Baptais ilo Etan Jemen, Nejin im Jitõb Kwojarjar

“Inem komin ilok, im kõmõn . . . dri kalora, im baptais ir ilo etan Jema im Nejin im Jitõb Kwojarjar.”​—MATU 28:19.

1, 2. (a) Ta eo ear walok ilo Jerusalem ilo ran in Pentekost eo ilo yiõ eo 33? (b) Etke elõñ armij ro rar emakõt ñõn air baptais?

 ILO ran in Pentekost eo ilo yiõ eo 33, Jerusalem ear eobrõk kin dri lotok ro me rar itok jen elõñ ailiñ ko ñõn bõk kwonair ilo juõn kwojkwoj eaurõk me ear walok ilo ien eo. Ilo ien in ear walok juõn men ejejuan me ear kamakõt dri jilik Piter ñõn an kwalok juõn katak ekairujruj im ear jelet buruen armij ro ilo juõn wãwen ekabwilõñlõñ. Nan ko an Piter rar kamakõt enañin 3,000 dri Ju im dri tõmak ro rejjab dri Ju ñõn air ukwelok im baptais ilo dren. Ilo wãwen in, kar kobaik rein ñõn congregation in Kristian eo ekãl me ej kap ejaak ilo ien eo. (Jerb. 2:​41) Kin an kar lõñ armij ro rar baptais ilo lwe ko me rar ber ibelakin Jerusalem, men in emaroñ kar lap an kairuj armij ro!

² Ta eo ear kõmõn bwe en lõñ armij ren baptais? Moktalok ilo ran eo, ear walok “juõn ainikien jen lõñ, einwõt ainikien kõto ko rellab.” Ilo bo eo ilo juõn im, tarrin in 120 dri kalor ro an Jisõs rar obrõk kin jitõb kwojarjar. Elikin an walok men in, dri tõmak man im kõra ro rar kuktok im bwilõñ ke rar roñ an dri kalor ro “kennan ilo elõñ kain kajin” ko. Elõñ ian armij rein ear ‘lel burueir’ ke rar roñjake ta eo Piter ear ba, ekoba nan ko an rekajju im alikar kin mij eo an Jisõs. Ta eo rej aikwij kõmõne? Piter ear uak im ba: “Komin ukwelok jen jerawiwi ko ami, kajjojo iami, im baptais ilo etan Jesus Christ, bwe en jeorlok jerawiwi ko ami; im kom naj bõk menin letok an Anij, eo Jitõb Kwojarjar.”​—Jerb. 2:​1-4, 36-​38, UBS.

3. Ilo ran in Pentekost eo, ta eo dri Ju im dri tõmak ro rejjab dri Ju me rar ukwelok rar aikwij in kõmõne?

³ Lemnok kin wãwen kar tõmak eo an dri Ju im dri tõmak ro rejjab dri Ju me rar roñjake ta eo Piter ear ba. Emwij air bõk Jeova einwõt  Anij eo air. Im jen Jeje ko ilo kajin Hibru, rar jela kin jitõb kwojarjar eo bwe ej kajur eo ej jerbal an Anij me kar kajerbale ilo ien kõmõnmõn lõñ im lõl im ilo ien ko tokelik. (Jen. 1:2; Ekaj. 14:​5, 6; 1 Sam. 10:6; Sam 104:30) Bõtab, ear lukkun aurõk ñõn air melele im tõmak kin ialin lomor eo an Anij, ikijen Messaia eo, Jisõs. Kin men in, Piter ear kwalok kin aurõkin air “baptais ilo etan Jisõs Kraist.” Ilo jet ran ko moktalok jen ien in, Jisõs, eo emwij an kar jerkakbiji, ear kakien Piter im ro jet ñõn air baptaisi armij ro “ilo etan Jema im Nejin im Jitõb Kwojarjar.” (Matu 28:19, 20) Men in ear lukkun lap melelen ñõn dri Kristian ro mokta, im bareinwõt ñõn kij ranin. Ta in?

Ilo Etan Jemen

4. Ta oktõk eo ear walok ñõn ro im ear or ibeir juõn kõtan emõn iben Jeova?

⁴ Einwõt kar kwalok kake moktalok, ro me rar emakõt ñõn nan in kemelele ko an Piter rar kabuñ ñõn Jeova im ear or ibeir juõn kõtan emõn iben mokta. Rein rar kate ir ñõn bokake Kien eo an, im eñin kar unin elõñ iair rar itok jen ailiñ ko jet ñõn Jerusalem. (Jerb. 2:​5-​11) Bõtab, Anij ear kõmõn juõn oktõk elap kin wãwen ej jerbal iben armij ro. Ear karmijete dri Ju ro im kiõ ejjab watõk ir einwõt armij ro an, inem air kejbãrok Kien eo ear jab juõn wãwen ej kabuñburuen Anij. (Matu 21:43; Kol. 2:​14) Elañe dri roñjake rein rar kõnan drebij wõt kõtan eo air emõn iben Jeova, ebar or juõn men rar aikwij kõmõne.

5, 6. Ta eo elõñ dri Ju im dri tõmak ro rejjab dri Ju rar aikwij in kõmõne ñõn air maroñ bõk juõn kõtan emõn iben Anij?

⁵ Alikar, men eo rar aikwij in kõmõne ear jab bwe ren ilok jen dri Letok Mour eo, Jeova. (Jerb. 4:​24) Ro rar emakõt ñõn nan in kemelele ko an Piter rar lukkun kile kiõ bwe Jeova ear juõn Jemen ejoij. Ear jilkintok Messaia eo ñõn lomoren ir im ear mõnõnõ in jeorlok bwir ko an ro me Piter ear maroñ ba: ‘Ro nukin Israel otemjej ren kanuij jela, bwe Anij e ar kõmõnmõn Jisõs eo bwe En Iroij im Kraist, eo kom ar dilaik e.’ Ilo mol, ro rej jerbale nan ko an Piter, eor kiõ ibeir juõn un elaplok ñõn air kamolol kin men eo Jeova ear kõmõne ñõn aolep ro im rekõnan bõk juõn kõtan emõn iben!​—Riit Jerbal 2:​30-​36.

⁶ Emol, dri Ju im dri tõmak ro rejjab dri Ju rar lo bwe ñõn air maroñ bõk juõn kõtan emõn iben Jeova, men in ear kitibuj air kile bwe e eo ej dri Letok lomor ikijen Jisõs. Inem, kwomaroñ melele kin etke rein rar aikwij ukwelok jen jerawiwi ko air, meñe rar jela ak jab jela bwe rar bõk kwonair ilo mij eo an Jisõs. Im eñin unin ilo ran ko tokelik rein rar “niknik ilo air katak ibben ri jilõk ro.” (Jerb. 2:​42, UBS) Rar maroñ im renaj kar kõnan ‘kebak ñõn tron in joij, bwe ren bõk tiriamokake.’​—Hib. 4:​16.

7. Ta oktõk ko elõñ armij ro ranin rar kõmõni ikijen lemnok ko air kin Anij im ilo air baptais ilo etan Jemen?

⁷ Ranin, elõñ million armij ro me ekajjo wãwen mour ko air rar katak mol eo kin Jeova jen Baibel eo. (Ais. 2:​2, 3) Mokta jen an kar rein oktõk im tõmak bwe eor juõn dri Kõmõnmõn eo me remaroñ ejaak juõn kõtan eaurõk iben, jet iair rar jab tõmak ilo Anij ak remaroñ kar tõmak bwe eor juõn Anij me ejjab itoklimo kin menin kõmõnmõn ko an. Ro jet rar kabuñ ñõn jilu anij ilo juõn ak ñõn elõñ kain ekjõp ko. Ak emwij an rein katak bwe Jeova ej mõke wõt Anij eo ekajur potata, im kiõ rej kajerbal ãt eo etan. Men in ej ekkar ñõn men eo Jisõs ear ba kin dri kalor ro an bwe rej aikwij baptais ilo etan Jemen.

8. Ta eo armij ro me rar jab jela kin jerawiwi eo an Adam rar aikwij melele kin Anij?

⁸ Rein rar bareinwõt katak bwe rar jolit jerawiwi jen Adam. (Rom 5:​12) Katak in ear juõn men ekãl ñõn ir im rar aikwij tõmake. Jemaroñ keiri armij rein ñõn juõn eman enañinmij ak ejjab kile bwe eor an nañinmij. Emaroñ walok jet kakõle ko kin nañinmij eo an, einwõt an emetõktõk enbwinin jen ien ñõn ien. Ak kinke ejañin kar etal im kakõlkõl, emaroñ lemnok bwe ej ejmour wõt. Bõtab, ke ear kakõlkõl men in ear kalikar bwe ejjab ejmour.  (Keiri 1 Dri Korint 4:4, UBS.) Ta elañe ear taktõ im kar kwalok ñõn e kin ta nañinmij eo an? Ejjab juõn men in meletlet ke ñõn an kabukot im kajerbal juõn kilen taktõ me emaroñ kemour e jen nañinmij eo an? Ejja eindreinlok wõt, ke elõñ rar katak kin mol eo bwe aolep rar jolit jerawiwi, rar tõmak “kein kakõlkõl” eo ilo Baibel eo bwe eor an armij ro nañinmij in jerawiwi im rar katak im jela bwe Anij ej letok kein “kejmour” eo. Aet, aolep ro im rejenolok jen Anij rej aikwij reilok ñõn Eo me emaroñ “kejmour” ir.​—Ep. 4:​17-​19.

9. Ta eo Jeova ear kõmõne bwe armij ro ren maroñ bõk juõn kõtan emõn iben?

⁹ Elañe emwij am wujleplok mour eo am ñõn Jeova Anij im kwoj juõn dri Kristian me emwij an baptais, kwojela bwe ej juõn jerammõn elap ñõn bõk juõn jimjera iben Anij. Kwomaroñ kile kiõ kin ewi joñõn an Jeova yokwe yuk. (Riit Dri Rom 5:8.) Meñe Adam im Iv rar jerawiwi nae Anij, e eo ear jino emakõt ñõn kõmõn bwe ro nejin Adam, ekoba kij, ren maroñ bõk juõn kõtan emõn iben. Ilo an kõmõne men in, Anij ear aikwij in lo an Nejin eo ejitenburu iben, iñtan im mij. Ar jela kin men in ejjab ke jibõñ kij ñõn kõtãik kij iomin maroñ eo an Anij im bokake kien ko an kinke jej yokwe e? Elañe kwojañin kõmõni men kein, eor un ko remõn ñõn am wujleplok kwe mõke ñõn Anij im baptais.

Ilo Etan Nejin

10, 11. (a) Ewi joñõn am muri ñõn Jisõs? (b) Ewi wãwen am iñjake kin mij eo an Jisõs einwõt juõn binmour?

¹⁰ Bar lemnok mõk kin ta eo Piter ear ba ñõn jar eo. Ear kwalok kin aurõkin air tõmak ilo Jisõs, me ej ekkejellok ñõn air baptais “ilo etan . . . Nejin.” Etke men in ear aurõk ilo ien eo, im etke eaurõk kiõ? Ar tõmak ilo Jisõs im baptais ilo etan ej melelen bwe jej kile ijo kwonan ilo kõtan eo ar iben dri Kõmõnmõn eo. Jisõs ear aikwij toto ion alal in iñtan eo ñõn an maroñ jolok binikol in kien jen dri Ju ro, bõtab, mij eo an ear bõktok juõn tokjen elaplok. (Gal. 3:​13) Ear letok katok in binmour eo me armij otemjej rar aikwiji. (Ep. 2:​15, 16; Kol. 1:​20; 1 Jon 2:​1, 2) Ñõn an maroñ kõtõbrõke men in, Jisõs ear aikwij kijenmij iomin jab ekajet jime, konono nae, iñtan, im eliktata mij. Ewi joñõn am kamolol kin katok in an? Pijaik kwe mõke einwõt juõn ladrik 12 yiõ ridtõn eo ej uwe ion tima eo etan Titanic, me ear itak iben juõn ice elap im ear tuññulallok ilo yiõ eo 1912. Kwoj kajeoñ in uwe ion booj in lomor eo, ak eobrõk. Bõtab, juõn eman iloan booj eo ear mejenmaik lio iben im to jene bwe kwon maroñ bõk jikin. Ewi wãwen am iñjake? Alikar kwonaj kar lukkun kamolol eman eo! Inem kwomaroñ lukkun melele kin iñjake eo an kar ladrik eo me ear iione wãwen in. * Bõtab, men eo Jisõs ear kõmõne ñõn yuk ear laplok jen men in. Ear mij bwe kwon maroñ bõk mour indrio.

¹¹ Ewi wãwen am kar iñjake ke kwar katak kin ta eo Nejin Anij ear kõmõne ñõn yuk? (Riit 2 Dri Korint 5:​14, 15.) Ejelok berre ear lap am kamolol. Men in ear jibõñ yuk ñõn emakõt ilo am wujleplok mour eo am ñõn Anij im ñõn ‘mour jab ñõn kwe mõke, a ñõn Eo e ar mij kin kwe.’ Baptais ilo etan Nejin ej melelen bwe kwoj kile men eo Jisõs ear kõmõne ñõn yuk im kwoj kõtãik yuk ñõn maroñ eo an einwõt “Iroij in mour.” (Jerb. 3:​15; 5:​31) Mokta, ear ejelok ibõm juõn kõtan emõn iben dri Kõmõnmõn eo, im ear ejelok ibõm juõn kejatrikrik emol. Ak ilo am jerbale tõmak eo am ilo mij eo an Jisõs Kraist im baptais, kwoj kiõ bõk juõn kõtan emõn iben Anij. (Ep. 2:​12, 13) Paul ear je, “Mokta komar ettolok jen Anij, im kin jerbal im lemnak ko ami renana komar erom ri kijdrate Anij. Ak kiõ, kin mij eo an Nejin ilo kanniek, emwij an Anij jeraik kom, bwe en bõktok kom ñõn ibben ilo kwojarjar im erreo.”​—Kol. 1:​21, 22, UBS.

12, 13. (a) Ñe juõn ej kalõkatip yuk, ewi wãwen baptais eo am ilo etan Nejin en kar jelet yuk? (b) Einwõt juõn Kristian me emwij an baptais ilo etan Jisõs, ta erro eo am?

 ¹² Meñe kwar baptais ilo etan Nejin, kwoj kile wõt bwe kwoj juõn armij ejjab wãppen im ekkã am kõmõni men ko renana. Am kile men in enaj lap an jibõñ yuk aolep ran. Ñõn wanjoñok, elañe juõn armij ej kalõkatip yuk, kwoj ke kememej bwe komro jab wãppen? Komro aikwij kajitõk kin jeorlok bwir iben Anij, im bareinwõt mõnõnõ in jeorlok an dron bwir. (Mark 11:25) Ñõn kalikar kin aikwij in, Jisõs ear kwalok juõn wanjoñok kin Iroij eo im ear mõnõnõ in jeorlok muri ko an juõn dri korijer me kar joñõn in joñoul tausan talent (60 million denarii). Bõtab, dri korijer in ear makoko in jeorlok muri eo an dri korijer eo mõtõn me ear muri iben 100 denarii. Inem Jisõs ear kalikar point in: Jeova ejamin jeorlok bwir eo an juõn armij me ejjab jeorlok bwir eo an eo jein ak jãtin. (Matu 18:23-​35) Aet, ar baptais ilo etan Nejin ej melelen bwe jej kile maroñ eo an Jisõs im jej kate kij ñõn ar lor joñok im katak ko an, ekoba ar mõnõnõ in jeorlok bwir ko an ro jet.​—1 Pit. 2:​21; 1 Jon 2:6.

¹³ Kin am jab wãppen, kwojjab maroñ kajeoñwe aolep men ko Jisõs ear kõmõni. Mekarta, kin am kar wujleplok yuk mõke ñõn Anij kin aolepen buruõm, kwoj kõnan kajeoñwe Jisõs joñõn wõt am maroñ. Men in ej kitibuj am kate wõt yuk ñõn wutik armij eo emor im kõnõk armij eo ekãl. (Riit Dri Epesõs 4:​20-​24.) Ñe kwoj koutiej juõn eo mõtõm, ekkã am kõnan kajeoñ in katak jen joñok eo an im jen karkar ko karkarin remõn. Eindrein, eor am kõnan ñõn katak jen Kraist im kajeoñwe e.

14. Ewi wãwen kwomaroñ kwalok bwe kwoj kile maroñ eo an Jisõs einwõt Kiñ eo ilõñ?

¹⁴ Eor bar juõn wãwen kwomaroñ kwalok bwe kwoj melele kin ta eo ej kitibuj ilo am baptais ilo etan Nejin. Anij ear “kõtãik men otemjej iomin neen [Jisõs], im E ar lelok E bõran ion men otemjej ñõn eklisia.” (Ep. 1:​22) Kin men in, kwoj aikwij koutiej wãwen eo Jisõs ej tel ro im emwij air wujleplok ir ñõn Jeova. Kraist ej kajerbal armij ro rejjab wãppen ilo congregation eo, elaptata eman ro reridto ilo jitõb ak elder ro me emwij jitõñ ir. Kar jitõñ eman rein ‘bwe ren [kajime, NW] ro remõn, . .  . kin kalek enbwinin Kraist.’ (Ep. 4:​11, 12) Meñe juõn armij ejjab wãppen ej kõmõn juõn bwir, Jisõs einwõt Kiñ in Ailiñ in lõñ emaroñ kamarmire men in ilo ien im wãwen eo ekõnan. Kwoj ke tõmak men in?

15. Elañe kwojañin baptais, ta jerammõn ko kwomaroñ reimanlok ñõni elikin am baptais?

¹⁵ Jet rejañin wujleplok ir mõke ñõn Jeova im baptais. Elañe kwoj juõn ian rein, kwomaroñ ke lo jen pãrokõrããp ko ilõñ bwe am kile maroñ eo an Nejin ej wãwen eo ejime im ej wãwen eo kwoj kwalok am kamolol? Ilo am baptais ilo etan Nejin, men in enaj kõmõn bwe kwon maroñ bõk jerammõn ko relap.​—Riit Jon 10:​9-​11.

Ilo Etan Jitõb Kwojarjar

16, 17. Ta melelen ñõn kwe ñe kwoj baptais ilo etan jitõb kwojarjar eo?

¹⁶ Ta melelen ñõn am baptais ilo etan jitõb kwojarjar? Einwõt kar kwalok kake mokta, ro rar roñjake Piter ilo ran in Pentekost eo rar jela kin jitõb kwojarjar eo. Ilo mol, rar maroñ lo kin mejeir bwe Anij ear wõnmanlok wõt im kajerbal jitõb kwojarjar eo. Piter ear juõn ian ro im rar ‘obrak kin Jitõb Kwojarjar, im ear jino kennan ilo elõñ kain kajin ko.’ (Jerb. 2:​ 4, 8, UBS) Ranin, elõñ men ko rej kõmõni “ilo etan kien,” eo me ejjab juõn armij ak ej melelen bwe kar kõmõni ekkar ñõn kien. Eindrein, juõn eo ej baptais ilo etan jitõb kwojarjar ej kile bwe jitõb kwojarjar eo, ejjab juõn armij, ak ej kajur eo ej jerbal an Jeova. Im baptais in ej melelen bwe armij eo ej kile jerbal eo jitõb kwojarjar eo ej kõmõne ñõn kõtõbrõk karõk eo an Anij.

¹⁷ Ejjab mol ke bwe unin am jela kin jitõb kwojarjar eo ej ikijen am kar katak Baibel eo? Ñõn wanjoñok, kwar katak im melele bwe kar je Baibel eo iomin tel eo an jitõb kwojarjar eo. (2 Tim. 3:​16) Ke kwar kõmõn wõnmanlok ko ilo jitõb, alikar bwe ear laplok am melele bwe ‘Jememiuij i lõñ ej lelok Jitõb Kwojarjar eo ñõn ro otemjej rej kajitõk iben,’ ekoba kwe. (Luk 11:13) Bwelen kwar lo wãwen an jitõb kwojarjar eo jerbal ilo mour eo am. Ijo turãjet, elañe kwojañin baptais ilo etan jitõb kwojarjar, kalimur eo an Jisõs bwe Anij ej letok jitõb kwojarjar eo ej melelen bwe eor jerammõn ko relap rej ber imam ñe kwonaj bõk jitõb in.

18. Ta jerammõn ko renaj walok ñõn ro im rej baptais ilo etan jitõb kwojarjar eo?

¹⁸ Ej bareinwõt alikar ilo ran kein bwe Jeova ej tel congregation an Kristian eo ikijen jitõb eo an. Jitõb in ej bareinwõt jibõñ kij kajjojo ilo makõtkit ko ar ran otemjej. Ar kar baptais ilo etan jitõb kwojarjar eo ej kitibuj ar melele kin jerbal eo an ilo mour eo ar im ar mõnõnõ in jerbal ilo burukuk iben. Ak, jet remaroñ lemnok kin ewi wãwen jemaroñ mour ekkar ñõn wujleplok eo ar ñõn Jeova im ewi wãwen jitõb kwojarjar eo ej bõk kwonan ilo men in. Jenaj etale men in ilo katak in tok juõn.

[Kamelele eo itulal]

Kwoj Kememej Ke?

• Ilo am baptais ilo etan Jemen, ta melelen men in ñõn yuk?

• Ta melelen ñõn am baptais ilo etan Nejin?

• Ewi wãwen kwomaroñ kwalok bwe kwoj kile aurõkin am baptais ilo etan Jemen im Nejin?

• Ta melelen ñõn am baptais ilo etan jitõb kwojarjar eo?

[Kajitõk ko ñan katak]

[Kamelele in juõn pija ilo peij 10]

Elikin Pentekost ilo yiõ eo 33, ta kõtan eo dri kalor ro rekãl rar maroñ ejaak iben Anij?

[Kamelele in juõn pija ilo peij 10]

By permission of the Israel Museum, Jerusalem