Bapetizohia i te iˈoa o vai ma e o te aha?
Bapetizohia i te iˈoa o vai ma e o te aha?
‘E teie nei, e haere outou e faariro i te mau fenua atoa ei pǐpǐ, a bapetizo atu ai ia ratou i roto i te iˈoa o te Metua, o te Tamaiti, e o te varua maitai.’—MAT. 28:19.
1, 2. (a) Eaha tei tupu i Ierusalema i te Penetekose 33? (b) No te aha e rave rahi i bapetizo ai ia ratou?
MEA taata roa i Ierusalema no te mau fenua rau mai. I te Penetekose 33, te tupu ra te hoê oroa rahi e te apiti ra e rave rahi ratere. Ua tupu râ te hoê ohipa taa ê, e horoa ˈtura te aposetolo Petero i ta ˈna oreroraa parau mana. Ei faahopearaa maere, ua putapû e 3 000 ati Iuda e peroseluto i ta ˈna mau parau, ua tatarahapa, e ua bapetizo ia ratou i roto i te pape. Ua amuihia ˈtura ratou i te amuiraa Kerisetiano haamau-apî-hia. (Ohi. 2:41) Ua atutu te parau o te bapetizoraa e rave rahi taata i roto i te mau apoo pape i Ierusalema.
2 No te aha e rave rahi i bapetizo ai ia ratou? Na mua ˈtu i taua mahana ra, “te haruru maira no nia mai i te raˈi mai te mataˈi rahi uˈana.” I roto i te piha i nia, 120 pǐpǐ a Iesu tei î i te varua maitai, aore ra moˈa. I muri iho, ua putuputu maira te mau tane e vahine faaroo e ua maere i to te mau pǐpǐ ‘parauraa i te parau ěê.’ I to ratou faarooraa i ta Petero parau, e ta ˈna mau tatararaa papu no nia i te pohe o Iesu, e rave rahi tei ‘putapû te aau.’ Eaha ïa ta ratou e rave? Ua pahono Petero: ‘E tatarahapa, e ia bapetizohia outou atoa i roto i te iˈoa o Iesu Mesia, e horoahia mai ïa te varua maitai ia outou.’—Ohi. 2:1-4, 36-38.
3. I te Penetekose, eaha tei titauhia ia rave te mau ati Iuda e peroseluto tatarahapa?
3 A hiˈo na i te haapaoraa a taua mau ati Iuda e peroseluto ra tei faaroo ia Petero. Ua farii ê na ratou e o Iehova to ratou Atua. E ua ite ratou i roto i te mau Papai Hebera e e puai ohipa o te Atua te varua moˈa ta ˈna i faaohipa i roto i te poieteraa e i muri aˈe. (Gen. 1:2; Tav. 14:5, 6; Sam. 1, 10:6; Sal. 33:6) Eita râ e navai. Mea faufaa roa ia taa e ia farii ratou i ta te Atua ravea faaora, te Mesia ra o Iesu. No reira Petero i haapapu ai e ia ‘bapetizohia ratou i te iˈoa o Iesu Mesia’ e tia ˈi. Maa mahana na mua ˈtu, ua faaue Iesu, tei faatia-faahou-hia mai, ia Petero e te tahi atu e bapetizo i te taata ‘i te iˈoa o te Metua, o te Tamaiti, e o te varua maitai,’ aore ra moˈa. (Mat. 28:19, 20) E auraa faufaa roa to te reira i te senekele matamua e tae roa mai i teie mahana. Eaha te reira?
I te iˈoa o te Metua
4. Eaha te tauiraa i tupu no nia i to te taata taairaa e o Iehova?
4 Mai tei faahitihia ˈtu, ua haamori ê na te feia tei putapû i te oreroraa parau a Petero ia Iehova e ua faatupu ê na i te taairaa e o ˈna. Ua tutava ratou i te pee i ta ˈna Ture, no reira hoi ratou i haere ai i Ierusalema mai te fenua rau mai. (Ohi. 2:5-11) Ua taui râ te Atua i ta ˈna huru raveraa e te taata. Ua faarue oia i te mau ati Iuda ei nunaa taa ê no ˈna. E ere atura te auraroraa i te Ture i te ravea e noaa ˈi ta ˈna farii maitai. (Mat. 21:43; Kol. 2:14) Ia atuatu ratou i taua taairaa ra e o Iehova, e titauhia ïa te tahi atu mea.
5, 6. Eaha ta te ati Iuda e peroseluto e rave rahi o te senekele matamua i rave no te faatupu i te taairaa e te Atua?
5 E ere roa ˈtu ïa i te faarueraa ia Iehova, te Tumu o to ratou ora. (Ohi. 4:24) E ere, ua nehenehe te feia tei farii i ta Petero faataaraa e ite i teie nei e e Metua hamani maitai o Iehova. Ua tono oia i te Mesia no te faaora ia ratou e ua ineine i te faaore i te hara a te feia ta Petero i parau atu: “Ia ite atoa te fetii o Iseraela e, ua faariro-mau-hia oia e te Atua ei Fatu e ei Mesia, o Iesu mau nei â ta outou i [“rî i nia i te pou,” MN].” (Ohi. 2:36) E tumu rahi atu â e mauruuru ai te feia e faaohipa i ta Petero parau i te Metua no ta ˈna i rave no te feia atoa e hinaaro e faatupu i te taairaa e o ˈna!—Ohi. 2:32-35.
6 Ua ite mau taua mau ati Iuda e peroseluto ra e e titauhia i teie nei ia farii ratou i te Atua ei Faaora maoti Iesu no te faatupu i te taairaa e o Iehova. No reira ïa ratou i tatarahapa ˈi i te hara ta ratou i rave ma te ite aore ra aita, e hopoia ta ratou i te haapoheraa ia Iesu. E taa-atoa-hia ïa e i to muri iho mau mahana, ua “mau papu maite atura ratou i ta te mau aposetolo i haapii.” (Ohi. 2:42) Ua nehenehe e ua hinaaro ratou e ‘faafatata noa ˈtu i te terono o te aroha mau.’—Heb. 4:16.
7. Mea nafea e rave rahi i taui ai i to ratou manaˈo no nia i te Atua e i bapetizo ai i te iˈoa o te Metua?
7 I teie mahana, ua haapii e mirioni taata oraraa rau i te parau mau no nia ia Iehova i roto i te Bibilia. (Isa. 2:2, 3) E feia atua ore vetahi e te tahi atu, te tiaturi ra ïa i te hoê Atua aita e anaanatae ra i te huitaata. I muri iho, ua papu ia ratou e te vai ra te hoê Atua Poiete a nehenehe ai ratou e faatupu i te taairaa e o ˈna. I haamori na te tahi atu i te hoê atua toru tahi aore ra i te idolo. I teie nei, ua haapii ratou e o Iehova anaˈe te Atua mana hope, e e paraparau ratou ia ˈna ma te faahiti i to ˈna iˈoa. Ua tuea maite te reira i ta Iesu i parau i ta ˈna mau pǐpǐ ia bapetizo i te iˈoa o te Metua.
8. Ia taa te feia ite ore i te hara a Adamu i te aha no nia i te Metua?
8 Ua haapii atoa ratou e ua raeahia ratou e te hara a Adamu. (Roma 5:12) Ia farii ïa ratou i teie manaˈo apî. E nehenehe ratou e faaauhia i te hoê taata maˈi tei ore i ite e e maˈi to ˈna. E mauiui paha oia i te tahi taime. No te mea râ aita oia i rave i te tahi hiˈopoaraa, ua manaˈo paha oia e mea maitai o ˈna. Mea papu râ e e ere roa ˈtu. (A hiˈo i te Korinetia 1, 4:4.) E ia faaite mai te hiˈopoaraa i to ˈna maˈi, e ere anei ïa i te mea paari ia imi e ia farii oia i te hoê rapaauraa maitai, papu, e te matauhia? Oia atoa, ua farii e rave rahi i te “hiˈopoaraa” a te Bibilia i to ratou haapiiraa i te parau mau no nia i te hara i tutuuhia mai e ua taa ia ratou e na te Atua e “faaora” ia ratou. E titauhia ia fariu te feia atoa tei atea ê i te Metua o te nehenehe e “faaora” ia ratou.—Eph. 4:17-19.
9. Eaha ta Iehova i rave e nehenehe ai e faatupu i te taairaa e o ˈna?
9 Mai te peu e ua pûpû ê na oe i to oe oraraa i te Atua ra o Iehova e ua riro oe ei Kerisetiano bapetizohia, ua ite oe e mea faahiahia mau te faatupuraa i te taairaa e o ˈna. Ua taa ia oe i teie nei e e Metua î i te here o Iehova. (A taio i te Roma 5:8.) Noa ˈtu e ua hara Adamu raua Eva, ua imi te Atua i te ravea e nehenehe ai to raua huaai, tatou atoa, e faatupu i te taairaa maitai e o ˈna. Ua mauiui râ oia i te iteraa i ta ˈna Tamaiti here rahi i te haamauiuiraahia e te haapoheraahia. E tauturu te iteraa i te reira ia tatou ia farii i te mana faatere o te Atua e ia auraro i ta ˈna mau faaueraa ma te here, e ere anei? Mai te peu e aitâ oe i na reira ˈtura, e tano ïa ia pûpû oe ia oe i te Atua e ia bapetizohia.
I te iˈoa o te Tamaiti
10, 11. (a) Mai te aha te rahi o ta oe tarahu ia Iesu? (b) Mai te aha to oe huru i to Iesu poheraa ei hoo?
10 A manaˈo â i ta Petero i parau i te nahoa taata. Ua haafaufaa oia i te fariiraa ia Iesu, tei taai-roa-hia i te bapetizoraa ‘i te iˈoa o te Tamaiti.’ No te aha e mea faufaa roa ˈi te reira i tera tau e i teie mahana? Te auraa e farii ia Iesu e e bapetizo i to ˈna iˈoa, e farii ïa i to ˈna tiaraa i roto i to tatou taairaa e te Atua Poiete. Ia rîhia Iesu i nia i te pou haamauiuiraa no te faaore i te faaino a te Ture i nia i te mau ati Iuda e tia ˈi. E haamaitairaa rahi aˈe râ to to ˈna pohe. (Gal. 3:13) Ua horoa oia i te tusia taraehara hinaarohia e te huitaata. (Eph. 2:15, 16; Kol. 1:20; Ioa. 1, 2:1, 2) No reira Iesu i faaoromai ai i te parau-tia ore, te faaino, te haamauiuiraa, e te pohe atoa. Mai te aha te rahi o to oe mauruuru no to ˈna tusia? Ei hiˈoraa, tei nia te hoê tamaiti 12 matahiti i te pahi Titanic, tei û i nia i te hoê pape paari painu e tei tomo i 1912. Ua tamata oia i te ouˈa i nia i te hoê poti, ua î râ i te taata. I reira, ua apa te hoê tane i nia i te poti i ta ˈna vahine, ua ouˈa maira i nia i te tahua o te pahi, e ua tuu ia ˈna i roto i te poti. Ahiri o oe tera, mai te aha to oe huru? E mauruuru roa ïa oe ia ˈna! Ua taa ia oe te huru o teie tamaiti tei û mau i teie ati. * Ua hau atu râ ta Iesu i rave no oe. Ua pohe oia ia noaa ia oe te ora mure ore.
11 Mai te aha to oe huru i to oe iteraa i ta te Tamaiti a te Atua i rave no oe? (A taio i te Korinetia 2, 5:14, 15.) Ua mauruuru mau paha oe. Ua tauturu te reira ia oe ia pûpû i to oe oraraa i te Atua e ‘ia ore e haapao faahou ia oe iho i te oraraa nei, ia haapao râ ia ˈna, tei pohe no oe.’ Te auraa e bapetizo i te iˈoa o te Tamaiti, e farii ïa i ta Iesu i rave no oe e i to ˈna mana faatere ei “Arii e ei Ora.” (Ohi. 5:31) Na mua ˈˈe, aita to oe e taairaa e te Atua Poiete e aita atoa e tiaturiraa papu. I to oe râ faaiteraa i te faaroo i te toto i niniihia o Iesu Mesia e bapetizoraa, ua faatupu ïa oe i te taairaa e te Metua. (Eph. 2:12, 13) Ua papai te aposetolo Paulo: “O outou hoi, o tei taa ê i mutaa iho e te enemi hoi i to outou aau i te parau iino ra, ua faafaitehia ïa e [te Atua] i teie nei, i to [Iesu] ra pohe i te tino taata no ˈna ra, ia tuu oia ia outou ma te maitai, e te hapa ore.”—Kol. 1:21, 22.
12, 13. (a) E nafea te bapetizoraa i te iˈoa o te Tamaiti e ohipa ˈi ia inoino oe i te tahi taata? (b) Ei Kerisetiano bapetizohia i te iˈoa o Iesu, eaha te titauhia ia oe?
12 Noa ˈtu e ua bapetizohia oe i te iˈoa o te Tamaiti, ua ite maitai oe i to oe huru tia ore. E tauturu te reira ia oe i te mau mahana atoa. Ei hiˈoraa, ia inoino oe i te tahi taata, e haamanaˈo anei oe e e taata hara orua? E hinaaro iho â orua ia faaore te Atua i ta orua hara, e ia faaore ïa orua orua iho i ta orua hara. (Mar. 11:25) No te haapapu i te reira, ua horoa Iesu i te hoê faahohoˈaraa: Ua faaore te hoê fatu i te tarahu a ta ˈna tavini hoê ahuru tausani taleni (60 mirioni moni veo). I muri iho, aita taua tavini ra i faaore i te tarahu 100 moni veo a to ˈna hoa rave ohipa. Ua horoa ˈtura Iesu i teie faaotiraa: E ore Iehova e faaore i te hara a te hoê taata te ore e faaore i ta to ˈna taeae. (Mat. 18:23-35) Te auraa e bapetizo i te iˈoa o te Tamaiti, e farii ïa i te mana faatere o Iesu e e tutava i te pee i to ˈna hiˈoraa e ta ˈna mau haapiiraa, mai te ineineraa i te faaore i te hara a vetahi ê.—Pet. 1, 2:21; Ioa. 1, 2:6.
13 Eita oe e nehenehe e pee roa ia Iesu no te mea e taata hara oe. No ta oe râ pûpûraa ia oe i te Atua ma to aau atoa e hinaaro ai oe e pee ia Iesu i tei maraa ia oe. Ia haa tamau ïa oe i te haapae i te huru taata tahito e i te ahu mai i te huru taata apî. (A taio i te Ephesia 4:20-24.) Ia faatura oe i te hoê hoa, e tamata iho â oe i te haapii mai i to ˈna hiˈoraa e huru maitatai. Oia atoa, e hinaaro oe e haapii mai i te Mesia e e pee ia ˈna.
14. E nafea ia faaite e te farii ra oe i to Iesu mana faatere ei Arii i te raˈi?
14 Te vai ra te tahi atu ravea e faaite ai oe e ua taa ia oe te auraa e bapetizo i te iˈoa o te Tamaiti. “Ua tuu [te Atua] i te mau mea atoa nei i raro aˈe i [to Iesu] avae, e ua haapao hoi ia ˈna ei upoo i nia iho i te mau mea atoa i te ekalesia,” aore ra amuiraa. (Eph. 1:22) E mea tia ïa ia faatura tatou i te huru aratairaa a Iesu i te feia tei pûpû ia ratou ia Iehova. Te faaohipa nei te Mesia i te mau taata tia ore i roto i te mau amuiraa, te feia paari iho â râ i te pae varua, te mau matahiapo. Ua faatoroahia teie mau tane “ei faaau i te feia moˈa . . . ia tupu i te maitai te tino o te Mesia.” (Eph. 4:11, 12) Noa ˈtu e e hape te mau taata, e nehenehe ta Iesu ei Arii o te Basileia i te raˈi e faaafaro i te fifi i te taime e ma te huru e au. Te tiaturi ra anei oe i te reira?
15. Mai te peu e aitâ oe i bapetizohia ˈtura, eaha te mau haamaitairaa e vai ra i muri aˈe i te bapetizoraa?
15 Aitâ vetahi i pûpû ia ratou ia Iehova e i bapetizohia ˈtura. Mai te peu e aita atoa oe, te maramarama ra anei oe e mea tano ia farii i te Tamaiti no te faaite hoi i to oe mauruuru? E fanaˈo oe i te mau haamaitairaa rahi ia bapetizo oe ia oe i te iˈoa o te Tamaiti.—A taio i te Ioane 10:9-11.
I te iˈoa o te varua moˈa
16, 17. Eaha te auraa no oe e bapetizo i te iˈoa o te varua moˈa?
16 Eaha te auraa e bapetizo i te iˈoa o te varua moˈa? Mai tei faahitihia, ua ite maitai te feia i faaroo ia Petero i te Penetekose eaha te varua moˈa. Ua ite mata roa ratou i te haapapuraa e te tamau ra te Atua i te faaohipa i te varua moˈa. O Petero atoa tei ‘î i te varua maitai e tei parau i te parau ěê.’ (Ohi. 2:4, 8) Ia parauhia “i te iˈoa o,” e ere noa ïa i te iˈoa o te hoê taata. I teie mahana, e rave rahi mea te ravehia “i te iˈoa o te ture,” e ere hoi i te hoê taata. Te ravehia ra te reira ia au i te ture. Oia atoa, ia bapetizohia te hoê taata i te iˈoa o te varua moˈa, te farii ra ïa oia e e puai ohipa o Iehova te varua moˈa, e ere i te hoê taata. Te auraa o teie bapetizoraa, te farii ra ïa oia i te ohipa a te varua moˈa i roto i te opuaraa a te Atua.
17 Ua ite oe eaha te varua moˈa i roto i ta oe haapiiraa i te Bibilia. Ei hiˈoraa, ua taa ia oe e ua papaihia te Bibilia i raro aˈe i te aratairaa a te varua moˈa. (Tim. 2, 3:16) A haere ai oe i mua i te pae varua, ua maramarama ˈtu â oe e ‘e horoa te Metua i te raˈi i te varua maitai i te feia i ani atu ia ˈna,’ e ia oe atoa. (Luka 11:13) Ua ite paha oe i te ohiparaa te varua moˈa i roto i to oe oraraa. Mai te peu râ e aitâ oe i bapetizohia ˈtura i te iˈoa o te varua moˈa, te haapapu ra Iesu e e horoa te Metua i te varua moˈa e e haamaitai-mau-hia oe a noaa ˈi ia oe taua varua ra.
18. Eaha te mau haamaitairaa e fanaˈo te feia e bapetizohia i te iˈoa o te varua moˈa?
18 Mea papu e i teie mahana atoa, te aratai ra Iehova i te amuiraa Kerisetiano maoti to ˈna varua. E tauturu atoa tera varua ia tatou taitahi i roto i ta tatou mau ohipa i te mau mahana atoa. Ua taaihia te bapetizoraa tatou i te iˈoa o te varua moˈa i to tatou fariiraa i ta ˈna ohiparaa i roto i to tatou oraraa. E haa amui atoa tatou e taua varua ra ma te mauruuru. E ui râ paha vetahi e nafea tatou e ora ˈi ia au i ta tatou pûpûraa ia Iehova e eaha te tuhaa a te varua moˈa i reira. O to muri iho ïa tumu parau.
[Nota i raro i te api]
^ A hiˈo i te Réveillez-vous! o te 22 no Tenuare 1982, api 3-8.
Te haamanaˈo ra anei outou?
• Eaha te auraa no outou e bapetizo i te iˈoa o te Metua?
• Eaha te auraa e bapetizo i te iˈoa o te Tamaiti?
• E nafea outou e faaite ai e ua taa ia outou te auraa e bapetizo i te iˈoa o te Metua e o te Tamaiti?
• Eaha te auraa e bapetizo i te iˈoa o te varua moˈa?
[Uiraa haapiiraa]
[Hohoˈa i te api 10]
I muri aˈe i te Penetekose 33, ua faatupu te mau pǐpǐ apî i teihea taairaa e te Metua?
[Faaiteraa i te tumu]
Ma te parau faatia a te Israel Museum i Ierusalema