiitimit Esajamit ima siulittuutigineqartutut: “Takornartallu [Jehovamut] ilannguttut kiffartuukkumallugu aqqalu asanartillugu taassumunngalu kiffaajumallutik sabbatimik illernartitsisut nalinginnaatinnagulu, angerutsinnillu aalajangiussisut tamaasa, taakku qaqqannut illernartumut pisikkumaarpakka tipaatsutsillugillu illunni qinusarfimmi.” Jehovalu ima nangippoq: “Illuga taaneqartassaaq inuiaqatigiit tamarmik qinusarfiannik.” — Esaja 56:6, 7.
Kikkut assersuutinik ilangiissappat?
15, 16. (a) Apustilip Paulusip angeruseq nutaaq sumut atassuserpaa? (b) Sooq nunarsuarmi inuunissamik neriugisallit eqqaaniaalluni nalliuttorsiornermi assersuutinik ilangiisassanngillat?
15 Angerutsimut nutaamut ilaasut ‘illernartuummut isernissamut nakimaassuseqarput’. (Atuakkit Hebræerit 10:15-20). Taakkua ‘naalagaaffik aalajaatsoq pigilissavaat’. (Hebræerit 12:28) Tassa Jiisusi Kristusi peqatigalugu qilammi kunngiullutillu palasiusussat kisimik ‘ermutsimit angerusisaajusumit’ imissapput. Angerusisaamut peqataasut Savaaqqamut nuliassarititaapput. (2 Korinthimiut 11:2; Saqqummersitat 21:2, 9) Ukiumoortumik eqqaaniaalluni nalliuttorsiornermi najuuttut allat tamarmik assersuutinik ilangiinatik ataqqinnillutik isiginnaartuusarput.
16 Paulusip allagaa aamma nunarsuarmi inuunissamik neriugisallit eqqaaniaalluni nalliuttorsiornermi assersuutinik ilangiisassannginnerannik paasinninnissamut iluaqutigaarput. Kristumiut tanitat ima allaffigai: “[Timiusamik] tamatuminnga nerisaraangassi ermutsimillu tamatuminnga imeraangassi Naalakkap toqua nalunaajaatigisarparsi, tikiutserlugu.” (1 Korinthimiut 11:26) Naalagaq qaqugu ‘tikiutissagami’? Nuliassaqatigiinnut tanitanut ilaasoq kingulleq qilaliaqatiginiarlugu tikiukkuni. (Johannesi 14:2, 3) Tassa erseqqippoq Jiisusip toquneranik eqqaaniaalluni ukiumoortumik nalliuttorsiortarneq naassaanngitsumut nalliussineqartassanngitsoq. Arnap “qitornai allat” suli nunarsuarmiittut nereqatigiinnermi tamatumani peqataajuassapput kinguaassamut tamatumunnga ilaasut tamarmik akissarsisinneqarnissaat nalliutserlugu. (Saqqummersitat 12:17) Nunarsuarmi naassaanngitsumik inuusussattaaq assersuutinik ilangiisinnaatitaasuuppata nalliuttorsiorneq tamanna naassaanngitsumut nalliussineqartassagaluarpoq.
“Innuttarissavakka”
17, 18. Siulittuut Ezekieli 37:26, 27-miittoq qanoq ililluni eqquuppa?
17 Jehovap innuttami ataasiussusiat siulittuutigaa ima oqarluni: “Angerutsimik eqqississummik angerfigissavakka, taanna angerusiussaaq ataavartussaq. Amerlisissavakka, illernartuutigalu akornanniitissavara naassaanngitsumik. Ineqarfiga taakkunaniissaaq. Guutigissavaannga, taakkulu innuttarissavakka.” — Ezekieli 37:26, 27.
18 Guutip innuttaasa tamarmik neriorsuutip, angerutsip eqqississutip, tamatuma eqquunnera iluaqutigisinnaavaat. Aap, Jehovap kiffani naalattut tamaasa eqqissineqarnissaanik neriorsorpai. Guutip anersaavata inerititaata taakkunaniinnera erseqqippoq. Taassuma illernartuutaa, matumani kristumiutut pallorfiginninnermut ilumoortumut assersuutaasoq, ‘akornanniippoq’. Taakku ilumut tassaalersimapput taassuma innuttai, guutipilussioriaatsimmi tamaasa ajattorpaat, aamma Jehova Guutiuvoq pallorfigisatuaat.
19, 20. Kikkut Jehovap ‘innuttamisut’ taasaanut ilaappat, aamma angeruseq nutaaq pissutigalugu susoqarsinnaalerpa?
19 Nalitsinni eqimattat marluk taakkua ataasiussuseqalernerannik takunnittuulluni pissanganarsimaqaaq. Amerlangaartunut suli amerliartortunut ilaasut qilaliarnissamik neriugisaqanngillat, taakkuali tamatuminnga neriugisalinnik suleqateqarnertik immikkut pisinnaatitaaffittut isigaat. Israelimut Guutip pigisaanut ilaliussimapput. Taamaaliornermikkut Jehovap ‘innuttamisut’ taasaanut ilaalersimapput. Siulittuut una taakkununnga eqquuppoq: “Ullussami tassani inuiappassuit [Jehovamut] ilanngutissapput uannut innuttaalerlutik, ilinnilu ineqarumaarpunga.” — Zakaria 2:15; 8:21; atuakkit Esaja 65:22; Saqqummersitat 21:3, 4.
20 Angeruseq nutaaq iluaqutigalugu Jehovap tamakku tamaasa pisinnaanngortippai. Anersaakkut ittumik takornartaasut millionillit Jehovap innuttaanut iluarisaanut ilaalersimapput. (Mika 4:1-5) Angerutsimik tamatuminnga aalajangiusimannittuarnissartik aalajangiusimavaat tamatumani aaqqissuussanik ataqqinninnermikkut piumasaqaatinillu eqqortitsinermikkut. (Esaja 56:6, 7) Aamma Israeli Guutip pigisaa peqatigalugu taamaalioramik eqqissineqartuarnera nuannaarutigisinnaasimavaat. Neriuutigaarput illittaaq tamanna pilluaqquneqaatigiumaarit — maanna siunissamilu! (w10 03/15-E)
[Quppernerup ataani ilanngussat]
^ imm. 8 Tamatumunnga assingusumik pingaarnerpaamik tanitat ‘ilagiittut’ eqqartorneqartarput. (Hebræerit 12:23) Oqaaserli “ilagiit” aamma allatut isumaqarsinnaavoq. Kristumiunut tamanut sumilluunniit neriugisalinnut tunngasinnaavoq. — Takuuk Napasuliaq Alapernaarsuiffik 1. maaji 2007, qupp. 23-25.
^ imm. 13 Jiisusi angerutsimut nutaamut peqataanngilaq. Angerutsimi akunnermiliuttuuvoq, akunnermiliuttuugamilu erseqqippoq assersuutinik ilangiisanngitsoq.
Eqqaamavigit?
• “Israelip naggueqatigiissortai aqqaneq-marluk” 144.000-init eqqartuunneqartussat kikkuuppat?
• Tanitat savallu allat angerutsimut nutaamut tunngatillugu qanoq attaveqatigiippat?
• Kristumiut tamarmik eqqaaniaalluni nalliuttorsiornermi assersuutinik ilangiisartussaappat?
• Nalitsinni ataasiussuseq suna siulittuutigineqarpa?
[Atuaqqissaarnermi apeqqutit]
[Qupp. 25-mi takussutissaq/assiliartaq]
(Allassimasut qanoq inissisimanersut naqitami takuneqarsinnaavoq)
Inuppassuit maanna Israeli Guutip pigisaa kiffartoqatigaat
1950 | 373.430
1970 | 1.483.430
1990 | 4.017.213
2009 | 7.313.173