Pwihn Sihpw Teieu oh Sileparail Pahn Mehtehmen

“Kumwail me . . . ideidawehn ie, kumwail pahn iang mwohd nan mwoalen kadeik oh iang kadeikada kadaudok eisek riaun Israel.”​—MAD. 19:28.

1. Soangen nanpwungmwahu dah me Siohwa sapwellimaniki rehn kadaudok kan en Eipraam? Dahme kahrehda met sohte wehwehki me e ketin pohnsehsehla douluhl aramas akan en wehi teikan?

 SIOHWA kin ketin poakohng Eipraam oh E ketin kasalehiong kadaudoke kan limpoak mehlel. Daulih sounpar 1,500 samwa, e kin ketin kilangwohng wehin Israel, me wia kadaudok en Eipraam, nin duwen sapwellime aramas pilipil kei, sapwellime “aramas kesempwal.” (Wadek Eksodus 19:5.) Ia duwe, met wehwehki me Siohwa kin ketin pohnsehsehla douluhl aramas akan en tohn wehi teikan? Soh. Erein ahnsowo, irail kan me kaidehn mehn Israel ahpw men kaudokiong Siohwa kin mweimweida ren kak iangala sapwellime wehi pilipil wet. Mehn Israel kan anahne kilangwohng irail kan me wekiong lamalam en mehn Suhs me re wia kisehn wehi wet oh anahne wiahkin irail kiserail. (Lip. 19:33, 34) Irail pwukat pil anahne kapwaiada sapwellimen Siohwa kosonned akan koaros.​—Lip. 24:22.

2. Mahsen kapwuriamwei dah me Sises mahsanih? Peidek dah kei me kohda?

² Ahpw Sises mahsanihong mehn Suhs kan mahsen kapwuriamwei pwukat: “Wehin Koht pahn kohsang kumwail oh uhd kohieng aramas akan [“wehi ehu,” NW] me pahn kapwarehda wahn Wehin Koht.” (Mad. 21:43) Ihs me pahn wia towe kan en wehi kapw wet? Ia duwen wekidekla wet eh kin kamwakid kitail rahnwet?

 Wehi Kapw

3, 4. (a) Ia duwen Piter eh kasalehda ni sansal wehi kapw wet? (b) Ihs me wia tohn wehi kapw wet?

³ Wahnpoaron Piter kasalehda ni sansal wehi kapw wet. E ntinglahng ienge Kristian akan: “Kumwail wia keinek pilipil ehu, pwihn samworo en Nanmwarkio, kumwail wia wehi sarawi ehu, sapwellimen Koht aramas kei, me pilipildahng kalohkiseli wiewia kapwuriamwei kan en nin limen Koht, me ketin malipeikumwaildo sang nan rotorot ong nan sapwellime marain lingaling.” (1 Pit. 2:9) Nin duwen me kokohpdahr, irail pwilidak en mehn Suhs kan me pwungki Sises nin duwen Mesaia iei me tepin wia tohn wehi kapw wet. (Dan. 9:27a; Mad. 10:6) Mwuri, me tohto me kaidehn mehn Israel pil iang wiahla tohn wehi wet, met pwehki Piter doula oh nda: “Mahso kaidehk kumwail sapwellimen Koht, a met kumwail wialahr uhdahn sapwellime.”​—1 Pit. 2:10.

⁴ Ihs me Piter ndinda? E tepikihda nah kisinlikouo koasoia: “Mour kapw me [Koht] ketikihong kitail ni eh ketin kaiasada Sises Krais sang me melahr akan. . . . Ei, e ketin nekinekidohng kumwail kapai pwukat nanleng, wasa me re sohte kak ohla, de mwerpeseng, de sohrala ie.” (1 Pit. 1:3, 4) Eri, tohn wehi kapw wet iei Kristian keidi kan me ahneki koapworopwor nanleng. Irail iei “Israel en Koht.” (Kal. 6:16, NW) Nan kaudiahl ehu, wahnpoaron Sohn kilangada me irail pwukat me wia “Israel en Koht” meh 144,000. Re “kamaiaudahsangehr rehn aramas teikan oh iei irail me tepin meirongalahr ong Koht oh Sihmpwulo” pwehn papah nin duwen “samworo” kan oh pahn “iang [Sises] kakaun erein pahr kido.”​—Kaud. 7:4; 14:1, 4; 20:6; Seims 1:18.

Meteikan Pil Pahn Iang Irail?

5. (a) “Israel en Koht” kin dokedoke ihs? (b) Dahme kahrehda lepin lokaia “Israel” sohte kin ahneki wehwe ehute?

⁵ Eri e sansal me “Israel en Koht” nan Kalesia 6:16 (NW) kin koasokoasoia Kristian keidi kante. Ahpw ia duwe, mie pak me wehin Israel kin karasaraski Kristian akan likin me keidi kan? Pasapengpen met kak dierek nan mahsen kan en Sises ong sapwellime wahnpoaron lelepek kan: “Nin duwen Semei eh ketikihongieier manaman en kaunda wasa, I pil pahn kihong kumwail soangen manamanohte. Kumwail pahn iang ie konot de sak ni ei tehpel nan ei Wehi, oh kumwail pahn iang mwohd nan mwoalomwail mwoalen kopwung pwe en wia kapwungpen kadaudok eisek riaun Israel.” (Luk 22:28-30) Met pahn wiawi erein “Mwei Kapw,” de ni ahnsou me mehkan pahn onohnsapahlda, erein Kaundahn Krais Pahr Kido.​—Wadek Madiu 19:28.

6, 7. Nan ire kan en Madiu 19:28 oh Luk 22:30, “kadaudok eisek riaun Israel” kin dokedoke ihs?

⁶ Irail meh 144,000 pahn papah nin duwen nanmwarki, samworo oh sounkopwung kei nanleng erein Kaundahn Pahr Kido. (Kaud. 20:4) Ihs me irail pahn kadeikada oh ihs me irail pahn kaunda? Nan Madiu 19:28 oh Luk 22:30 kin padahkihong kitail me re pahn kadeikada “kadaudok eisek riaun Israel.” Nan iren Paipel pwukat ihs me “kadaudok eisek riaun Israel” kin wiliandi? Irail pwukat iei irail me ahneki koapworopwor en mour nin sampah, me pwosonla sapwellimen Sises meirong ahpw sohte iang kisehn pwihnen samworo ko. (Keinek en Lipai kan sohte iang kileldi nan kadaudok eisek riaun uhdahn mehn Israel kan.)  Irail kan me wia kadaudok eisek riaun Israel ni karasaras nan ire pwukat iei irail me pahn paiekihda kapai kan sang doadoahk me irail meh 144,000 pahn kapwaiada nin duwen samworo kan. Re pil wia sapwellimen Koht aramas akan oh e kin ketin poakohng irail oh kupwurkin irail. Eri e konehng en kapahrekiong irail duwehte sapwellime aramas akan en kawao.

⁷ Met pwung pwehki mwurin wahnpoaron Sohn kilangada irail Israel en Koht meh 144,000 ko uhdahn kileldi mwohn kahn kamakam kowahlap, e pil kilangada “pokon kalaimwun” ehu me aramas sohte kak wadekedi uwen tohto me kohsang nan “wehi koaros.” (Kaud. 7:9, NW) Irail pwukat pahn pitsang kahn kamakam kowahlap oh pahn mi pahn sapwellimen Krais Kaundahn Pahr Kido. Aramas meh lik kei me pahn iasada pahn iang irail mi wasao. (Sohn 5:28, 29; Kaud. 20:13) Irail koaros pahn ni karasaras wia “kadaudok eisek riaun Israel” me Sises oh ienge kaun meh 144,000 pahn kadeikada.​—Wiewia 17:31; 24:15; Kaud. 20:12.

8. Ia duwen wiewia kan en rahnen Tomwo eh kin kasalehda duwen irair en nanpwungen irail meh 144,000 oh tohnsampah kan?

⁸ Wiewia kan nan rahnen Tomw kin kasalehda duwen irair en nanpwungen irail meh 144,000 oh tohnsampah kan. (Lip. 16:6-10) Keieu, samworo lapalap anahne meirongkihla kouwol men nin duwen meirong en “dipe kan oh dipen eh peneinei.” Ihme kahrehda sapwellimen Sises meirong kin keieu kohwong sapwellime peneinei en me keidi kan me pahn iang ih wia samworo oh papah nanleng. Oh pil ni rahnen Tomw, kuht riemen kin kadoadoahk ong dipen mehn Israel teikan. Nan ire wet, samworo kan wiliandi irail meh 144,000, oh mehn Israel teikan wiliandi irail koaros me ahneki koapworopwor en mour nin sampah. Kawehwe wet kasalehda me lepin lokaia “kadaudok eisek riaun Israel” nan Madiu 19:28 kin dokedoke kaidehn ihte sapwellimen Sises me keidi kan me pahn iang ih wia samworo, ahpw pil meteikan koaros me pwoson sapwellimen Sises meirong. *

9. Nan kaudiahl en tehnpas me Esekiel kilang, samworo kan kin wiliandi ihs? Mehn Israel kan me kohsang keinek me kaidehn samworo kin wiliandi ihs?

⁹ Medewehla ehu karasaras tohrohr. Soukohp Esekiel kilangada kaudiahl ehu en tehnpas en Siohwa me inenen lapala. (Esek., irelaud 40-48) Nan kaudiahl wet, samworo kan kin doadoahk nan tehnpaso. Re kin kihda padahk oh pil ale sapwellimen Siohwa kaweid oh kopwung ong aramas akan. (Esek. 44:23-31) Nan kaudiahlo, tohn keinek en Israel kan kin kohdohn kaudok oh wia meirong. (Esek. 45:16, 17) Eri, nan ire wet, samworo kan kin wiliandi me keidi kan, oh mehn Israel kan me kohsang keinek me kaidehn samworo kin wiliandi irail kan me ahneki koapworopwor en mour nin sampah. Kaudiahl wet kasalehda kesempwalpen pwihn riau pwukat arail kin doadoahkpene  ni minimin, ni pwihnen samworo eh kin tiengla mwowe nan kaudok min.

10, 11. (a) Dahme kitail kilang duwen pweidahn sapwellimen Sises mahsen me kakehlaka atail pwoson? (b) Peidek dahieu me pwarada duwen sihpw teikan?

¹⁰ Sises mahsanihki “sihpw teikan” me re sohte kin mi nan “kehl” me “kisin pwihn sihpw” en sapwellime keidi kan kin mi loale. (Sohn 10:16, NW; Luk 12:32) E mahsanih: “I uhdahn pahn weiraildo, oh re pahn rong ngilei. Eri, re pahn wiahla pwihn sihpw teieu, oh sileparail pahn mehtehmen.” Ia uwen met eh kin kakehlaka atail pwoson en kilang pweidahn mahsen pwukat! Kisin pwihn en keidi kan oh pokon kalaimwun en sihpw teikan kin ehupene. (Wadek Sekaraia 8:23.) Ni karasaras sihpw teikan sohte kin papah kelen masloalen tehnpas, ahpw re papah nan kelen maslikin tehnpaso. *

¹¹ Ahpw ma ekei pak tohn keinek me kaidehn samworo en Israel mahs kin karasaraski sihpw teikan, irail me ahneki koapworopwor nin sampah pil anahne tungoale pilawa oh wain ni rahnen Kataman? Kitail pahn tehk pasapengpen peidek wet.

Inou Kapw

12. Koasoandi kapw dah me Siohwa ketin kohpada?

¹² Siohwa ketin kohpada koasoandi kapw ong sapwellime aramas akan ni eh mahsanih: “Inou kapw me I pahn wiahiong mehn Israel pahn duwe met: I pahn kihdi ei kosonned nan kapehdirail kan oh ntingihediong nan mohngiongirail kan. I pahn wiahla ar Koht, oh re pahn wiahla nei aramas.” (Ser. 31:31-33) Sang ni inou kapw wet, sapwellimen Siohwa inou ong Eipraam pahn pweida mwahu oh poatopoat.—Wadek Senesis 22:18.

13, 14. (a) Ihs irail kan me iang inou kapwo? (b) Ihs irail kan me paiekihda sang inou kapw wet oh ia duwen arail kin kolokol inowo?

¹³ Sises mahsanih duwen inou kapw wet mwohn eh pwoula ni eh mahsanih: “Dahl wet iei delen sapwellimen Koht inou kapw me wiawihkidahr ntahi, me kepwilipwildier pwehki kumwail.” (Luk 22:20; 1 Kor. 11:25) Kristian koaros kin mi nan inou kapw wet? Soh. Ekeite, duwehte wahnpoaron ko me tungoale dahl wet nin soutiko, iei irail me iang inou kapwo. * Sises ketin wiahda inou tohrohr ehu rehrail pwe ren iang ih kakaun nan sapwellime Wehi. (Luk 22:28-30) Re pahn iang Sises sapwellimanki sapwellime wehi.​—Luk 22:15, 16.

¹⁴ Ia duwen irail kan me pahn mour nin sampah me sapwellime Wehi pahn kakaun? Irail iei me paiekihda inou kapw wet. (Kal. 3:8, 9) Mendahki irail sohte mi nan inou kapw wet, re kin kolokol inou wet sang ni arail peikiong eh koasoandi kan duwehte soukohp Aiseia kohpadahr: “Mehn liki kan me wiahla kisehn sapwellime aramas akan, me kin poakohng oh papah, me kin wauneki rahnen Sapad oh kolokol sapwellime inou kan ni loalopwoat: ‘I pahn weikumwaillahng Saion, ei dohl sarawio, oh kihong kumwail peren nan ei tehnpas en kapakap.’” Mwuri, Siohwa mahsanih: “Ei Tehnpas Sarawio pahn kahdaneki tehnpas en kapakap ong tohn wehi koaros.”​—Ais. 56:6, 7.

Ihs me Anahne Tungoale Pilawa oh Wain?

15, 16. (a) Pwais kaselel dahieu me wahnpoaron Pohl koasoia me kin dokedoke irail akan me iang inou kapwo? (b) Dahme kahrehda irail me ahneki koapworopwor en mour nin sampah en dehr tungoale pilawa oh wain en rahnen Kataman?

¹⁵ Irail ko nan inou kapw “iang pedolong nan Wasa Sarawihe.” (Wadek Ipru 10:15-20.) Irail pwukat me “aleier wehi ehu me sohte kak mwekidida.” (Ipru 12:28) Eri, irail kante me pahn iang Sises kakaun nin duwen nanmwarki oh samworo nanleng me anahne tungoale sang nan  “dahl” me kin weliwelian inou kapwo. Irail me iang inou kapw iei irail me inoukidahr ren pwoudiki Sihmpwulo. (2 Kor. 11:2; Kaud. 21:2, 9) Meteikan koaros me kin towehda rahn en Katamano kin poudiahl ni wahu ahpw re sohte kin iang tungoale pilawa oh wain.

¹⁶ Pohl pil sewese kitail en wehwehki me irail kan me ahneki koapworopwor en mour sampah sohte kin iang tungoale pilawa oh wain en Kataman. E koasoiaiong Kristian keidi kan: “Ahnsou koaros me kumwail pahn tungoale pilawa wet oh nimasang dahl en wain wet, kumwail kalohki pwoulahn Kaun-o lao lel eh pahn ketin sapahldo.” (1 Kor. 11:26) Iahd me Kauno pahn ketin “sapahldo”? E pahn ketin sapahldo ni ahnsou me e pahn ketidohn ketikihdahla nanleng kaimwiseklahn sapwellime lih kamwohd. (Sohn 14:2, 3) Eri sansal me Sak en Soutik en Kauno solahr pahn kin wiawi kohkohlahte. “Luhwen kadaudok” en liho me mihmihte nin sampah pahn doulahte tungoale pilawa oh wain lao irail koaros alehier ketingparail nanleng. (Kaud. 12:17) Ahpw ma irail kan me pahn mour kohkohlahte nin sampah ale mweimwei en iang tungoale pilawa oh wain, eri Katamanpen sak wet pahn anahne wiawi kohkohlahte.

“Irail Pahn Kin Wia Nei Aramas”

17, 18. Ia duwen kokohp en Esekiel 37:26, 27 eh kin pweida?

¹⁷ Siohwa ketin kohpada duwen miniminpenehn sapwellime aramas akan ni eh mahsanih: “I pahn wiahda inou ehu ong irail me pahn wia poahsoan en arail mour meleilei kohkohlahte. I pahn kangedereirailla oh koasoanehdi Tehnpesei Sarawio pwe en uh kohkohlahte nan sapwarail. I pahn kin ket wasao rehrail oh wia ar Koht, a irail pahn kin wia nei aramas.”​—Esek. 37:26, 27.

¹⁸ Sapwellimen Koht aramas akan koaros kak paiekihda pweidahn inou kaselel wet, iei inoun meleilei. Ei, Siohwa ketin kamehlelehiong sapwellime ladu peik kan en ahneki meleilei. Wahn sapwellime manaman kin sansalda nanpwungarail. Sapwellime tehnpas sarawio, me karasaraski kaudok min en Kristian, kin mi rehrail. Irail uhdahn wiahla sapwellime aramas akan pwe re keselahr soangsoangen dikedik kan koaros oh wiakihla Siohwa me ihete Koht me re kin kaudokiong.

19, 20. Ihs irail akan me iangala kisehn aramas akan me Siohwa kin ketin kahdaneki “nei aramas”? Dahme pahn pweida sang inou kapwo?

¹⁹ Ia uwen kaperen en kilang ehupenehn pwihn riau wet nan atail ahnsou! Mendahki pokon kalaimwun me wie tohtohla sohte ahneki koapworopwor en mour nanleng, re kin kesempwalki arail werekiong irail me ahneki koapworopwor wet. Re kin patehng irail me wia Israel en Koht. Sang arail wia met, re kin wia kisehn aramas akan me Siohwa kin ketin kahdaneki “nei aramas.” Kokohp wet kin pweidahr rehrail: “Ni ahnsowo wehi tohto pahn patohdo rehn KAUN-O oh wiahla sapwellime aramas. E pahn ketiket nanpwungamwail.”​—Sek. 2:11; 8:21; wadek Aiseia 65:22; Kaudiahl 21:3, 4.

²⁰ Siohwa ketin kapwaiadahr soahng koaros sang ni inou wet. Aramas rar kei sang soangsoangen wehi kan wialahr kisehn sapwellimen Siohwa aramas akan me kenikenla reh. (Maika 4:1-5) Irail kin koasoanedier teng ren pousehlahte kolokol inowo sang ni arail kin kapwaiada oh peikiong koasoandi koaros en inowo. (Ais. 56:6, 7) Sang arail kin wia met, irail oh iangahki irail me wia Israel en Koht kin ale kapai kaselel kan en meleilei me kin pousehlahte wiawi. Eri, ke pil kak paiekihda met ahnsou wet oh pil ahnsou kohkohdo.

[Nting tikitik kan me mi pah]

Ke Tamataman?

• Ihs irail “kadaudok eisek riaun Israel” me 144,000 pahn kadeikada?

• Pwukoa dahieu me keidi kan ahneki nan inou kapwo, oh ia duwen sihpw teikan ar paiekihda inou wet?

• Kristian koaros anahne tungoale pilawa oh wain en Kataman?

• Minimin dahieu me kokohpdahr nan atail ahnsou?

[Peidek en Onop]

[Kilel nan pali 27]

(Pwehn kilang nting kan ni soandi mwahu, kilang pwuhk wet)

Met tohto kin iang Israel en Koht papah

1950 | 373,430

1970 | 1,483,430

1990 | 4,017,213

2009 | 7,313,173