U múuchʼ tamanoʼob, utúul j-kanan taman
U múuchʼ tamanoʼob, utúul j-kanan taman
«Teʼex xan ta tsaypachteneʼexeʼ yaan a kutaleʼex tiʼ doce jalaʼach kʼáancheʼob utiaʼal a pʼis óoltikeʼex u doce múuchʼ kajtaliloʼob Israel.» (MAT. 19:28)
1. ¿Bix tu yilil Jéeoba u paalal Abraham, yéetel baʼaxten k-aʼalik tak uláakʼ j-táanxel luʼumiloʼob jeʼel u páajtal kaʼach u meyajtkoʼobeʼ?
JÉEOBAEʼ jach tu yaabiltaj Abraham, le oʼolal jach tu yaabiltaj xan le israelitaʼob taaloʼob tiʼ u chʼiʼibaloʼ. Ich maas tiʼ mil quinientos jaʼaboʼobeʼ tu yilaj bey u kaajaleʼ (xokaʼak Deuteronomio 7:6). Baʼaleʼ láayliʼ tu kʼamaj u maasil máakoʼob tiʼ uláakʼ luʼumiloʼobeʼ. Wa u kʼáat u adorartoʼobeʼ jeʼel u páajtal u muchʼkubaʼob yéetel u kaajil Israeleʼ. Le j-táanxel luʼumiloʼobaʼ ku pʼáatloʼob bey jach israelitaʼobeʼ, le oʼolal unaj u tsʼoʼokbeskoʼob xan baʼax ku yaʼalik Dios yéetel unaj u tratartaʼaloʼob tubeel (Lev. 19:33, 34; 24:22).
2. ¿Baʼax tu yaʼalaj Jesús, yéetel baʼax kʼáatchiʼiloʼob ku beetaʼal tu yoʼolal?
2 Baʼaleʼ ka taal Jesús way Luʼumeʼ tu yaʼalaj tiʼ le judíoʼoboʼ: «U kaʼa lukʼesbil tiʼ teʼex u [reino Dios] utiaʼal ka tsʼaʼabak tiʼ le máakoʼob jeʼel u kʼubikoʼob le u yich [...] le [reinooʼ]» (Mat. 21:43). ¿Tiʼ máaxoʼob túun kun tsʼaabil? ¿Baʼax utsiloʼob ku taasik le baʼax beetaʼabaʼ?
Upʼéel túumben kaaj
3, 4. 1) ¿Baʼax tu yaʼalaj apóstol Pedro yoʼolal le túumben kaajoʼ? 2) ¿Máaxoʼob yanoʼob ichil le túumben kaajoʼ?
3 Apóstol Pedroeʼ tu yaʼalaj máaxoʼob yanoʼob ichil le túumben kaaj, le ka tu yaʼalaj tiʼ le sukuʼunoʼoboʼ: «Teʼexeʼ jumpʼéel kaaj yéeyaʼaneʼex, junmúuchʼ [j-]kʼiinoʼob táan u meyajtikoʼob le [reyoʼ], jumpʼéel kaaj kiliʼich, jumpʼéel kaaj utiaʼal Jajal Dios. Lelaʼ bey aniloʼ utiaʼal ka [kʼaʼayteʼex] u jakʼbeʼen meyajoʼob Jajal Dios, máax tʼaneʼex utiaʼal ka jóokʼokeʼex tiʼ le éekʼjochʼeʼeniloʼ utiaʼal ka okokeʼex tiʼ le kiʼichkelem sáasil[oʼ]» (1 Ped. 2:9). Jeʼex aʼalaʼabikoʼ, le yáax máakoʼob ookoʼob ichil le túumben kaajoʼ letiʼe judíoʼob kʼam Jesús bey Mesíasiloʼ (Dan. 9:27 yáax xóotʼ; Mat. 10:6). Baʼaleʼ ka máan kʼiineʼ, yaʼab máakoʼob maʼ judíoʼobeʼ ookoʼob xan ichil le túumben kaaj, jeʼex aʼalaʼabik tumen Pedroeʼ: «Teʼex kaʼacheʼ mix kaajaleʼexiʼ, baʼaleʼ beoraaʼ u kaajaleʼex Jajal Dios» (1 Ped. 2:10).
4 ¿Tiʼ máaxoʼob tu yaʼalaj Pedro le tʼaanoʼobaʼ? Tu káajbal le carta tu tsʼíibtoʼ k-ilik táan u tʼaan tiʼ le máaxoʼob tsʼoʼok u síijloʼob «tu kaʼatéen tu yoʼolal u kaʼa púut kuxtal Jesucristo tiʼ ichil le kimenoʼoboʼ. Lelaʼ ku tsʼáaiktoʼon jumpʼéel kuxtal yéetel alab óolal, yéetel bíin u beet a kʼamikeʼex le ayikʼalil u kanáantmaj a tiaʼalteʼex Jajal Dios teʼ kaʼanoʼ» (1 Ped. 1:3, 4). Jeʼex tun k-ilkoʼ le sukuʼunoʼob yéeyaʼanoʼob utiaʼal u binoʼob kaʼanoʼ letiʼob yanoʼob ichil le túumben kaajoʼ. Galaciailoʼob 6:16 ku yaʼalikeʼ le túumben kaajaʼ ku kʼaabaʼtik «u Israel Jajal Dios». Yéetel apóstol Juan xaneʼ tu yileʼ le túumben israelitaʼobaʼ 144,000 utúulaloʼob, letiʼobeʼ «toʼokoʼob tiʼ ichil máakoʼobeʼ bey yáax siibal utiaʼal Jajal Dios yéetel utiaʼal le j-tamanoʼ», tsʼoʼoleʼ yaan u beetik «u j-kʼiiniloʼob» yéetel «u jalaʼachiloʼob tu yéetel [Cristo] tu yáam mil jaʼaboʼob» (Apo. 5:10; 7:4; 14:1, 4; 20:6; Sant. 1:18).
¿Chéen wa letiʼob meyajtik Dios?
5. 1) ¿Tiʼ máaxoʼob ku yaʼalaʼal «u Israel Jajal Dios»? 2) ¿Baʼax eʼesik le tʼaan Israeloʼ ku meyaj xan utiaʼal u yúuchul tʼaan tiʼ uláakʼ máakoʼob meyajtik Diosoʼ?
5 Jeʼex túun k-ilkoʼ, chéen tiʼ le sukuʼunoʼob yéeyaʼanoʼob ku yaʼalaʼal «u Israel Jajal Dios[oʼ]» (Gal. 6:16). Baʼaleʼ Jéeobaeʼ ku chʼaʼachiʼitik xan u kaajil Israel utiaʼal u tʼaan tiʼ le uláakʼ máakoʼob meyajtikoʼ. Lelaʼ bey u yeʼesik le baʼax tu yaʼalaj Jesús tiʼ u apostoloʼoboʼ: «Kin tsʼáaikteʼex jumpʼéel [reino] jeʼel bix tsʼaʼanil tiʼ teen tumen in Taataeʼ, utiaʼal ka yanakeʼex yéetel ka ukʼulnakeʼex tin wéetel tin [reino], bey xan utiaʼal ka kulakeʼex tiʼ jalaʼach kʼáancheʼob utiaʼal ka pʼis óolteʼex u doce chʼiʼibaloʼob Israel» (Luc. 22:28-30). Le pʼis óolaʼ yaan u béeytal le «ken túumbenchajak tuláakal baʼal» yáanal u Reino Cristo ichil le Mil Jaʼaboʼoboʼ (xokaʼak Mateo 19:28).
6, 7. ¿Máaxoʼob ku chíikbesaʼaloʼob tumen le «u doce múuchʼ kajtaliloʼob Israel» ku yaʼalik Mateo 19:28 wa le «u doce chʼiʼibaloʼob Israel» ku yaʼalik Lucas 22:30?
6 Ichil le Mil Jaʼaboʼoboʼ le 144,000 yéeyaʼanoʼoboʼ yaan u beetik u reyiloʼob, u j-kʼiiniloʼob yéetel u jueziloʼob teʼ kaʼanoʼ (Apo. 20:4). Baʼaleʼ ¿máaxoʼob ken u juzgartoʼob yéetel ken u gobernartoʼob? Tu tsʼíibil Mateo 19:28 yéetel Lucas 22:30, ku yaʼalikeʼ yaan u gobernarkoʼob «u doce múuchʼ kajtaliloʼob Israel» wa «u doce chʼiʼibaloʼob Israel». ¿Máaxoʼob túun lelaʼ? Letiʼe máaxoʼob ku tsʼáaik u fejoʼob tiʼ le u kuxtal Jesús tu kʼuboʼ yéetel yaan u pʼáatloʼob kuxtal way Luʼumeʼ, maʼ táan u tʼaan tiʼ le máaxoʼob ken u beet u reyiloʼob yéetel u j-kʼiiniloʼoboʼ (kʼaʼajaktoʼoneʼ, úuchjeakileʼ maʼatech u xokaʼal u chʼiʼibal le levitaʼob ichil u doce chʼiʼibaliloʼob Israeloʼ). Kex le máaxoʼob ku chíikbesaʼaloʼob tumen le «u doce chʼiʼibaloʼob Israel» maʼ j-kʼiinoʼoboʼ, ku kʼamikoʼob le utsiloʼob ku taasik le meyaj ku beetik le 144,000 j-kʼiinoʼoboʼ. Tsʼoʼoleʼ táakaʼanoʼob ichil u kaajal Dios, yaabiltaʼanoʼob yéetel ku kʼaʼamloʼob tumen Jéeoba. Le oʼolal jach maʼalob u keʼetloʼob yéetel u úuchben kaajil Israel.
7 Apóstol Juan xaneʼ tu yileʼ táanil tiʼ le nojoch muʼyajiloʼ yaan u láaj sellartaʼal le 144,000 sukuʼunoʼob kun binoʼob kaʼanoʼ. ¿Baʼax uláakʼ tu yilaj? Tu yilaj «yaʼabkach máakoʼob» ku taaloʼob «tiʼ tuláakal múuchʼkabil kaajoʼob» (Apo. 7:9). Le yaʼabkach máakoʼobaʼ, yaan u salvarkubaʼob tiʼ le nojoch muʼyajiloʼ yéetel yaan u kuxtaloʼob yáanal u gobernación Cristo ichil le Mil Jaʼaboʼoboʼ. Baʼaleʼ maʼ chéen letiʼob kun kajtaloʼobiʼ, tak u millonesi máakoʼob kun kaʼa kuxkíintbiloʼoboʼ (Juan 5:28, 29; Apo. 20:13). Tuláakal le máaxoʼob kun pʼáatloʼob kuxtal way Luʼumeʼ ku chíikbesaʼaloʼob tumen le «u doce chʼiʼibaloʼob Israel[oʼ]», letiʼobeʼ yaan u juzgartaʼaloʼob yéetel yaan u gobernartaʼaloʼob tumen Jesús yéetel le 144,000 yéeyaʼanoʼoboʼ (Hch. 17:31; 24:15; Apo. 20:12).
8. Le baʼaxoʼob ku beetaʼal tu Kʼiinil le Saʼatsaj Siʼipiloʼ, ¿bix u chíikbesik le baʼax yaan u yil le 144,000 yéetel le u maasil máakoʼoboʼ?
8 Beoraaʼ tuukulnakoʼon tiʼ le baʼax ku beetaʼal tu Kʼiinil le Saʼatsaj Siʼipiloʼ, lelaʼ yaan u yeʼesiktoʼon baʼax yaan u yil le 144,000 yéeyaʼanoʼob yéetel le u maasil máakoʼoboʼ (Lev. 16:6-10). Le kʼiimbesajaʼ cada jaʼab ku beetaʼal kaʼachi, teʼ kʼiin jeʼeloʼ u nojchil le j-kʼiinoʼoboʼ yáaxeʼ ku kʼubik utúul wakax «yoʼolal u kʼamik u saʼatsaj siʼipil u kʼeban paʼteʼ yéetel u yotoch». Le u kuxtal Jesús tu kʼuboʼ, ku kʼaʼamal u yutsil yáax tumen le máaxoʼob ken u beet u j-kʼiiniloʼob yéetel u reyiloʼob teʼ kaʼan yáanal u nuʼuktajoʼ. Baʼaleʼ tu kʼiinil xan le Saʼatsaj Siʼipiloʼ ku kʼubaʼal kaʼatúul chivoʼob utiaʼal u saʼatsaʼal u kʼeeban u maasil israelitaʼoboʼ. Jeʼex túun k-ilkoʼ, le u chʼiʼibal le j-kʼiinoʼoboʼ ku chíikbeskoʼob le 144,000 yéeyaʼanoʼoboʼ, le u maasil israelitaʼoboʼ ku chíikbeskoʼob tuláakal le máaxoʼob táan u páaʼtikoʼob u pʼáatloʼob kuxtal mantatsʼ way Luʼumeʼ. Bey túunoʼ le «u doce múuchʼ kajtaliloʼob Israel» ku yaʼalik Mateo 19:28, maʼ táan u tʼaan tiʼ le máaxoʼob ken u beet u j-kʼiiniloʼoboʼ, baʼaxeʼ táan u tʼaan tiʼ le u maasil máakoʼob ken u tsʼáaj u fejoʼob tiʼ le u kuxtal Cristo tu kʼuboʼ. *
9. Teʼ náay tsʼaʼab u yil Ezequieloʼ, ¿máax ku chíikbesik le j-kʼiinoʼob yéetel le u maasil israelitaʼoboʼ?
9 Beoraaʼ koʼoneʼex tʼaan tiʼ le templo tsʼaʼab u yil Ezequiel tiʼ upʼéel náayoʼ (Eze., capítulo 40 tak 48). Letiʼeʼ tu yileʼ le j-kʼiinoʼoboʼ tiʼ ku meyajoʼob teʼ templooʼ, ku kaʼansajoʼob, ku tsolnuʼuktaʼaloʼob yéetel ku kʼamkoʼob u nuʼuktaj Jéeobaiʼ (Eze. 44:23-31). Baʼaleʼ u maasil israelitaʼoboʼ ku binoʼob teʼ templo utiaʼal u adorartoʼob Diosoʼ yéetel utiaʼal u kʼub u siibaloʼob tiʼ (Eze. 45:16, 17). Le j-kʼiinoʼob ilaʼab teʼ náayaʼ ku chíikbeskoʼob le sukuʼunoʼob yéeyaʼanoʼoboʼ, yéetel le u maasil israelitaʼoboʼ ku chíikbeskoʼob le máaxoʼob táan u páaʼtik u pʼáatloʼob kuxtal way Luʼumeʼ. Le baʼax tu yilaj Ezequieloʼ ku yeʼesik bix u múuchʼ meyaj le máaxoʼob táan u páaʼtik u pʼáatloʼob kuxtal way Luʼum yéetel le sukuʼunoʼob nuʼuktik le meyaj ku beetaʼal ichil u kaajal Diosoʼ.
10, 11. 1) Teʼ kʼiinoʼobaʼ ¿bix u béeytal le baʼax tu yaʼalaj Jesusoʼ? 2) ¿Baʼax kʼáatchiʼi ku beetaʼal yoʼolal le uláakʼ tamanoʼoboʼ?
10 Jesuseʼ tu yaʼalaj yaan «uláakʼ tamanoʼob» minaʼanoʼob teʼ «corral, NM» tuʼux yaan le u «chan muchʼ taman» wa le sukuʼunoʼob yéeyaʼanoʼoboʼ (Juan 10:16; Luc. 12:32). Letiʼeʼ tu yaʼalaj yoʼolal le «uláakʼ tamanoʼob[oʼ]»: «Yaan in taasikoʼob xan. Letiʼobeʼ yaan u yuʼubikoʼob in tʼaan, yaan u yantal jumpʼéeliliʼ u múuchʼul tamanoʼob yéetel juntúuliliʼ j-kanan taman». ¿Máasaʼ jach ku muʼukʼaʼankúuntik k-fe k-ilik bix u béeytal le baʼax tu yaʼaloʼ? U jaajileʼ tsʼoʼok u muchʼaʼal le u «chan muchʼ taman» wa le sukuʼunoʼob yéeyaʼanoʼoboʼ yéetel le «uláakʼ tamanoʼob» wa tuláakal le máakoʼob kun pʼáatloʼob kuxtal way Luʼumaʼ (xokaʼak Zacarías 8:23). Le uláakʼ tamanoʼoboʼ maʼatech u meyajoʼob ichil le templooʼ jeʼex u beetik le u chan muchʼ tamanoʼoboʼ.
11 Jeʼex túun k-ilkoʼ Jéeobaeʼ ku chʼaʼachiʼitik le u maasil israelitaʼob utiaʼal u tʼaan tiʼ uláakʼ tamanoʼoboʼ. ¿U kʼáat wa túun u yaʼaleʼ le máaxoʼob táan u páaʼtik u kuxtaloʼob way Luʼumeʼ jeʼel u páajtal u jaantkoʼob le waaj yéetel u yukʼikoʼob le vino le ken beetaʼak le Kʼaʼajsajiloʼ? Koʼoneʼex ilik u núukil.
Le túumben núuptʼaanoʼ
12. ¿Baʼax túumben núuptʼaanil tu yaʼalaj Jéeoba ken u beete?
12 Jéeobaeʼ tu yaʼalaj yaan u beetik upʼéel túumben núuptʼaan yéetel u kaajal le ka tu yaʼalaj: «Letiʼ le núuptʼaan bíin in beet yéetel Israel le ken kʼuchuk u kʼiinileʼ: Bíin in tsʼáa in waʼalmajtʼaan tu puksiʼikʼal bíin xan in tsʼíibt tu tsʼuʼ u tuukul. Teneʼ bíin u [Diosintenoʼob], letiʼob xaneʼ bíin in kaajaltoʼob. Teen Yuumtsil, teen aʼalik» (Jer. 31:31-33). Yéetel le túumben núuptʼaanaʼ yaan u béeykuntik tuláakal le baʼaxoʼob tu yaʼalaj tiʼ Abrahamoʼ (xokaʼak Génesis 22:18).
13, 14. 1) ¿Máaxoʼob ku táakpajloʼob tiʼ le túumben núuptʼaanoʼ? 2) ¿Máaxoʼob kʼamik u yutsiloʼob le túumben núuptʼaanoʼ, yéetel bix u machkubaʼob tiʼ?
13 Le áakʼab táanil tiʼ u kíimsaʼal Jesusoʼ, tu chʼaʼachiʼitaj le túumben núuptʼaanaʼ, letiʼeʼ tu yaʼalaj: «Le copaaʼ u kʼáat u yaʼal le túumben núuptʼaan ku beetaʼal yoʼolal in kʼiʼikʼel kun wekbil ta woʼolaleʼexoʼ» (Luc. 22:20, NM; 1 Cor. 11:25). ¿Tuláakal wa le máaxoʼob meyajtik Dios táakaʼanoʼob ichil le túumben núuptʼaanoʼ? Maʼatech, chéen wa jaytúul táakpajaʼanoʼobiʼ. Jeʼex le apostoloʼob tu yukʼoʼob le vino teʼ tu tsʼook áakʼab tu máansoʼob yéetel Jesusoʼ, chéen letiʼob ku táakpajloʼob teʼ túumben núuptʼaanoʼ. * Jesuseʼ tu beetaj uláakʼ upʼéel núuptʼaan utiaʼal u gobernar tu yéeteloʼob teʼ kaʼanoʼ (Luc. 22:28-30). Jeʼex túun k-ilkoʼ yaan u múul gobernaroʼob yéetel Cristo teʼ Reinooʼ (Luc. 22:15, 16).
14 ¿Kux túun le máaxoʼob táan u páaʼtik u kuxtaloʼob way Luʼum yáanal le Reinooʼ? Letiʼobeʼ yaan u kʼamkoʼob u yutsiloʼob le túumben núuptʼaanoʼ (Gal. 3:8, 9). Kex maʼatech u táakpajloʼob tiʼ le túumben núuptʼaanoʼ, «ku kʼubikubaʼob tu jaajil u yóoloʼob» tiʼ wa ku machkubaʼob tiʼ ikil u tsʼoʼokbeskoʼob le baʼax ku yaʼalikoʼ, Jéeobaeʼ ku yaʼalik: «Bey xan le j-táanxel luʼumiloʼob bíin u [kʼububaʼob] tiʼ tenoʼ, utiaʼal u meyajtenoʼob yéetel u yaabiltenoʼob, utiaʼal ka in palitsiltoʼoboʼ, wa ku tsʼoʼokbesikoʼob u yaʼalmajtʼaaniloʼob in sabadoʼob maʼ xan tu [mixbaʼalkúuntikoʼob], tumen ku kʼubikubaʼob tu jaajil u yóoloʼob u tsʼoʼokbesoʼob in núuptʼaaneʼ, teneʼ bíin in taasoʼob tin kiliʼich witsil, bíin in beet u kiʼital u yóoloʼob tin najil tuʼux ku yúuchul payalchiʼ. [...] Tumen in wotocheʼ bíin aʼalaʼak [...] u kúuchil payalchiʼ utiaʼal tuláakal kaajoʼob» (Isa. 56:6, 7).
¿Máaxoʼob unaj u jaantkoʼob le waaj yéetel u yukʼikoʼob le vinooʼ?
15, 16. 1) ¿Baʼax tu yaʼalaj Pablo ku páajtal u beetik le máaxoʼob ku táakpajloʼob teʼ túumben núuptʼaanoʼ? 2) ¿Baʼaxten maʼ unaj u jaantaʼal le waaj yéetel u yuʼukʼul le vino tumen le máaxoʼob táan u páaʼtik u pʼáatloʼob kuxtal way Luʼumoʼ?
15 Le máaxoʼob ku táakpajloʼob tiʼ le túumben núuptʼaanoʼ, ku páajtal u yookloʼob «yéetel tuláakal kʼub óolal tak tiʼ le jach Kiliʼich Kúuchiloʼ» (xokaʼak Hebreob 10:15-20). Yaan u tsʼaʼabaltiʼob tumen Dios upʼéel Reino «maʼ táan u páajtal u máan» (Heb. 12:28). Tumen le «copa» ku chíikbesik le túumben núuptʼaanoʼ, chéen le sukuʼunoʼob yéeyaʼanoʼob utiaʼal u beet u reyiloʼob yéetel u j-kʼiiniloʼob yéetel Cristo teʼ kaʼan jeʼel u páajtal u yukʼikoʼoboʼ. Ku yaʼalaʼal xaneʼ letiʼobeʼ bey u yaʼalmoʼob u tsʼoʼokol u beeloʼob yéetel le j-Tamanoʼ (2 Cor. 11:2; Apo. 21:2, 9). Le oʼolal u maasil le máaxoʼob ku binoʼob tu Kʼaʼajsajil kíimik Cristooʼ chéen ku yeʼeskoʼob tsiikil, maʼatech u jaantkoʼob le waajoʼ mix tech u yukʼikoʼob le vinooʼ.
16 Le baʼaxoʼob tu yaʼalaj Pablooʼ ku yáantkoʼon k-naʼat xaneʼ le máaxoʼob táan u páaʼtik u pʼáatloʼob kuxtal way Luʼumoʼ maʼatech u jaantkoʼob le waajoʼ mix tech u yukʼikoʼob le vino teʼ Kʼaʼajsajiloʼ. Letiʼeʼ tu yaʼalaj tiʼ le sukuʼunoʼob yéeyaʼanoʼoboʼ: «Jeʼel jaytéen ka a jaanteʼex le waajaʼ yéetel ka a wukʼeʼex le ukʼulaʼ táan a tsʼáaikeʼex kʼaj óoltbil u kíimil Yuumtsil tak ken taalak» (1 Cor. 11:26). ¿Baʼax kʼiin ken taalak Cristo? Letiʼe ken taalak u chʼaʼa u tsʼook utúul tiʼ le sukuʼunoʼob yéeyaʼanoʼoboʼ (Juan 14:2, 3). Lelaʼ ku yeʼesikeʼ yaan u kʼuchul u kʼiinil u xuʼulul u Kʼaʼajsaʼal kíimik Cristo. Le «u yalab» u chʼiʼibal le koʼolel pʼáatal way Luʼumoʼ yaan u xuʼulul u táakpajloʼob teʼ Kʼaʼajsajil le ken láaj xiʼikoʼob teʼ kaʼanoʼ (Apo. 12:17). Baʼaleʼ wa le máaxoʼob kun pʼáatloʼob kuxtal way Luʼum ku jaantkoʼob le waaj yéetel ku yukʼikoʼob le vinooʼ, le Kʼaʼajsajiloʼ yaan u seguer u beetaʼal utiaʼal mantatsʼ.
«Letiʼobeʼ bíin in kaajaltoʼob»
17, 18. ¿Bix u béeytal le baʼax ku yaʼalik Ezequiel 37:26 yéetel 27?
17 Jéeobaeʼ tu yaʼalaj bix ken u múuchʼ bisuba le máaxoʼob meyajtikoʼ: «Bíin in beet jumpʼéel núuptʼaan tu yéeteloʼob utiaʼal [...] jumpʼéel jeetsʼel kuxtal. Leloʼ jumpʼéel núuptʼaan utiaʼal kʼiinoʼob minaʼan u xuul. Bíin in beet u jach yaʼabtaloʼob, bíin in tsʼáa in [santuario] ichiloʼob utiaʼal kʼiinoʼob minaʼan u xuul. Bíin kajlaken ichiloʼob, bey xan bíin u [Diosintenoʼob], yéetel letiʼobeʼ, bíin in kaajaltoʼob» (Eze. 37:26, 27).
18 Tuláakal le máaxoʼob meyajtik Diosoʼ ku kʼamikoʼob u yutsil le «núuptʼaan [...] utiaʼal [...] jumpʼéel jeetsʼel kuxtal» ichiloʼoboʼ. Jeʼex túun k-ilkoʼ, Jéeobaeʼ ku yaʼalikeʼ le máaxoʼob ku chúukpajal u yóoloʼob meyajtikoʼ yaan u yantal jeetsʼelil tiʼob. Ichiloʼobeʼ chíikaʼan u yilaʼal u yich le kiliʼich muukʼoʼ. Yéetel u santuario Dios, wa le adoración kʼambeʼen tu táanoʼ, tiaʼan xan ichiloʼobeʼ. U jaajileʼ tsʼoʼok u kʼuchul u beetubaʼob u kaajal Jéeoba, tumen tsʼoʼok u pʼatkoʼob tuláakal le jejeláas adoracionoʼob maʼ kʼambeʼenoʼob tu táan Jéeobaoʼ utiaʼal u meyajtkoʼob chéen letiʼ.
19, 20. 1) ¿Máaxoʼob yanoʼob ichil u kaajal Jéeoba? 2) ¿Baʼaxoʼob tsʼoʼok u béeytal yoʼolal le túumben núuptʼaanoʼ?
19 ¿Máasaʼ jach ku beetik u kiʼimaktal k-óol k-ilik bix u múuchʼ meyaj le sukuʼunoʼob yéeyaʼanoʼob yéetel le máaxoʼob kun pʼáatloʼob kuxtal way Luʼumaʼ? Kex le yaʼabkach máakoʼob maʼ táan u páaʼtikoʼob u binoʼob kaʼanoʼ, kiʼimak u yóoloʼob ikil u múuchʼ meyajoʼob yéetel u Israel Dios. Le oʼolaleʼ ku yaʼalaʼal xan tiʼob tumen Jéeoba «in kaajal». Tiʼ letiʼob ku béeytal le profecíaaʼ: «Yaʼabkach múuchʼ kaajoʼob bíin u nupubaʼob tu yéetel Yuumtsil. Letiʼeʼ bíin u yaʼal: Bíin in kaajalt xan le múuchʼ kaajoʼobaʼ. Teen túuneʼ bíin kajlaken ichileʼex» (Zac. 2:11; 8:21; xokaʼak Isaías 65:22 yéetel Apocalipsis 21:3, 4).
20 Tuláakal lelaʼ tsʼoʼok u beetaʼal tumen Jéeoba yoʼolal le túumben núuptʼaanoʼ. U millonesi máakoʼobeʼ tsʼoʼok u yookloʼob ichil le kaaj ku kʼamkoʼ (Miq. 4:1-5). Letiʼobeʼ u chʼaʼatukultmoʼob u seguer a machkubaʼob tiʼ le túumben núuptʼaan ikil u beetkoʼob tuláakal le baʼaxoʼob ku yaʼalikoʼ (Isa. 56:6, 7). Beyoʼ ku kuxtaloʼob ich jeetsʼelil yéetel u Israel Dios mantatsʼ. ¿Máasaʼ jach kiʼimak k-óol yoʼolal le utsiloʼob k-kʼamik bejlaʼaʼ bey xan teʼ kʼiinoʼob ku taaloʼ?
[Tsolajiloʼob]
^ xóot’ol 8 Le tʼaan «u múuchʼul u yáax paalaloʼob Jajal Dios[oʼ]» táan u tʼaan tiʼ le sukuʼunoʼob yéeyaʼanoʼoboʼ (Heb. 12:23), baʼaleʼ lelaʼ ku meyaj xan utiaʼal u yúuchul tʼaan tiʼ tuláakal le máaxoʼob meyajtik Dios kex wa táan u páaʼtik u binoʼob kaʼan wa maʼ (ilaʼak U Pʼíich Tulumil Kanan 1 tiʼ mayo tiʼ 2007, táan juʼun 8 tak 11).
^ xóot’ol 13 Jesuseʼ maʼ táakpajaʼan teʼ túumben núuptʼaanoʼ, tumen tu yoʼolal letiʼ ku béeytal. Le oʼolal jeʼel u páajtal u yaʼalaʼaleʼ maʼ tu jaantaj le waajoʼ mix tu yukʼaj le vinooʼ.
¿Ta naʼataj wa?
• ¿Máaxoʼob le «u doce chʼiʼibaloʼob Israel» kun gobernartbiloʼob tumen le 144,000 yéeyaʼanoʼoboʼ?
• ¿Baʼax utsiloʼob ku taasik le túumben núuptʼaan tiʼ le sukuʼunoʼob yéeyaʼanoʼob bey xan tiʼ le uláakʼ tamanoʼoboʼ?
• ¿Unaj wa u jaantaʼal le waaj yéetel u yukʼaʼal le vino tumen tuláakal le máaxoʼob ku binoʼob teʼ Kʼaʼajsajiloʼ?
• ¿Bix aʼalaʼabik kun múuchʼ meyaj le máaxoʼob meyajtik Dios teʼ kʼiinoʼobaʼ?
[U kʼáatchiʼiloʼob le xookoʼ]
[U tsolajil le oochel teʼ táan juʼun 25]
Yaʼab máakoʼob tsʼoʼok u joʼopʼol u múuchʼ meyajoʼob yéetel u Israel Dios
7,313,173
4,017,213
1,483,430
373,430
1950 1970 1990 2009