Nabawtismohan sa Ngalan ni Kinsa ug sa Unsa?
Nabawtismohan sa Ngalan ni Kinsa ug sa Unsa?
“Busa panglakaw kamo ug paghimog mga tinun-an . . . , nga magabawtismo kanila sa ngalan sa Amahan ug sa Anak ug sa balaang espiritu.”—MAT. 28:19.
1, 2. (a) Unsay nahitabo sa Jerusalem sa Pentekostes 33 K.P.? (b) Nganong daghan ang natukmod sa pagpabawtismo?
ANG Jerusalem punog mga tawo nga gikan sa lainlaing kayutaan. Sa adlaw sa Pentekostes 33 K.P., gisaulog ang usa ka hinungdanong pista ug daghang bisita ang nakigbahin niana. Apan dihay talagsaong panghitabo, ug human niana si apostol Pedro mihatag ug makapatandog nga pakigpulong nga may katingalahang epekto. Mga 3,000 ka Hudiyo ug mga kinabig ang natandog sa iyang gipamulong, naghinulsol, ug nagpabawtismo. Sa ingon, nadugang sila sa bag-ong natukod nga Kristohanong kongregasyon. (Buh. 2:41) Lagmit gayong naukay ang mga tawo tungod sa kadaghan sa nagpabawtismo diha sa mga linaw sa Jerusalem!
2 Nganong daghan kaayo ang nagpabawtismo? Sayosayo nianang adlawa, “may nahitabong kabanha gikan sa langit sama gayod nianang nagahuros nga makusog nga hangin.” Sa itaas nga lawak sa usa ka balay, mga 120 ka tinun-an ni Jesus ang napuno sa balaang espiritu. Human niana, ang masimbahong mga tawo nanugok ug nahibulong sa pagkadungog nila sa mga tinun-an nga ‘nagsultig lainlaing pinulongan.’ Sa dihang nadungog nila ang gipamulong ni Pedro, lakip na ang iyang pintok nga mga komento bahin sa kamatayon ni Jesus, daghan ang ‘nasamdan sa ilang kasingkasing.’ Unsay angay nilang buhaton? Si Pedro miingon: “Paghinulsol kamo, ug magpabawtismo ang matag usa kaninyo sa ngalan ni Jesu-Kristo . . . , ug inyong madawat ang walay bayad nga gasa nga balaang espiritu.”—Buh. 2:1-4, 36-38.
3. Sa adlaw sa Pentekostes, unsay kinahanglang buhaton sa mahinulsolong mga Hudiyo ug mga kinabig?
3 Hunahunaa ang relihiyosong situwasyon sa mga Hudiyo ug mga kinabig nga nakadungog sa gipamulong ni Pedro. Una pa niana, ila nang gidawat si Jehova ingong ilang Diyos. Ug ilang nakat-onan gikan sa Hebreohanong Kasulatan nga ang balaang espiritu mao ang aktibong gahom sa Diyos nga iyang gigamit panahon sa paglalang ug human niana. (Gen. 1:2; Maghu. 14:5, 6; 1 Sam. 10:6; Sal. 33:6) Apan duna pa silay angayng mahibaloan. Hinungdanon nga ilang masabtan ug dawaton ang instrumento sa Diyos alang sa kaluwasan—ang Mesiyas, si Jesus. Busa, gipasiugda ni Pedro nga kinahanglan silang ‘magpabawtismo sa ngalan ni Jesu-Kristo.’ Pipila ka adlaw una pa niana, ang nabanhawng si Jesus nagsugo kang Pedro ug sa uban pa sa pagbawtismo sa mga tawo “sa ngalan sa Amahan ug sa Anak ug sa balaang espiritu.” (Mat. 28:19, 20) Dako kanag kahulogan niadtong unang siglo, ug maingon man usab karon. Unsa man kana?
Sa Ngalan sa Amahan
4. Maylabot sa mga tawo nga dunay personal nga relasyon kang Jehova, unsang kausaban ang nahitabo?
4 Sumala sa nahisgotan na, kadtong misanong sa pakigpulong ni Pedro nagsimba na kang Jehova ug duna nay personal nga relasyon kaniya. Naningkamot sila sa pagsunod sa iyang Balaod, nga maoy hinungdan nga kadtong gikan sa laing kayutaan nangadto sa Jerusalem. (Buh. 2:5-11) Apan, ang Diyos mihimog dakong kausaban sa iyang pagpakiglabot sa mga tawo. Iyang gisalikway ang mga Hudiyo ingong iyang linaing nasod; ang ilang pagtuman sa Balaod dili na mao ang paagi nga mabatonan ang iyang pag-uyon. (Mat. 21:43; Col. 2:14) Kon buot nilang magpadayon ang ilang relasyon kang Jehova, aduna silay kinahanglang buhaton.
5, 6. Unsay gihimo sa daghang Hudiyo ug mga kinabig sa unang siglo aron makabatog personal nga relasyon sa Diyos?
5 Kana dili gayod ang pagtalikod kang Jehova, ang ilang Maghahatag-ug-Kinabuhi. (Buh. 4:24) Gani, mas nasabtan pa niadtong misanong sa pakigpulong ni Pedro nga si Jehova maoy maluluy-ong Amahan. Iyang gipadala ang Mesiyas aron sa pagluwas kanila ug andam siyang mopasaylo bisan niadtong giingnan ni Pedro: “Angay gayod nga mahibalo ang tibuok nga balay sa Israel nga ang Diyos naghimo kaniyang Ginoo ug Kristo, kining Jesus nga inyong gilansang.” Sa pagkatinuod, kadtong nagpadapat sa gipamulong ni Pedro duna nay mas dakong rason nga magmapasalamaton sa gihimo sa Amahan alang sa tanan nga buot makabatog personal nga relasyon sa Diyos!—Basaha ang Buhat 2:30-36.
6 Sa walay duhaduha, nasabtan sa maong mga Hudiyo ug mga kinabig nga ang personal nga relasyon kang Jehova naglangkit diay sa pag-ila kaniya ingong Magtataganag kaluwasan pinaagi ni Jesus. Nan, imong masabtan kon nganong naghinulsol sila sa ilang mga sala, lakip na nianang sa pagpatay kang Jesus, sila man aktuwal nga nagkigbahin niana o wala. Ug masabtan usab kon nganong sa misunod nga mga adlaw “sila nagpadayon sa pagdeboto sa ilang kaugalingon sa ginatudlo sa mga apostoles.” (Buh. 2:42) Sila makahimo ug nagtinguha ‘sa pagduol sa trono sa dili-takos nga kalulot uban ang kagawasan sa pagsulti.’—Heb. 4:16.
7. Nganong daghan karon ang nag-usab sa ilang panglantaw sa Diyos ug nagpabawtismo sa ngalan sa Amahan?
7 Karong adlawa, milyonmilyong tawo nga lainlaig kagikan ang nakakat-on gikan sa Bibliya sa kamatuoran bahin kang Jehova. (Isa. 2:2, 3) Ang pipila kaniadto maoy mga ateyista o deyista, a apan nakombinsir sila nga dunay usa ka Maglalalang kang kinsa sila mahimong makabatog suod nga relasyon. Ang uban nagsimbag tinagutlo nga diyos o sa lainlaing idolo. Ilang nakat-onan nga si Jehova lamang ang labing gamhanang Diyos, ug karon ilang gitawag siya sa iyang personal nga ngalan. Nahiuyon kana sa giingon ni Jesus nga ang iyang mga tinun-an angayng mabawtismohan sa ngalan sa Amahan.
8. Maylabot sa Amahan, unsay kinahanglang masabtan niadtong walay kasayoran sa sala ni Adan?
8 Nasayran usab nila nga napanunod nila ang sala ni Adan. (Roma 5:12) Usa kini ka bag-ong butang nga kinahanglan nilang dawaton. Mahimo silang ipakasama sa usa ka tawong dunay sakit apan wala mahibalo kon unsay iyang sakit. Tingali duna nay mga simtoma, sama sa panagsang pagbatig kasakit. Apan kay wala man madayagnos kon unsay iyang sakit, basin maghunahuna siya nga maayo ra siyag lawas. Hinunoa, dili na maoy tinuod niyang kahimtang. (Itandi ang 1 Corinto 4:4.) Komosta kon tukmang madayagnos ang iyang sakit? Dili ba maalamon nga mangita siyag nailhan, napamatud-an, ug epektibong tambal? Sa susama, sa dihang makat-onan ang kamatuoran bahin sa napanunod nga sala, daghan ang midawat sa “dayagnosis” sa Bibliya ug nakasabot nga ang Diyos nagtanyag ug “tambal.” Oo, ang tanang nahimulag sa Amahan kinahanglang modangop sa Usa nga “makaayo” kanila.—Efe. 4:17-19.
9. Unsay gihimo ni Jehova aron ang mga tawo makabatog personal nga relasyon kaniya?
9 Kon ikaw nagpahinungod na sa imong kinabuhi kang Jehova nga Diyos ug nahimo nang bawtismadong Kristohanon, imong mahibaloan nga usa ka kahibulongang kasinatian ang pagbatog personal nga relasyon kaniya. Imo nang maapresyar karon kon unsa kamahigugmaon ang imong Amahan nga si Jehova. (Basaha ang Roma 5:8.) Bisan tuod si Adan ug Eva nakasala kaniya, ang Diyos mihimo sa unang lakang aron ang ilang kaliwat—lakip kanato—makabatog maayong relasyon kaniya. Sa pagbuhat niana, kinahanglang agwantahon sa Diyos ang kasakit nga makita ang iyang minahal nga Anak nga nag-antos ug namatay. Dili ba ang pagkahibalo niini motabang kanato sa pag-ila sa awtoridad sa Diyos ug pagsugot sa iyang mga sugo tungod sa atong gugma kaniya? Kon wala pa nimo kana mahimo, duna kay daghang rason kon nganong angayng magpahinungod sa Diyos ug magpabawtismo.
Sa Ngalan sa Anak
10, 11. (a) Nganong dako ang imong utang kabubut-on kang Jesus? (b) Unsay imong gibati sa pagkahibalo nga si Jesus namatay aron sa pagtagana sa lukat?
10 Apan, hunahunaa pag-usab ang gipamulong ni Pedro sa panon sa katawhan. Iyang gipasiugda ang pagdawat kang Jesus, nga direktang nalangkit sa pagpabawtismo “sa ngalan . . . sa Anak.” Nganong hinungdanon kana kaniadto, ug sa atong panahon? Buweno, ang pagdawat kang Jesus ug pagpabawtismo sa iyang ngalan nagpasabot sa pag-ila sa iyang papel diha sa atong relasyon sa Maglalalang. Si Jesus kinahanglang ilansang sa estaka sa pagsakit aron kuhaon ang tunglo sa Balaod gikan sa mga Hudiyo; apan, ang iyang kamatayon dunay mas dakong kaayohan. (Gal. 3:13) Iyang gitagana ang halad lukat nga gikinahanglan sa tanang katawhan. (Efe. 2:15, 16; Col. 1:20; 1 Juan 2:1, 2) Aron malampos kana, giantos ni Jesus ang inhustisya, pagbiaybiay, pagsakit, ug sa ulahi ang kamatayon. Gipabilhan ba nimo ang paghalad niya sa iyang kinabuhi? Handurawa nga ikaw usa ka 12-anyos nga batang lalaki nga nagsakay sa Titanic, ang barko nga nabangga sa usa ka dakong yelo ug nalunod niadtong 1912. Naningkamot ka nga makasakay sa bote, apan puno na kini. Dayon usa ka lalaki diha sa bote ang mihalok sa iyang asawa, mibalik sa barko, ug nagpasakay kanimo sa bote. Unsay imong bation? Seguradong mapasalamaton ka kaniya! Imong masabtan kon unsay gibati niadtong batang lalaki nga nakasinati niana. b Apan, labaw pa niana ang gihimo ni Jesus alang kanimo. Siya namatay aron ikaw mabuhi sa walay kataposan.
11 Unsay imong gibati sa dihang imong nahibaloan ang gihimo sa Anak sa Diyos alang kanimo? (Basaha ang 2 Corinto 5:14, 15.) Lagmit mapasalamaton kaayo ka. Kana nakapalihok kanimo sa pagpahinungod sa imong kinabuhi sa Diyos ug sa ‘pagkinabuhi dili na alang sa imong kaugalingon, kondili alang kaniya nga namatay alang kanimo.’ Ang pagpabawtismo sa ngalan sa Anak nagpasabot nga imong ilhon ang nahimo ni Jesus alang kanimo ug ang iyang awtoridad ingong “Pangulong Ahente sa kinabuhi.” (Buh. 3:15; 5:31) Sa miagi, wala kay personal nga relasyon sa Maglalalang, ug sa pagkatinuod wala kay tinuod nga paglaom. Apan pinaagi sa pagpasundayag ug pagtuo sa giula nga dugo ni Jesu-Kristo ug sa pagpabawtismo, ikaw karon aduna nay personal nga relasyon sa Amahan. (Efe. 2:12, 13) Si apostol Pablo misulat: ‘Kamo nga nahimulag kanhi ug mga kaaway tungod kay ang inyong mga kaisipan diha sa mga buhat nga daotan, gipasig-uli sa Diyos karon pinaagi sa unodnong lawas ni Jesus pinaagi sa iyang kamatayon, aron kamo itanyag nga balaan ug walay lama.’—Col. 1:21, 22.
12, 13. (a) Sa unsang paagi ang pagpabawtismo sa ngalan sa Anak mag-apektar sa imong reaksiyon sa dihang dunay nakapasilo kanimo? (b) Ingong Kristohanon nga nabawtismohan sa ngalan ni Jesus, unsay imong obligasyon?
12 Bisan tuod nabawtismohan ka sa ngalan sa Anak, ikaw nahibalo gayod sa imong makasasalang hilig. Ang pag-ila niana makatabang kanimo sa adlaw-adlaw. Pananglitan, kon dunay nakapasilo kanimo, imo bang gihunahuna nga kamo parehong makasasala? Gikinahanglan ninyo ang kapasayloan sa Diyos, ug kamo angayng magmapinasayloon. (Mar. 11:25) Sa pagpasiugda sa kahinungdanon niini, si Jesus mihatag ug ilustrasyon: Ang usa ka agalon nagpapas sa utang sa iyang ulipon nga nagkantidad ug napulo ka libong talanton (60 milyon ka denario). Sa ulahi, ang maong ulipon nagpabilanggo sa iyang isigkaulipon nga nakautang kaniyag 100 ka denario. Dayon gipasiugda ni Jesus kini nga punto: Dili pasayloon ni Jehova kadtong dili mopasaylo sa iyang igsoon. (Mat. 18:23-35) Oo, ang pagpabawtismo sa ngalan sa Anak nagpasabot sa pag-ila sa awtoridad ni Jesus ug pagpaningkamot sa pagsunod sa iyang panig-ingnan ug pagtulon-an, lakip na nianang pagkaandam nga mopasaylo sa uban.—1 Ped. 2:21; 1 Juan 2:6.
13 Tungod kay dili ka hingpit, dili nimo bug-os masundog si Jesus. Bisan pa niana, nahiuyon sa imong kinasingkasing nga pagpahinungod sa Diyos, buot nimong sundogon si Jesus kutob sa imong maarangan. Naglangkit kini sa padayong pagpaningkamot sa paghukas sa daang pagkatawo ug pagsul-ob sa bag-o. (Basaha ang Efeso 4:20-24.) Kon imong gitahod ang usa ka higala, lagmit sundogon nimo ang iyang panig-ingnan ug maayong mga hiyas. Sa susama, buot kang mokat-on bahin kang Jesus ug mosundog kaniya.
14. Sa unsang paagi imong ikapakita nga imong giila ang awtoridad ni Jesus ingong langitnong Hari?
14 Dunay laing paagi nga imong ikapakita nga imong nasabtan kon unsay nalangkit sa pagpabawtismo sa ngalan sa Anak. Ang Diyos ‘nagpasakop sa tanang butang ilalom sa mga tiil ni Jesus, ug naghimo kaniyang ulo ibabaw sa tanang butang nganha sa kongregasyon.’ (Efe. 1:22) Busa, angay nimong tahoron ang paagi ni Jesus sa pagtultol niadtong nagpahinungod kang Jehova. Si Kristo naggamit ug dili-hingpit nga mga tawo diha sa kongregasyon, ilabina ang hamtong sa espirituwal nga mga lalaki, ang tinudlong mga ansiyano. Sila gitudlo “alang sa pagpasibo ug balik sa mga balaan, . . . alang sa pagpalig-on sa lawas ni Kristo.” (Efe. 4:11, 12) Bisan pag ang usa ka dili-hingpit nga tawo makahimog sayop, ingong Hari sa langitnong Gingharian, atimanon kini ni Jesus sa iyang gitakdang panahon ug paagi. Motuo ka ba niana?
15. Kon magpabawtismo ka, unsang mga panalangin ang imong malaoman human niana?
15 Sa gihapon, ang pipila wala pa magpahinungod kang Jehova ug magpabawtismo. Kon wala pa nimo kana mahimo, nasabtan ba nimo nga ang pag-ila sa Anak maoy makataronganon ug magpakita nga ikaw mapasalamaton? Kon ikaw nabawtismohan sa ngalan sa Anak, mahimong madawat nimo ang dagkong mga panalangin.—Basaha ang Juan 10:9-11.
Sa Ngalan sa Balaang Espiritu
16, 17. Unsay kahulogan alang kanimo sa pagpabawtismo sa ngalan sa balaang espiritu?
16 Unsay kahulogan sa pagpabawtismo sa ngalan sa balaang espiritu? Sama sa nahisgotan ganina, kadtong nakadungog kang Pedro sa adlaw sa Pentekostes nahibalo nga dunay balaang espiritu. Gani, ilang nakita ang ebidensiya nga padayong gigamit sa Diyos ang balaang espiritu. Si Pedro maoy usa niadtong “napuno sa balaang espiritu ug misugod sa pagsulti sa lainlaing mga pinulongan.” (Buh. 2:4, 8) Ang ekspresyong “sa ngalan sa” dili kanunayng nagpasabot ug ngalan sa usa ka persona. Karong adlawa, daghang butang ang gihimo “sa ngalan sa balaod,” nga dili usa ka persona. Kini gihimo pinasukad sa balaod. Sa susama, ang usa nga nabawtismohan sa ngalan sa balaang espiritu nahibalo nga kana dili usa ka persona kondili ang aktibong gahom sa Diyos. Ug ang maong bawtismo nagpasabot nga giila sa usa ang papel sa balaang espiritu diha sa katuyoan sa Diyos.
17 Dili ba nga imong nahibaloan ang bahin sa balaang espiritu pinaagi sa imong pagtuon sa Bibliya? Pananglitan, imong nasabtan nga ang Kasulatan gisulat ilalom sa pagtultol sa balaang espiritu. (2 Tim. 3:16) Samtang miuswag ka sa espirituwal, lagmit mas nasabtan na nimo nga ‘ang Amahan sa langit mohatag ug balaang espiritu niadtong nagapangayo kaniya,’ lakip na kanimo. (Luc. 11:13) Tingali imo nang nasinati ang paglihok sa balaang espiritu diha sa imong kinabuhi. Sa laing bahin, kon ikaw magpabawtismo sa ngalan sa balaang espiritu, ang pasalig ni Jesus nga ang Amahan mohatag ug balaang espiritu nagpasabot nga ikaw makabatog mga panalangin sa dihang madawat nimo kana.
18. Unsang mga panalangin ang madawat niadtong nabawtismohan sa ngalan sa balaang espiritu?
18 Dayag usab nga sa atong adlaw, si Jehova nagagiya ug nagatultol sa Kristohanong kongregasyon pinaagi sa iyang espiritu. Ang maong espiritu nagtabang usab sa matag usa kanato diha sa atong adlaw-adlawng buluhaton. Ang atong pagpabawtismo sa ngalan sa balaang espiritu nagkahulogan nga kita nakasabot sa papel niini sa atong kinabuhi ug mapabilhong nakigkooperar niini. Apan, ang pipila naghunahuna tingali kon sa unsang paagi nato matuman ang atong pagpahinungod kang Jehova ug kon sa unsang paagi nalangkit ang balaang espiritu. Ato kanang hisgotan sa sunod nga artikulo.
[Mga footnote]
a Ang mga deyista nagtuo nga adunay Diyos apan dili siya interesado sa iyang mga linalang.
b Tan-awa ang Pagmata! sa Abril 22, 1982, panid 3-9.
Nahinumdom Ka Ba?
• Unsay nalangkit sa pagpabawtismo sa ngalan sa Amahan?
• Unsay kahulogan sa pagpabawtismo sa ngalan sa Anak?
• Sa unsang paagi nimo ikapakita nga imong gipabilhan ang kahinungdanon sa pagpabawtismo sa ngalan sa Amahan ug sa Anak?
• Unsay kahulogan sa pagpabawtismo sa ngalan sa balaang espiritu?
[Mga Pangutana sa Pagtuon]
[Mga hulagway sa panid 10]
Human sa Pentekostes 33 K.P., unsa nay relasyon sa bag-ong mga tinun-an ngadto sa Amahan?
[Credit Line]
By permission of the Israel Museum, Jerusalem