Mutapi U li Muñwi, Mulisana A li Muñwi

“Mina be mu ni latelezi, mu ka ina ni mina fa mabona a lishumi ka a mabeli, mu atule masika a Isilaele a lishumi ka a mabeli.”—MAT. 19:28.

1. Ki swalisano ifi ya naa na ni yona Jehova ni baikulu ba Abrahama, mi ki kabakalañi swalisano yeo ha i sa talusi kuli na si na taba ni macaba a mañwi kaufela?

JEHOVA na latile Abrahama, mi kacwalo na bonisize lilato le li sa cinci kwa baikulu ba Abrahama. Ka lilimo ze fitelela 1,500, na nga sicaba sa Isilaele se ne si simuluhile ku Abrahama sina “sicaba sa hae tota,” ili sa na ketile. (Mu bale Deuteronoma 7:6.) Kana taba yeo ne i talusa kuli Jehova na si na taba ni macaba a mañwi? Batili. Ka nako yeo, batu be ne ba si Maisilaele be ne ba lata ku lapela Jehova ne ba lumelelizwe ku swalisana ni sicaba sa hae tota. Basikuluhi bao, kamba maproselite, ne ba balelwa kwa sicaba sa Isilaele. Ne ba swanelwa ku ngiwa sina banabahabo. (Liv. 19:33, 34) Mi ne ba swanela ku utwa milao ya Jehova kaufelaa yona.—Liv. 24:22.

2. Ki taba ifi ye komokisa ya na bulezi Jesu, mi i zusa lipuzo mañi?

² Kono Jesu naa bulezi taba ye ne komokisize Majuda ba mwa miteñi ya hae ha na ize: “Mu ka amuhiwa mubuso wa Mulimu, mi u ka fiwa sicaba si sili, se si ka beya lukau lwa ona.” (Mat. 21:43) Ki bo mañi be ne ba ka ba sicaba se sinca seo, mi cinceho yeo i lu ama cwañi kacenu?

Sicaba se Sinca

3, 4. (a) Muapositola Pitrosi na zibahalize cwañi sicaba se sinca? (b) Ki bo mañi ba ba li sicaba se sinca seo?

³ Muapositola Pitrosi na zibahalize sicaba se sinca seo. Na ñolezi Bakreste sina yena kuli: “Mina mu lusika lo lu ketilwe, mu na ni buprisita bwa silena, mu mushobo o kenile, mu sicaba sa hae tota, kuli mu bulele ze nde za hae Yena ya mi bizelize ku zwa mwa lififi, ni ku kena mwa liseli la hae le li komokisa.” (1 Pit. 2:9) Majuda ba ka sipepo be ne ba amuhezi Jesu sina Mesia ne li bona lilama za pili za sicaba se sinca seo, mi kacwalo bupolofita bwa kuli Mesia “u ka buluka tumelelano inge i tiile ka sunda i liñwi bakeñisa ba bañata,” bwa talelezwa. (Dan. 9:27a, NW; Mat. 10:6) Hasamulaho, batu ba bañata be ne ba si Maisilaele ne ba ekelizwe kwa sicaba seo, kakuli Pitrosi na ize: “Sapili mina ne mu si sicaba, kono cwale mu sicaba sa Mulimu.”—1 Pit. 2:10.

⁴ Pitrosi na bulelela bo mañi manzwi ao? Kwa makalelo a liñolo la hae u li: “[Mulimu] u lu pepile la bubeli, kuli ka ku zuha kwa Mulena kwa bafu, lu be ni sepo ye pilisa; mi lu fiwe sanda sa bufumu bo bu sa boli, bo bu sa nyazahali, bo bu sa undi, bo bu bulukezwi mina kwa lihalimu.” (1 Pit. 1:3, 4) Kacwalo sicaba se sinca seo ki Bakreste ba ba tozizwe ba ba na ni sepo ya ku yo pila kwa lihalimu. Ki bona “Isilaele wa Mulimu.” (Magal. 6:16) Muapositola Joani na boni pono ye ne bonisa kuli palo ya Isilaele wa Mulimu yo ki 144,000. Ba “liuluzwi mwahalaa batu, kuli ba be mitamuno ku Mulimu ni ku Ngunyana” ilikuli ba yo ba “baprisita” ni kuli ba yo “busa ni [Jesu] myaha ye 1,000.”—Sin. 5:10; 7:4; 14:1, 4; 20:6; Jak. 1:18.

Kana Sicaba sa Isilaele si Yemela Feela Batoziwa?

5. (a) Pulelo ya “Isilaele wa Mulimu” i yemela bo mañi? (b) Ki kabakalañi linzwi la “Isilaele” ha li sa talusangi feela nto i liñwi?

⁵ Kacwalo kwa iponahalela hande kuli pulelo ya “Isilaele wa Mulimu” ye kwa Magalata 6:16 i yemela feela Bakreste ba ba tozizwe. Kono kana fokuñwi sicaba sa Isilaele si swanisezanga Bakreste ba bañwi kwandaa feela ba ba tozizwe? Kalabo lu i fumana mwa manzwi a, a na bulezi Jesu kwa  baapositola ba hae ba ba sepahala: “Ni ka mi fa mubuso, sina ndate ha ni file ona, kuli mu ce mi mu nwe fa tafule ya ka, mwa mubuso wa ka; mi mu ka ina fa litulo za bulena, mu atule masika a Isilaele a lishumi ka a mabeli.” (Luka 22:28-30) Taba yeo i ka ezahala ka “nako ye li ka ezwa sinca” linto, ili ka nako ya Puso ya Kreste ya Lilimo ze Sikiti.—Mu bale Mateu 19:28.

6, 7. Pulelo ya “masika a Isilaele a lishumi ka a mabeli” i talusa bo mañi mwa litimana za Mateu 19:28 ni Luka 22:30?

⁶ Ba 144,000 ba ka ba malena, baprisita, ni baatuli kwa lihalimu ka nako ya Puso ya Lilimo ze Sikiti. (Sin. 20:4) Ba ka atula ni ku busa bo mañi? Kwa Mateu 19:28 ni Luka 22:30, lu bulelelwa kuli ba ka atula “masika a Isilaele a lishumi ka a mabeli.” “Masika a Isilaele a lishumi ka a mabeli” a swaniseza bo mañi mwa litimana zeo? A swaniseza batu kaufela ba ba na ni sepo ya ku pila fa lifasi—ba ba na ni tumelo mwa sitabelo sa Jesu kono ili ba ba siyo mwa sitopa sa malena ni baprisita. (Lusika lwa Livi ne lu sa balelwi kwa masika a 12 a Isilaele wa ka sipepo.) Batu ba ba swanisezwa ki masika a 12 a Isilaele ki bona ba ba ka fiwa limbuyoti ki ba 144,000 ha ba ka peta misebezi ya bona ya buprisita. Batu bao ba ba si baprisita ili ba ba ka tusiwa, ni bona ki batu ba Mulimu, mi wa ba lata ni ku ba amuhela. Kacwalo kwa swanela ha ba swanisezwa kwa sicaba sa hae sa kwakale.

⁷ Mi mane muapositola Joani ha sa boni batu ba 144,000 ba ba li Isilaele wa Mulimu inze ba swaiwa lwa mafelelezo, ñalelwa ye tuna i si ka taha kale, hape na boni “buñata bo butuna bwa batu” ba ba sa konwi ku balwa, ba ba “zwa mwa macaba kaufela.” (Sin. 7:9) Batu bao ba ka pululeza mwa ñalelwa ye tuna ni ku kena mwa lifasi le linca mwa Puso ya Kreste ya Lilimo ze Sikiti. Teñi mo ba ka pila hamoho ni batu ba bañata-ñata ba ba ka zusiwa kwa bafu. (Joa. 5:28, 29; Sin. 20:13) Batu bao kaufela ki bona ba ba ka ba “masika a Isilaele a lishumi ka a mabeli” a swanisezo, ili a ka atulwa ki Jesu ni ba 144,000 ba ba ka busa ni yena.—Lik. 17:31; 24:15; Sin. 20:12.

8. Lika ze ne eziwanga fa Lizazi la Swalelo ya Libi li swaniseza cwañi swalisano ye mwahalaa ba 144,000 ni batu ba bañwi kaufela?

⁸ Swalisano yeo ye mwahalaa ba 144,000 ni batu kaufela ba ba ka busiwa ki bona ne i swaniselizwe ki ze ne eziwanga fa Lizazi la Swalelo ya Libi ka silimo ni silimo. (Liv. 16:6-10) Muprisita yo muhulu na tokwa pili ku eza pohwana sitabelo sa sibi “bakeñisa hae tota, ni bakeñisa ba ndu ya hae.” Kacwalo, sitabelo sa Jesu pili si tusa ba ndu ya hae ba ba ka ba baprisita, ili ba ba ka sebeza ni yena kwa lihalimu. Fa Lizazi la Swalelo ya Libi ne ku fiwanga sitabelo sa licembwe ze peli bakeñisa libi za Maisilaele ba bañwi kaufela. Ka ku ya ka ze ne eziwanga fa lizazi leo, lusika lwa baprisita lu swaniseza ba 144,000, mi Maisilaele ba bañwi kaufela ba swaniseza batu kaufela ba ba na ni sepo ya ku pila fa lifasi. Taluso yeo i bonisa kuli pulelo ya “masika a Isilaele a lishumi ka a mabeli” ye kwa Mateu 19:28 ha i talusi ba ba ka ba baprisita ni Jesu ili ba ba tozizwe ka moya, kono i talusa batu ba bañwi kaufela ba ba lumela sitabelo sa Jesu. *

9. Baprisita ba na boni Ezekiele mwa pono ya tempele ba swaniseza bo mañi, mi Maisilaele be ne ba siyo mwa lusika lwa baprisita ba swaniseza bo mañi?

 ⁹ Mu nyakisise mutala o muñwi. Mupolofita Ezekiele na bonisizwe tempele mwa pono. (Ezek., likauha. 40-48) Mwa pono yeo, baprisita ne ba sebeleza mwa tempele, ili ku fa litaelo ni ku amuhela likelezo ni likalimelo ze zwa ku Jehova. (Ezek. 44:23-31) Mwa pono ye swana yeo, ba masika a shutana-shutana ne ba taha kwa ku lapela ni ku fa matabelo. (Ezek. 45:16, 17) Kacwalo mwa pono ye, baprisita ba swaniseza batoziwa, mi Maisilaele be ne ba siyo mwa lusika lwa baprisita ba swaniseza batu ba ba na ni sepo ya ku pila fa lifasi. Pono yeo i bonisa kuli likwata ze peli zeo li sebelisana hamoho, mi sitopa sa baprisita ki sona se si etelela mwa bulapeli bo bu kenile.

10, 11. (a) Ki talelezo mañi ya manzwi a Jesu ye tiisa tumelo ili ye lu iponezi? (b) Ki puzo mañi ye zuha ka za lingu ze ñwi?

¹⁰ Jesu na bulezi ka za “lingu ze ñwi” ze ne si ke za ba za “mulaka” wa “mutapinyana” wa balateleli ba hae ba ba tozizwe. (Joa. 10:16; Luka 12:32) Na ize: “Ni zona ni swanezi ku li tisa; mi li ka utwa linzwi la ka, mi ikaba mutapi u li muñwi, ni mulisana a li muñwi.” Ki nto ye tiisa tumelo luli ku bona talelezo ya manzwi ao! Likwata ze peli za batu li kopanyizwe hamoho—ili sikwatanyana sa ba ba tozizwe ni buñata bo butuna bwa lingu ze ñwi. (Mu bale Zakaria 8:23.) Nihaike kuli lingu ze ñwi ha li sebelezi mwa lapa la mwahali la tempele ya swanisezo, li sebeleza mwa lapa la kwande la tempele yeo.

¹¹ Kono bakeñisa kuli Maisilaele ba kwaikale be ne ba siyo mwa lusika lwa baprisita fokuñwi ba swanisezanga lingu ze ñwi, kana ba ba na sepo ya ku pila fa lifasi ni bona ba swanela ku canga kwa sinkwa ni ku nwa kwa veine ka nako ya Kupuzo? Cwale lu ka nyakisisa kalabo ya puzo yeo.

Bulikani bo Bunca

12. Ki tukiso ifi ye nca ya na polofitile Jehova?

¹² Jehova na polofitezi batu ba hae tukiso ye nca ha na ize: “Ki bo bulikani bo ni ka iswala ni ba ndu ya Isilaele, mazazi ao ha sa felile . . . Ni ka ñola mulao wa ka mwa lifuba za bona, ni u ñole mwa lipilu za bona. Ni ka ba Mulimu wa bona, bona i be sicaba sa ka.” (Jer. 31:31-33) Ka bulikani bo bunca bo, talelezo ya sepiso ya Jehova ku Abrahama i ka tahisa limbuyoti za kamita.—Mu bale Genese 22:18.

13, 14. (a) Ki bo mañi ba ba balelwa mwa bulikani bo bunca? (b) Ki bo mañi ba ba tusiwa ki bulikani bo bunca, mi ba ‘tiiseza cwañi ku bu tokomela’?

¹³ Jesu na amile kwa bulikani bo bunca bo mwa busihu bwa mafelelezo pili a si ka shwa kale ha na ize: “Sinwiso se, ki bulikani bo bunca bwa mwa mali a ka, a sululelwa mina.” (Luka 22:20; 1 Makor. 11:25) Kana ki Bakreste kaufela ba ba balelwa mwa bulikani bo bunca bo? Batili. Ki ba bañwi feela ku bona ba ba balelwa mwa bulikani bo, ka ku swana ni baapositola be ne ba nwezi mwa sinwiso seo manzibwana ani. * Jesu na isweli bulikani bo buñwi ni bona kuli ba yo busa hamoho ni yena mwa Mubuso  wa hae. (Luka 22:28-30) Ba ka sebelisana ni Jesu mwa Mubuso wa hae.—Luka 22:15, 16.

¹⁴ Ku cwañi ka za batu ba ba ka pila fa lifasi ili ba ba ka buswa ki Mubuso wa hae? Bona ba ka tusiwa ki bulikani bo bunca. (Magal. 3:8, 9) Niha ba sa balelwi mwa bulikani bo, ba ‘tiiseza ku bu tokomela’ ka ku mamela litaelo za bulikani bo, ku likana ni mwa na polofitezi Isaya kuli: “Bana ba macaba ba ba kumalezi Muñaa Bupilo, ku mu sebeleza ni ku lata Libizo la hae kuli ba be batanga ba hae, bona ba ba mamela la Pumulo ku sa li foseza, ba ba tiiseza ku tokomela bulikani bwa ka; luli, ni ka ba tisa kwa lilundu la ka le li kenile, ni ba tabise mwa Ndu ya ka ya tapelo.” (Isa. 56:6, 7) Mi cwale Jehova u bulela kuli: “Kakuli Ndu ya ka i ka bizwa kuli ki Ndu ya tapelo ya macaba kaufela.”—Isa. 56: 6, 7.

Ki bo Mañi ba ba Swanela ku ca Kwa Sinkwa ni ku Nwa Kwa Veine?

15, 16. (a) Ki mbuyoti mañi ya talusa muapositola Paulusi ye ba ka ba ni yona ba ba mwa bulikani bo bunca? (b) Ki kabakalañi ba ba na ni sepo ya ku pila fa lifasi ha ba sa cangi kwa sinkwa ni ku nwa kwa veine ka nako ya Kupuzo?

¹⁵ Ba ba mwa bulikani bo bunca ba “filwe tukelo ye tiile, ya kuli [ba] kene mwa Sibaka se si kenile.” (Mu bale Maheberu 10:15-20.) Ki bona ba ba ka ‘amuhela mubuso o sa zikinyehi.’ (Maheb. 12:28) Kacwalohe, ba ba ka ba malena ni baprisita ni Jesu Kreste mwa lihalimu ki bona feela ba ba swanela ku nwela mwa “sinwiso” se si yemela bulikani bo bunca. Ba ba mwa bulikani bo bunca bao ki bona ba ba beelelizwe ki Ngunyana. (2 Makor. 11:2; Sin. 21:2, 9) Batu ba bañwi kaufela ba ba fumanehanga kwa Kupuzo silimo ni silimo ba yo teelezanga feela ka likute mi ha ba cangi kwa sinkwa ni ku nwa kwa veine.

¹⁶ Paulusi hape u lu tusa ku utwisisa kuli ba ba na ni sepo ya ku pila fa lifasi ha ba cangi kwa sinkwa ni ku nwa kwa veine ka nako ya Kupuzo. Na taluselize Bakreste ba ba tozizwe kuli: “Kamita ha mu ca kwa buhobe bo, mi mu nwela mwa sinwiso seo, ikaba mu bulela lifu la Mulena, mane a kute.” (1 Makor. 11:26) Mulena u ‘kuta’ lili? U kuta ha ka to nga ba mafelelezo ba sitopa sa munyaliwa se si tozizwe kuli ba yo ina kwa lihalimu. (Joa. 14:2, 3) Taba yeo i bonisa hande kuli mukiti wa ka silimo ni silimo wa Mulalelo wa Mulena ha u na ku zwelapili ku ya ku ile. “Ba ba sa siyezi” fa lifasi ba peu ya musali ba ka zwelapili ku canga mulalelo wo ku fitela kaufelaa bona ba fiwa mupuzo wa bona kwa lihalimu. (Sin. 12:17) Kono kambe ba ba ka pila ku ya ku ile fa lifasi ni bona ba swanela ku canga kwa sinkwa ni ku nwa kwa veine, u zibe mulalelo wo wa Kupuzo ne u ka zwelapili ku ciwanga ku ya ku ile.

Ba “ka ba Sicaba sa Ka”

17, 18. Bupolofita bo bu ñozwi kwa Ezekiele 37:26, 27 bu talelelizwe cwañi?

¹⁷ Jehova na polofitile ka za swalisano ya sicaba sa hae kuli: “Ni ka swalana ni bona bulikani bwa kozo; bulikani bo ni ka iswala ni bona ki bo bu sa feli; ni ka ba tiisa, ni ba atiseze batu; mi Tempele ya ka ni ka i beya mwahalaa bona ku ya ku ile. Tabernakele ya ka i ka ina mwahalaa bona; Na, ni ka ba Mulimu wa bona, bona ba be sicaba sa ka.”—Ezek. 37:26, 27.

¹⁸ Batu ba Mulimu kaufela ba kona ku tusiwa ki talelezo ya sepiso ye makaza yeo, ya bulikani bwa kozo. Kaniti, Jehova u sepisize batu ba hae kaufela ba ba ipeya ku utwa kuli u ka ba fa kozo. Ba bonisa muselo wa moya wa hae. Tempele ya hae ye bulezwi fa, ili ye swaniseza bulapeli bwa Sikreste bo bu kenile, i mwahalaa bona. Ba bile  sicaba sa hae luli, kakuli ba tuhezi ku lapela milimu kaufela ya buhata mi ba lapela feela Jehova Mulimu.

19, 20. Ki bo mañi ba ba balelwa kwa batu bao Jehova a biza kuli “sicaba sa ka,” mi bulikani bo bunca bu konahalisa linto mañi?

¹⁹ Lu tabile hahulu ku iponela mutapinyana ha u swalisaniswa ni lingu ze ñwi! Buñata bo butuna bwa batu ba ba sweli ku ekezeha niha ba si na sepo ya ku pila kwa lihalimu, ba tabile ku ba ni tohonolo ya ku swalisana ni ba ba na ni sepo yeo. Ba kumalezi Isilaele wa Mulimu. Ka ku eza cwalo, ba balelwa kwa batu bao Jehova a biza kuli “sicaba sa ka.” Bupolofita bo bu latelela, bu talelezwa ku bona: “Macaba a mañata a ka kumalela Muñaa Bupilo mwa lizazi leo, mi a ka ba sicaba sa ka; ni ka yaha mwa naha ya hao.”—Zak. 2:11; 8:21; mu bale Isaya 65:22; Sinulo 21:3, 4.

²⁰ Ka bulikani bo bunca, Jehova u konahalisize linto zeo kaufela. Batu ba bañata-ñata ili ba ba zwa mwa macaba ba ekelizwe kwa sicaba sa Jehova se si shemubilwe ki yena. (Mika 4:1-5) Ba ikatulezi ku tiiseza ku tokomela bulikani bo ka ku amuhela ni ku latelela litaelo za bona. (Isa. 56:6, 7) Ka ku eza cwalo, bona hamoho ni Isilaele wa Mulimu ba ikola mbuyoti ya ku ba ni kozo ye sa feli. Haike ni mina mu ikole kozo ye cwalo ka nako ya cwale mane ni ku ya ku ile!

[Litaluso za kwatasi]

Kana Mwa Hupula?

• Ki bo mañi ba ba li “masika a Isilaele a lishumi ka a mabeli” a ka atulwa ki ba 144,000?

• Ki ifi swalisano ye li teñi mwahalaa batoziwa ni bulikani bo bunca, ni ye li teñi mwahalaa lingu ze ñwi ni bulikani bo?

• Kana Bakreste kaufela ba swanela ku canga kwa sinkwa ni ku nwa kwa veine ka nako ya Kupuzo?

• Ki swalisano ifi ye ne polofitilwe kuli i ka ba teñi mwa miteñi ya luna?

[Lipuzo za Tuto]

[Grafu/Maswaniso a fa likepe 25]

(Kuli mu bone mo i hatiselizwe luli, mu bone hatiso)

Batu ba bañata cwale ba sebeza hamoho ni Isilaele wa Mulimu

7,313,173

4,017,213

1,483,430

373,430

1950 1970 1990 2009