Teki dopu na ini a nen fu a Tata, a Manpikin, nanga a santa yeye
Teki dopu na ini a nen fu a Tata, a Manpikin, nanga a santa yeye
’Fu dati ede, go èn meki disipel, èn dopu den na ini a nen fu a Tata, fu a Manpikin, èn fu a santa yeye.’—MAT. 28:19.
1, 2. (a) San ben pasa na ini Yerusalem na a Pinksterfesa fu a yari 33? (b) San meki taki furu fu den sma di ben de drape ben wani teki dopu?
TAPU a Pinksterfesa fu a yari 33, Yerusalem ben lai nanga ipi-ipi sma di ben komoto fu furu difrenti kondre. Na a dei dati, wan prenspari fesa ben o hori, èn furu fu den sma di ben kon drape ben o teki prati na a fesa dati. Ma wan sani pasa di sma no ben fruwakti, èn baka dati na apostel Petrus hori wan tumusi moi taki di ben abi furu krakti tapu den sma di ben de drape. Sowan 3000 Dyu nanga sma di ben teki a Dyu bribi ben lobi den sani di Petrus ben taki, èn fu dati ede den sori berow, èn den teki dopu na ini watra. Na so den tron memre fu a nyun Kresten gemeente di ben seti (Tori. 2:41). A no de fu taki, dati bigi dyugudyugu ben de na ini Yerusalem, di so furu sma ben e teki dopu na den difrenti presi pe watra ben de!
2 San meki taki so furu sma ben e teki dopu? Moro fruku a dei dati, ’wan babari ben komoto fu hemel, èn a ben de leki te wan tranga winti ben e wai’. Na ini a sodrokamra fu na oso, a santa yeye kon na tapu sowan 120 fu den disipel fu Yesus. Baka dati, man nanga uma di ben abi lespeki gi Gado, kon na wán, èn a naki den ati di den yere fa den disipel disi ben e „taki na ini difrenti tongo”. Di den arki san Petrus ben taki, èn di den yere sosrefi den prenspari sani di a ben taki fu a dede fu Yesus, dan „den konsensi fon den trutru”. San den ben musu du? Petrus piki den: „Un musu abi berow, èn ibriwan fu unu musu dopu na ini a nen fu Yesus Krestes . . . ; na so unu sa kisi a santa yeye leki wan fri presenti.”—Tori. 2:1-4, 36-38.
3. Na a dei fu a Pinksterfesa, san den Dyu nanga sma di ben teki a Dyu bribi, ben musu du baka di den ben sori berow?
3 Prakseri a situwâsi fu den sma di ben yere san Petrus ben taki. Den sma disi ben de Dyu nanga trakondre sma di ben teki a Dyu bribi. Den ben teki Yehovah kaba leki a Gado fu den. Èn nanga yepi fu den Hebrew Buku fu Bijbel, den ben kon sabi fu a santa yeye, noso a krakti di Gado gebroiki fu meki hemel nanga grontapu, èn fu du tra sani (Gen. 1:2; Krut. 14:5, 6; 1 Sam. 10:6; Ps. 33:6). Ma den ben abi moro fanowdu. Den ben musu kon sabi a Mesias, Yesus, moro bun, fu di Gado ben o gebroiki en fu gi den frulusu. Dati meki Petrus sori den krin taki den ben musu teki „dopu na ini a nen fu Yesus Krestes”. Wan tu dei na fesi, Yesus, di ben kisi wan opobaka, gi Petrus nanga trawan a komando fu dopu sma „na ini a nen fu a Tata, fu a Manpikin, èn fu a santa yeye” (Mat. 28:19, 20). Dati ben de wan tumusi prenspari sani na ini a fosi yarihondro, èn na ini a ten disi a de so ete. San dati ben wani taki?
Dopu na ini a nen fu a Tata
4. Sortu kenki ben kon gi sma di ben abi wan matifasi nanga Yehovah?
4 Soleki fa wi ben si kaba, dan den sma di ben arki Petrus ben de anbegiman fu Yehovah, èn den ben abi wan matifasi kaba nanga en. Den ben pruberi fu hori densrefi na a Wet fu en, èn na fu dati ede den sma fu tra kondre ben kon na Yerusalem (Tori. 2:5-11). Ma now Gado ben tyari wan bigi kenki kon na ini a fasi fa a ben o handri nanga libisma. A no ben wani den Dyu moro leki a spesrutu pipel fu en, èn den no ben abi fu hori densrefi moro na a Wet fu man de sma di a feni bun (Mat. 21:43; Kol. 2:14). Efu den sma disi ben wani tan abi wan matifasi nanga Yehovah, dan den ben musu du ete wan sani.
5, 6. San furu Dyu èn sosrefi sma di ben teki a Dyu bribi ben du fu man abi wan matifasi nanga Gado?
5 A no de fu taki, dati den sma disi no ben musu drai baka gi Yehovah, a Sma di ben gi den libi (Tori. 4:24). Nôno, den sma di ben gi yesi na den sani di Petrus ben taki, now ben kan si moro krin taki Yehovah ben de wan lobi-ati Papa. A ben seni a Mesias kon fu frulusu den, èn a ben de klariklari fu gi pardon na den wan di Petrus ben kan taigi a sani disi: „Meki a heri oso fu Israel sabi krin taki Gado meki a Yesus disi di unu spikri na wan postu, tron Masra èn sosrefi Krestes.” Fu taki en leti, den wan di ben gi yesi na den wortu fu Petrus, ben abi moro reide now fu de nanga tangi gi san a Tata ben du gi ala sma di ben wani abi wan matifasi nanga en!—Leisi Tori fu den Apostel 2:30-36.
6 Iya, den Dyu nanga den sma di ben teki a Dyu bribi, ben kan si now taki te den ben abi wan matifasi nanga Yehovah, dan dati ben wani taki dati den ben e si en leki a Sma di frulusu den nanga yepi fu Yesus. Sobun, yu kan frustan fu san ede den ben e sori berow gi den sondu fu den. Den ben sori berow tu fu di den no ben poti bribi na ini Yesus, èn fu di leki grupu den ben de frantwortu gi a dede fu en. Èn wi kan frustan tu taki na ini den dei baka a Pinksterfesa, „den ben e tan poti prakseri na den leri fu den apostel” (Tori. 2:42). Den ben kan ’go na fesi a kownusturu fu Gado di ben e sori den no-frudini bun-ati, èn den ben kan taki nanga en sondro fu frede’.—Hebr. 4:16.
7. Fa a du kon taki furu sma na ini a ten disi kenki a fasi fa den e si Gado èn e teki dopu na ini a nen fu a Tata?
7 Na ini a ten disi, milyunmilyun sma fu difrenti kondre nanga kulturu kon sabi den tru tori fu Yehovah nanga yepi fu Bijbel (Yes. 2, 2, 3). Fosi, sonwan fu den sma dati no ben e bribi na ini Gado. Trawan fu den ben e bribi taki Gado de, ma taki a no ben e poti prakseri na den sani di a meki. Ma now den kon abi na overtoigi taki wan Mekiman de èn taki den kan abi wan matifasi nanga en. Trawan ben e anbegi wan gado di den ben e si leki dri gado di de wán, noso den ben e anbegi difrenti falsi gado. Now den kon sabi taki Yehovah wawan na a almakti Gado, èn den e kari en na en nen. A sani disi fiti fu di Yesus ben taki dati den disipel fu en musu teki dopu na ini a nen fu a Tata.
8. San den sma di no ben sabi fu a sondu fu Adam, musu kon frustan fu a Tata?
8 Sma kon sabi tu taki den kisi sondu fu Adam (Rom. 5:12). Disi ben de wan nyun sani di den ben musu poti bribi na ini. Wi kan agersi den sma disi nanga wan siki man di no sabi taki a siki. Kande a ben abi pen son leisi noso kande tra sani ben e du en. Ma fu di a no ben sabi seiker taki a abi wan siki, meki a ben kan denki taki a ben de gosontu. Ma sani ben de tra fasi (Luku 1 Kor. 4:4). Fa a ben o de te a ben sabi seiker taki a siki? A ben o bun te a ben o suku wan bun dresi gi a siki fu en, a no so? Na so a de tu taki di furu sma kon sabi san Bijbel e taki fu a sondu, noso a „siki” di libisma kisi, dan den poti bribi na den sani dati èn den kon frustan taki Gado abi a „dresi” gi a siki dati. Iya, ala sma di no sabi a Tata, musu suku yepi na a Sma di kan „dresi” den.—Ef. 4:17-19.
9. San Yehovah du so taki libisma kan kon abi wan matifasi nanga en?
9 Efu yu gi yusrefi abra kaba na Yehovah Gado èn yu dopu leki Kresten, dan yu sabi sortu bigi grani a de fu abi wan matifasi nanga en. Yu kan frustan now taki Yehovah na wan lobi-ati Tata (Leisi Romesma 5:8). Aladi Adam nanga Eva ben sondu teige Gado, toku Gado du wan sani fu sorgu taki den bakapikin fu den, sosrefi wi, kan kon abi wan bun matifasi nanga En. Fu man du dati, Gado ben musu si fa sma pina en lobi-ati Manpikin èn fa sma kiri en. A sani disi ben musu fu hati Gado. Fu di wi sabi dati, meki wi wani teki a tiri fu Gado èn wi wani gi yesi na den komando fu en fu di wi lobi en, a no so? Efu yu no du dati ete, dan yu abi nofo reide fu gi yusrefi abra na Gado èn teki dopu.
Dopu na ini a nen fu a Manpikin
10, 11. (a) O furu warderi yu abi gi den sani di Yesus du gi yu? (b) Fa yu feni en taki Yesus dede gi yu leki wan frulusu-ofrandi?
10 Ma prakseri baka san Petrus ben taigi den sma di ben arki en. A ben sori den krin taki den ben musu poti bribi na ini Yesus fu man teki dopu „na ini a nen . . . fu a Manpikin”. Fu san ede a sani disi ben prenspari fosi èn fu san ede a prenspari na ini a ten disi? We, te sma e poti bribi na ini Yesus èn te den e teki dopu na ini a nen fu en, dan dati e sori taki den kon frustan taki den man abi wan matifasi nanga a Mekiman, nanga yepi fu a Manpikin disi. Yesus ben musu dede na wan pina-postu fu man puru a fluku fu a Wet tapu den Dyu. Ma a dede fu en ben o tyari moro bigi wini kon gi libisma (Gal. 3:13). A dede fu Yesus ben de a frulusu-ofrandi di ala libisma ben abi fanowdu (Ef. 2:15, 16; Kol. 1:20; 1 Yoh. 2:1, 2). Dati meki Yesus horidoro di sma du ogri nanga en, di sma kosi en, di den fon en, èn a horidoro tu teleki den kiri en. Yu abi warderi gi a frulusu-ofrandi fu en? Kon meki wi taki dati yu ben de wan boi fu 12 yari èn taki yu ben de na ini a sipi Titanic, di sungu na ini 1912, fu di a naki wan ijsbergi. Yu e pruberi fu dyompo go na ini wan pikin boto, ma a boto disi furu. Ne, wan man di de na ini a boto disi, e bosi en wefi èn a e dyompo go baka na ini a sipi èn a poti yu na ini a pikin boto. Fa yu ben o feni a sani dati? A no de fu taki, dati yu ben o de nanga tangi trutru! Yu kan frustan fa wan boi di ben ondrofeni a sani disi trutru, ben firi. * Ma Yesus du moro leki dati gi yu. A dede so taki yu kan kisi têgo libi.
11 Fa yu ben feni en di yu kon sabi san a Manpikin fu Gado du gi yu? (Leisi 2 Korentesma 5:14, 15.) Kande yu ben de nanga bigi tangi. A sani disi yepi yu fu gi yusrefi abra na Gado èn fu ’no libi gi yusrefi moro, ma gi a sma di dede gi yu èn di opo baka’. Te yu teki dopu na ini a nen fu a Manpikin, dan dati wani taki dati yu frustan san Yesus du gi yu èn taki yu si en leki a „Moro Prenspari Fesiman” di sa meki wi kisi libi (Tori. 3:15; 5:31). Fosi, yu no ben abi wan matifasi nanga a Mekiman èn fu taki en leti yu no ben abi wan trutru howpu. Ma fu di yu poti bribi na ini a brudu fu Yesus Krestes, èn yu teki dopu, meki yu abi wan bun matifasi now nanga a Tata (Ef. 2:12, 13). Na apostel Paulus ben skrifi: „Wan ten unu ben de freimdesma èn sosrefi feanti fu Gado fu di unu ben prakseri soso ogri, ma now Gado meki unu kon bun baka nanga en, nanga yepi fu a libisma skin fu [Yesus] di ben dede, so taki unu kan kon na en fesi leki santa sma di krin èn di de sondro fowtu.”—Kol. 1:21, 22.
12, 13. (a) Fu di yu dopu na ini a nen fu a Manpikin, dan san yu o du te wan sma du wan hati sani nanga yu? (b) Fu di yu na wan Kresten di dopu na ini a nen fu Yesus, dan san yu musu du?
12 Aladi yu dopu na ini a nen fu a Manpikin, yu sabi taki yu na wan sondusma di abi swakifasi. A de wan yepi te yu e hori a sani dati na prakseri ibri dei. Fu eksempre, efu wan sma du wan hati sani nanga yu, dan yu e hori na prakseri taki un ala tu na sondusma? Un ala tu musu kisi pardon fu Gado, èn un ala tu musu de klariklari fu gi trawan pardon (Mark. 11:25). Fu sori taki a sani disi prenspari, dan Yesus fruteri na agersitori disi: Wan srafu ben abi wan paiman fu 60 milyun dinari na en masra. Ma a masra taigi en taki a no ben abi fu pai en moro. Bakaten, a srafu disi miti wan tra srafu di ben abi wan paiman fu 100 dinari na en. Ma now, a ben de nomonomo taki a srafu dati ben musu pai en. Yesus taki moro fara dati Yehovah no sa gi pardon na a sma di no wani gi en brada pardon (Mat. 18:23-35). Iya, te wan sma dopu na ini a nen fu a Manpikin, dan dati wani taki dati a sma e teki a tiri fu Yesus èn a e du muiti fu teki na eksempre fu en. Disi wani taki tu dati a de klariklari fu gi yesi na den leri fu Yesus èn fu gi trawan pardon.—1 Petr. 2:21; 1 Yoh. 2:6.
13 Fu di yu na wan sondu libisma, meki yu no man teki na eksempre fu Yesus dorodoro. Ma fu di yu gi yusrefi abra na Gado nanga yu heri ati, meki yu wani du ala san yu man fu teki na eksempre fu Yesus. Disi wani taki dati yu e tan meki muiti fu kenki a fasi fa yu ben de fosi so taki yu kan tron wan nyun sma. (Leisi Efeisesma 4:20-24.) Te yu abi lespeki gi wan mati, dan yu sa pruberi fu leri fu en, èn yu sa pruberi tu fu sori den srefi fasi fu en. Na so a de tu, taki yu musu leri fu Krestes, èn yu musu teki na eksempre fu en.
14. Fa yu kan sori taki yu e teki a tiri fu Yesus, di de Kownu na hemel?
14 Ete wan tra fasi de fa yu kan sori taki yu e frustan san a wani taki fu dopu na ini a nen fu a Manpikin. Gado „poti ala sani na ondro Krestes, èn a meki a tron edeman fu ala sani gi a bun fu a gemeente” (Ef. 1:22). Sobun, yu musu sori lespeki gi a fasi fa Yesus e tiri den wan di gi densrefi abra na Yehovah. Krestes e gebroiki sondu libisma fu tiri a gemeente, spesrutu den lepi brada di e dini leki owruman. Den man disi abi a frantwortu fu „ poti den santawan na tapu a reti pasi baka, . . . èn fu meki a skin fu Krestes kon tranga” (Ef. 4:11, 12). Srefi efu wan sondu libisma meki wan fowtu, toku Yesus di de Kownu fu a hemel Kownukondre man krutu na afersi dati na wan ten èn na wan fasi di a feni bun. Yu e bribi dati?
15. Efu yu no dopu ete, dan sortu blesi yu sa kisi baka te yu dopu?
15 Soleki fa wi ben si kaba, dan son sma no gi densrefi abra ete na Yehovah, èn den no teki dopu. Efu yu na wan fu den sma disi, dan meki a de so taki den sani di skrifi na ini na artikel disi yepi yu fu poti bribi na ini a Manpikin. Na so yu o sori taki yu koni èn taki yu de nanga tangi gi den sani di Yesus du gi yu. Te yu dopu na ini a nen fu a Manpikin, dan yu sa kisi bigi blesi.—Leisi Yohanes 10:9-11.
Dopu na ini a nen fu a santa yeye
16, 17. Te yu dopu na ini a nen fu a santa yeye, dan san dati wani taki?
16 San a wani taki fu dopu na ini a nen fu a santa yeye? Soleki fa wi si kaba, dan den wan di ben e arki Petrus na a dei fu a Pinksterfesa, ben sabi fu a santa yeye. Fu taki en leti, den ben kan si nanga den eigi ai taki Gado ben e tan gebroiki a santa yeye. Petrus ben de wan fu den sma di ’santa yeye ben kon na den tapu, èn di ben bigin taki na ini difrenti tongo’ (Tori. 2:4, 8). A no ala ten den wortu „na ini a nen fu” abi fu du nanga a nen fu wan sma. Na ini a ten disi, sma e du furu sani „na ini a nen fu lanti”, aladi lanti no de wan libisma. Na lanti e gi sma a komando fu du den sani dati. Na so a de tu taki, te wan sma teki dopu na ini a nen fu a santa yeye, dan a sma dati e frustan taki a santa yeye no de wan sma, ma na a krakti di Yehovah e gebroiki fu du a wani fu en. Èn wan sma di teki dopu na a fasi dati, sabi taki Gado e gebroiki a santa yeye fu du san a abi na prakseri.
17 Di yu studeri Bijbel, dan yu kon sabi fu a santa yeye, a no so? Fu eksempre, yu kon frustan taki Bijbel skrifi nanga yepi fu santa yeye (2 Tim. 3:16). Di yu bigin go na fesi na ini na anbegi, dan yu kon frustan moro krin taki ’a Tata di de na hemel e gi santa yeye na den sma di e aksi en’, èn a sa gi yu dati tu (Luk. 11:13). Kande yu ondrofeni fa a santa yeye yepi yu na ini yu libi. Ma efu yu no dopu ete na ini a nen fu a santa yeye, dan hori na prakseri taki Yesus ben gi a dyaranti taki en Tata e gi sma En santa yeye. Dati wani taki dati te Gado sa gi yu a yeye dati, dan yu sa kisi trutru blesi.
18. Sortu blesi den wan sa kisi di dopu na ini a nen fu a santa yeye?
18 A de krin taki na ini a ten disi, Yehovah e tiri a Kresten gemeente tu nanga yepi fu en santa yeye. A yeye dati e yepi ibriwan fu wi tu na ini wi aladei libi. A dopu di wi dopu na ini a nen fu a santa yeye, wani taki dati wi e frustan sortu krakti a abi tapu wi libi, èn wi e wroko makandra nanga a yeye dati fu di wi de nanga tangi. Ma kande son sma e aksi densrefi fa den kan tan gi yesi na Yehovah soleki fa den ben pramisi en. Kande den e aksi densrefi tu fa a santa yeye e yepi wi fu du dati. Wi sa poti prakseri na den tori disi na ini a tra artikel.
[Futuwortu]
^ paragraaf 10 Luku na Ontwaakt! fu 22 februari 1982 bladzijde 3-8.
Yu e memre disi ete?
• San a wani taki te yu dopu na ini a nen fu a Tata?
• San a wani taki fu dopu na ini a nen fu a Manpikin?
• Fa yu kan sori taki yu e frustan san a wani taki fu dopu na ini a nen fu a Tata èn fu a Manpikin?
• San a wani taki fu dopu na ini a nen fu a santa yeye?
[Aksi fu a tori disi]
[Prenki na tapu bladzijde 10]
Sortu matifasi den nyun disipel kon abi nanga a Tata, baka a Pinksterfesa fu a yari 33?
[Sma di abi a reti fu a prenki]
By permission of the Israel Museum, Jerusalem