Taareb e Ulung, Ma Taareb e Ta Chugol Saf

“Gimed e re ragag nge l’agruw i girdi’ rog nir e bay kum pired nga tagil’med ni ngam  gagiyegniged fa ragag nge l’agruw i ganong nu Israel.”​—MATT. 19:28.

1. (a) Uw rogon u wan’ Jehovah e piin owchen Abraham? (b) Mang fan ni re n’ey e gathi be yip’ fan ni ke n’ag Jehovah yugu boch e girdi’?

 BA T’UF Abraham rok Jehovah, ma kub t’uf rok e piin owchen Abraham. Ke pag 15 e chibog ni ke tay Jehovah ni piin ni owchen Abraham, ni aram fare nam nu Israel ni yad e piin ni “ke mel’egrad.” (Mu beeg e Deuteronomy 7:6.) Gur, fan e re n’ey e ke n’ag Jehovah yugu boch e nam? Danga’. Ngiyal’ nem ma piin ni gathi yad piyu Israel e rayog ni ngar chaggad ngak fare nam ni ke mel’eg Jehovah. Ere bod ni kar manged bang ko re nam nem. (Lev. 19:33, 34) Ma thingar ra folgad ko urngin e motochiyel rok Jehovah.​—Lev. 24:22.

2. Mang e ke yog Jesus ngak piyu Israel, ma mang l’agruw e deer ni ke sum?

² Machane, ke yog Jesus ngak piyu Israel ni gaar: “Ere nggog ngomed ni gagiyeg rok Got e bay ni chuweg romed ngan pi’ ngak girdien reb e nam ni yad e bay yib wom’engirad nib fel’.” (Matt. 21:43) Mini’ e piin ni ra mang fare nam nib beech, ma mang ke rin’ e re n’ey ngodad?

Fare Nam nib Beech

3, 4. (a) Mang e ke yog apostal Peter u murung’agen fare nam nib beech? (b) Mini’ girdien e re nam n’em?

³ Rib tamilang e n’en ni yog Peter u murung’agen e re nam nib beech nem. Ke yol ngak e pi Kristiano ni gaar: “Gimed girdien fare nam ni ke mel’egmed Got, ni gimed e pi prist rok e en ni Pilung, ma gimed fare nam ni gimed girdien Got, ni mel’egmed Got ni ngam wereged murung’agen e n’en nrib fel’ ni ke ngongliy Got, ni ir e piningmed u fithik’ e lumor ngam bad nga fithik’ e tamilang rok nrib fel’.” (1 Pet. 2:9) Piyu Jew ni kar folgad rok fare Messiah e yad e tin som’on ni kar manged bang ko re nam nib beech nem. (Dan. 9:27a; Matt. 10:6) Me munmun ma boor e piin ni gathi yad piyu Israel ni kar manged boch girdien e re nam nem, ya yog Peter ni gaar: “Immoy ba ngiyal’ ni um pired  ni gathi gimed girdien Got, machane chiney e kam manged girdien.”​—1 Pet. 2:10.

⁴ Mini’ e be weliy Peter murung’agen? Ke yoloy ni gaar: “Bochan e ri be runguydad me pi’ e yafos nib beech ngodad ni fan e faseg Jesus Kristus ko yam’. Ereray fan ni kad nanged ni tin ni ke l’agan’dad ngay e bay yib i m’ug nib riyul’, ere gadad be son ni nge yog ngodad e flaab ni ba ga’ ni ke chaariy Got ni fan ngak e tirok e girdi’, ni be chaariy e pi tow’ath nem u tharmiy ni fan ngomed.” (1 Pet. 1:3, 4) Ere piin ni kan dugliyrad e yad fare nam nib beech ni athap rorad e yad ra yan nga tharmiy. Yad fare ‘Israel u fithik’ i lanin’rad.’ (Rom. 2:29) Kan piliyeg e changar rok apostal John me guy ni piyu Israel u fithik’ i lanin’rad e yad 144,000 u gubin. “Kan biyuliyrad u fithik’ e tin ni ka ba’ e girdi’ nu fayleng ma yad e tin som’on e girdi’ nni pi’rad ngak Got nge ngak fare Fak e Saf.” Ma bay ra manged e “prist” ma “bay ra uned ngak [Jesus] ko gagiyeg u lan bbiyu’ e duw.”​—Rev. 5:10; 7:4; 14:1, 4; 20:6; Jas. 1:18.

Kub Muun Yugu Boch e Girdi’ Ngorad?

5. (a) Chon mini’ e yad e ‘Israel u fithik’ i lanin’rad’? (b) Mang fan ni fare thin ni “Israel” e ku rayog ni nge yip’ fan boch ban’en?

⁵ Ere ba tamilang ni fare thin ni ‘Israel u fithik’ i lanin’rad’ ni bay ko Roma 2:29 e be yip’ fan e pi Kristiano ni kan dugliyrad. Machane gur, immoy yu ngiyal’ ni ke fanay Jehovah fare nam nu Israel nib fanathin ni gathi be yip’ fan e piin ni kan dugliyrad? Rayog ni ngan pirieg e fulweg riy ko pi thin ni yog Jesus ngak e pi apostal rok nib yul’yul’ ni gaar: “Ere rogon ni ke pi’ e Chitamag mat’awug ngog ni ngug gagiyeg, e aram e n’en ni bay gu rin’ ngomed. Bay mu uned ngog ko abich nge garbod u tebel rog ko gin nsuwog, ma bay mpired nga tagil’ e pilung ngam gagiyegniged fa ragag nge l’agruw i ganong nu Israel.” (Luke 22:28-30) Ra buch e re n’ey u nap’an ni “yira beechnag urngin ban’en” ara nap’an e Gagiyeg rok Kristus u lan Reb e Biyu’ e Duw.​—Mu beeg e Matthew 19:28.

6, 7. Mini’ “fa ragag nge l’agruw i ganong nu Israel” ni be weliy ko Matthew 19:28 nge Luke 22:30?

⁶ Nap’an reb e biyu’ e duw ma fare 144,000 e girdi’ ni yad ra mang pilung nge prist u tharmiy e ku yad ra mang ta puf oloboch. (Rev. 20:4) Mini’ e yad ra pufthinnag mi yad gagiyegnag? Matthew 19:28 nge Luke 22:30 e be yog ngodad ni yad ra pufthinnag “fa ragag nge l’agruw i ganong nu Israel.” Ere mini’ e be yip’ fan “fa ragag nge l’agruw i ganong nu Israel” u roy? Yad e piin ni ke mich e maligach rok Jesus u wan’rad machane gathi yad bang ko piin ni kan dugliyrad, ya yad e piin ni be athapeg ni ngar pared u roy u fayleng. (Fare ganong ni Levi e dan unegrad ko fa 12 i ganong nu Israel.) Ere fare 144,000 e piin ni kan dugliyrad e yad ra ayuweg fa 12 i ganong nu Israel ni be weliy murung’agen u roy. Pi girdi’ ney e gathi yad e prist machane ku yad e girdi’ rok Got, ma yad ba t’uf rok. Kan taareb rogonnagrad ko girdi’ rok kakrom.

⁷ Aram fan ni tomuren ni ke guy John fare  144,000 ni kan dugliyrad ma kan tay e pow ngorad u m’on ni ra yib fare gafgow nib ga’, miki guy ba ulung i girdi’ nib “pire’ ni pire’,” ni ra bad “u gubin e nam.” (Rev. 7:9) Yad ra magey nib fas u nap’an fare gafgow nib ga’ mar thap gad nga Lan fare Biyu’ e Duw ni be Gagiyeg Kristus. Ba muun ngorad bokum bilyon e piin ni kan fasegrad ko yam’. (John 5:28, 29; Rev. 20:13) Yad e piin ni ka nog “fa ragag nge l’agruw i ganong nu Israel” ngorad nra pufthinnagrad Jesus nge fare 144,000.​—Acts 17:31; 24:15; Rev. 20:12.

8. Uw rogon ma n’en ni un rin’ u nap’an fare rran ko Biyul e be dag rogon e tha’ u thilin e 144,000 nge tin ni ka bay e girdi’?

⁸ Tha’ u thilin fare 144,000 nge tin ni ka bay e girdi’ e kan dag yaan u nap’an fare Rran ko Biyul ni yima tay ni taab yay u reb e duw. (Lev. 16:6-10) Som’on ma fare prist nib tolang e ra pi’ e garbaw ni maligach ni fan ko “denen rok nge denen ko girdi’ u tabinaw rok.” Maligach rok Jesus e som’on e fan ko piin ni nge un ngak ko gagiyeg u tharmiy. Ma ku rorran nem ko Biyul e yira pi’ l’agruw e kaming ni fan ko denen rok e tin ni ka bay piyu Israel. Rogon ni be yog e fare ganong rok Levi e be yip’ fan fare 144,000, ma tin ni ka bay piyu Israel e be yip’ fan urngin e girdi’ ni yad be athapeg ni ngar pared u fayleng. Fare bugithin ni “fa ragag nge l’agruw i ganong nu Israel” ni kan weliy murung’agen u Matthew 19:28 e gathi be yip’ fan e piin ni kan dugliyrad, ya be yip’ fan urngin e piin ni ke mich e biyul rok Jesus u wan’rad. *

9. (a) Fapi prist ni ke guy Ezekiel e be yip’ fan mini’? (b) Mini’ e be yip’ fan e piin ni gathi yad e prist?

⁹ Am mu lemnag e n’en ni ke guy Ezekiel ni profet. Kan piliyeg e changar rok me guy e tempel rok Jehovah. (Ezek., guruy ni 40-48) Ngiyal’ nem ma ke guy e prist ni yad be maruwel u lan e tempel, ma yad be fonownag e girdi’ me Jehovah e be fonownagrad. (Ezek. 44:23-31) Ma ku ke guy Ezekiel e girdi’ ni kar bad ko pi ganong nu Israel ni ngar liyorgad ngak Got ma ngkur pied e maligach. (Ezek. 45:16, 17) Ere, pi prist e be yip’ fan e piin ni kan dugliyrad, ma piyu Israel ni gathi yad e prist e be yip’ fan e girdi’ ni yad be athapeg e yafas u fayleng. Re n’ey e be dag ni gali ulung ney e yad be maruwel u taabang ma piin ni kan dugliyrad e be pow’iyrad.

10, 11. (a) Mang e thin rok Jesus ni kad guyed ni ke lebug ma ke gelnag e michan’ rodad? (b) Mang e deer ni ke sum u murung’agen yugu boch e saf?

¹⁰ Ke weliy Jesus murung’agen “yugu boch e saf” ni gathi yad bang ko piin ni kan dugliyrad ni ka nog “fachi ulung ngorad.” (John 10:16; Luke 12:32) I gaar Jesus: “Thingar kug fekrad i yib; ya bay ra metelgad nga lungug, mi yad peth ko tiney ngar pired mi yad taab ran’ i saf ma taabe’ e be gafaliyrad.” Pi n’ey  ni kad guyed ni ke lebug e ke gelnag e michan’ rodad! L’agruw e ulung ni kar chaggad nga taabang ni aram fachi ulung nge fare ulung ni ba ga’. (Mu beeg e Zekariah 8:23.) Yugu aram rogon ni yugu boch e saf e darur pigpiggad u lan fare tempel nib fanathin machane yad be pigpig u wuru’ e yoror ko re tempel nem.

¹¹ Yu ngiyal’ ma ma fanay Jehovah piyu Israel ni gathi yad e prist ni nge yip’ fan yugu boch e saf, ere gur, susun e ngar unumed fare wain mar ked fare flowa u nap’an e Puguran ko Yam’ ni tay Jesus? Ngad guyed e fulweg ko re deer ney e chiney.

Fare M’ag nib Beech

12. Mang yaram nib beech e ke yog Jehovah?

¹² Ke yog Jehovah murung’agen reb e yaram nib beech ni fan ko girdi’ rok ni gaar: “Baaray e re m’ag ni bay gu ngongliy u thilmad e girdi’ nu Israel: bay gu tay e motochiyel rog nga lanin’rad mu gu yoloy nga lan ngorongorrad. Bay gu mang Got rorad, ma bay ra manged girdi’ rog.” (Jer. 31:31-33) Ra lebug e n’en ni ke micheg Jehovah ngak Abraham u daken e re m’ag nib beech ney.​—Mu beeg e Genesis 22:18.

13, 14. (a) Chon mini’ e yad bang ko fare m’ag nib beech? (b) Mini’ e ra fel’ rogon u tan e re m’ag ney, ma uw rogon ni ngar ‘yul’yul’gad’ ngay?

¹³ Ke weliy Jesus murung’agen e re m’ag nib beech ney u nap’an fare nep’ u m’on ni yim’ ni gaar: “Re kap ney e bin nib beech e m’ag u thilin Got nge girdi’ ni rachaeg ni bay map’ nga but’ ni fan ngomed e ir e bayi micheg.” (Luke 22:20; 1 Kor. 11:25) Gur, urngin e Kristiano e yad bang ko re m’ag nib beech ney? Danga’. Ya kemus ni piin ni yad ra unum e wain mar ked e flowa, ni bod e pi apostal e yad ra mang bang ko re m’ag nib beech ney. * Ke fal’eg Jesus Kristus reb e m’ag ni fan ngorad ni aram e ngar uned ngak ngar gagiyeggad u Gil’ilungun. (Luke 22:28-30) Yad ra un ngak Jesus ngar maruwelgad u taabang u Gil’ilungun.​—Luke 22:15, 16.

¹⁴ Ere uw rogon e piin ni yad be par u fayleng u tan Gil’ilungun? Ku ra fel’ rogorad u tan ere m’ag nib beech ney. (Gal. 3:8, 9) Yugu aram rogon ni gathi yad bang ko re m’ag nib beech ney machane yad be par ni yad ba “yul’yul’” ngay ya yad ma fol ko pi motochiyel ni kan pi’ ngorad ni bod e n’en ni yog Isaiah ni profet ni gaar: “Pi girdi’ nu bang ni kar manged boch e girdi’ rok, nib t’uf rorad mi yad ma pigpig ngak, ma yad ma tayfan e sabbath mi yad ba yul’yul’ ko fare m’ag rok: ‘Bay gu fekmed i yan nga Zion, ko fare burey rog nib thothup, mu gu pi’ e felfelan’ ngomed u lan e naun rog ni yima meybil riy.’ Miki gaar Jehovah: ‘Tempel rog e bay ni pining fithingan ni naun ko meybil ni fan e girdi’ u gubin e nam.’”​—Isa. 56:6, 7.

Mini’ e Ra Kay fare Flowa me Unum fare Wain?

15, 16. (a) Mang e yog apostal Paul u murung’agen fare m’ag nib beech? (b) Mang fan ni piin ni ngar pared u roy u fayleng e dab ra ked fare flowa ma dab ra unumed fare wain?

¹⁵ Piin ni yad bang ko fare m’ag nib beech e ‘kari puf e kanawo’ ngorad ni nga ranod nga lan fa Gin’en nib Th’abi Thothup.’ (Mu beeg e Hebrews 10:15-20.) Ireray e pi cha’ ni rayog ngorad e “gagiyeg rok Got ndabiyog ni nge rur.” (Heb. 12:28) Ere kemus ni piin ni yad ra un ngak Jesus nga tharmiy e yad ra mang pilung nga prist e thingar ra unumed fare wain u lan e “cup” ni be yip’ fan fare m’ag nib beech. Pi girdi’ ney ni yad bang ko fare m’ag nib beech e kan dugliy ni yad ra mabgol fare fak e saf. (2 Kor. 11:2; Rev. 21:2, 9) Ma tin ni ka bay e girdi’ ni yad ma un ko re puguran ko yam’ ni tay Jesus e dab ra ked e flowa ma ku dab ra unumed e wain u nap’an e re madnom nem.

¹⁶ Maku be ayuwegdad Paul ni ngad  nanged fan ni piin ni yad be athapeg ni ngar pared u fayleng e darur ked fare flowa ma ku darur unumed e wain u nap’an fare puguran ko yam’ ni tay Jesus. Ke yog ngak e piin ni kan dugliyrad ni gaar: “Nguum weliyed murung’agen e yam’ ni tay Somol ko ngiyal’ ni gimed ra kay e re flowa ney mi gimed unum e n’en ni ba’ ko re kap ney nge yan i mada’ ko ngiyal’ ni bayi sul Somol riy.” (1 Kor. 11:26) Wuin e ra ‘sul’ Somol riy? Ngiyal’ ni ra fek urngin e tin ni ka bay ko piin ni kan dugliyrad ni nga ranod nga tharmiy. (John 14:2, 3) Ere ba tamilang ni fare Abich ni Blayal’ rok Somol e ra ba ngiyal’ ma ra tal. ‘Piin ni ka yad ba’’ ni owchen fare ppin e yad ra un ko re abich ni blayal’ rok Somol ney nga mada’ ko ngiyal’ ni yad gubin e ka ranod nge tharmiy. (Rev. 12:17) Ere faanra piin ni yad be athapeg ni ngar pared u fayleng e bay rogorad ni ngar ked fare flowa mar unumed fare wain ere ba t’uf ni dab ni tal i madnomnag e re madnom ney.

‘Yad Ra Mang e Girdi’ Rog’

17, 18. Uw rogon ni ke lebug fare yiiy ni bay ko Ezekiel 37:26, 27?

¹⁷ Ke yiiynag Jehovah ni ra taareban’ e girdi’ rok me gaar: “Bay gu ngongliy ba m’ag u thilmad ni bayi mang mich ko par ni ngar tiyed ndariy n’umngin nap’an ma dab ki buch ban’en rorad. Ma bay gu gagiyegnagrad ngar yoorgad, mu gu tay e tempel rog nga lan e nam rorad, ni aram e gin ni bayi par riy ndariy n’umngin nap’an. Bay ug par rorad nggu mang Got rorad mi yad mang girdi’ rog.”​—Ezek. 37:26, 27.

¹⁸ Ra fel’ rogon urngin e girdi’ rok Got u nap’an nra lebug e tin ni kan micheg ni aram fare m’ag ko gapas u thilin e pi Kristiano. Riyul’ ni ke micheg Jehovah ni ra pi’ e gapas ngak urngin e pi tapigpig rok nib yul’yul’. Ba tamilang ni bay womngin gelngin Got nib thothup u fithikrad. Tempel rok ni be yip’ fan e bin riyul’ e liyor e bay rorad. Riyul’ ni kar manged girdi’ rok, ya dakurur liyorgad ngak boch e got ni googosur, ma kemus ni Jehovah e yad be liyor ngak.

19, 20. Chon mini’ e ke yog Jehovah ni “girdien,” ma mang e ke rin’ fare m’ag nib beech ngorad?

¹⁹ Ri yad be felfelan’ ni kad guyed ni kan taarebnag e gali ulung nem ni yugu aram rogon ni fare ulung nib baga’ e dabra ranod nga tharmiy, machane yad ba felfelan’ ni yad be chag ngak e piin ni yad ra yan nga tharmiy ni ka nog e Israel rok Got ngorad. Bochan e re n’ey ma aram fan ni ke yog Jehovah ni ‘girdien.’ Bochrad ma ke lebug fare yiiy ni gaar: “Re ngiyal’ i n’em e ba yoor e nam nra yib ngak Somol ngar manged girdien. Bayi par u fithik’med.”​—Zek. 2:11; 8:21; mu beeg e Isaiah 65:22; Revelation 21:3, 4. 

²⁰ Ke yog ni nge rin’ Jehovah e pi n’ey ni bochan fare m’ag nib beech. Bokum milyon e girdi’ e kar manged bang ko ulung rok Jehovah. (Mik. 4:1-5) Yad ba adag ni nguur yul’yul’gad ko re m’ag nem, ma aram e yad ma fol ko pi motochiyel ni kan pi’ ngorad. (Isa. 56:6, 7) Aram fan ni fare Israel rok Got e bay e gapas u fithik’rad. Yibe athapeg ni nge yog ngom e re tow’ath ney ni dariy n’umngin nap’an.

[Footnotes]

Ka Ga Manang?

• Mini’ “fa ragag nge lagruw i ganong nu Israel” ni fare 144,000 ni piin ni kan dugliyrad e ra pufthinnagrad?

• Uw rogon e tha’ u thilin e piin ni kan dugliyrad nge yugu boch e saf ko fare m’ag nib beech?

• Gur, gubin e Kristiano e thingara ked fare flowa ma ngar unumed fare wain u nap’an fare puguran ko yam’ ni tay Jesus?

• Mang e ke taareban’uy ngay ni kan weliy murung’agen?

[Study Questions]

[Picture on page 27]

(For fully formatted text, see publication)

Boor e girdi’ ni yad be maruwel fare Israel rok Got u taabang

7,313,173

4,017,213

1,483,430

373,430

1950 1970 1990 2009