Tasi le Lafu ma le Leoleo Mamoe e Toʻatasi

“Tou te tiʻetiʻe ai foʻi o outou o ē na mulimuli mai iā te aʻu i nofoālii e sefulu lua, ma faamasino atu i ituaiga e sefulu lua o Isaraelu.”—MATA. 19:28.

1. Na faapefea ona silasila Ieova i ē na tupuga mai iā Aperaamo, ma aiseā e lē faapea ai e leʻi silasila o ia i tagata o isi nuu?

NA ALOFA Ieova iā Aperaamo, o lea na ia faaalia ai lona alofa faamaoni i ē na tupuga mai iā te ia. Mo le silia i le 15 senituri, na silasila Ieova i le nuu o Isaraelu o ē na tupuga mai iā Aperaamo, o lona nuu filifilia ma o lana “oloa tāua.” (Faitau le Teuteronome 7:6.) Po o le uiga ea na lē silasila lava Ieova i isi nuu? E leai. A o faagasolo lenā vaitaimi, na mafai e tagata e lē o ni Isaraelu, o ē na mananaʻo e tapuaʻi iā Ieova, ona auaufaatasi ma lona nuu filifilia. O nei tagata liulotu, po o ē na liliu i le lotu Iutaia, na manatu i ai o tagata o lenā nuu. Na tatau ona faia i latou e pei o ni o latou uso. (Levi. 19:33, 34) Ma sa tatau foʻi ona latou usiusitaʻi i tulafono uma a Ieova.—Levi. 24:22.

2. O le ā le folafolaga e faateʻia ai na faia e Iesu, ma o ā fesili ua tulaʻi mai ai?

² Ae peitaʻi, na fai atu e Iesu lenei folafolaga e faateʻia ai i tagata Iutaia o ona aso: “E aveesea le malo o le Atua mai iā te outou, ae tuuina atu i se nuu e fua mai ai ona fua.” (Mata. 21:43) O ai o le a faia aʻe ai lenei nuu fou, ma e faapefea ona aafia ai i tatou i aso nei i lea suiga ?

Le Nuu Fou

3, 4. (a) Na faapefea ona faailoa mai e Peteru le nuu fou? (e) O ai ua faia aʻe ai lenei nuu fou?

³ Na faailoa ma le manino e Peteru lenei nuu fou. Na ia tusia le faamatalaga lenei i ona uso Kerisiano: “O outou o ‘⁠se vaega ua filifilia, o ositaulaga ua avea ma tupu, o le nuu paia, o tagata ua faapitoa mo le Atua, ina ia outou faalauiloa atu uiga silisili ona lelei’ o lē na valaauina outou mai i le pōuliuli i lona malamalama ofoofogia.” (1 Pete. 2:9) E pei lava ona valoia, o tagata Iutaia na taliaina Iesu o le Mesia, o uluaʻi tagata ia o le nuu fou. (Tani. 9:27a; Mata. 10:6) Mulimuli ane, na aofia ai le toʻatele o tagata e lē o ni Isaraelu i lenei nuu, na faamatala atili e Peteru: “E leʻi avea muamua outou ma nuu, a ua avea nei outou ma nuu o le Atua.”—1 Pete. 2:10.

⁴ O ai sa talanoa i ai Peteru i inei? I le amataga o lana tusi, ua ia faapea mai: “Ua . . . fanaufouina ai i tatou [e le Atua] i se faamoemoe ola e ala i le toe faatūina o Iesu Keriso mai i le oti, i se tofi e lē pala, e lē faaleagaina, ma e lē mavae. Ua taofia mo outou i le lagi.” (1 Pete. 1:3, 4) Ua faia aʻe la lenei nuu fou i Kerisiano faauuina, o ē ua iai le faamoemoe e ola i le lagi. O i latou ia o “le Isaraelu a le Atua.” (Kala. 6:16) Na iloa e Ioane i se faaaliga, e 144,000 le aofaʻi o nei tagata Isaraelu faaleagaga. O i latou na “ua faatauina mai i tagata o uluaʻi fua mo le Atua ma le Tamaʻi Mamoe,” ina ia avea ma “ositaulaga” ma “pule . . . o ni tupu faatasi ma [Iesu] mo le afe tausaga.”—Faaa. 5:10; 7:4; 14:1, 4; 20:6; Iako. 1:18.

Pe e Aofia ai ma Isi?

5. (a) O ai o loo faasino i ai le faaupuga “Isaraelu a le Atua”? (e) E faapefea ona iloa e lē tasi se mea o uiga i ai le faaupuga “Isaraelu”?

⁵ Ua manino la, i le Kalatia 6:16, e na o Kerisiano faauuina o loo faatatau atu i ai le faaupuga “Isaraelu a le Atua.” Ae peitaʻi, pe e iai ni taimi ua faaaogā ai e Ieova le nuu o Isaraelu  e fai ma ata po o se faataʻitaʻiga, ae e lē na o le vaega faauuina o aofia ai? E maua le tali i fetalaiga nei a Iesu i ona aposetolo faamaoni: “Ua ou osia ai se feagaiga ma outou, e pei lava ona osia e loʻu Tamā se feagaiga ma aʻu mo se malo, ina ia outou aai ma inu i laʻu laoai i loʻu malo, ma nonofo i nofoālii ma faamasino atu i ituaiga e sefulu lua o Isaraelu.” (Luka 22:28-30) O le a tupu lenei mea “i le taimi e toe faafouina ai mea uma,” po o le taimi o le toefuataʻiga a o faagasolo le Pulega a Keriso i le Afe o Tausaga.—Faitau le Mataio 19:28.

6, 7. O ai o loo faasino i ai le faaupuga “ituaiga e sefululua o Isaraelu,” i le Mataio 19:28 ma le Luka 22:30?

⁶ O le a avea le 144,000 ma tupu, o ositaulaga ma faamasino i le lagi i le Pulega o le Afe o Tausaga. (Faaa. 20:4) O ai o le a latou faamasinoina, ma o ai o le a latou pule i ai? Ua taʻu mai i le Mataio 19:28 ma le Luka 22:30, latou te faamasino i “ituaiga e sefululua o Isaraelu.” O ai o loo faaata mai e “ituaiga e sefululua o Isaraelu” i inei? O loo faaata mai ai i latou uma ua iai le faamoemoe e ola i le lalolagi, o ē e faatuatua i le taulaga a Iesu ae e lē aofia i le vaega o ositaulaga ma tupu. (E leʻi aofia le ituaiga o Levi i le lisi o ituaiga e 12 o Isaraelu faaletino.) O i latou ua faaata mai e ituaiga e 12 o Isaraelu i inei, o i latou ia o le a maua faamanuiaga faaleagaga mai i le auaunaga faaositaulaga a le 144,000. E ui e lē o ni ositaulaga, ae e latou te maua aogā auā o i latou foʻi o tagata o le Atua, ma e alofagia ma talia i latou e Ia. E talafeagai la ona faatusaina i latou i ona tagata i aso anamua.

⁷ Ina ua uma ona vaaia e Ioane le faamaufaailogaina tumau o le 144,000 o tagata Isaraelu faaleagaga, a o lumanaʻi le puapuaga tele, ua ia iloa foʻi le “motu o tagata e toʻatele” e lē mafaitaulia, o ē e “mai i atunuu uma.” (Faaa. 7:9) O i latou ia o le a sao mai i le puapuaga tele ma ulu atu i le Pulega a Keriso i le Afe o Tausaga. O le a faatasi atu iā i latou le faitau piliona o tagata o le a toe faatutūina. (Ioa. 5:28, 29; Faaa. 20:13) O i latou ia o le a faia aʻe ai “ituaiga e sefululua o Isaraelu” i se auala faafaatusa, o ē o le a faamasinoina e Iesu ma ē o le a tupu faatasi ma ia, e 144,000.—Galu. 17:31; 24:15; Faaa. 20:12.

8. E faapefea i mea na tutupu i le Aso o le Togisala, ona faaata mai ai le fesootaʻiga i le va o le 144,000 ma isi tagata uma?

⁸ O lenei fesootaʻiga i le va o le 144,000 ma isi tagata uma, ua faaata mai i mea na tutupu i le Aso o le Togisala lea na faatasi ona fai i le tausaga. (Levi. 16:6-10) Sa tatau ona osi muamua e le ositaulaga sili se taulaga i se povi poʻa, “mo ia ma lona aiga atoa.” O lea la, ua faasafua muamua atu aogā o le taulaga a Iesu i lona aiga o ositaulaga lagolago, o ē o le a pule faatasi ma ia i le lagi. Na saunia foʻi i le Aso o le Togisala anamua ni ʻoti se lua mo agasala a isi tagata uma o Isaraelu. O ai ua faaata mai e ʻoti? I lenei mataupu, o loo faaata mai e le ituaiga o ositaulaga le 144,000, ae ua faaata mai e le isi vaega uma o Isaraelu, i latou e faamoemoe e ola i le lalolagi. O lenei malamalamaga ua faaalia ai o le faaupuga “Isaraelu,” i le Mataio 19:28 e lē o faasino atu i ositaulaga lagolago ua faauuina e le agaga, ae o isi uma  ua faaalia le faatuatua i le taulaga a Iesu. *

9. O ai ua faaata mai e ositaulaga i le faaaliga o le malumalu na tuuina atu iā Esekielu, ae o ai ua faaata mai e tagata Isaraelu e lē o ni ositaulaga?

⁹ Seʻi manatu i se isi faataʻitaʻiga. Na tuuina atu iā Esekielu se faaaliga auʻiliʻili o le malumalu o Ieova. (Eseki., mataupu e 40-48) I lenā faaaliga, na galulue ositaulaga i le malumalu, e saunia faatonuga ma maua fautuaga ma faasaʻoga mai iā Ieova. (Eseki. 44:23-31) I lenā lava faaaliga, e ō mai tagata mai i ituaiga eseese e tapuaʻi ma ofo atu taulaga. (Eseki. 45:16, 17) I inei la, ua faaata mai e ositaulaga le vaega faauuina, ae o tagata Isaraelu mai i ituaiga e lē o ni ositaulaga, ua faaata mai ai i latou e iai le faamoemoe e ola i le lalolagi. Ua faamatilatila mai i le faaaliga, le galulue faatasi o vaega e lua i le autasi, ma e taʻimua le vaega faaositaulaga i le tapuaʻiga mamā.

10, 11. (a) O le ā le faataunuuga o upu a Iesu ua tatou vaaia, e faamalosia ai le faatuatua? (e) O le ā le fesili ua lāgā e faatatau i isi mamoe?

¹⁰ Na fetalai Iesu e faatatau i “isi mamoe,” o ē o le a lē iai i le “lotoā” o loo iai le “lafu mamoe itiiti” o ona soo faauuina. (Ioa. 10:16; Luka 12:32) Na fetalai o ia: “E tatau foʻi ona ou aumaia i latou, ma latou te faalogo i loʻu leo, ona avea ai lea o i latou ma lafu e tasi, ma le leoleo mamoe e toʻatasi.” Maʻeu le faamalosia ai o le faatuatua i le vaai atu o faataunuuina na fetalaiga! Ua aufaatasi vaega e lua—o le vaega toʻaitiiti o le ʻaufaauuina ma le motu o tagata e toʻatele o isi mamoe. (Faitau le Sakaria 8:23.) E ui lava e lē auauna i se auala faafaatusa isi mamoe i le lotoā pito i totonu o le malumalu faaleagaga, ae e latou te auauna i le lotoā pito i fafo o lenā malumalu.

¹¹ Ae pe afai e faaaogā e Ieova i nisi taimi tagata o Isaraelu anamua e lē o ni ositaulaga, e faaata mai ai isi mamoe, pe tatau foʻi la ona latou tagofia le areto ma le uaina o le Faamanatuga? O le a tatou iloiloina nei le tali o lenei fesili.

Le Feagaiga Fou

12. O le ā le faatulagaga fou na valoia e Ieova?

¹² Na valoia e Ieova se faatulagaga fou mo ona tagata ina ua ia fetalai: “O le feagaiga lenei ou te osia ma le aiga o Isaraelu pe a mavae na aso, . . . Ou te tuuina laʻu tulafono i totonu iā i latou, ma ou te tusiaina foʻi i o latou loto. E fai aʻu ma o latou Atua, e fai foʻi i latou ma oʻu nuu.” (Iere. 31:31-33) E ala i lenei feagaiga fou, o le a iai se faataunuuga mataʻina ma tumau o le folafolaga a Ieova iā Aperaamo.—Faitau le Kenese 22:18.

13, 14. (a) O ai e aofia ai i le feagaiga fou? (e) O ai e maua faamanuiaga, ma e faapefea ona latou “taofimau” i lenei feagaiga fou?

¹³ I le pō a o lumanaʻi lona maliu, sa faasino atu Iesu i lenei feagaiga fou ina ua ia fetalai: “O lenei ipu, o le faatusa  lea o le feagaiga fou e ala i loʻu toto lea o le a faamaligiina mo outou.” (Luka 22:20; 1 Kori. 11:25) Pe e aofia ai Kerisiano uma i lenei feagaiga fou? E leai. O nisi, e pei o aposetolo o ē na feinu i lenā ipu i lea pō, ua aofia ai i le feagaiga fou. * Na faia e Iesu se isi feagaiga ma i latou ina ia pule faatasi ma ia i lona Malo. (Luka 22:28-30) O le a latou auai faatasi ma Iesu i lona Malo.—Luka 22:15, 16.

¹⁴ Ae faapefea i latou o ē o le a ola i le lalolagi i lalo o lona Malo? E latou te maua faamanuiaga mai i lenā feagaiga fou. (Kala. 3:8, 9) E ui lava e lē aofia ai i latou, ae e latou te “taofimau” i lenei feagaiga e ala i le gauaʻi i mea e manaʻomia ona fai i le feagaiga, e pei ona valoia mai e le perofeta o Isaia: “O tagata mai isi atunuu o ē ua faatasi atu iā Ieova ina ia auauna iā te ia, ma alolofa i le suafa o Ieova, ina ia fai ma ana auauna, o i latou uma o ē e tausia le sapati, ina ia lē solia ai ma taofimau i laʻu feagaiga, o le a ou aumaia i latou na i loʻu mauga paia, ma oʻu faafiafia iā i latou i loʻu fale tatalo.” Ona fetalai mai lea o Ieova: “Auā e taʻua loʻu fale o le fale tatalo mo tagata uma.”—Isa. 56:6, 7.

O Ai e Ao Ona Taumamafa?

15, 16. (a) O le ā ua faafesootaʻi atu i ai e Paulo le feagaiga fou? (e) Aiseā e lē tatau ai ona taumamafa i le areto ma le uaina o le Faamanatuga, i latou e faamoemoe e ola i le lalolagi?

¹⁵ O i latou i le feagaiga fou, ua “matuā mautinoa . . . i le auala e oo atu ai i le mea paia.” (Faitau le Eperu 10:15-20.) O i latou ia o le a “maua se malo e lē mafai ona lūlūina.” (Epe. 12:28) O lea la, e na o i latou o ē o le a avea ma tupu ma ositaulaga i le lagi faatasi ma Iesu Keriso, e ao ona feinu mai i le “ipu” lea e faaata mai ai le feagaiga fou. O i latou ua aofia ai i le feagaiga fou, o i latou ia na folafolaina e foaʻi atu e faaipoipo i le Tamaʻi Mamoe. (2 Kori. 11:2; Faaa. 21:2, 9) O isi tagata uma e auai i le Faamanatuga i tausaga taʻitasi, o ē e maimoaina ma le faaaloalo lea sauniga, ae latou te lē taumamafa i le areto ma le uaina.

¹⁶ Ua fesoasoani mai foʻi Paulo iā i tatou ina ia malamalama, o i latou e iai le faamoemoe e ola i le lalolagi, e latou te lē taumamafa i le areto ma le uaina o le Faamanatuga. Na ia fetalai atu i Kerisiano faauuina: “Auā o taimi uma lava e tou te aai ai i lenei areto ma inu i lenei ipu, ua outou faalauiloa atu ai pea le maliu o le Alii seʻia taunuu mai o ia.” (1 Kori. 11:26) O afea e “taunuu” mai ai le Alii? Pe a sau o ia e avatu le tagata mulimuli o lana vasega faauuina o le tamaʻitaʻi faaipoipo, i lo latou aiga i le lagi. (Ioa. 14:2, 3) E manino la, e lē faaauau ai e faavavau le faamanatuina faaletausaga o le Talisuaga Afiafi a le Alii. O “ē o totoe” o le fanau a le fafine e iai pea i le lalolagi, o le a faaauau ona taumamafa i lenei talisuaga, seʻia oo ina maua e i latou uma lo latou taui i le lagi. (Faaa. 12:17) Peitaʻi, pe afai e ao ona tagofia e i latou o le a ola e faavavau i le lalolagi, le areto ma le uaina, o le a manaʻomia la ona faia pea lenei Faamanatuga seʻia oo i le faavavau.

ʻE Fai i Latou ma Oʻu Nuu’

17, 18. Ua faapefea ona faataunuuina le valoaga o loo i le Esekielu 37:26, 27?

¹⁷ Na valoia e Ieova le autasi o ona tagata i  upu nei: “Ou te osia le feagaiga o le filemu ma i latou; e fai ma feagaiga e tumau iā i latou. Ou te tuuina i latou i o latou laueleele ma faatoʻateleina i latou, ou te tuuina foʻi loʻu malumalu i totonu iā i latou i aso uma. O le a iai loʻu faleʻie i luga o i latou, e fai aʻu ma o latou Atua, e fai foʻi i latou ma oʻu nuu.”—Eseki. 37:26, 27.

¹⁸ Ua faamanuiaina tagata uma o le Atua, i le mauaina o aogā mai i le faataunuuga o lenei folafolaga matagofie, o lenei feagaiga o le filemu faa-Kerisiano. Ioe, ua faamautinoa mai e Ieova le filemu mo ana auauna usiusitaʻi uma lava. Ua faamaonia le iai iā i latou o le fua o lona agaga. Ua iā i latou lona malumalu, lea e faaata mai ai le tapuaʻiga mamā faa-Kerisiano. Ua avea moni i latou ma ona nuu, auā ua latou lafoaʻia ituaiga uma o ifo i tupua, ma tapuaʻi atu tau lava o Ieova le Atua moni.

19, 20. O ai e aofia ai iā i latou ua taʻua e Ieova o ‘loʻu nuu,’ ma o le ā ua mafai ona faataunuuina ona o le feagaiga fou?

¹⁹ Maʻeu le faagaeeloto o le molimauina o le autasi o nei vaega e lua i o tatou aso! E ui lava e lē o iai i le motu o tagata e toʻatele ua faatuputeleina, le faamoemoe e ola i le lagi, ae e latou te fiafia e auaufaatasi ma i latou o iai lenā faamoemoe. Ua latou auaufaatasi ma le Isaraelu a le Atua. O le faia faapea, ua aofia ai i latou i ē ua taʻua e Ieova o ‘loʻu nuu.’ Ua faataunuuina iā i latou le valoaga lenei: “E aufaatasi mai foʻi atunuu e tele iā Ieova i lea aso, ona fai ai lea o i latou ma oʻu nuu; ma ou te nofo foʻi iā te oe.”—Saka. 2:11; 8:21; faitau le Isaia 65:22; Faaaliga 21:3, 4.

²⁰ E ala i lenei feagaiga fou, ua mafai ai e Ieova ona faataunuuina nei mea uma. E faitau miliona tagata ese faaleagaga ua avea ma vaega o le nuu ua finagalo malie i ai Ieova. (Mika 4:1-5) Ua latou naunau e faaauau ona taofimau i lenā feagaiga, e ala i le talia o ana sauniuniga ma usitaʻia mea e manaʻomia ona fai i le feagaiga. (Isa. 56:6, 7) O le faia faapea faatasi ma le Isaraelu a le Atua, ua latou maua ai le tele o faamanuiaga o le filemu tumau. Tau ina ia e tofo i na faamanuiaga, i le taimi nei seʻia oo i le faavavau!

[Faaopoopoga i lalo]

Pe E te Manatua?

• O ai “ituaiga e sefululua o Isaraelu” o le a faamasinoina e le 144,000?

• O le ā le fesootaʻiga a le vaega faauuina ma isi mamoe i le feagaiga fou?

• Pe e tatau ona taumamafa Kerisiano uma i le areto ma le uaina o le Faamanatuga?

• O le ā le autasi na valoia e tupu i o tatou aso?

[Fesili mo le Suʻesuʻega]

[Siata/​Ata i le itulau 25]

(Tagaʻi i le lomiga mo le ata atoa)

E toʻatele ua auaufaatasi ma le Isaraelu a le Atua

1950 | 373,430

1970 | 1,483,430

1990 | 4,017,213

2009 | 7,313,173