Jajevautisa Túva, Taʼýra ha espíritu sánto rérape

‘Tapeho aipóramo opa tetã rupi ha pejapo chuguikuéra che remimboʼe. Pevautisa chupekuéra Túva, Taʼýra ha espíritu sánto rérape.’ (MAT. 28:19.)

1, 2. a) Mbaʼépa oikorakaʼe Jerusalénpe Pentecostés jave áño 33-pe? b) Mbaʼérepa oĩrakaʼe hetaite ojevautisáva?

 YMA áño 33-pe hetaiterei hénte oho Jerusalénpe Pentecostesrã, ha heta tetãgui oho hikuái. Péro ko arete jave oiko peteĩ mbaʼe oñeimoʼãʼỹva ha upe rire apóstol Pedro ojapo peteĩ diskúrso iporãitereíva. Upévare tres mil hudío ha umi ndahaʼéiva avei oñembyasy ha ojevautisa. Ha péicha oike hikuái pe kongregasión pyahúpe (Hech. 2:41). Mbaʼeichaite piko oiméne la hénte oponderajoáraʼe ohechávo hetaitereípe ojevautisa.

² Mbaʼe mbaʼe piko oikóraʼe ajeve hetaite oĩ ojevautisáva? La Biblia omombeʼu mbaʼépa oiko ojevautisa mboyve umi hénte. Heʼi voi: ‘Ou sapyʼa yvágagui peteĩ tyapu yvytu hatã oipejurõguáicha’. Upe rire ciento veinte Jesús remimboʼe oñembyatyvahína peteĩ ógape henyhẽ espíritu sántogui. Umi kuña ha kuimbaʼe omombaʼéva Ñandejárape ha ohovaʼekue ohecha mbaʼépa la oikóva, oponderaiterei ohendúvo Jesús remimboʼekuérape ‘oñeʼẽ ambue ñeʼẽme’. Upe rire apóstol Pedro ojapo la idiskúrso iporãitereíva ha omyesakã heta mbaʼe Jesús ñemano rehegua. Umi mbaʼe heʼíva oguapyeterei umi ohendúvare chupe ha upévare oporandu hikuái mbaʼépa ojapovaʼerã. Ha pe apóstol heʼi chupekuéra: ‘Peñearrepenti ha pejevautisa peteĩteĩ Jesucristo rérape oñemeʼẽ hag̃ua peẽme espíritu sánto’ (Hech. 2:​1-4, 36-38).

3. Mbaʼépa ofaltarakaʼe ojapo umi hudío ha ndahaʼéiva avei pe Pentecostés jave?

³ Ñapensamíntena mbaʼe situasiónpepa oĩvaʼekue umi ohenduvaʼekue apóstol Pédrope. Haʼekuéra ningo oservímakuri Jehovápe. Ha oreko rupi Ñandejára Ñeʼẽ Génesis guive Malaquías peve, oikuaa avei hikuái oĩha pe espíritu sánto. Upéva ningo hína pe puʼaka Ñandejára  oiporuvaʼekue ojapo hag̃ua opa mbaʼe ha upe rire avei osegi oiporu (Gén. 1:2; Jue. 14:​5, 6; 1 Sam. 10:6; Sal. 33:6). Péro ofalta gueteri chupekuéra ojapo peteĩ mbaʼe. Haʼekuéra ningo ogueroviavaʼerã Jesús haʼeha pe Mesías, upe ombouvaʼekue Ñandejára osalva hag̃ua yvypórape. Upévare Pedro heʼi chupekuéra ojevautisa hag̃ua ‘Jesucristo rérape’. Pórke Imboʼehára Guasu heʼivaʼekue umi apóstol ha iñirũnguérape oporovautisa hag̃ua ‘Túva, Taʼýra ha espíritu sánto rérape’ (Mat. 28:​19, 20). Upévare, ñahesaʼỹijo porãmína mbaʼépa heʼiserakaʼe yma síglo primérope ko mandáto ha mbaʼépa heʼise koʼág̃a rupi.

Túva rérape

4. Mbaʼe kámbiopa Ñandejára ojaporakaʼe?

⁴ Jaʼéma haguéicha umi ohenduvaʼekue apóstol Pedro diskúrso ningo oservíma oikóvokuri Jehovápe ha oñemoag̃uíma hese. Haʼekuéra oñehaʼãvaʼekue ojapo pe Léipe heʼiháicha. Ha Ñandejára léi okumpli hag̃ua voi ningo ohókuri hikuái Jerusalénpe (Hech. 2:​5-11). Péro upérõ Ñandejára ojapo peteĩ kámbio tuichaitereíva omboykévo Israélpe. Upévare ndahaʼevéima pe tetã Haʼe oiporavovaʼekue imbaʼerã. Upéicha rupi ndaikatuvéima oĩ porã hikuái Jehová ndive pe Léi okumplípente (Mat. 21:43; Col. 2:14). Upévare umi osegiséva oĩ porã Jehová ndive ojapovevaʼerã ambue mbaʼe.

5, 6. Mbaʼépa ojaporakaʼe umi hudío ha ndahaʼéiva avei oñemoag̃ui hag̃ua Ñandejárare?

⁵ Haʼekuéra ningo oñemoag̃uintevaʼerã voi Jehováre, heséko odepende oikove hag̃ua hikuái (Hech. 4:24). Koʼág̃a haʼekuéra ohechakuaavaʼerã mbaʼeichaitépa ipyʼaporã Itúva Jehová. Haʼe ningo ombou voi pe Mesías osalva hag̃ua chupekuéra. Ha hiʼarive haʼe oĩ operdona hag̃uáicha umi hembiapo vai vaʼekuépe. Umívape ningo Pedro la heʼíkuri: ‘Peikuaa porãke Israel retã, ko Jesús peẽ pemosaingovaʼekue peteĩ yvyra rehe, Ñandejára ojapo hague chugui Mburuvicha Guasu ha Cristo’. Upévare umi ojapóva pe apóstol heʼíva oagradesevaʼerã Ñandejárape ojapovaʼekuére hesehapekuéra oĩ porã hag̃ua hendive (jaleemína Hechos 2:​30-36).

⁶ Umi hudío ha umi ndahaʼéiva avei ohecha tekotevẽha oguerovia Jehová osalvataha chupekuéra Jesús rupive. Ha upéicharõ añoite ikatúta oñemoag̃ui hikuái Ñandejárare. Upévare oñembyasy hikuái hembiapo vai haguére, pór ehémplo omoirũ térã oipota haguére ojejuka Jesúspe. Upévare avei haʼekuéra osegi oaprende ‘apostolkuéra omboʼéva’ (Hech. 2: 42). Péicha ojapóramo haʼekuéra ikatúta oñemoag̃ui ‘Ñandejára oporohayhúva rendápe ohupyty hag̃ua pe iporiahuvereko’ (Heb. 4:​16, BNP).

7. Mbaʼépa heta oĩ ojapóva ojevautisa mboyve pe Túva rérape?

⁷ Koʼág̃a rupi avei hetaiterei kuña ha kuimbaʼe opa tetãygua oikuaa Jehovápe ostudia rupi la Biblia (Isa. 2:​2, 3). Umíva apytépe oĩvaʼekue umi deísta * ha umi ndogueroviáiva Ñandejára oĩha. Ha koʼág̃a ohechakuaa hikuái oĩha peteĩ ñande Apohare ha ikatuha ñañemoag̃ui hese. Oĩ avei umi ogueroviavaʼekue Túva, Taʼýra ha espíritu sánto peteĩnteha térã omombaʼeguasúva taʼanga. Péro koʼág̃a oikuaáma hikuái Jehová haʼeha pe Ñandejára ipuʼakapáva ha oiporuvaʼerãha héra oñemoag̃ui hag̃ua hese. Ha koʼã mbaʼe haʼekuéra oikuaágui iñeʼẽrendu Jesúspe ha ojevautisa pe Túva rérape.

8. Mbaʼépa ohechakuaavaʼerã umi ndoikuaaivaʼekue onaséma hague pekadór?

⁸ Haʼekuéra ohechakuaa avei Adán ombohasa hague enterovépe pekádo (Rom. 5:12). Ñantende porãve hag̃ua ñapensami ko ehémplore: Ñamoĩ chupe peteĩ karai orekoha peteĩ mbaʼasy péro haʼe ndoikuaái. Ikatu oñandumimi jepi hasýva chupe, péro ndojeʼéi rupi chupe mbaʼépa la orekóva, haʼe oimoʼã hesãiha. Upéi oho doktórpe ha heʼi chupe mbaʼe mbaʼasýpa oreko (ñambojojami 1 Corintios 4:4 rehe). Upévare iporãta pe karai ohekáramo peteĩ tratamiénto ojekuaáva oikoha upe mbaʼasýpe g̃uarã ha osegi. Upéicha avei haʼete  oikóva heta tapicháre, ostudia rire la Biblia oikuaa onaséma hague pekadór. Péicha la Biblia heʼi chupekuéra “mbaʼe mbaʼasýpa oreko” ha ohechakuaa Ñandejára añoite ikatuha omeʼẽ chupekuéra “ipohag̃ua”. Upévare, enterove ndoservíriva Ñandejárape oñemoag̃uivaʼerã hese okuera hag̃ua (Efe. 4:​17-19).

9. Mbaʼépa ojapo Jehová ikatu hag̃uáicha yvypóra oñemoag̃ui jey hese?

⁹ Ñande ñañemeʼẽmavaʼekue Jehovápe ha jajevautisámava jaikuaa mbaʼeichaitépa javyʼa ñaime porãramo ñande Ru Jehová ndive. Ha jaikuaa avei Haʼe ñanderayhuetereiha (jaleemína Romanos 5:8). Adán ha Eva naiñeʼẽrendúiramo jepe, Jehová ohecha mbaʼéichapa omeʼẽta oportunida ifamiliarekuérape oñemoag̃ui jey hag̃ua hese. Péro upearã Jehová ohasa peteĩ mbaʼe ijetuʼuetereíva. Ha mbaʼépa upéva? Haʼe ningo ohechákuri mbaʼéichapa Itaʼýra ohasa asy ha omano ñanderehehápe. Ajépa jaikuaávo koʼã mbaʼe jahayhuverei Ñandejárape! Ha upéva ñanemomýi ñamombaʼeguasu ha ñaneñeʼẽrendu hag̃ua chupe. Péro ndépa reñemeʼẽma Jehovápe ha rejevautisa? Jahechaháicha iñimportanteterei jajapo upéva.

Taʼýra rérape

10, 11. a) Mbaʼérepa jadeve Jesúspe? b) Mbaʼéichapa reñeñandu Jesús omeʼẽ haguére hekove nderehehápe?

¹⁰ Apóstol Pedro ningo omyesakã porã kuri idiskúrsope iñimportantetereiha jajerovia Jesús rehe jajevautisa hag̃ua pe ‘Taʼýra rérape’. Ha mbaʼérepa upéva iñimportanterakaʼe, ha mbaʼérepa iñimportánte koʼág̃a peve? Pórke jajeroviávo Jesús rehe ha jajevautisávo hérape jahechakuaañaína ñaikotevẽha hese ñaime porã hag̃ua ñande Apohare ndive. Ñapensamíntena umi mbaʼe porã ojehupytývare Jesús omano rupi pe yvyráre. Ñepyrũrã umi hudíope oipeʼa pe Léi maldisióngui (Gál. 3:13). Péro la iñimportantevéva ningo omoĩ pe tekotevẽva oipeʼa hag̃ua yvyporakuérape pekádo ha ñemano poguýgui (Efe. 2:​15, 16; Col. 1:20; 1 Juan 2:​1, 2). Upearã haʼe heta mbaʼe ohasavaʼekue, inhustísia, ojeapoʼi, ojetortura ha amo ipahápe katu ojejuka chupe. Upévare iporãta ñañeporandumi: “Amombaʼépa ko sakrifísio Jesús ojapovaʼekue cherehehápe?”. Ñantende porãve hag̃ua ko sakrifísio ikatu ñambojojami peteĩ mbaʼe oikovaʼekuére: áño 1912-pe peteĩ mitã orekóva 12 áño oviaha ohóvo peteĩ várko guasúpe, hérava Titanic. * Ha upeichaháguinte pe várko ochoka peteĩ iélo guasúre ha oñepyrũ oyguy. Upévo pe mitãʼi oho ojupi hag̃ua peteĩ kanóa salvavídape, péro ndaijavéima. Upémaramo peteĩ karai ojedespedi hembirekógui, ohetũ chupe ha ojepoi jey pe kanoágui ikatu hag̃uáicha pe mitãʼi ija hendaguépe. Mbaʼéichapa reñeñanduvaʼerãmoʼã ndérire upe mitãʼi? Katuete ningo reagradesetereíta pe karaípe la ojapóvare. Péro Jesús tuichave mbaʼe ojapókuri nderehehápe. Hekove voi omeʼẽ ikatu hag̃uáicha nde reikove opa ára g̃uarã.

¹¹ Mbaʼéichapa reñeñandúraʼe reikuaárõ guare Ñandejára Raʼy ojapovaʼekue nderehehápe? (Jaleemína 2 Corintios 5:​14, 15.) Katuete reagradeséneraʼe upévare. Upéicha rupi oiméne reñemeʼẽrakaʼe Jehovápe ha redesidi ‘ndereikoveimaha ndejupe g̃uarã, reikovetaha uvei upe nderehehápe omanovaʼekuépe g̃uarã’. Jajevautisávo pe Taʼýra rérape jahechakuaañaína Jesús ojapovaʼekue ñanderehehápe ha ñañemoĩ pe ‘Tekove meʼẽha’ poguýpe (Hech. 3:15; 5:31). Ñande ningo jajevautisa mboyve ndajarekoivaʼekue Jehovápe ñaneamígoramo ha ndajarekói avei peteĩ esperánsa ñane renonderãme g̃uarã. Péro koʼág̃a ñande jajerovia rupi Jesucristo sakrifísiore oikóma ñandehegui Ñandejára amígo (Efe. 2:​12, 13). Pe apóstol Pablo ohai haguéicha oiko: ‘Peẽ niko yma peneambuevaʼekue Ñandejáragui ha peñemoĩvaʼekue hese pórke pene rembiapo vai. Ñandejára katu penemoingo porã jey hendive Cristo rete rupive, pe oñemeʼẽvaʼekue omano hag̃ua, ha upéicha penemog̃uahẽ hag̃ua marangatúpe ha kyʼaʼỹme’ Ñandejára renondépe (Col. 1:​21, 22, JMP).

12, 13. Jajevautisámaramo pe Taʼýra rérape, a) mbaʼépa jajapovaʼerã oĩramo ñanembopochýva? b) mbaʼépa ñañehaʼãvaʼerã jajapo jaikuaágui ñande pekadorha?

 ¹² Jajevautisámaramo jepe pe Taʼýra rérape, ndahaʼéi upévarente ndajajaposemoʼãvéimava ivaíva. Jahechakuaáramo upéva ñanepytyvõta opa mbaʼépe káda día. Pór ehémplo, mbaʼépa ojapovaʼerã peteĩ ermáno oĩramo ombopochýva chupe? Imanduʼavaʼerã mokõive pekadorha, upévare mokõivéva oikotevẽ oñeperdona chupe ha oporoperdonakuaa (Mar. 11:25). Jesús ohechauka hag̃ua iñimportanteha upéva omombeʼu peteĩ káso. Heʼi peteĩ kuimbaʼe operdona hague ideveha peteĩ hembiguáipe sesenta millones de denarios (diez mil talentos). Péro upe rire ko tembiguái noperdonaséi ideveha peteĩ hapichápe ha cien denárionte hiʼarive la odevéva chupe. Mbaʼépa omboʼesevaʼekue Jesús? Haʼe ningo ohechaukasénte nañaperdonáiramo ñane ermanokuérape, Jehová nañaneperdonamoʼãiha avei (Mat. 18:​23-35). Upévare peteĩ ojevautisáva pe Taʼýra rérape oñemoĩvaʼerã ipoguýpe, oñehaʼãmbaite osegi iñehémplo ha umi mbaʼe omboʼevaʼekue. Umíva apytépe ningo Jesús omboʼevaʼekue ñaporoperdonavaʼerãha (1 Ped. 2:21; 1 Juan 2:6).

¹³ Jaikuaa ningo ñande pekadorha ha ndaikatuiha jajapo opa mbaʼe Jesús ojapo hagueichaite. Upéicharõ jepe, ñañehaʼãvaʼerã ikatuha peve jaguata ipyporére ha péicha ñakumpli pe kompromíso jajapovaʼekue Ñandejára ndive ñañemeʼẽvo chupe. Upévare voi koʼẽ koʼẽre ñañehaʼãmbaite ñakambia ha ñanderekoporãve (jaleemína Efesios 4:​20-24). Pór ehémplo jarekóramo peteĩ ñane amígo jahayhúva ningo jasegise iñehémplo ha jajapose avei umi mbaʼe porã haʼe ojapóva. Upéicharõ koʼýte ñañehaʼãvaʼerã ñaaprende Jesucrístogui ha jasegi iñehémplo!

14. Mbaʼéichapa jahechaukáta avei jagueroviaha Ñandejára omoĩ hague opaite mbaʼe Jesús pyguýpe?

¹⁴ Jahechaukáta avei jaikuaaha mbaʼépa heʼise jajevautisa pe Taʼýra rérape jagueroviáramo Ñandejára ‘omoĩ hague opaite mbaʼe Cristo pyguýpe, ha chupe voi ningo omoĩ omoakã hag̃ua pe kongregasión’ (Efe. 1:​22, BNP). Upéicharõ ñande jarrespetavaʼerã pe Jesús oiporúva oisãmbyhy hag̃ua hemimboʼekuérape. Upearã haʼe omoĩ umi ansiáno, umíva iñimperféktoramo jepe ohechauka ojerovia mbareteha Ñandejárare. Ha omoĩ chupekuéra oipytyvõ hag̃ua umi Ñandejárare ojeroviávape oguata porã hag̃ua hapére, ha upéicha “omombarete Cristo rete” (Efe. 4:​11, 12). Péro peteĩ ansiáno ojavýramo, Jesucristo osolusionáta upe provléma iporãve hag̃uáicha ha itiémpope. Jajeroviápa hese ojapóne hag̃ua upéicha?

15. Mbaʼépa heʼi la Biblia jahupytytaha jajevautisáramo?

¹⁵ Jaʼéma haguéicha oĩ gueteri umi neʼĩrava oñemeʼẽ Jehovápe ha ojevautisa. Ha nde reiméramo umíva apytépe, katuete umi párrafo ñahesaʼỹijómava nepytyvõta rentende hag̃ua iporãha rejevautisa pe Taʼýra rérape. Upéicha rehechaukáta remombaʼe ha reagradeseha Jesús ojapovaʼekue. Ha upéicha rejapo rupi rehupytýta heta mbaʼe porã (jaleemína Juan 10:​9-11).

Espíritu sánto rérape

16, 17. Mbaʼépa heʼise jajevautisa pe espíritu sánto rérape?

¹⁶ Mbaʼépa heʼise jajevautisa pe espíritu sánto rérape? Umi ohenduvaʼekue Pédrope upe Pentecostésrõ guare oikuaáma voi mbaʼépa pe  espíritu sánto. Haʼekuéra ningo ohechákuri mbaʼépa ojapo upe rire pe espíritu sánto. Ohecha umi apóstol ha ambue Jesús remimboʼe ‘henyhẽmba espíritu sántogui, ha oñepyrũ oñeʼẽ ñeʼẽ ambuépe’ (Hech. 2:​4, 8). Péro oĩ umi heʼíva oñeñeʼẽramo ‘espíritu sánto rérape’ oñeñeʼẽhahína peteĩ persónare. Ha añete piko upéva? Nahániri. Pór ehémplo, sapyʼánte jaʼe ojejapoha peteĩ mbaʼe “pe goviérno rérape”, péro upéva ndeʼiséi pe goviérno haʼeha peteĩ persóna. Ha upéichante avei pe espíritu sánto. Upévare enterove ojevautisáva espíritu sánto rérape oikuaa upéva ndahaʼeiha peteĩ persóna, oikuaa porã haʼeha pe mbarete Ñandejára oiporúva ojapo hag̃ua opa mbaʼe. Ohechakuaa avei mbaʼéichapa Ñandejára oiporu okumpli hag̃ua hembipota.

¹⁷ Ha ñande ñahesaʼỹijo rupi la Biblia jaikuaa mbaʼépa pe espíritu sánto. Pór ehémplo, jaikuaa Ñandejára oiporu hague espíritu sánto ohaika hag̃ua la Biblia (2 Tim. 3:16). Avei ñamombaretevévo ñande jerovia ñantende porãve pe Jesús oprometevaʼekue heʼívo: “Pende Ru yvágape oĩva omeʼẽta espíritu sánto umi chupe ojerurévape”. Upéicharõ ñandéve avei katuete omeʼẽta (Luc. 11:13). Oiméne jahechakuaáma voi mbaʼeichaitépa ñanepytyvõ pe espíritu sánto ñande rekovépe. Péro mbaʼépa ikatu rejapo oiméramo nderejevautisái gueteri pe espíritu sánto rérape? Nemanduʼavaʼerã rejevautisáramo oñekumplitaha nderehe Jesús oprometevaʼekue: Ñandejára omeʼẽta ndéve espíritu sánto ha rehupytýta heta mbaʼe porã.

18. Mbaʼépa ohupyty umi ojevautisáva pe espíritu sánto rérape?

¹⁸ Ñande ningo jahechakuaa Jehová oisãmbyhyha avei koʼág̃a rupi kongregasión ijespíritu sánto rupive. Ha upe espíritu sánto ningo ára ha ára ñanesãmbyhy avei káda únope. Jajevautisa rupi hérape, jaagradesevaʼerã ha jahechakuaa mbaʼéichapa ñanepytyvõ. Jahejavaʼerã avei tañanesãmbyhy. Pe artíkulo oúvape katu jahecháta mbaʼépa jajapovaʼerã ñakumpli hag̃ua pe kompromíso jajapovaʼekue Jehová ndive ñañemeʼẽvo chupe. Ha mbaʼéichapa pe espíritu sánto ikatu ñanepytyvõ upearã.

[Nóta]

Ñanemanduʼápa koʼã mbaʼére?

• Mbaʼépa heʼise jajevautisa pe Túva rérape?

• Mbaʼépa jajapovaʼerã jajevautisáramo pe Taʼýra rérape?

• Mbaʼépa jajapovaʼerã jahechauka hag̃ua jaikuaaha mbaʼépa heʼise jajevautisa pe Túva ha Taʼýra rérape?

• Mbaʼépa heʼise jajevautisa espíritu sánto rérape?

[Porandu ñahesaʼỹijóva]

[Nóta oĩva taʼanga ndive páhina 10]

Mbaʼe kámbiopa ojaporakaʼe pe Túva áño 33-pe Pentecostés jave?

[Roagradese]

Omeʼẽ pe Museo de Israel (Jerusalén)