Ún Tou ku Ún Wardadó

“Boso ku a sigui mi tambe lo sinta riba diesdos trono i husga e diesdos tribunan di Israel.”​—MAT. 19:28.

1. Kon Yehova a trata Abraham su desendientenan, i dikon esaki no ta nifiká ku el a ignorá tur otro pueblo?

YEHOVA tabata stima Abraham. P’esei, el a demostrá su amor leal na Abraham su desendientenan. Pa mas ku 15 siglo, el a konsiderá e pueblo di Israel, e desendientenan di Abraham, komo su pueblo skohí, su “pueblo spesial.” (Lesa Deuteronomio 7:6.) Esei a nifiká ku Yehova a ignorá hende di otro nashon? Nò. Durante e tempu ei, Yehova a permití hende ku no tabata israelita, pero ku a deseá di ador’é, djòin su nashon spesial. El a konsiderá e prosélitonan akí, esta, personanan ku a kombertí na hudaismo, komo parti di e nashon. E israelitanan mester a trata nan manera ruman. (Lev. 19:​33, 34) I nan tambe mester a obedesé tur e leinan di Yehova meskos ku e israelitanan.​—Lev. 24:22.

2. Ki deklarashon sorprendente Hesus a hasi, i ki pregunta esaki ta lanta?

² Sinembargo, Hesus a hasi e deklarashon sorprendente akí na e hudiunan den su tempu: “E reino di Dios lo wòrdu kitá for di boso, i duná na un nashon ku sí ta hasié produsí fruta.” (Mat. 21:43) Ken lo a forma parti di e nashon nobo akí, i ki efekto e kambio akí tin riba nos awe?

 E Nashon Nobo

3, 4. (a) Kon apòstel Pedro a identifiká e nashon nobo? (b) Ken ta forma parti di e nashon nobo akí?

³ Apòstel Pedro a identifiká e nashon nobo akí na un manera masha kla. Den su karta, el a bisa su kompañeronan kristian lo siguiente: “Boso ta un rasa skohí, un saserdosio real, un nashon santu, un pueblo pekuliar, pa boso por proklamá e alabansanan di esun ku a yama boso for di skuridat na su lus maravioso.” (1 Ped. 2:9) E hudiunan ku a aseptá Hesus komo e Mesias tabata e promé miembronan di e nashon nobo ei. I di e manera ei, e profesia ku a bisa ku pa un periodo di tempu e Mesias “tin ku mantené e pakto na vigor pa hopi hende” a haña su kumplimentu. (Dan. 9:27a, NW; Mat. 10:6) Despues, hopi hende ku no tabata israelita tambe por a bira parti di e nashon akí, pasobra Pedro a sigui bisa: “Un tempu boso no tabata un pueblo, ma awor boso ta e pueblo di Dios.”​—1 Ped. 2:10.

⁴ Ku ken Pedro tabata papia akinan? Na prinsipio di su karta, el a bisa: “[Dios] a hasi nos nase di nobo den un speransa bibu pa medio di e resurekshon di Hesukristu for di e mortonan, pa optené un herensia ku ta inkoruptibel i sin mancha i ku lo no marchitá, ku ta reservá den shelu pa boso.” (1 Ped. 1:​3, 4) Pues, e nashon nobo akí ta konsistí di kristiannan ungí, kendenan tin e speransa di bai shelu. Nan ta “e Israel di Dios.” (Gal. 6:16) I den un vishon, apòstel Juan a mira ku e israelitanan spiritual akí ta 144.000 persona. Ademas, nan a ser “kumprá for di entre hende komo e promé frutanan pa Dios i pa e Lamchi” pa sirbi komo ‘saserdote’ i pa “reina huntu ku [Hesus] pa mil aña.”​—Rev. 5:10; 7:4; 14:​1, 4; 20:6; Sant. 1:18.

Ta e Ungínan So e Nashon di Israel A Prefigurá?

5. (a) Na ken e ekspreshon “Israel di Dios” ta referí? (b) Dikon no ta tur biaha e palabra “Israel” ta referí na e ungínan?

⁵ Ta klaru ku e frase “Israel di Dios” na Galationan 6:16 ta referí eksklusivamente na e kristiannan ungí. Sinembargo, Beibel sa usa e nashon di Israel pa prefigurá, òf representá, kristiannan ku no ta ungí? Nos por haña e kontesta pa e pregunta ei den loke Hesus a bisa su apòstelnan fiel: “Meskos ku mi Tata a laga un reino pa mi, mi ta laga pa boso, pa boso kome i bebe na mi mesa den mi reino, i boso lo sinta riba trononan pa husga e diesdos tribunan di Israel.” (Luk. 22:​28-30) Esaki lo sosodé durante e tempu di “e regenerashon,” òf rekreashon, ku lo tuma lugá durante e Gobernashon di Mil Aña di Kristu.​—Lesa Mateo 19:28.

6, 7. Den e konteksto di Mateo 19:28 i Lukas 22:30, na ken e ekspreshon “e diesdos tribunan di Israel” ta referí?

⁶ Sí, e 144.000 lo sirbi komo rei, saserdote i hues selestial durante e Reino di Mil Aña. (Rev. 20:4) Pero, ken nan lo husga, i riba ken nan lo goberná? Mateo 19:28 i Lukas 22:30 ta bisa nos ku nan lo husga “e diesdos tribunan di Israel.” Ken “e diesdos tribunan di Israel” ta prefigurá den e konteksto akí? Nan ta  representá tur hende ku tin speransa pa biba riba tera pa semper—esnan ku tin fe den e sakrifisio di Hesus pero ku no ta forma parti di e grupo di rei i saserdote. (E tribu saserdotal di Levi no tabata inkluí den e lista di e 12 tribunan di Israel.) Pues, den e konteksto akí, e 12 tribunan di Israel ta prefigurá e personanan ku lo disfrutá di e benefisionan spiritual ku e sirbishi saserdotal di e 144.000 ta trese kuné. Ounke esnan ku ta benefisiá no ta saserdote, nan tambe ta forma parti di e pueblo di Dios, i e ta aseptá nan i ta stima nan. P’esei, korektamente nan ta ser kompará ku Yehova su pueblo di antigwedat.

⁷ Na armonia ku esei, despues ku apòstel Juan a mira kon e 144.000 israelitanan spiritual a ser seyá permanentemente promé ku e tribulashon grandi, el a mira tambe un “multitut grandi” inkontabel di hende ku ta sali for “di tur nashon.” (Rev. 7:9) E personanan akí lo sobrebibí e tribulashon grandi i lo bai biba bou di e Reino di Mil Aña di Kristu. Bou di e Reino ei, míles di miónes di hende ku lo resusitá despues lo djòin nan. (Juan 5:​28, 29; Rev. 20:13) Nan tur huntu ta forma e ‘diesdos tribunan simbóliko di Israel’ ku Hesus i su 144.000 ko-gobernantenan lo husga.​—Echo. 17:31; 24:15; Rev. 20:12.

8. Den ki sentido e susesonan riba e Dia di Ekspiashon ta prefigurá e relashon entre e 144.000 i e restu di humanidat?

⁸ E susesonan riba e Dia di Ekspiashon a prefigurá e relashon entre e 144.000 i e restu di humanidat. (Lev. 16:​6-10) E Lei a rekerí pa, promé ku tur kos, e sumo saserdote hasi sakrifisio di un toro komo un ofrenda di piká “pa su mes i pa e hendenan di su kas.” Pues na promé lugá, Hesus su sakrifisio a apliká na su kas ku a konsistí di e 144.000 personanan ku lo sirbi komo saserdote huntu kuné den shelu. Riba e Dia di Ekspiashon, e sumo saserdote a presentá tambe dos kabritu pa e pikánan di e otro israelitanan. Den e konteksto akí, e tribu saserdotal ta prefigurá e 144.000, i e sobrá israelitanan ta prefigurá tur hende ku tin speransa di biba riba tera pa semper. E aplikashon akí ta mustra ku e ekspreshon “e diesdos tribunan di Israel” na Mateo 19:28 no ta referí na Hesus su saserdotenan ungí ku spiritu santu, sino na tur otro persona ku ta pone fe den e sakrifisio di Hesus. *

9. Ken e saserdotenan den Ezekiel su vishon di tèmpel ta representá, i ken e israelitanan ku no tabata saserdote ta representá?

⁹ Laga nos konsiderá un otro ehèmpel. Profeta Ezekiel a haña un vishon ekstenso di e tèmpel di Yehova. (Eze., kap. 40-48) Den e vishon ei, el a mira kon e saserdotenan tabata traha den e tèmpel, duna instrukshon i risibí konseho i korekshon for di Yehova pa e pueblo. (Eze. 44:​23-31) Ademas, el a mira kon miembronan di vários tribu tabata bin adorá i ofresé  sakrifisio. (Eze. 45:​16, 17) Pues, den e konteksto akí, e saserdotenan ta prefigurá e ungínan, i e israelitanan di e tribunan no-saserdotal ta prefigurá e hendenan ku tin speransa di biba riba tera pa semper. E vishon ta enfatisá ku e dos gruponan ta traha huntu den armonia, i ku e grupo di saserdote ta esun ku ta hiba delantera den adorashon puru.

10, 11. (a) Ki kumplimentu ku ta fortalesé fe nos a mira di e palabranan di Hesus? (b) Ki pregunta ta lanta tokante e otro karnénan?

¹⁰ Hesus a papia di “otro karnénan,” kendenan lo no ta di e mesun “kurá” ku e “tou chikitu” di su siguidónan ungí. (Juan 10:16; Luk. 12:32) El a bisa: “Nan tambe mi mester trese, i nan lo tende mi bos; i nan lo bira ún tou ku ún wardadó.” E echo ku nos ta mira kon e palabranan akí ta haña nan kumplimentu ta fortalesé nos fe. Sí, dos grupo di hende a uni, esta, e grupo chikitu di kristiannan ungí i e multitut grandi di otro karnénan. (Lesa Zakarias 8:23.) Ounke e otro karnénan no ta sirbi den e plenchi paden di e tèmpel spiritual, nan ta sirbi sí den e plenchi pafó di e tèmpel.

¹¹ Pero e echo ku Beibel sa usa e miembronan no-saserdotal di antiguo Israel pa prefigurá e otro karnénan ta nifiká ku nan tambe mester tuma di e emblemanan di Memorial? Nos lo konsiderá e kontesta pa e pregunta akí den e siguiente paragrafnan.

Un Pakto Nobo

12. Tokante ki pakto nobo Yehova a profetisá?

¹² Yehova a profetisá tokante un aliansa, òf pakto, nobo ku lo el a sera ku su pueblo ora el a bisa: “Esaki ta e aliansa ku lo mi sera ku e kas di Israel despues di e dianan ei. . . . Lo mi pone mi lei den nan i lo mi skirbié riba nan kurason; i ami lo ta nan Dios i nan lo ta mi pueblo.” (Jer. 31:​31-33) Mediante e pakto nobo akí, e promesa ku Yehova a hasi na Abraham lo a haña un kumplimentu glorioso i duradero.​—Lesa Génesis 22:18.

13, 14. (a) Ken ta e partisipantenan den e pakto nobo? (b) Ken ta esnan ku ta benefisiá, i kon nan “ta tene firme” na e pakto nobo akí?

¹³ Hesus a referí na e pakto nobo akí riba e anochi promé ku su morto ora el a bisa: “E kopa akí, ku a wòrdu dramá pa boso, ta e aliansa nobo den mi sanger.” (Luk. 22:20; 1 Kor. 11:25) Ta tur kristian ta inkluí den e pakto nobo akí? Nò. Ta algun di nan, manera e apòstelnan ku a bebe di e kopa e anochi ei, ta e partisipantenan den e pakto nobo. * I ta ku nan Hesus a sera un otro pakto pa nan goberná kuné den su Reino. (Luk. 22:​28-30) Nan lo ta huntu ku Hesus den su Reino.​—Luk. 22:​15, 16.

¹⁴ Awor, kiko di e hendenan ku lo biba riba tera bou di su Reino? Nan ta esnan ku lo benefisiá di e pakto nobo. (Gal. 3:​8, 9) Ounke nan no ta partisipante, nan ta kumpli ku e rekisitonan di e aliansa, òf pakto, akí; asina nan “ta tene firme” na dje manera profeta Isaias a profetisá: “E stranheronan ku uni nan mes ku SEÑOR, pa sirbié, i pa stima e nòmber di SEÑOR, pa ta su sirbidónan, kada un ku no ta profaná dia di sabat, i ta tene firme na mi aliansa, eseinan lo mi hiba na mi seru santu, i lo mi hasi nan kontentu den mi kas di orashon.” Despues di esei, Yehova a bisa: “Mi kas lo wòrdu yamá kas di orashon pa tur e pueblonan.”​—Isa. 56:​6, 7.

 Ken Mester Tuma di e Emblemanan?

15, 16. (a) Ku ki privilegio apòstel Pablo a relashoná e partisipantenan di e pakto nobo? (b) Dikon esnan ku tin speransa pa biba riba tera pa semper no mester tuma di e emblemanan di Memorial?

¹⁵ E kristiannan ku ta den e pakto nobo “tin konfiansa pa drenta e lugá santu.” (Lesa Hebreonan 10:​15-20.) Nan ta esnan ku lo “risibí un reino ku no por wòrdu sagudí.” (Heb. 12:28) Pues, ta solamente personanan ku lo sirbi komo rei i saserdote den shelu huntu ku Hesukristu mester bebe di e “kopa” ku ta representá e pakto nobo. E partisipantenan di e pakto nobo ta esnan ku ta komprometí pa kasa ku e Lamchi. (2 Kor. 11:2; Rev. 21:​2, 9) Tur sobrá hende ku ta asistí na e Memorial anual ta opservadónan respetuoso, ku no ta tuma di e emblemanan.

¹⁶ Pablo tambe ta yuda nos komprondé ku hende ku tin speransa di biba pa semper riba tera no ta tuma di e emblemanan di Memorial. El a bisa e kristiannan ungí: “Pasobra kada bes ku boso kome e pan akí i bebe e kopa akí, boso ta proklamá e morto di Señor te ora ku e bin.” (1 Kor. 11:26) Na ki tempu e Señor ta “bin”? Esei ta ora e bin pa hiba e último miembronan di su brùit na nan kas den shelu. (Juan 14:​2, 3) Ta klaru anto ku e selebrashon anual di e Sena di Señor no ta sigui pa semper. “E restu” di e simia di e muhé ku ta riba tera ainda lo sigui tuma di e emblemanan na e sena te ora nan tur risibí nan rekompensa selestial. (Rev. 12:17) Pero si e hendenan ku lo biba pa semper riba tera tambe tin mag di tuma di e emblemanan, esei lo a nifiká ku e sena di Memorial lo mester sigui pa semper.

Nan “Lo Bira Mi Pueblo”

17, 18. Kon e profesia na Ezekiel 37:​26 i 27 a haña su kumplimentu?

¹⁷ Yehova a profetisá e union ku ta reina den su pueblo ku e siguiente palabranan: “Lo mi sera un aliansa di pas ku nan; esei lo ta un aliansa eterno ku nan. I lo mi establesé nan i multipliká nan, i lo mi pone mi santuario meimei di nan pa semper. Mi lugá di biba tambe lo ta meimei di nan; i ami lo ta nan Dios, i nan lo ta mi pueblo.”​—Eze. 37:​26, 27.

¹⁸ Henter e pueblo di Dios tin e privilegio di benefisiá di e kumplimentu di e promesa maravioso akí, esta, di e aliansa, òf pakto, di pas. Sí, Yehova a duna e garantia ku tur su sirbidónan obediente lo tin pas. P’esei, e fruta di su spiritu ta bisto entre nan. Su santuario, ku akinan ta representá adorashon kristian puru, ta entre nan. Nan realmente a bira su pueblo, pasobra nan a bandoná tur tipo di idolatria i a hasi Yehova e úniko Dios ku nan ta adorá.

19, 20. Ken ta entre esnan ku Yehova ta yama “mi pueblo,” i kiko e pakto nobo ta hasi posibel?

¹⁹ Ta masha emoshonante pa mira e union di e dos gruponan akí den nos tempu. Ounke e multitut grandi ku ta sigui krese mas i mas no tin speransa di bai shelu, nan ta orguyoso di por apoyá esnan ku sí tin e speransa ei. Nan a uni nan mes ku e Israel di Dios. Debí ku nan a hasi esei, nan ta entre esnan ku Yehova ta yama “mi pueblo.” Nos ta komprondé ku e siguiente profesia ta kumpli riba nan: “Hopi nashon lo uni nan mes ku SEÑOR den e dia ei i lo bira mi pueblo. E ora ei lo mi biba meimei di boso.”​—Zak. 2:11; 8:21; lesa Isaias 65:22; Revelashon 21:​3 i 4.

²⁰ Tur esaki Yehova a hasi posibel mediante e pakto nobo. Miónes di stranhero spiritual, esta, hende for di hopi nashon a bira parti di Yehova su nashon aprobá. (Mik. 4:​1-5) Nan ta determiná pa sigui tene firmemente na e pakto ei, aseptando i obedesiendo e rekisitonan di dje. (Isa. 56:​6, 7) Ora nan ta hasi esei, huntu ku e Israel di Dios, nan ta disfrutá di e bendishonnan riku ku pas eterno ta trese kuné. Ohalá bo tambe por disfrutá di e bendishonnan ei—awor i pa semper den futuro!

[Nota]

Bo Ta Kòrda?

• Ken ta “e diesdos tribunan di Israel” ku e 144.000 lo husga?

• Ki papel e ungínan ta hunga den e pakto nobo, i kon e pakto nobo ta benefisiá e otro karnénan?

• Ta tur kristian mester tuma di e emblemanan di Memorial?

• Ki union Beibel a profetisá pa nos tempu?

[Preguntanan di Estudio]

[Grafik/Plachi na página 28]

(Pa e teksto den su formato kompleto, wak e publikashon)

Awe tin hopi kristian ta sirbi huntu ku e Israel di Dios

1950 | 373.430

1970 | 1.483.430

1990 | 4.017.213

2009 | 7.313.173