Ndina Baptism ke Enyịn̄ Ete ye Eyen ye Edisana Spirit

“Mmọdo ẹka ẹkenam mme owo . . . ẹdi mbet mi, ẹnịm mmọ baptism ke enyịn̄ Ete ye Eyen ye edisana spirit.”—MATT. 28:19.

1, 2. (a) Nso iketịbe ke Jerusalem ke Pentecost isua 33 E.N.? (b) Nso ikanam ata ediwak owo ẹna baptism?

ATA ediwak owo ẹma ẹto nsio nsio idụt ẹdi Jerusalem ke usen Pentecost isua 33 E.N., ẹdidụk ata akpan usọrọ isua oro, ndien ediwak isenowo ẹma ẹtiene ẹdụk usọrọ oro. Edi ke apostle Peter ama eketịn̄ ikọ, n̄kpọ oro akanam mîtịbeke ama etịbe. Utịn̄ikọ emi ama enen̄ede otụk owo 3,000 emi ẹkesịnede mme Jew ye mbon oro ẹkesikponode Abasi ke ido mme Jew, onyụn̄ anam mmọ ẹkabade esịt ẹna baptism. Mmọ ẹma ẹtiene ẹdụk esop Abasi oro ẹketọn̄ọde obufa mi. (Utom 2:41) Ekeme ndidi mme owo ẹma ẹkere m̀mê nso ikpetịbe ke ini ẹkụtde nte adan̄a akpakịp owo oro ẹnade baptism ke Jerusalem.

² Nso ikanam utọ akpakịp owo oro ẹna baptism? Mbemiso mme owo emi ẹkenade baptism usen oro, “uyom [ama] oto ke heaven ọwọrọ emi ebietde uyom ata ọkpọsọn̄ ofụm.” Edisana spirit ama edidoro mbet Jesus 120 oro ẹkedude ke ubet enyọn̄. Idem ama akpa iren ye iban oro ẹbakde Abasi, emi ẹkesopde idem do, ndikụt nte mmọ “[ẹsemde] nsio nsio usem.” Ke ini mmọ ẹkekopde utịn̄ikọ Peter, ye se enye eketịn̄de aban̄a n̄kpa Jesus, “esịt [ama] afịna mmọ.” Nso ke mmọ ẹkenyene ndinam? Peter ama ọdọhọ mmọ ete: “Ẹkabade esịt, kpukpru mbufo ẹnyụn̄ ẹna baptism ke enyịn̄ Jesus Christ . . . , ndien mbufo ẹyebọ edisana spirit emi edide enọ mfọn.”—Utom 2:1-4, 36-38.

3. Nso ke mme Jew ye mbon oro ẹkesikponode Abasi ke ido mme Jew ẹkenyene ndinam ke ẹma ẹkekabade esịt ke usen Pentecost?

³ Kere nte mme Jew ye mbon idụt oro  ẹkekopde utịn̄ikọ Peter ẹkesikponode Abasi. Mmọ ẹkesikpono Jehovah Abasi. Ndien sia edide mmọ ẹma ẹnyene N̄wed Abasi Usem Hebrew, mmọ ẹma ẹnyene ifiọk ẹban̄a edisana spirit, kpa anamutom odudu Abasi emi Abasi akadade obot mme n̄kpọ onyụn̄ anam mme n̄kpọ eken. (Gen. 1:2; Judg. 14:5, 6; 1 Sam. 10:6; Ps. 33:6) Edi ikokụreke ke oro. Akana mmọ ẹfiọk ẹnyụn̄ ẹnyịme ke Jesus edi Messiah emi Abasi adade anyan̄a owo. Ntak edi oro Peter ọkọdọhọde mmọ “ẹna baptism ke enyịn̄ Jesus Christ.” Usen ifan̄ ke Jesus ama ekeset, enye ama ọdọhọ Peter ye mme mbet eken ete ẹnịm mme owo baptism “ke enyịn̄ Ete ye Eyen ye edisana spirit.” (Matt. 28:19, 20) Ndinam oro ekenen̄ede edi akpan n̄kpọ ini oro ye idahaemi n̄ko. Edi nso ke ikọ Jesus ọkọwọrọ?

Ke Enyịn̄ Ete

4. Nso ukpụhọde ke Jehovah akanam, emi okotụkde mbon oro ẹkesikponode enye?

⁴ Nte ima iketetịn̄, mbon oro ẹkekopde utịn̄ikọ Peter ẹnyụn̄ ẹna baptism ẹma ẹsikpokpono Jehovah. Mmọ ẹma ẹsidomo ndinam se Ibet esie ọkọdọhọde ẹnam, ndien oro akanam ndusụk mmọ ẹto mme idụt en̄wen ẹdi Jerusalem isua oro. (Utom 2:5-11) Edi Abasi ama okpụhọ nte enye ekesinamde n̄kpọ ye mme owo. Enye ikadaha aba mme Jew nte san̄asan̄a ikọt esie. Ntre, ekpedi mmọ ẹkenịm Ibet Moses adan̄a didie, oro ikanamke Abasi ada mmọ aba nte ikọt esie. (Matt. 21:43; Col. 2:14) Edieke mmọ ẹkeyomde ndisụk n̄ka iso ndi ikọt Jehovah, enyene n̄kpọ en̄wen emi akanade mmọ ẹnam.

5, 6. Nso ke mme Jew akpa isua ikie ye mbon oro ẹkesikponode Abasi ke ido mme Jew ẹkenam man ẹdi ikọt Abasi?

⁵ Emi ikọwọrọke ndikpọn̄ Jehovah, emi ọkọnọde mmọ uwem. (Utom 4:24) Utu ke oro, mbon oro ẹnyịmede ndinam se Peter ọkọdọhọde ẹdikam inenen̄ede ikụt ke Jehovah edi ata eti Ete. Enye ama ọnọ Messiah edinyan̄a mmọ, onyụn̄ enyịme ndifen idem mbon oro Peter eketịn̄de aban̄a, ke ini ọkọdọhọde ete: “Yak ofụri ufọk Israel ẹtịm ẹfiọk ẹte Abasi ama anam enye edi Ọbọn̄ ye Christ, kpa Jesus emi mbufo ẹkekọn̄de ke eto.” Mmọdo, mbon emi ẹnamde se Peter ọkọdọhọde ẹma ẹdinen̄ede ẹkụt ntak emi ikpowụtde esịtekọm iban̄a se Ete anamde ọnọ mbon oro ẹmade ndidi ikọt esie.—Kot Utom 2:32-36.

⁶ Mme Jew ye mbon oro ẹkesikponode Abasi ke ido mme Jew ẹma ẹdifiọk ke edieke owo oyomde ndidi asan̄autom Jehovah, ke ana enye ọfiọk ke Jesus ke Jehovah ada anyan̄a mme owo. Omokụt do ntak emi mmọ ẹkekabarede esịt ẹkpọn̄ mme idiọkn̄kpọ mmọ? Idiọkn̄kpọ emi esịne ndikenyene ubọk ke n̄kpa Jesus, edide mmọ ẹkefọfiọk m̀mê ikọfiọkke-fiọk iwot enye. Ntre, ‘mmọ ẹma ẹka iso ẹsịn idem ke ukpepn̄kpọ mme apostle.’ (Utom 2:42) Emi ama anam mmọ ẹkeme ‘ndisan̄a n̄kpere ebekpo mfọnido oro owo mîdotke ifụre ifụre.’—Heb. 4:16.

7. Didie ke ediwak owo mfịn ẹkpụhọde ekikere oro mmọ ẹkenyenede ẹban̄a Abasi ẹnyụn̄ ẹna baptism ke enyịn̄ Ete?

⁷ Mfịn, miliọn owo emi ẹtode nsio nsio ebiet ẹkpep akpanikọ ẹban̄a Jehovah ke Bible. (Isa. 2:2, 3) Ndusụk ikenịmke-nịm ke Abasi do, ke ini mmọ oro ẹkenịmde ẹkekerede ke enye ikereke iban̄a mmimọ. Edi idahaemi mmọ ẹnịm ke Abasi do, ye nte ke imekeme ndinen̄ede nsan̄a n̄kpere enye. Mmọ eken ẹkesikpono Abasi-Ita-ke-Kiet mîdịghe ẹkpono nsio nsio ndisọi n̄kpọ. Idahaemi mmọ ẹdifiọk ke Jehovah ikpọn̄-ikpọn̄ edi Ata Ọkpọsọn̄ Abasi, ndien mmọ ẹsikot enyịn̄ esie. Se ikọ Jesus ọkọwọrọde edi oro ke ini enye ọkọdọhọde ẹnịm mme mbet imọ baptism ke enyịn̄ Ete.

8. Nso ke mbon oro mîkọfiọkke n̄kpọ iban̄a idiọkn̄kpọ Adam ẹnyene ndifiọk mban̄a Ete?

⁸ Mmọ ẹdifiọk idahaemi ke ikada idiọkn̄kpọ ito Adam. (Rome 5:12) Emi ekedi obufa  ukpepn̄kpọ oro akanade mmọ ẹnyịme. Mmọ ẹketie nte owo emi mîfiọkke ke imenyene ata idiọk udọn̄ọ. Ekeme ndidi enye esikop nte abiakde imọ ke idem ndusụk ini. Edi sia mîkaha yak abiausọbọ ekese enye idem, enye ekeme ndikere ke inyeneke se inamde imọ, ke ini edide n̄kpọ anam enye. (Men 1 Corinth 4:4 domo.) Edi nso ke enye akpanam edieke akade ekese idem onyụn̄ ọfiọk se ifịnade enye? Ndi ikpọfọnke ndika n̄kọbọ ata eti usọbọ? Ukem ntre, ke ini mme owo ẹdide ẹdifiọk ke ikadada idiọkn̄kpọ emi onyụn̄ etiede nte idiọk udọn̄ọ idimana, ediwak mmọ ẹsinyịme ẹkpep mmimọ Bible, ẹnyụn̄ ẹdifiọk ke Abasi ke ọnọ mme owo usọbọ. Mmọdo, yak kpukpru mbon oro mîfiọkke Abasi ẹyom enye man Enye ọkpọkọk udọn̄ọ mmọ.—Eph. 4:17-19.

9. Nso ke Jehovah akanam man ikeme ndisan̄a n̄kpere enye?

⁹ Edieke edide ama ayak idem ọnọ Jehovah Abasi onyụn̄ ana baptism, ọwọrọ ke omokụt nte enemde ndisan̄a n̄kpere enye, onyụn̄ okụt nte enye amade fi nte ata edima Ete. (Kot Rome 5:8.) Kpa ye oro akpa ete ye eka nnyịn ẹkesọn̄de ibuot ye enye, enye ama anam n̄kpọ man nnyịn emi idide nditọ mmọ ikeme ndisan̄a n̄kpere enye. Emi ama enen̄ede atak Abasi n̄kpọ—kere nte eketiede enye ke idem nditie n̄kụt ẹtụhọrede ẹnyụn̄ ẹwot edima Eyen esie. Emi ekpenyene ndinam isụk ibuot inọ enye inyụn̄ inam se ededi emi enye ọdọhọde inam ke imaesịt. Ndi kpukpru emi idịghe eti ntak ndiyak idem nnọ Abasi nnyụn̄ nna baptism edieke edide unamke oro kan̄a?

Ke Enyịn̄ Eyen

10, 11. (a) Nso isọn ke akama Jesus? (b) Esitie fi didie ke idem ke ini etide ke Jesus akpakpa ke ibuot fo?

¹⁰ Ti se Peter ọkọdọhọde otu owo oro ẹkekopde utịn̄ikọ esie. Enye ọkọdọhọ mmọ ẹnyịme Jesus, emi edide ndina baptism “ke enyịn̄ . . . Eyen.” Ntak emi akanade mbon eyo oro ẹnam oro, ndien ntak emi nnyịn n̄ko ikpanamde oro? Ndinyịme Jesus nnyụn̄ nna baptism ke enyịn̄ esie ọwọrọ ndifiọk ke mîkpedịghe enye, nnyịn ikpekemeke ndisan̄a n̄kpere Abasi. Akana ẹkọn̄ Jesus ke eto ndutụhọ man enye anyan̄a mme Jew osio ke isụni Ibet. Edi n̄kpa esie ama enyene ata akamba ufọn en̄wen. (Gal. 3:13) Enye ama ọnọ ufak emi ofụri ubonowo ẹkenen̄erede ẹyom. (Eph. 2:15, 16; Col. 1:20; 1 John 2:1, 2) Emi akanam enye ọyọ ufịk, usọn̄enyịn, ndutụhọ, onyụn̄ enyịme ndikpa. Ndi emenen̄ede owụt esịtekọm aban̄a se Jesus akanamde emi ọnọ fi? Da nte ke edi eyen isua 12, ke ama etiene esịne ke nsụn̄ikan̄ Titanic emi akawatde ọkọtọ akamba ice onyụn̄ esịp ke 1912. Afo ke oyom usụn̄ nditiene ndụk ekpri ubom oro ẹdade ẹnyan̄a mme owo, edi enye ọyọhọ. Edi ete kiet emi ama okododụk ubom emi etịm n̄wan esie inua, afiak ebe odụk nsụn̄ikan̄ emi eden̄de, onyụn̄ osio fi esịn ke itie esie. Etie fi didie ke idem? Ke akpanikọ, inua ikemeke nditịn̄ nte ọkpọkọmde enye. Ntre n̄ko ke eketie ekpri eyen emi n̄kpọ emi eketịbede ọnọ. * Edi se Jesus akanamde ọnọ fi akan oro. Enye akakpa man afo odu uwem ke nsinsi.

¹¹ Eketie fi didie ke idem ke ini ekekpepde aban̄a se Eyen Abasi akanamde ọnọ fi? (Kot 2 Corinth 5:14, 15.) Esịt ama enen̄ede enem fi, idịghe ntre? Emi n̄ko akanam ayak idem ọnọ Abasi onyụn̄ etre ‘ndidu uwem nnọ idemfo, edi odu ọnọ enye emi akakpade ọnọ fi.’ Ndina baptism ke enyịn̄ Eyen ọwọrọ ke ọmọfiọk se enye akanamde ọnọ fi onyụn̄ ọfiọk ke enye edi “Akpan Isụn̄utom uwem.” (Utom 3:15; 5:31) Mbemiso akayakde idem ọnọ Abasi onyụn̄ ana baptism, afo ukûsan̄ake n̄kpọ ndomokiet ye Abasi, ukûnyụn̄ unyeneke idotenyịn ndomokiet. Edi ndibuọt idem ke iyịp Jesus Christ nnyụn̄ nna baptism anam fi asan̄a ekpere Abasi idahaemi. (Eph. 2:12, 13) Apostle Paul ọkọdọhọ ke “mbufo  emi ini kiet ko ẹkedianarede ẹda ẹnyụn̄ ẹdide mme asua ke ntak emi ekikere mbufo ẹkedude ke mme utom eke ẹdiọkde, [Abasi] ke emi amada ikpọkidem [Jesus] anam ẹfiak ẹdu ke emem ebe ke n̄kpa esie, man anam mbufo ẹdi edisana ẹnyụn̄ ẹnana ndo.”—Col. 1:21, 22.

12, 13. (a) Ndina baptism ke enyịn̄ Eyen akpanam esinam n̄kpọ didie ke ini owo eduede fi? (b) Sia akanade baptism ke enyịn̄ Jesus, nso ke ana anam?

¹² Kpa ye oro akanade baptism ke enyịn̄ Eyen, ọmọfiọk ke isụk iyenyene udọn edinam se mîfọnke. Ndifiọk emi ayan̄wam fi ke usen ke usen. Ke uwụtn̄kpọ, ke ini owo eduede fi, ndi emesiti ke mbufo mbiba ẹdi mme anamidiọk? Sia edide ẹmeyom Abasi efen ọnọ mbufo, ntre akpana mbufo ẹfen ẹnọ kiet eken n̄ko. (Mark 11:25) Man anam emi an̄wan̄a, Jesus ama ọnọ uwụtn̄kpọ aban̄a eteufọk emi okosion̄ode idem ọkpọn̄ tọsịn talent duop (miliọn denarii 60) emi ofụn esie akakamade enye. Edi ofụn̄ oro ikenyịmeke ndision̄o idem n̄kpọn̄ denarii 100 oro ekemmọ ofụn akakamade. Jesus ọkọdọhọ ke edieke nnyịn mîfenke inọ owo, ke Jehovah idifenke inọ nnyịn n̄ko. (Matt. 18:23-35) Mmọdo, ndina baptism ke enyịn̄ Eyen ọwọrọ ndisụk ibuot nnọ Jesus nnyụn̄ n̄kpebe uwụtn̄kpọ esie, nnam se enye ekekpepde; emi esịne ndinyịme ndifen nnọ mbon en̄wen.—1 Pet. 2:21; 1 John 2:6.

¹³ Unana mfọnmma idiyakke ekeme ndinam kpukpru se Jesus akanamde onyụn̄ ekpepde. Edi sia akayakde idem ọnọ Abasi ke ofụri esịt, ọdọn̄ fi ndinam se ededi oro ekemede man ekpebe enye. Emi esịne ndika iso nsịn ukeme nsio akani owo nduọk nnyụn̄ mmen obufa owo nsịne. (Kot Ephesus 4:20-24.) Edieke amade owo, n̄kọ emesidomo ndikpebe enye nnyụn̄ ndu uwem nte enye. Se inyụn̄ inamde oyom ndikpebe Christ edi oro.

14. Nso ke akpanam man owụt ke imosụk ibuot inọ Jesus emi edide Edidem ke heaven?

¹⁴ Odu n̄kpọ en̄wen oro akpanamde man owụt ke imọfiọk se ndina baptism ke enyịn̄ Eyen ọwọrọde. Abasi “ama anam kpukpru n̄kpọ ẹdu ke idak ikpat [Jesus], onyụn̄ anam enye edi ibuot kpukpru n̄kpọ ọnọ esop.” (Eph. 1:22) Ke ntak oro, ana okpono usụn̄ oro Jesus adade ọnọ mbon oro ẹyakde idem ẹnọ Jehovah ndausụn̄. Enye ada mme anana-mfọnmma owo, oro edi, mbiowo, ọnọ esop kiet kiet ndausụn̄. Emek mmọ “man ẹnen̄ede ndisana owo, . . . man ẹbọp idem Christ ẹnam ọkọri.” (Eph. 4:11, 12) Kpa ye oro mme anana-mfọnmma owo ẹsinamde ndudue, Jesus emi edide Edidem Obio Ubọn̄ heaven eyese aban̄a oro ke edikem ini esie ke usụn̄ oro enye okụtde ke ọfọn. Ndi emenịm?

15. Edieke mûnaha kan̄a baptism, mme edidiọn̄ ewe ke editiene ọbọ edieke anade?

¹⁵ Edi ndusụk owo iyakke idem inọ Jehovah inyụn̄ inaha kan̄a baptism. Edieke mûnaha kan̄a, ndi ama okop ke ndidiọn̄ọ Jesus nnyụn̄ n̄wụt esịtekọm mban̄a se enye anamde ọnọ fi edi mfọnn̄kan n̄kpọ oro akpanamde? Ndina baptism ke enyịn̄ Eyen ayanam fi etiene ọbọ akakan edidiọn̄.—Kot John 10:9-11.

Ke Enyịn̄ Edisana Spirit

16, 17. Nso ke ndina baptism ke enyịn̄ edisana spirit ọwọrọ?

¹⁶ Nso ke ndina baptism ke enyịn̄ edisana spirit ọwọrọ? Nte ima iketetịn̄, mbon oro  ẹkekopde utịn̄ikọ Peter ke usen Pentecost ẹma ẹfiọk ke edisana spirit do. Mmọ ẹma ẹkụt usen oro nte ke Abasi ke adada edisana spirit anam n̄kpọ. Peter ama esịne ke otu mbon oro ‘ẹkeyọhọde ye edisana spirit ẹnyụn̄ ẹsemde nsio nsio usem.’ (Utom 2:4, 8) Ndinam n̄kpọ “ke enyịn̄” n̄kpọ iwọrọke ke n̄kpọ oro edi owo. Mfịn, ẹsidọhọ ke ẹnam n̄kpọ “ke enyịn̄ ukara” kpa ye oro ukara mîdịghe owo. Emi esiwọrọ ke ukara ọnọ odudu ẹda ẹnam mme n̄kpọ oro. Ntre, owo emi anade baptism ke enyịn̄ edisana spirit ọfiọk ke edisana spirit idịghe owo, edi ke edi anamutom odudu Jehovah. Emi n̄ko owụt ke enye ọfiọk ke edisana spirit enen̄ede enyene ubọk ke ndisu uduak Abasi.

¹⁷ Ndi ndikpep Bible inamke fi ọfiọk se edisana spirit edide? Ke uwụtn̄kpọ, ọmọfiọk ke edisana spirit akada mbon oro ẹkewetde Bible usụn̄. (2 Tim. 3:16) Nte osụk esịnde ifịk anam n̄kpọ Abasi, emedinen̄ede ọfiọk ke ‘Ete fo ke heaven esiyak edisana spirit ọnọ mbon oro ẹben̄ede enye,’ ye afo nde. (Luke 11:13) Anaedi edisana spirit esin̄wam fi. Edi edieke mûnaha kan̄a baptism ke enyịn̄ edisana spirit, ti ke Jesus ọkọdọhọ ke Ete imọ esinọ mme owo edisana spirit. Emi owụt ke eyenyene ekese edidiọn̄ ke ini Abasi edinọde fi spirit oro.

18. Nso edidiọn̄ ke mbon oro ẹnade baptism ke enyịn̄ edisana spirit ẹnyene?

¹⁸ Imokụt mfịn nte ke Jehovah ada spirit esie ada esop esie usụn̄. Spirit emi esin̄wam nnyịn owo kiet kiet kpukpru usen. Ndina baptism ke enyịn̄ edisana spirit esịne ndifiọk se spirit emi anamde ọnọ nnyịn nnyụn̄ nnyịme nditiene ndausụn̄ esie. Ndusụk owo ẹkeme ndikere m̀mê idinam didie idu uwem nte mbon emi ẹma ẹkeyak idem ẹnọ Jehovah, ẹnyụn̄ ẹkere nte edisana spirit ekemede ndin̄wam mmimọ inam oro. Se idinemede edi oro urua en̄wen.

[Ikọ Idakisọn̄],[Mme Ikọ Idakisọn̄]

Nte Afo Emeti?

• Nso ke ndina baptism ke enyịn̄ Ete ọwọrọ?

• Nso ke ndina baptism ke enyịn̄ Eyen ọwọrọ?

• Nso ke akpanam man owụt ke imọfiọk se ndina baptism ke enyịn̄ Ete ye Eyen ọwọrọde?

• Nso ke ndina baptism ke enyịn̄ edisana spirit ọwọrọ?

[Mme Mbụme Ukpepn̄kpọ]

[Ndise ke page 10]

Ke usen Pentecost isua 33 E.N. ama ekebe, mbufa mbet Jesus ẹkekabade ẹdi nso ye Ete?

[Ebiet ẹdade n̄kpọ ẹto]

Ẹbọ ẹto Itie Unịm N̄kpọeset Israel ke Jerusalem