Dios Yayapa, Tsuripa y santo espïritupa shutinchö bautizashqa

“Qamcunata[m] cachayaq [ . . . ] nunacunata willapäyänequipaq, y creyicoq caqtana bautisayanqui Dios Yayapa, Tsurin Jesucristupa y Santu Espiritupa jutincho.” (MAT. 28:19.)

1, 2. a) ¿Imataq pasakorqan Jerusalenchö 33 wata Pentecostés fiestachö? b) ¿Imanirtaq atskaq nunakuna bautizakuyarqan?

JERUSALENCHÖMI 33 watachö atskaq nunakuna këkäyarqan. Hinantin nacionkunapitam shayämushqa Pentecostés nishqan fiestata celebrayänampaq. Pero kë fiestata rurëkäyaptinmi, mana imëpis pasakonqan pasarerqan. Apóstol Pedru discursanqan nunakunapa shonqunman chäriptinmi, kima waranqa (3.000) judïokuna y judïoman tikrashqakuna hutsankunapita arrepentikurnin bautizakuriyarqan, tsënöpam tsëraq patsakëkaq congregacionman yëkuriyarqan (Hech. 2:41). ¡Imanö kushikïpaqraq tsëtsika nunakuna Jerusalen marka qochakunachö o kitakunachö bautizakuyanqanqa karqan!

² ¿Imanöpataq tsëtsika nunakuna bautizakuyarqan? Bibliam nimantsik manaraq bautizakuyaptin ima pasakonqantapis, “sielupita[m] wiyacorqan imeca shucuqui bientunoraq” santo espíritu shamoqta, y huntarirqanmi wayipa altusninchö ëllurëkaq o qorirëkaq pachak ishkë chunka (120) Jesuspa qateqninkunaman. Diosta kuyaq nunakuna rikëkurninnam, alläpa espantakuyarqan Jesuspa qateqninkuna “tuquilaya idiomata parla[qta]” wiyar. Tsëpitanam, shonqunkunaman chaq discursota Pedru rurarirqan, tsëchömi Jesusta wanutsiyanqampita parlarqan. Tsënam “tsecho juntarëcaq nunacuna shonquncunacho nanatsicur allapa llaquicu[yarqan]”, ¿imatatan rurayänä? nirmi tapukuyarqan, “tsenam Pedru queno yasquerqan: —Llapequicuna, mana  alli rureniquicunata dejariyë, y bautisacuyë Jesucristurecur jutsequicunapita Dios perdonecuyäshunequipaq. Tsenam Santu Espirituta qamcunatapis qoycuyäshunqui” (Hech. 2:1-4, 36-38).

3. ¿Imatataq rurayänan karqan Pentecostés fiestachö judïokuna y judïoman tikrashqakuna?

³ Pëdruta wiyaq judío y judïoman tikrashqa nunakunaman pensarishun. Judío karmi, Jehovälla Diosninkuna kanqanta musyayarqan. Hinamampis Escrituras Hebreas nishqanta leirninmi, musyayarqan santo espíritu Diospa kallpan kanqanta, y tsëwan imëkatapis ruranqanta (Gén. 1:2; Jue. 14:5, 6; 1 Sam. 10:6; Sal. 33:6). Pero manam tsëllatatsu musyayänan karqan, sinöqa Jesustam chaskiyänan karqan Dios Akranqan libraqninkunatanö. Tsëmi, Pëdruqa nirqan bautizakuyänampaq “Jesucristupa [...] jutincho”. Kawariramur ichik tiempo pasarinqanllachömi, Jesus apostolninkunata mandarqan qateqnin këta munaqkunata “Dios Yayapa, Tsurin Jesucristupa y Santu Espiritupa jutincho” bautizayänampaq (Mat. 28:19, 20). Yachakurishun, unë tiempochö y kanampis Jesus mandakunqan alläpa preciso kanqanta.

Dios Yayapa shutinchö

4. ¿Imanönataq Jehová rikarqan israelïtakunata?

⁴ Rikanqantsiknöpis, Pedru discursanqanta wiyar bautizakoqkunaqa, Jehoväta sirveq y pë munanqanta ruraqmi kayarqan. Hinamampis sinchikïkäyarqanmi Diospa Leyninkunata wiyakuyänampaq. Y Jehoväpa mandakïninta cumplirmi, karu këkaptimpis Jerusalenman shayämurqan (Hech. 2:5-11). Pero Jehoväqa israelïtakunata manam akrashqa markantanönatsu rikarqan. Tsëmi Leyta wiyakurninllaqa Dioswan alli këta puëdeyarqannatsu (Mat. 21:43; Col. 2:14, NM). Jehoväwan alli këta munarqa mastaraqmi rurayänan karqan.

5, 6. ¿Imatataq rurayarqan judïokuna y mana judïokuna Dioswan alli kawakuyänampaq?

⁵ Manam Jehoväpita witikuyänantsu karqan, Pëlla kawëninkuna qoptin (Hech. 4:24). Tsëran cuentata qokuyarqan, Teytankuna Jehová alläpa kuyakoq y llakipäkoq kanqanta. Pëqa, Akrashqantam kachamushqa karqan nunakunata hutsankunapita libranampaq y perdonanampaq, tsëmi Pedru nirqan: “Israel casta mayïcuna, canan rasonpa caqta cäyicuyë: qamcuna tse Jesusta chiquirnin cruscho [“qeruchö”, NM] wanutsiyanqequitam, Dios churarishqa llapan nunacunapa mandacoqnin y Pepa Acrashqan cananpaq”. Pëdruta wiyakoq nunakunaqa, alläpam agradecikuyänan karqan Teyta Dios llapan ruranqampita (lei Hechos 2:30-36).

⁶ Judïokuna y judïoman tikrashqakuna Diosman witiyänampaqqa, Jesustam Jehová qonqan salvadorninkunatanö chaskiyänan karqan. Tsëmi pëkunaqa hutsankunapita arrepentikuyänan karqan, y wakinkunanäqa Diospa tsurin kanqanta musyëkar o mana musyëkar Jesusta wanutsiyanqampitam arrepentikuyänan karqan. Y “apostolcuna yachatsicuyanqanta cäsucur[nam]” kawakuyarqan (Hech. 2:42). Hinamampis shonqunkunapita patsë Diosman mañakïtapis puëdeyarqannam (Heb. 4:16).

7. ¿Imakunataraq Teyta Diospita yachakuyarqan pëpa shutinchö bautizakuyänampaq?

⁷ Kananqa Bibliata estudiarninmi, tukï markapita atska millón nunakuna Jehoväta reqiyashqa (Isa. 2:2, 3). Wakinqa Diosman manam creiyaqtsu, wakinnam Diosman creirpis kawëninkunachö mana yanapanqanta creiyaq, tsënö karpis cuentata qokuyashqam hapallan Kamakoq kanqanta y Pëllawan alli këta tariyänantapis. Wakinkunanam creiyaq kima Dios hukllëllachö kanqanta, wakinnam imägenkunata adorayaq, tsëpis yachakuyashqam Jehovälla llapan kallpayoq Dios kanqanta y shutintapis reqiyashqam. Këkunata yachakuyanqanmi yanaparqan Jesus mandakunqanta wiyakuyänampaq, y Teyta Diospa shutinchö bautizakuyänampaq.

8. ¿Teyta Diospita imatataq cuentata qokuyarqan hutsapita yachakoqkuna?

⁸ Hina Bibliata estudiaqkunaqa yachakuyashqam llapantsikpis hutsayoq kanqantsikta  (Rom. 5:12). Këta maslla tantearinapaq huk nunaman pensarishun. Ichiklla nanapäkurpis manam qeshyayoq kanqantaqa musyantsu, y mëdicoman mana ëwashqa karninnam sano këkanqanta pensan. Pero huk reqishqa mëdicom imawampis qeshyëkanqanta tarirapun (igualaratsi 1 Corintios 4:4). ¿Tsëqa manatsuraq más alli kaq hampita ashinman? Tsënöllam pasashqa Bibliapita yachakoqkunawampis. Musyayannam imawan “qeshyayanqantapis”, y yachakuyashqanam Diospa yanapakïninwan “kachakäyänanta”. Awmi, Teyta Diosllam hampikoqqa, pëmanmi llapan nunakuna witiyänan (Efe. 4:17-19).

9. ¿Imatataq Jehová rurashqa nunakuna pëwan alli këta tariyänampaq?

⁹ Teyta Diosllapaqna kawanapaq awnikoq y bautizakoqkunaqa, musyantsiknam Teyta Diospa amïgon y kuyakïninchö kanqantsik alläpa alli kanqanta (lei Romanos 5:8). Adanwan Eva hutsata rurayashqa kayaptimpis, Diosqa tukïtam rurashqa nunakuna pëwan alli këta tariyänampaq. Pero tsëpaqqa Tsurin pasëpa hipar wanunantam permitinan karqan. Këta musyëmi yanapamantsik Diosnintsikta más kuyanapaq. Y tsënö kuyanqantsikmi yanapamantsik pëllata gobernamaqnintsiktanö chaskinapaq y wiyakunapaq. ¿Y qamqa Diosta awnishqankinaku servinëkipaq, y bautizakushqankinaku? Rikanqantsiknöpis, tukïtam Dios rurashqa pëta servinapaq.

Tsuripa shutinchö

10, 11. a) ¿Imanötaq Jesusta rikashwan noqantsikrëkur ruranqampita? b) ¿Imatataq rurankiman Jesus noqantsikrëkur wanunqanta musyarir?

¹⁰ Yapë yarpärishun Pëdrupa discursonman. Pëqa yachatsikurqan Jesusta chaskiyänan alläpa preciso kanqantam, y qateqninkunaqa rikätsikuyarqan “Jesucristupa [...] jutincho” bautizakurmi. ¿Imanirtaq unëpis y kanampis kë ruranan alläpa preciso? Jesusta chaskir y shutinchö bautizakurmi rikätsikuntsik noqantsikpaq Jesus llapan ruranqanta agradecikunqantsikta. Qeruchö wanunqampita Jesus imëka bendicionkunata apamunqanman pensarishun. Puntataqa, judïokunatam Ley maldecinqampita librarqan (Gal. 3:13). Pero manam tsëllatsu, sinöqa hutsapita y wanïpitam llapan nunakunata salvashqa (Efe. 2:15, 16; Col. 1:20; 1 Juan 2:1, 2). Salvamänapaqqa tukïtam hiparqan, maqayarqan y wanutsiyarqan. ¿Tsë ruranqanta agradecikunkiku? Jesus ruranqan alläpa valoryoq kanqanta maslla tantearinapaq, unë tiempochö pasakonqanman pensarishun; chunka ishkë watayoq wambram 1912 watachö viajëkan Titanic nishqan barcochö. * Ëwëkanqanchömi tsë hatun barco chocarin yaku hananchö hatun rajuwan, y undikar qallëkun. Tsë wambram salvakuyänampaq kaq bötekunaman lloqëta o lätayta munan, pero mananam sitio kannatsu. Tsënam, tsë bötechö lloqarëkaq nuna, warmimpita despedikurirnin bötepita bajarir lloqarkatsin wambrata. ¿Tsë wambratanö qamta salvariyäshuptikiqa imataraq rurankiman karqan? Shonqupita patsëchi agradecikunkiman karqan. Pero Jesusqa tsëpitapis mastam qampaq rurashqa: mana wanushpa kawakïta tarinëkipaqmi wanurqan.

¹¹ ¿Imanötaq sientikurirqëki Diospa Tsurin qampaqrëkur ruranqanta yachakurirnin? (Lei 2 Corintios 5:14, 15.) Alläpachi agradecikurqëki ¿aw? Tsëchi yanapashurqëki Jehovällata servinëkipaq y kikikipa munënikita haqirinëkipaqpis. Tsuripa shutinchö bautizakïqa rikätsikun Jesus noqantsikrëkur ruramunqanta chaskinqantsikta, y ‘Salbadornintsic canqantam’ (Hech. 5:31). Manaraq bautizakurninqa, manam Jehoväwan amigo karqantsikraqtsu y manam shamoq tiempochö imanö kawanapaqpis alliqa musyarqantsikraqtsu. Pero kananqa Jesuspa wanïninman markäkunqantsikrëkurmi, Diospa amïgonna kantsik (Efe. 2:12, 13). Apóstol Pablu qellqanqannömi: “Puntatam mana allicunata rurar, llutata pensar Diosta chiquirnin, pepita raquicashqa caquicayarqequi. Peru cananqa Dioswan amishtayarqonquim. Dioswan tseno amishtayänequipaqmi Jesucristu wanorqan, Diospa nopancho jutsannaq,  limpiu shonquyoqna, mana shimpipashqa cayänequipaq” (Col. 1:21, 22).

12, 13. Diospa Tsurimpa shutinchö bautizakushqa karqa, a) ¿imanötaq piñatsimaqnintsikta rikashwan?, b) ¿imatataq ruranantsik?

¹² Diospa Tsurimpa shutinchö bautizakushqa karpis, musyantsikmi hutsayoq kënintsik bautizakunqantsikwan mana ushakärenqanta. Këta musyëmi yanapamantsik llapan kawënintsikchö. Maslla tantearinapaq, ¿imatataq huk cristiano ruranman pipis piñatsiptin? Yarpänanmi, kikin y piñatseqnimpis hutsayoq kayanqanta, tsëmi ishkampis perdonta wanayan y yachayänanmi perdonanakïta (Mar. 11:25). Jesusmi këta yachatsikurqan, huk patrón huk esclävonta hoqta chunka millón (chunka waranqa talento) denariokunata haqan kanqanta perdonëkonqanwan. Pero kë esclävoqa manam perdonëta munarqantsu huk esclavo mayinta ichiklla (huk pachak denariokunalla) haqan këkaptimpis. Kë yachatsikïwanqa Jesus këtam nikarqan: cristiano mayintsikta mana perdonashqaqa manam Jehoväpis perdonamäshuntsu (Mat. 18:23-35). Tsuripa shutinchö bautizakoqqa manam Mandakoqtanöllatsu chaskinan, sinöqa llapan ruranqanta qatinampaqmi sinchikunan, y llapan yachatsikunqanta qatirmi, perdonakoq kanan (1 Ped. 2:21; 1 Juan 2:6).

¹³ Hutsayoq karnimpis Jesus ruranqanta qatinapaq tïrarqa, cumplishunmi Diosllatana servinapaq awninqantsikta. Tsëmi waran waran sinchikunantsik mana alli rurënintsikta haqirïkur, más alli nuna tikranapaq (lei Efesios 4:20-24). Huk amïgota kuyarnenqa, alli rurëninta y imanöpis kanqantam qatita tïrantsik. Y huk amïgopitapis yachakïkarqa, ¿manatsuraq Jesuspita yachakïta y ruranqanta qatita masraq sinchikushwan?

14. ¿Imanötaq rikätsikuntsik Jesuspa gobernacionninta respetanqantsikta?

¹⁴ Hina Tsuripa shutinchö bautizakunqantsikqa rikätsikun, ‘imecatapis pepa mandaduncho canampaq’ y “llapan creyicoqcunapa mandacoqnin cananpaq” Dios churanqanta respetanqantsiktam (Efe. 1:22). Tsëmi, respetanantsik Jesus qateqninkunata pushanampaq churanqan nunakunata. Llapan congregacionmanmi anciänokunata churashqa, hutsayoq karnimpis pëkunaqa rikätsikuyanmi poqu cristiano kayanqanta. Y pëkunataqa churashqa, ‘creyicoqcunapa marcäquinincuna mas y mas cananpaq imecanopapis sirwir yachatsiyanampaqmi’ (Efe. 4:11, 12). Pipis hutsaman ishkiriptinqa, kikin Jesusmi Gobernaq këninwan imë karpis o imanöpis altsamunqa. ¿Tsënö ruramunanman markäkuntsikku?

15. ¿Bautizakoqkuna ima bendicionta chaskiyänampaqtaq Biblia willakun?

¹⁵ Këchö yachakunqantsiknöpis, wakinqa Diosllatana serviyänampaq manaran awnikuyanraqtsu ni bautizakuyanraqtsu. Tsëta manaraq rurashqa kaptikiqa, itsa yachakunqantsikkuna yanapashunki Diospa Tsurimpa shutinchö bautizakï alläpa preciso kanqanta musyanëkipaq. Tsënöpam rikätsikunki Jesus ruranqanta alläpa agredecikunqëkita. Y Diosta servinëkipaq churapakarqa, atska bendicionkunatam chaskinki (lei Juan 10:9-11).

Santo espïritupa shutinchö

16, 17. ¿Imatataq musyanan santo espïritupa shutinchö bautizakoqkuna?

¹⁶ ¿Santo espïritupa shutinchö bautizakoqkunaqa imatataq musyayänan? Hana kaq pärrafochö yachakunqantsiknöpis Pentecostés fiestachö apóstol Pedru discursaqta wiyaqkunaqa,  musyayarqanmi santo espíritu ima kanqantapis. Rikarëkäyaptinmi, Pëdruwan wakin discïpulonkuna “Santu Espiritupa poderninchona ticrariyarqan, y tuquilaya idiomata parlarmi qallecuyarqan segun Santu Espiritu parlatsenqanmanno” (Hech. 2:4, 8). Wakinqa niyanmi, “Santu Espiritupa jutincho” nirqa, huk nunapaqmi parlëkan nishpa, pero ¿rasumpaku tsënö niyanqan? Manam. Maslla tantearinapaq, ima obratapis rikarqa consëjom rurëkätsin nintsikmi, y consëjoqa manam huk nunatsu, tsënöllam santo espïritupis. Santo espïritupa shutinchö bautizakoqqa, musyanmi santo espíritu Diosnö mana kanqanta, sinöqa Dios munëninta ruranampaq kallpan kanqanta.

¹⁷ Santo espïritupitaqa yachakushqantsik Bibliata estudiarninmi. Yachakushqantsikmi, Diosnintsik santo espïritunwan Bibliata qellqaqkunata yanapanqanta (2 Tim. 3:16). Hina Jesusqa nirqanmi: ‘Mañacoqcunataqa Santu Espiritunta Dios Yaya qoyconqam’, tsëtam Bibliapita más yachakunqantsikmannö rikantsik (Luc. 11:13). Y kawënintsikchöpis santo espíritu yanapamarquntsiknachi. Pero santo espïritupa shutinchö manaraq bautizakushqa karqa, yarpë, bautizakurqa Jesus ninqannömi santo espïrituta y atska bendicionkunatapis chaskinki.

18. ¿Ima bendicionkunatataq chaskiyan santo espïritupa shutinchö bautizakoqkunaqa?

¹⁸ Alleq clärom këkan unë tiempochönölla kanampis Diosnintsik santo espïritunwan markanta pushanqan. Hina tsë espïrituqa yanapamantsikmi cada hunaq kawënintsikchöpis. Shutinchö bautizakushqa karmi, kawënintsikchö yanapamanqantsikta musyanantsik, alläpa agradecikunantsik y pushamänata haqinantsik. Qateqnin kaq artïculochömi yachakushun Diosta servinapaq awninqantsikta cumplinapaq, y santo espíritu imanö yanapamänapaq kaqtapis.

[Päginapa ura kuchunchö willakï]

¿Yarpankiku?

• ¿Dios imanö kanqantataq musyayänan Teytapa shutinchö bautizakoqkuna?

• ¿Jesus imanö kanqantataq musyayänan Tsuripa shutinchö bautizakoqkuna?

• ¿Imanötaq kawanantsik Teytapa y Tsuripa shutinchö bautizakunqantsikta alläpa agradecikurqa?

• ¿Imatataq musyayänan santo espïritupa shutinchö bautizakoqkuna?

[Yachakunapaq kaqpa tapukïninkuna]

[8 kaq päginachö dibüjukuna]

¿Imanönataq Teyta Dios rikar qallëkurqan mushoq discïpulokunata 33 wata Pentecostespita patsë?

[Pikunapa kanqan]

Con la autorización del Museo de Israel (Jerusalén)