Pâwl Khat, Vêngtu Pakhat
Pâwl Khat, Vêngtu Pakhat
“Nangni mi zuituteho hi, Israel hnam sâwm leh hnam hnihte chu ngaihtuahin, lalṭhutphah sâwm leh pahnihah in la ṭhu ve ang.”—MT. 19:28.
1. Engtin nge Pathian Jehova chuan Abrahama thlahte chu a dâwr a, engvângin nge chu chu mi dang zawng zawng a ngaihthah hmak tihna a nih loh?
PATHIAN JEHOVA chuan Abrahama chu a hmangaih a, chuvângin a thlahte chungah hmangaihna rinawm A lantîr a ni. Kum zabi 15 aia tam chhûng zawng Abrahama thlah Israelte chu Pathian hnam thlan, a “pual bîk” an ni. (Deuteronomy 7:6 chhiar rawh.) Pathian Jehova chuan mi dang zawng zawngte a ngaihthah hmak tihna a ni em? Ni lo ve. Israelte a ta neih lai pawhin, Israel mi ni lote zînga Pathian Jehova be duhte chu a hnam thlan bîkte nêna an inzawm a phal a. Chutiang mi, a nih loh leh saphunte chu Israel hnam zînga mi anga thlîr an ni a. Anni chu unau anga ngaih tûr an ni. (Lev. 19:33, 34) Tin, Pathian Jehova dân thu zawng zawngte chu an zâwm tlat tûr a ni bawk.—Lev. 24:22.
2. Isua chuan eng thu dangdai tak nge a puan chhuah a, chu chuan eng zawhnate nge a siam?
2 Amaherawhchu, Isua chuan a hun laia Judate hnênah he thu dangdai tak hi a puang chhuak a ni: “Pathian ram chu in hnên ata lâksak a ni ang a, a rah chhuah tûr hnam hnênah pêk a ni ang,” tih hi. (Mt. 21:43) He hnam thar hi tute hmanga din tûr nge ni a, he inthlâkthlengna hian tûn laiah engtin nge min nghawng?
Hnam Thar Chu
3, 4. (a) Engtin nge tirhkoh Petera chuan hnam thar chu a târ lan? (b) He hnam thar hi tute hmanga din nge ni?
3 Tirhkoh Petera chuan chu hnam thar chu a Kristian unaute hnênah chiang takin a târ lang a ni: “Thim ata chhuaka, a êng mak taka lût tûra kotu che u ṭhatna chu in entîr theih nân nangni zawng chi thlan, lal puithiamho, hnam thianghlim, Pathian mite ngei in ni,” tia ziakin. (1 Pet. 2:9) Sawi lâwk tawh angin, Messia anga Isua pawmtu tisa lama Judate chu hnam thar zînga mi ni hmasa berte an ni a. (Dan. 9:27a; Mt. 10:6) A hnuah chuan, Israel mi ni lo mi tam tak chu hnam thar zîngah an lo tel a ni, Petera’n: “Hmân lai khân mi rêng in ni lo va, tûnah erawh chuan Pathian mi in ni ta a,” tiin a sawi si a.—1 Pet. 2:10.
4 Petera biak chu tute nge ni? A lehkha thawn tîr lamah: “[Pathian chuan] mitthi zîng ata Isua Krista thawhlehna avângin beiseina nung hmu tûrin min hring leh a, rochan chhe thei lo, bawlhhlawh kai lo, chuai thei lo, vâna in tâna khêk chu hmuhna tûrin,” tiin a sawi a ni. (1 Pet. 1:3, 4) Chuvângin, chu hnam thar chu hriak thih Kristian, vân lam beiseina neite hmanga din a ni a. Anni chu “Pathian Israelte” an ni. (Gal. 6:16) Tirhkoh Johana chuan inlârnaah chûng thlarau lam Israelte chu mi 1,44,000 an ni tih a hmu a. Anni chu “Pathian tân leh Berâm No tân rah hmasa ber ni tûrin mihring zîng ata tlan” an ni a, “puithiamte” niin, ‘[Isua] nên kum sângkhat ro an rêl ang.’—Thup. 5:10; 7:4; 14:1, 4; 20:6; Jak. 1:18.
Mi Dangte Pawh An Tel Ve Em?
5. (a) “Pathian Israelte” tih ṭawngkam hi tute tâna hman nge ni? (b) Engvângin nge “Israel” tih thu mal hi thil pakhat chauh sawi nâna hman a nih reng loh?
5 Galatia 6:16-a kan hmuh “Pathian Israelte” tih hi hriak thih Kristiante chauh sawina a ni tih a chiang hle. Mahse, Pathian Jehova chuan Israel hnam chu hriak thihte bâka Kristian dang telna entîr nâna hman châng a nei em? A chhânna chu, tirhkoh rinawmte hnêna Isua thusawi: “Ka rama ka dawhkâna in eia in bâr theihna tûrin, ka Pain ram mi ruatsak angin ram ka ruatsak che u a ni; tichuan Israel hnam sâwm leh hnam hnih rorêlsakin lalṭhutphahah in la ṭhu ang,” tihah hian kan hmu thei a ni. (Lk. 22:28-30) Chu chu ‘siam tharna’ hun, Krista Kum Sâng Rorêl hun chhûngin a thleng ang.—Matthaia 19:28 chhiar rawh.
6, 7. Matthaia 19:28 leh Luka 22:29, 30-a “Israel hnam sâwm leh hnam hnihte” chuan tute nge a entîr?
6 Mi 1,44,000-te chu Kum Sâng Rorêl chhûnga vân lam lalte, puithiamte, leh rorêltu tûrte an ni a. (Thup. 20:4) Tute chungah nge ro an rêl ang a, tute chungah nge lal an nih ang? Matthaia 19:28 leh Luka 22:29, 30 chuan, “Israel hnam sâwm leh hnam hnihte” chunga rorêl tûr an nih thu min hrilh a ni. He mi thu-ah hian “Israel hnam sâwm leh hnam hnihte” chuan tute nge an entîr? Anni chuan lei lam beiseina nei zawng zawng—Isua tlanna inthawina ring chung pawha lal puithiamho zînga tel lote—an entîr a ni. (Tisa lam Israel hnam 12-te zîngah hian Levia puithiam hnam chu chhiar tel a ni lo.) He mi thu-a Israel hnam 12-in a entîrte chu mi 1,44,000-te puithiam rawngbâwlna thlarau lama hlâwkpuitu tûrte an ni. Hêng puithiam ni si lova a hlâwkna têltute pawh hi Pathian mite an ni ve tho va, ani chuan a hmangaihin, a pawm bawk a ni. Hmân laia a mite nêna chûng mite khaikhin chu a âwm hle.
7 Tirhkoh Johana chuan thlarau lam Israel, mi 1,44,000-te chu hrehawm nasa tak a lo thlen hmaa chhinchhiahna hnuhnûng zâwk pêk an nih lai a hmuh hnuah, “hnam tin zînga mi” “mipui tam tak” chhiarsên lohte a hmu pawh hi a inâwm hle a ni. (Thup. 7:9) Chûng mite chu hrehawm nasa takah dam khawchhuakin, Krista Kum Sâng Rorêlnaah an lût ang a. Chutah chuan tholeh mi tlûklehdingâwn tam takin an fin ang. (Joh. 5:28, 29; Thup. 20:13) Chûng mi zawng zawngte chu Isua leh a rorêlpui mi 1,44,000-te rorêlna hnuaia awm tûr, entîr nei “Israel hnam sâwm leh hnam hnihte” an ni.—Tirh. 17:31; 24:15; Thup. 20:12.
8. Engtin nge Inremna Nî-a thiltihte chuan 1,44,000-te leh mi dang zawngte inlaichînna chungchâng a entîr lâwk?
8 Inremna Nî-a thilthleng khân mi 1,44,000-te leh mi dang zawngte inlaichînna chu a lo entîr lâwk a ni. (Lev. 16:6-10) Chu mi nî chuan, puithiam lal chuan “amah leh a chhûngte tân” sual thawina bâwngpa a hlan hmasak phawt a ngai a. Chuvângin, Isua inthâwina chu vâna a rorêlpui tûr, a hnuaia puithiam hna thawktu a chhûngte tân a ni phawt a ni. Tin, chu mi nîah vêk chuan, Israel mi dangte sual thawi nân kêl pahnih hman a ni bawk. He mi chungchângah hian, puithiam hnam chuan 1,44,000-te a entîr laiin, Israel mipui dangte chuan lei lam beiseina neite a entîr thung a ni. Hei hian Matthaia 19:28-a “Israel hnam sâwm leh hnam hnihte” tih ṭawngkam hi thlarauva hrin Isua hnuaia puithiam hna thawktute ni lovin, Isua inthawina ringtu dang zawng zawngte sawina a nihzia a târ lang a ni. *
9. Ezekiela hmuh biak in inlârnaa puithiamte’n tute nge an entîr a, puithiam ni lo Israel mite’n tute nge an entîr?
9 Entîrna dang ngaihtuah leh ta ila. Zâwlnei Ezekiela chu Pathian Jehova biak in inlârna chipchiar tak hmuhtîr a ni a. (Ezek., bung 40-48) Chu inlârnaah chuan, puithiamte chuan biak in chhûngah rawng an bâwl a, mipuite tân kaihhruaina an pein, Pathian Jehova thununna leh zilhna an dawng bawk a ni. (Ezek. 44:23-31) Chu inlârnaah bawk chuan, hnam chi hrang hranga mite pawh Pathian chibai bûk tûr leh inthawina hlân tûrin an lo kal bawk. (Ezek. 45:16, 17) Chuti a nih chuan, he mi-ah bîk hian puithiamte chuan hriak thihte a entîr a, puithiam ni lo Israelte chuan lei lam beiseina neite a entîr thung a ni. He inlârna hian pâwl hnihte’n inlungrual takin rawng an bâwl tlâng a, puithiamte chuan biakna thianghlimah hma an hruai tih a târ lang a ni.
10, 11. (a) Rinna tichak thei tak, Isua thute thlen famkimna eng nge kan hmuh? (b) Berâm dangte chungchângah eng zawhna nge lo chhuak?
10 Isua chuan a hnungzuitu hriak thih “pâwl tlêmte” “huanga” mi ni lo “berâm dang” chungchâng a sawi a. (Joh. 10:16; Lk. 12:32) Ani chuan: “Anni pawh ka la rawn hruai tûr a ni, ka aw pawh an hria ang; chutichuan pâwl khatin an awm ang a, vêngtu pakhat nên,” tiin a sawi a ni. Chûng thute thlen famkimna hmuhna chuan rinna a va tichak tak êm! Pâwl hniha mite chu an infinkhâwm a ni—hriak thih pâwl tlêmte leh berâm dang mipui tam takte chu. (Zakaria 8:23 chhiar rawh.) Berâm dangte chuan thlarau lam biak in hung chhûngnung zâwkah rawngbâwl lo mah se, biak in hung chhûng pâwnta zâwkah an bâwl tiin a sawi theih a ni.
11 Mahse, Pathian Jehova’n puithiam ni lo hmân lai Israelte chu berâm dangte entîr nâna hman châng a neih chuan, lei lam beiseina neitute chuan Hriatrengna entîrnate chu an eiin an in ve tûr a ni em? Tûnah chu zawhna chhânna chu kan lo ngaihtuah ang?
Thuthlung Thar
12. Eng ruahmanna thar nge Pathian Jehova’n a sawi lâwk?
12 Pathian Jehova chuan: “Chûng nî hnua Israel chhûngte hnêna thu ka thlun tûr erawh chu hei hi a ni. . . . An chhûngrilahte ka thupêk ka dah ang a, an thinlungah ka ziak bawk ang a, kei hi an Pathian ka ni ang a, anni chu ka mite an ni ang,” tia sawiin a mite tâna ruahmanna thar chungchâng chu a lo sawi lâwk a. (Jer. 31:31-33) He thuthlung thar hmang hian, Abrahama hnêna Pathian Jehova thutiam chuan thlen famkimna ropui leh tluantling zâwk a nei tûr a ni.—Genesis 22:18 chhiar rawh.
13, 14. (a) Tute nge thuthlung thara telte chu? (b) Tute nge a hlâwkpuitute chu ni a, engtin nge chu thuthlung thar chu an “pawm tlat”?
13 Isua’n a thih hma zâna: “He no hi ka thisena thuthlung thar chu a ni, in aia chhuak tûra chu,” tia a sawi khân he thuthlung thar chungchâng hi a sawi a ni. (Lk. 22:20; 1 Kor. 11:25) Chu thuthlung tharah chuan Kristian zawng zawng an tel vek em? Tel vek lo. Chu mi zâna chu no intu tirhkohte ang mi ṭhenkhatte chauh an tel a ni. * Isua chuan anni chu a Lalrama a rorêlpui tûrin thuthlung dang a siampui bawk a. (Lk. 22:28-30) Anni chu Isua nên a Lalramah an awm ang.—Lk. 22:15, 16.
14 A Lalram hnuaia leia nung tûrte chungchâng hi eng nge ni ve le? Anni chu chu thuthlung thar hlâwkpuitute an ni a. (Gal. 3:8, 9) Zâwlnei Isaia’n: “Ram dang mite pawh, chawlhni bawhchhe lova serh ṭhîn leh, ka thuthlung pawm tlat apiang, LALPA rawng bâwl tûr leh, LALPA hming ngaina tûr leh, a chhiahhlawhahte awm tûra LALPA zawm apiangte chu; anni ngei chu ka tlâng thianghlimah chuan ka hruai ang a, ka ṭawngṭaina inah ka tihlim ang,” tia a lo hrilh lâwk ang chiahin, chu thuthlungah chuan tel ve lo mah se, a thil phûtte zâwmin, anni chuan chu thuthlung chu an “pawm tlat” a ni. Tichuan, Pathian Jehova chuan: “Ka in chu mi tinrêng tân ṭawngṭaina in an ti dâwn si a,” tiin a sawi a ni.—Is. 56:6, 7.
Tute’n Nge Entîrnate chu Eia In?
15, 16. (a) Tirhkoh Paula chuan thuthlung thar chu eng nên nge a thlun zawm? (b) Engvângin nge lei lam beiseina neite chuan Hriatrengna entîrna chu an eia an in loh?
15 Thuthlung thara mite chuan ‘hmun thianghlima luh chu an huam a.’ (Hebrai 10:15-20 chhiar rawh.) Anni chu “ram tihnghîn rual loh” changtu tûrte an ni. (Heb. 12:28) Chuti a nih chuan, vâna Isua Krista nêna lal leh puithiam ni tûrte chauh chuan thuthlung thar entîrtu “no” chu an in tûr a ni. Thuthlung thara tel hêng mite hi Berâm No nupui ni tûra tiamte chu an ni a. (2 Kor. 11:2; Thup. 21:2, 9) Kum tina neih Hriatrengnaa lo tel mi dang zawng zawngte chu a entîrna eia in lo, zah taka thlîrtute an ni.
16 Paula pawhin lei lam beiseina neite’n Hriatrengna entîrna an eiin an in lo tih hre thiam tûrin min ṭanpui a. Ani chuan hriak thih Kristiante hnênah: “Chu chhang chu in ei a, no chu in in apiangin, a lo kal leh hma loh zawng Lalpa thihna chu in entîr ṭhîn a ni si a,” tiin a hrilh a. (1 Kor. 11:26) Engtikah nge Lalpa chu ‘a lo kal ang’? A hriak thih mo pâwl zînga a hnuhnûng berte an vân lam ina a lâk hunah a ni. (Joh. 14:2, 3) Chuvângin, Lalpa Zanriah kum tina neih ṭhin chu tâwp nei lo va hman tûr a ni lo tih a chiang hle. Hmeichhe thlah he leia “la awm,” a nih loh leh la bângte chuan an zaa vân lam lâwmman an dawn kim vek thleng chauh chu zanriah chu kîl chhunzawm tûr an ni a. (Thup. 12:17) Leia chatuana nung tûrte’n entîrna chu an eia an in ve te chuan, he Hriatrengna zanriah hi chatuana kîl chhunzawm zêl a ngai dâwn tihna a ni asin.
“Anni Chu Ka Mite An Ni Ang”
17, 18. Engtin nge Ezekiela 37:26, 27-a chhinchhiah hrilh lâwkna chu a thlen famkim mêk?
17 Pathian Jehova chuan a mite inlungrual dân chu hêng thute hmang hian a sawi lâwk a: “Chu lo pawh chu anmahni hnênah remna thuthlung ka siam ang a, an tân kumkhaw thuthlung a ni ang a, an hnênah ka pe ang a, anni chu ka tipung ang a, an zîngah chuan kumkhuain ka biakbûk ka dintîr ang. Ka bâwktê pawh an hnênah a awm ang a, an Pathian ka ni ang a, anni chu ka mite an ni ang,” tiin.—Ezek. 37:26, 27.
18 Pathian mi zawng zawngte chuan he thutiam ropui tak, Kristiante remna thuthlung hi an hlâwkpui vek thei a ni. Ni e, Pathian Jehova chuan a chhiahhlawh thuâwih zawng zawngte chu remna a tiam a. A thlarau rah chu an zîngah a lang a. A hmun thianghlim—Kristiante biakna thianghlim—chu an zîngah a awm a ni. Milem biakna chi hrang hrang kalsana Pathian Jehova chauh an biak avângin, anni chu a mite an ni tak zet a ni.
19, 20. Pathian Jehova’n “ka mite” a tihah hian tute nge tel ve a, thuthlung thar chuan eng nge a nih theihtîr?
19 Tûn laiah pâwl hnihte inlungrual taka an awm hmuh chu a va phûrawm êm! Mipui tam tak pung chho rengte chuan vân lam beiseina nei lo mah se, a neite ṭhian nih chu chawimawinaah an ngai a. Pathian Israelte chu an zawm a ni. Chutianga tiin, Pathian Jehova’n “ka mite” a tihte zîngah an tel ve a. Anmahniah chuan: “Chumi nîah chuan hnam tam takin LALPA chu an rawn zawm ang a, ka mite an ni ang: tin, i hnênah chuan ka chêng ang,” tih hrilh lâwkna thlen famkimna hi kan hmu a ni.—Zak. 2:11; 8:21; Isaia 65:22; Thu Puan 21:3, 4 chhiar rawh.
20 Pathian Jehova chuan a thuthlung thar hmangin chûng zawng zawng chu a nih theihtîr a. Thlarau lama ram dang mi maktaduai têlte chu Pathian Jehova duhsak hnam zîngah an lo tel a ni. (Mik. 4:1-5) Anni chuan thuthlung ruahmannate pawm a, a thil phûtte zâwmin chu thuthlung chu pawm chhunzawm an tum tlat a. (Is. 56:6, 7) Chutianga tiin, Pathian Israelte rualin, malsâwmna nasa tak remna chu an chên chhunzawm zêl a ni. Chu chu tûnah leh hun lo la awm tûra i thiltawn ni mawlh rawh se! (w10-E 03/15)
[Footnote-te]
^ par. 8 Chutiang bawkin, hriak thihte chu “kohhranho” tia sawi bîk an ni a. (Heb. 12:23) Amaherawhchu, “kohhran” tih thu mal hian awmze dang a nei thei a; an beiseina chu eng pawh ni se, Kristian zawng zawngte sawi nâna hman a ni.—May 1, 2007 chhuak Vênnainsâng, phêk 9-11 en ang che.
^ par. 13 Isua chu chu thuthlunga tel ve ni lovin, a Palai a ni a. Palai a nih angin, entîrna chu a eiin a in ve lo a ni.
Kan La Hria Em?
• Mi 1,44,000-te rorêlna hnuaia awm tûr “Israel hnam sâwm leh hnam hnihte” chu tute nge ni?
• Thuthlung thara hriak thihte leh berâm dangte inlaichînna chu eng nge ni?
• Kristian zawng zawngin Hriatrengna entîrna chu an eiin, an in tûr a ni em?
• Tûn laia inlungrualna chungchâng eng nge hrilh lâwk a nih?
[Zirlai Atâna Zawhnate]
[Phêk 29-naa graph/milemte]
(A lan dân tûr dik tak hriat nân, a lehkhabu en rawh)
Mi tam takin tûn laiah Pathian Israelte rualin rawng an bâwl
73,13,173
40,17,213
14,83,430
3,73,430
1950 1970 1990 2009