Re Kolobetšwa Leineng la Mang le la Eng?

“E-yang le dire batho ba ditšhaba ka moka barutiwa, le ba kolobetša leineng la Tate le la Morwa le la moya o mokgethwa.”—MAT. 28:19.

1, 2. (a) Go diregile’ng kua Jerusalema ka Pentekoste ya 33 C.E.? (b) Ke ka baka la’ng batho ba bantši lešabeng ba ile ba tutueletšega go kolobetšwa?

MAŠABA ao a tšwago dinageng tše dintši a be a e-ya godimo le fase kua Jerusalema. Ka letšatši la Pentekoste ya 33 C.E., go be go swerwe monyanya o bohlokwa gomme baeng ba bantši ba be ba le moo. Eupša go diregile selo se sengwe seo se sa tlwaelegago seo ka morago ga sona, moapostola Petro a ilego a nea polelo e matla yeo e ilego ya ba le mafelelo a kgahlišago. Bajuda ba e ka bago ba 3 000 le basokologi ba be ba kgomilwe ke mantšu a gagwe, ba itshola gomme ba kolobetšwa meetseng. Ka gona ba ile ba tlatša phuthego ya Bokriste yeo e bego e sa tšwa go hlongwa. (Dit. 2:41) Go kolobetšwa ga batho ba bantši gakaakaa madibeng goba matamong a Jerusalema go swanetše go ba go ile gwa baka tlhakatlhakano e kgolo!

² Ke’ng seo se dirilego gore batho ba bantši gakaakaa ba kolobetšwe? Pejana letšatšing leo, go ile “gwa ba le lešata le le tšwago legodimong le bjalo ka ledimo le matla.” Phapošing ya ka godimo ya ntlo, barutiwa ba Jesu ba 120 ba ile ba tlatšwa ka moya o mokgethwa. Ka morago ga moo, banna le basadi bao ba hlomphegago bao ba bego ba bokane moo ba ile ba makatšwa ke go kwa barutiwa ba ba “bolela ka maleme a fapa-fapanego.” Gatee-tee ge ba e-kwa seo Petro a se boletšego, go akaretša le mantšu a gagwe mabapi le lehu la Jesu, ba bantši ba ile “ba hlabega dipelo.” Ba be ba swanetše go dira’ng? Petro o ile a araba ka gore: “Itsholeng, gomme yo mongwe le yo mongwe a kolobetšwe leineng la Jesu Kriste . . . , gomme le tla amogela mpho e sa lefelelwego ya moya o mokgethwa.”—Dit. 2:1-4, 36-38.

3. Ka letšatši la Pentekoste, ke’ng seo Bajuda bao ba itshotšego le basokologi ba ilego ba swanelwa ke go se dira?

³ Nagana ka boemo bja bodumedi bja Bajuda  le basokologi bao ba kwelego Petro. Ba be ba šetše ba amogetše Jehofa e le Modimo wa bona. Le gona, go ya ka Mangwalo a Seheberu, ba be ba tseba ka moya o mokgethwa, matla a Modimo a šomago ao a dirišitšwego nakong ya tlholo le ka morago ga yona. (Gen. 1:2; Baa. 14:5, 6; 1 Sam. 10:6; Ps. 33:6) Eupša ba be ba nyaka mo go oketšegilego. Go be go le bohlokwa gore ba kwešiše le go amogela tsela ya Modimo ya phološo—Mesia, yena Jesu. Ka baka leo, Petro o ile a gatelela bohlokwa bja gore ba “kolobetšwe leineng la Jesu Kriste.” Matšatšing a sego kae pejana, Jesu yo a tsošitšwego o laetše Petro le ba bangwe gore ba kolobetše batho “leineng la Tate le la Morwa le la moya o mokgethwa.” (Mat. 28:19, 20) Seo se be se bolela mo gogolo kudu lekgolong la pele la nywaga, gomme go sa dutše go le bjalo. Seo se bolela’ng?

Leineng la Tate

4. Ke phetogo efe yeo e bilego gona go batho bao ba nago le tswalano le Jehofa?

⁴ Bjalo ka ge go boletšwe, bao ba ilego ba arabela gabotse polelong ya Petro ba be ba rapela Jehofa gomme ba be ba kile ba ba le tswalano le yena. Ba be ba dutše ba leka go latela Molao wa gagwe, e lego lona lebaka leo le dirilego gore bao ba tšwago dinageng tše dingwe ba tle Jerusalema. (Dit. 2:5-11) Lega go le bjalo, Modimo o be a sa tšwa go dira phetogo e kgolo tseleng yeo a bego a tla dirišana le batho ka yona. O be a lahlile Bajuda bjalo ka setšhaba sa gagwe seo se kgethegilego; go boloka ga bona Molao e be e se sa hlwa e le tsela ya gore ba ka amogelwa ke yena. (Mat. 21:43; Bakol. 2:14) Ge e ba batheetši bao ba be ba nyaka gore ba dule ba e-na le tswalano le Jehofa, ba be ba swanetše go dira selo se sengwe.

5, 6. Ke’ng seo Bajuda ba bantši ba lekgolong la pele la nywaga le basokologi ba ilego ba se dira gore ba be le tswalano le Modimo?

⁵ Ruri ba be ba sa swanela go hlanogela Jehofa, Monei wa bona wa Bophelo. (Dit. 4:24) Bao ba arabelago gabotse tlhalosong ya Petro ga bjale ba be ba kgona go bona go feta le ge e le neng pele gore Jehofa e be e le Tate yo botho. O ile a romela Mesia gore a ba phološe gomme o be a ikemišeditše go lebalela gaešita le bao Petro a boletšego le bona a re: “Anke ntlo ka moka ya Isiraele e tsebe gore ruri Modimo o mo dirile Morena le Kriste, yena Jesu yo yoo le mo kokotetšego koteng.” Ge e le gabotse, bao ba dirišago mantšu a Petro ga bjale ba be ba ka ba le lebaka le le kwagalago la go leboga seo Tate a se diretšego bohle bao ba bego ba nyaka go ba le tswalano le Modimo!—Bala Ditiro 2:30-36.

⁶ Ka kgonthe, Bajuda le basokologi bao ga bjale ba be ba ka bona gore go ba le tswalano le Jehofa go be go akaretša go lemoga gore ke Monei wa phološo ka Jesu. Ka gona, o ka kwešiša gore ke ka baka la eng ba ile ba itsholela dibe tša bona, go akaretša le taba ya gore go sa šetšwe gore ba be ba tseba seo goba go se bjalo, ka tsela e itšego ba be ba akaretšwa polaong ya Jesu. Le gona go tloga go kwagala gore matšatšing ao a latelago, ba ile “ba tšwela pele ba ikgafela thutong ya baapostola.” (Dit. 2:42) Ba be ba ka kgona e bile ba be ba nyaka go “[batamela] ka tokologo ya go bolela sedulong sa bogoši sa botho bjo bo sa swanelago.”—Baheb. 4:16.

7. Ba bantši lehono ba fetošitše bjang pono ya bona mabapi le Modimo gomme ba kolobetšwa leineng la Tate?

⁷ Lehono, batho ba dimilione bao ba tšwago ditlogong tša go fapa-fapana ba ithutile therešo ya Beibele mabapi le Jehofa. (Jes. 2:2, 3) Ba bangwe e be e le baila-modimo goba balatedi ba deism, * eupša ba be ba kgolwa gore go na le Mmopi yo a ka bago le tswalano e botse le bona. Ba bangwe ba be ba rapela modimo wa boraro botee goba medimo e fapa-fapanego ya diswantšho. Ba ithutile gore ke Jehofa feela yo e lego Modimo ra-matla-ohle, gomme ga bjale ba mmitša ka leina la gagwe. Seo se dumelelana le taba ya gore Jesu o boletše gore barutiwa ba gagwe ba swanetše go kolobetšwa leineng la Tate.

8. Ke’ng seo bao ba bego ba sa tsebe selo ka sebe sa Adama ba ilego ba swanelwa ke go se lemoga mabapi le Tate?

⁸ Le gona ba ithutile gore ba abetše sebe go Adama. (Baroma 5:12) Se e be e le selo se sefsa seo ba ilego ba swanelwa ke go dumela gore ke  therešo. Batho bao ba ka swantšhwa le motho yo a babjago yo a sa lemogego gore o a babja. A ka no ba a bile le ditšhupo tša gore o a babja, tše bjalo ka go fela a e-kwa dihlabi. Lega go le bjalo, ka ge a se a botšwa gore o swerwe ke bolwetši bjo itšego, a ka no ba a be a nagana gore o phetše gabotse. Lega go le bjalo, go ile gwa utollwa gore o a babja. (Bapiša le 1 Bakorinthe 4:4.) Go thwe’ng ge a ka tsebišwa gore ge e le gabotse o swerwe ke’ng? Na e be e ka se be gabohlale gore a tsome le go amogela pheko yeo e tsebjago le yeo go kgonthišeditšwego gore e a šoma? Ka mo go swanago, gatee-tee ge ba bantši ba ithutile therešo mabapi le sebe sa leabela, ba ile ba dumela gore Beibele e ba bontšha seo go ka thwego ke bolwetši gomme ba kwešiša gore Modimo o ba nea seo go ka thwego ke pheko ya bjona. Ee, bohle bao ba aroganego le Tate ba swanetše go retologela go Yo a ka ba neago seo go ka thwego ke pheko.—Baef. 4:17-19.

9. Ke’ng seo Jehofa a se dirilego gore go kgonege go ba le tswalano le yena?

⁹ Ge e ba o šetše o neetše bophelo bja gago go Jehofa Modimo gomme o le Mokriste yo a kolobeditšwego, o a tseba gore go ba le tswalano le yena ke selo se sebotse gakaakang. Ga bjale o thabela kamoo Tatago, Jehofa, a go ratago ka gona. (Bala Baroma 5:8.) Modimo o ile a gata mogato wa pele e le gore ditlogolo tša gagwe—go akaretša le rena—di ka ba le tswalano e botse le yena, gaešita le ge Adama le Efa ba be ba dirile sebe kgahlanong le yena. Ka go dira bjalo, Modimo o ile a swanelwa ke go kwa bohloko ge a bona Morwa wa gagwe yo a rategago a tlaišega le go hwa. Na go tseba se ga go re thuše gore re amogele bolaodi bja Modimo le go kwa ditaelo tša gagwe ka go rata? Ge e ba o se wa hlwa o dira bjalo, o na le mabaka a go ineela go Modimo le go kolobetšwa.

Leineng la Morwa

10, 11. (a) O kolota Jesu gakaaka’ng? (b) O ikwa bjang ka go hwa ga Jesu e le topollo?

¹⁰ Lega go le bjalo, nagana gape ka seo Petro a se boditšego lešaba. O gateletše taba ya go amogela Jesu, e lego seo ka go lebanya se tswalanago le go kolobetšwa “leineng . . . la Morwa.” Ke ka baka la’ng seo se be se le bohlokwa ka nako yeo gomme ke ka baka la’ng se le bohlokwa gona bjale? Ge e le gabotse, go amogela Jesu le go kolobetšwa leineng la gagwe go bolela go lemoga tema yeo a e kgathago tswalanong ya rena le Mmopi. Jesu o ile a swanelwa ke go fegwa koteng ya tlhokofatšo e le gore a tloše thogako ya Molao go Bajuda; lega go le bjalo, lehu la gagwe le be le e-na le mehola e megolo. (Bagal. 3:13) O neile sehlabelo sa topollo seo batho ka moka ba bego ba se nyaka. (Baef. 2:15, 16; Bakol. 1:20; 1 Joh. 2:1, 2) Gore a fihlelele seo, Jesu o ile a kgotlelela go hloka toka, go rogwa, go tlaišwa gomme mafelelong a hwa. O tšeela sehlabelo sa gagwe godimo gakaaka’ng? Akanya o le mošemane wa nywaga e 12 yo a lego leetong ka sekepe sa Titanic, seo se ilego sa thula lehlwa gomme sa nwelela ka 1912. O leka go tšhabela ka seketswaneng se se phološago maphelo eupša o hwetša se tletše. Ke moka monna yo a lego ka seketswaneng seo o atla mosadi wa gagwe gomme o a fologa gore wena o namele. O be o tla ikwa bjang? Ruri o be o tla mo leboga! O ka kwešiša kamoo mošemane yoo ruri a ilego a lebeletšana le boemo bjoo a ilego a ikwa ka gona. * Lega go le bjalo, Jesu o go diretše mo gontši kudu. O ile a hwa e le gore o ka hwetša bophelo bjo bo sa felego.

¹¹ O ile wa ikwa bjang ge o be o sa tšwa go kwa ka seo Morwa wa Modimo a go diretšego sona? (Bala 2 Bakorinthe 5:14, 15.) Mohlomongwe o ile wa mo leboga kudu. Seo se ile sa go tutueletša go neela bophelo bja gago go Modimo le ‘go se sa hlwa o iphelela, eupša o phelele yena yo a go hwetšego.’ Go kolobetšwa leineng la Morwa go bolela go lemoga seo Jesu a go diretšego sona le go amogela bolaodi bja gagwe bjalo ka “Moemedi yo Mogolo wa bophelo.” (Dit. 3:15; 5:31) Nakong e fetilego, o be o se na tswalano le Mmopi e bile ge e le gabotse o be o se na kholofelo e tiilego. Eupša ka go bontšha tumelo mading a Jesu Kriste ao a tšholotšwego le ka go kolobetšwa, ga bjale o na le tswalano le Tate. (Baef. 2:12, 13) Moapostola Paulo o ngwadile gore: “Lena bao le kilego la ba ba arogilego e bile le le manaba gobane menagano ya lena e be e le medirong e kgopo, bjale [Modimo] o dirile poelanyo gape ka mmele wa [Jesu] wa nama ka lehu la gagwe, e le gore a le  tšweletše le le ba bakgethwa gomme le hloka sekodi.”—Bakol. 1:21, 22.

12, 13. (a) Go kolobetšwa leineng la Morwa go swanetše go kgoma bjang tsela yeo o arabelago ka yona ge yo mongwe a go kgopiša? (b) Bjalo ka Mokriste yo a kolobeditšwego leineng la Jesu, ke tlamo efe yeo o nago le yona?

¹² Gaešita le ge o ile wa kolobetšwa leineng la Morwa, o tloga o lemoga ditshekamelo tša gago tša sebe. Temogo yeo e a hola letšatši le letšatši. Ka mohlala, ge motho a go kgopiša, na o a gopola gore bobedi bja lena le badiradibe? Bobedi bja lena le nyaka go lebalelwa ke Modimo e bile le swanetše go ba bao ba lebalelago. (Mar. 11:25) Ge a gatelela senyakwa se, Jesu o swantšhitše ka tsela ye: Mong wa mohlanka o ile a phumola sekoloto sa ditalente tše dikete tše lesome (ditenariase tše dimilione tše 60). Ka morago, mohlanka yoo ga se a ka a lokolla mohlanka-gotee le yena yo a bego a mo kolota ditenariase tše 100. Ke moka Jesu o ile a gatelela ntlha ye: Jehofa a ka se ke a lebalela motho yo a sa lebalelego ngwanabo. (Mat. 18:23-35) Ee, go kolobetšwa leineng la Morwa go bolela go lemoga bolaodi bja Jesu le go katanela go latela mohlala le dithuto tša gagwe, go akaretša le go ikemišetša go lebalela ba bangwe.—1 Pet. 2:21; 1 Joh. 2:6.

¹³ Ka ge o se wa phethagala, o ka se kgone go ekiša Jesu ka botlalo. Lega go le bjalo, o nyaka go ekiša Jesu ka mokgwa wo o ka kgonago ka wona ka go dumelelana le boineelo bja gago go Modimo ka pelo ka moka. Se se akaretša go tšwela pele o katanela go lahla motho wa kgale le go apara motho yo mofsa. (Bala Baefeso 4:20-24.) Ge o thoma go hlompha mogwera, gantši e ba ge o ithuta mohlaleng le dikeng tša gagwe tše dibotse. Ka mo go swanago, o nyaka go ithuta go Kriste le go mo ekiša.

14. O ka bontšha bjang gore o lemoga bolaodi bja Jesu bjalo ka Kgoši ya legodimong?

¹⁴ Go na le tsela e nngwe yeo ka yona o ka bontšhago gore o kwešiša seo se akaretšwago tabeng ya go kolobetšwa leineng la Morwa. Modimo “o beile dilo tšohle ka tlase ga dinao tša [Jesu], gomme a mo dira hlogo ya dilo tšohle phuthegong.” (Baef. 1:22) Ka gona, o swanetše go hlompha tsela yeo ka yona Jesu a hlahlago bao ba ineetšego go Jehofa. Kriste o diriša batho bao ba sa phethagalago diphuthegong tša gabo rena, kudu-kudu banna bao ba godilego moyeng e lego bagolo bao ba kgethilwego. Tokišetšo ya gore go kgethwe banna ba bjalo ke “ka morero wa go lokiša bakgethwa, . . . bakeng sa go agwa ga mmele wa Kriste.” (Baef. 4:11, 12) Gaešita le ge motho yo a sa phethagalago a dira phošo, Jesu bjalo ka Kgoši ya Mmušo wa legodimong o kgona go swaragana le taba ka nako ya gagwe le ka tsela ya gagwe. Na o dumela seo?

15. Ge e ba o itokišeletša go kolobetšwa, ke ditšhegofatšo dife tšeo o ka di fagahlelago ka morago ga kolobetšo?

¹⁵ Le gona, ba bangwe ga se ba hlwa ba ineela go Jehofa le go kolobetšwa. Ge e ba o se wa hlwa o dira bjalo, na o kgona go bona go seo se lego ka mo godimo gore go lemoga Morwa ke selo se se kwagalago le seo o ka se dirago e le go bontšha tebogo? Go kolobetšwa leineng la Morwa go tla dira gore le wena o hwetše ditšhegofatšo tše dikgolo.—Bala Johane 10:9-11.

Leineng la Moya o Mokgethwa

16, 17. Go kolobetšwa leineng la moya o mokgethwa go bolela’ng go wena?

¹⁶ Go kolobetšwa leineng la moya o mokgethwa go bolela’ng? Bjalo ka ge go boletšwe pejana, bao ba kwelego Petro ka letšatši la Pentekoste ba be ba tseba moya o mokgethwa. Ge e le gabotse, go be go e-na le bohlatse bjo bo bonalago bja gore Modimo o tšwetše pele a diriša moya o mokgethwa. Petro e be e le yo mongwe wa bao ba ilego  ba “tlala moya o mokgethwa [gomme] ba thoma go bolela ka maleme a fapa-fapanego.” (Dit. 2:4, 8) Polelwana e rego “leineng la” ga e šupe leineng la motho. Lehono, dilo tše dintši di dirwa “leineng la mmušo,” woo e sego motho. Di dirwa ka tumelelo ya mmušo. Ka mo go swanago, motho yo a kolobetšwago leineng la moya o mokgethwa o a lemoga gore moya o mokgethwa ga se motho, eupša ke matla a Jehofa ao a šomago. E bile go kolobetšwa mo go bjalo go bolela gore motho o lemoga tema yeo e kgathwago ke moya o mokgethwa morerong wa Modimo.

¹⁷ Na ga se wa tseba ka moya o mokgethwa ge o be o ithuta Beibele? Ka mohlala, o ile wa kwešiša gore Mangwalo a ngwadilwe ka pudulelo ya moya o mokgethwa. (2 Tim. 3:16) Ge o be o dutše o gola moyeng, mohlomongwe o ile wa kwešiša ka mo go tseneletšego gore ‘Tate yo a lego legodimong o nea moya o mokgethwa go bao ba mo kgopelago,’ go akaretša le wena. (Luka 11:13) Mohlomongwe o ile wa bona moya o mokgethwa o šoma bophelong bja gago. Ka lehlakoreng le lengwe, ge e ba o itokišeletša go kolobetšwa leineng la moya o mokgethwa, kgonthišetšo ya Jesu ya gore Tate o nea moya o mokgethwa e bolela gore o na le ditšhegofatšo tša kgonthe tše di letšego ka pele tša ge o tla be o hwetša moya woo.

18. Bao ba kolobetšwago leineng la moya o mokgethwa ba hwetša ditšhegofatšo dife?

¹⁸ Go molaleng gore le lehono, Jehofa o hlahla phuthego ya Bokriste le go e etelela pele ka moya wa gagwe. Moya woo o re thuša re le ka o tee ka o tee medirong ya rena ya letšatši le letšatši. Taba ya gore re kolobeditšwe leineng la moya o mokgethwa e akaretša go lemoga tema yeo o e kgathago maphelong a rena le go dirišana le moya woo ka tebogo. Lega go le bjalo, ba bangwe ba ka ipotšiša ge e ba re ka kgona go phelela boineelo bja rena go Jehofa le kamoo moya o mokgethwa o akaretšwago ka gona. Re tla ahla-ahla seo nakong e tlago.

[Mengwalo ya tlase]

Na o a Gopola?

• Go kolobetšwa leineng la Tate go akaretša’ng go wena?

• Go kolobetšwa leineng la Morwa go bolela’ng?

• O ka bontšha bjang gore o kwešiša seo se bolelwago ke go kolobetšwa leineng la Tate le la Morwa?

• Go kolobetšwa leineng la moya o mokgethwa go bolela’ng?

[Dipotšišo tša Thuto]

[Diswantšho go letlakala 10]

Ka morago ga Pentekoste ya 33 C.E., bao e bego e sa tšwa go ba barutiwa ba ile ba ba le tswalano efe le Tate?

[Mothopo]

By permission of the Israel Museum, Jerusalem