Ngan Taufe u Daken Fithingan Mini’ nge Mang?

“Ere mmarod ngak girdien e pi nam u gubin yang . . . , mi gimed taufenagrad nga fithingan e Chitamangiy nge Fak nge gelngin Got nib thothup.”​—MATT. 28:19, NW.

1, 2. (a) Mang e buch u Jerusalem ko Pentekost ko 33 C.E.? (b) Mang fan ni boor e girdi’ u rom nra uned ko taufe?

 KE SUG lan yu Jerusalem ko girdi’ ni yoor ni kar bad u boor e nam. Nap’an fare rran ni Pentekost ko 33 C.E., ma boor e girdi’ nra uned nga reb e madnom nib ga’ fan. Tomuren ni pi’ Peter reb e welthin ma bay ban’en ni buch. Gonap’an 3,000 e girdi’ nu Israel nge girdi’ ni gathi yad piyu Israel ni taw fapi thin nga gum’ircha’rad ma ra kalgadngan’rad mi yad un ko taufe, ma aram ma ra manged boch girdien fare ulung ni Kristiano ni kafin ni sum. (Acts 2:41) Taufe ni tay e pi girdi’ ney u Jerusalem e k’aring boch e girdi’ ni nge yoor lungurad.

² Mang e k’aring e pi girdi’ ney ni ngar uned ko taufe? Tabolngin e re rran nem, ma immoy 120 pi gachalpen Jesus ko thal ni nga lang u reb e naun mi yad rung’ag “lingan ban’en u lan e lang ni bod lingan bangi nifeng nib gel ni ke thow.” Tomuren ni buch e re n’ey ma boor e girdi’ nra muulunggad nga taabang ya yad baadag ni ngar rung’aged pi gachalpen Jesus ni yad be non “nlungun boch e nam.” Nap’an ni yad be motoyil ngak Peter ni be welthin, ma aram ma ki weliy murung’agen e yam’ ni tay Jesus ma “ri yib e marus ngorad.” Mang e thingar ra rin’ed? Me fulweg Peter ni gaar: “Nge bigimed me pi’ keru’ ko denen ni be rin’, min taufenag nga fithingan Jesus Kristus . . . , me yog e tow’ath rok Got ngomed, ni aram gelngin Got nib thothup.”​—Acts 2:1-4, 36-38, NW.

3. Nap’an e Pentekost, mang e ba t’uf ni nge rin’ piyu Israel nge girdi’ ni gathi yad piyu Israel?

³ Rayog ni ngam nang rogon e michan’ ko pi girdi’ nem nra rung’aged e thin rok Peter. Yad manang ni Jehovah e Got rorad. Ma yad manang ni gelngin Got nib thothup ni be weliy e Bible ni thin ni Hebrew e be yog ni fanay Got gelngin ni nge sunumiy urngin ban’en ngay ko  tabolngin. (Gen. 1:2; Judg. 14:5, 6; 1 Sam. 10:6; Ps. 33:6) Machane ku bay ban’en nib t’uf ni ngar nanged. Rib ga’ fan ni ngar nanged me tamilangan’rad ni Got e ke pi’ Jesus ni ir fare Messiah ni nge yognag e yafas ngorad. Miki tamilangnag Peter nib t’uf ni ngan taufenagrad “nga fithingan Jesus Kristus.” In e rran u m’on ni buch e re n’ey me yog Jesus ngak Peter nge ku boch pi gachalpen ni ngar taufenaged e girdi’ “nga fithingan e Chitamangiy nge Fak nge gelngin Got nib thothup.” (Matt. 28:19, 20) Bay fan e taufe ni un tay ko bin som’on e chibog. Mang fan ni ngan taufe?

Nga Fithingan e Chitamangiy

4. Mang e ke thilyeg Jehovah ni bay rogon ko piin ni bay e tha’ u thilrad?

⁴ Bod faram ni kad weliyed ni fapi girdi’ ni ur motoyilgad ngak Peter e ur liyorgad ngak Jehovah ma ba fel’ e tha’ u thilrad. Yad ma athamgil ni ngar folgad ko Motochiyel rok, ma aram fan ni ke yib boch e girdi’ u boch e nam nga Jerusalem. (Acts 2:5-11) Ereray e ngiyal’ ni ke tabab ni nge thilyeg Got boch ban’en. Ke n’ag fare nam nu Israel ni i tay ni yad girdien ere Motochiyel ni pi’ ngak piyu Israel e ke m’ay fan. (Matt. 21:43; Kol. 2:14) Faanra baadag fapi girdi’ ni ur motoyilgad ko welthin ni nge fel’ thilrad Jehovah, ma aram e bay ban’en nib t’uf ni ngar rin’ed.

5, 6. Mang e rin’ e tin som’on e girdi’ nu Israel nge girdi’ ni gathi yad piyu Israel ko bin som’on e chibog ya nge fel’ e tha’ u thilrad Got?

⁵ Thingar dab ra pied keru’rad ngak Jehovah ni ir e pi’ e yafas ngorad. (Acts 4:24) Girdi’ ni ur motoyilgad ngak Peter e kafin ra nanged ni Jehovah e Chitamangirad ma baadag ni nge ayuwegrad. Ke pi’ fare Messiah ni nge ayuwegrad ma ba m’agan’ ngay ni nge ayuweg e piin ni non Peter ngorad ni gaar: “Ere urngin e girdi’ nu Israel ni thingar ra nanged ni cha’ nem i Jesus, ni ir e mu richibiyed [“nga lang,” NW] e ke tay Got ni ir e Somol nge Messiah!” Piin ni yad be fol ko thin rok Peter e rayog ni ngar felfelan’gad ko n’en ni ke rin’ Jehovah ni fan ngak gubin e girdi’ ni yad baadag ni nge fel’ e tha’ u thilrad Got.​—Mu beeg e Acts 2:30-36.

⁶ Girdi’ nu Israel nge girdi’ ni gathi yad piyu Israel e rayog ni ngar nanged e chiney nra nge fel’ e tha’ u thilrad Jehovah mab t’uf ni ngar nanged ni ir e en ni ke pi’ e yafas u daken Jesus. Rayog ni ngan nang ko mang fan ni kar kalgadngan’rad ko denen rorad nib muun ngay e kireb rorad ni kar lied Jesus ndemtrug ko yad manang fa dar nanged. Ma ke tamilang ni nap’an e tin migid e rran ngay “ma ur pired ni be machibnagrad e pi apostal.” (Acts 2:42) Rayog rorad maku yad baadag ni ngar “bad nga tagil’ Got, ko gin ni bay e ayuw riy.”​—Heb. 4:16.

7. Uw rogon ni ke thilyeg boor e girdi’ e lem rorad u murung’agen Got ma kan taufenagrad nga fithingan e Chitamangiy?

⁷ Bokum milyon e girdi’ u fayleng e ngiyal’ n’ey nib thilthil rarogorad e kar filed e tin riyul’ u murung’agen Jehovah. (Isa. 2:2, 3) Boch e pi girdi’ ney e ur lemnaged ndariy e Got ma boch e ur lemnaged ni bay e Got machane der lemnag e pi n’en ni ke sunumiy, machane ke thil e lem rorad ma kar nanged e tin riyul’ u murung’agen Got. Boch e pi girdi’ ney e ba mich u wan’rad e machib ni trinitas fa reb e ur meybilgad ko liyos. Machane chiney e kar nanged ni Jehovah e Got ni th’abi tolang, ma bay fithingan. Ereray fan ni yog Jesus ngak pi gachalpen ni ngar taufenaged e girdi’ nga fithingan e Chitamangiy.

8. Mang e ba t’uf ni nge nang e piin ni dar nanged ni bay e denen rok Adam rorad u murung’agen e Chitamangiy?

⁸ Kar filed ni ke af e denen rok Adam ngorad. (Rom. 5:12) Ireram ban’en nib beech ni thingari riyul’ u wan’rad. Girdi’ ni aray rogon e rayog ni ngan taareb rogonnagrad ngak be’ ni de nang ni bay e m’ar rok. Sana ma amith yu yang u dow yu ngiyal’. Machane faanra dab ni skengnag ma sana ra lemnag ni dariy e m’ar rok. Ma re n’ey e gathi be micheg ni dariy e m’ar rok. (Mu taarebrogonnag ko 1 Korinth 4:4.) Mang e ra buch ni faanra ni skengnag ko m’ar? Ere gathi ba fel’ ni nge un ko tafalay ya nge yog ni ngan pirieg e m’ar rok? Taareb rogon ko bin ni ngan fil e tin riyul’ u murung’agen e denen ni ke af ngodad, boor e girdi’ e  ke ayuwegrad e thin ko Bible ma kar nanged ni Got e baadag ni nge “ayuwegrad.” Piin ni ba orel rok e en Chitamangiy e ba t’uf ni nga ranod ngak ni nge “ayuwegrad.”​—Efe. 4:17-19.

9. Mang e ke rin’ Jehovah ya nge yog ni fel’ e tha’ u thildad?

⁹ Faanra kam ognag e yafas rom ngak Jehovah Got ma kam un ko taufe, ma aram e kam nang ni n’en ni th’abi fel’ e nge manigil e tha’ u thilmew Got. Rayog ni ngam felfelan’ nga rogon ni ma t’ufegem Jehovah. (Mu beeg e Roma 5:8.) Yugu aram rogon ni ke denen Adam nge Efa nib togopluw ngak Got, machane ke guy rogon ni nge fel’ e tha’ u thilrad pi fak Adam ni ku gad muun ngay. Bochan ni ke rin’ e re n’em ma aram e ke pi’ Fak nib t’uf rok ni nge gafgow me yim’. Gathi ke ayuwegdad e re n’ey ni ngad nanged mat’awun Got ma gad fol ko motochiyel rok u fithik’ e t’ufeg? Faanra dawor mu ognagem ngak Got ma aram e ba fel’ ni ngam rin’ e chiney ma ga un ko taufe.

Nga Fithingan Fak

10, 11. (a) Mang e thingar mu rin’ ni fan ngak Jesus? (b) Uw rogon u wan’um e yam’ ni tay Jesus ni nge biyuliy e girdi’?

¹⁰ Am lemnag e n’en ni weliy Peter ngak fapi girdi’ ni aram urngirad. Ke yog ni thingari mich Jesus u wan’rad ya nge yog ni ngar uned ko taufe ni yira tay nga “fithingan Fak.” Mang nib ga’ fan e re n’ey kafram maku ba ga’ fan e ngiyal’ n’ey? Faanra ngam fol rok Jesus min taufenagem nga fithingan, ma aram e be yip’ fan ni kam nang e n’en ni ke rin’ ya nge fel’ thildad Jehovah. Thingar ni tining Jesus ko fare ley i gek’iy ya nge yog ni ayuweg e yafas rok piyu Israel ni dar folgad ko Motochiyel rok Got, machane ku bay reb i fan ni yim’. (Gal. 3:13) Ke pi’ fare biyul ni fan ngak e girdi’. (Efe. 2:15, 16; Kol. 1:20; 1 John 2:1, 2) Ere ke gafgow nge mada’ ko ngiyal’ ni ke yim’. Uw rogon u wan’um e maligach ni pi’? Am lemnag ni faanra gur reb e pagel ni 12 e duw rom ma ga bay u daken fare barkow ni Titanic, ni ke ligil ko duw ni 1912. Ga be guy rogon ni ngam af nga lan reb e bowoch ya ngam ayuweg e yafas rom, machane ke sug ko girdi’ ma dabkiyog ni ngam taw nga langgin. Ma aram e bay reb e pumoon ni fingichiy e ppin rok me og u lan fare bowoch nga but’, ma aram me yog ngom ni ngam man nga lan fare bowoch. Uw rogon e re n’ey u wan’um? Rib mudugil ni ga ra pining e magar ngak. Rayog ni ngam nang rogon laniyan’ e re pagel nem ko n’en ni ke buch. * Ke rin’ Jesus ban’en ni ba ga’ fan ngom. Ke yim’ ya nge yog e yafas ni manemus ngom.

¹¹ Uw rogon u wan’um u nap’an ni kam fil ko mang e ke rin’ Jesus ni fan ngom? (Mu beeg e 2 Korinth 5:14, 15.) Ri ga ra pining e magar ngak. Re n’ey e ra ayuwegem ni ngam ognag e yafas rom ngak Got ma ‘ga par ni gathi ngam rin’ e tin nib m’agan’um ngay ya ke yim’ Jesus ni fan ngom.’ Faanra ni taufenagem nga fithingan Fak ma aram e be yip’ fan ni kam nang fan e n’en ni ke rin’ Jesus ni fan ngom ma ga fol rok ya ir e “ma thapeg e girdi’ ngak Got.” (Acts 3:15; 5:31) Som’on e dariy e tha’ u thilmew Got maku dariy e athap rom ni fan ko yafas. Machane bochan ni ke mich u wan’um ni ke yim’ Jesus ni fan ngom, ma kam un ko taufe, ma chiney e ke fel’ e tha’ u thilmew Got. (Efe. 2:12, 13) Be gaar Paul: “Ba’ ba ngiyal’ ni um moyed ni gimed mmal’af rok Got ma gimed be taymed ni gimed e pi toogor rok ni bochan e tin nib kireb ban’en ni um rin’ed ma gimed be lemnag. Ma chiney e ke taymed Got ni gimed e pi tafager rok u daken e yam’ ni tay Fak, ni fan e nge yog ni fekmed i yib nga p’eowchen ni kam thothupgad ma kam machalboggad ma dariy e kireb romed.”​—Kol. 1:21, 22.

12, 13. (a) Uw rogon ni ngam taufe nga fithingan Fak e ra ayuwegem u nap’an nra yog be’ ban’en ni dabum? (b) Mang e ba milfan ngom ni gur reb e Kristiano ni kan taufenagem nga fithingan Jesus?

¹² Yugu aram rogon ni kam taufe nga fithingan Fak, dab mu pagtalin ni ku bay e denen rom. Rib ga’ fan ni ngaud tedan’dad ni gubin e rran. Faanra yog be’ ban’en ni dabum ma ga ma lemnag ni gimew e tadenen, fa? Gimew l’agruw nib t’uf ni ngam n’igew fan e kireb romew. (Mark 11:25) Rayog ni nge tamilang e re n’ey ko fanathin ni yog Jesus ni: Fare masta e ke  n’ag fan e malulfith rok fare tapigpig rok ni 60 milyon denarii. Machane fare tapigpig ni kan n’ag fan e malfith rok e de n’ag fan e malfith rok reb e tapigpig ni kemus ni 100 denarii. Ma aram me tamilangnag Jesus fan e re fanathin ney ni Jehovah e dabi n’ag fan e kireb rok be’ ni faanra dabi n’ag fan e kireb rok walagen. (Matt. 18:23-35) Ere faanra ngam taufe nga fithingan fak ma be yip’ fan ni kam nang mat’awun Jesus ma ga athamgil ni ngam folwok u rogon ni i machib nge rogon ni i n’ag fan e kireb rok boch e girdi’.​—1 Pet. 2:21; 1 John 2:6.

¹³ Bochan ni gad ba tadenen, dabiyog ni ngar da rin’ed e maruwel ni rin’ Jesus ni gubin. Machane bochan ni ke yib u gum’irchaem ni ngam ognagem ngak Got, ma aram e ga baadag ni ngam folwok rok Jesus u rogon ni rayog rom. Ere ba t’uf ni ngad n’aged pangidad ni ke kakrom ma don’ed nga dakendad e bin nib beech pangin. (Mu beeg e Efesus 4:20-24.) Nap’an ni ga ra tayfan e fager rom, ma ga ra guy rogon ni ngam fol u pangin nib fel’. Ere ba t’uf ni ngam fol u kanawoen Kristus.

14. Uw rogon ni ga ra dag ni kam nang mat’awun Jesus ni ir e Pilung u tharmiy?

¹⁴ Ku bay reb e kanawo’ ni rayog ni ngam dag ni kam nang ko mang fan ni kam taufe nga fithingan Fak. Ke tay Got “urngin ban’en nga tan e rifrif u ay Kristus, ma ke pi’ Jesus ngak e [“ulung,” NW] ni ir e nge mang Pilung ni ga’ u urngin ban’en.” (Efe. 1:22) Ere ba t’uf ni ngam tay fan rogon ni ma pow’iy Jesus e piin ni kar ognaged yad ngak Jehovah. Ma fanay Kristus e girdi’ ni dawora flontgad u lan e ulung ni ba ga’ ni piin ni pumoon ni ke yoor ban’en ni kar nanged ko tirok Got ni ngar manged e piin piilal. Pi piilal ney e ‘yad ma rin’ e re n’ey ni ngar ngongliyed rogon urngin e girdi’ rok Got ngar pigpiggad ngak Got ni aram e maruwel rok girdien Kristus, mi yad ayuweg girdien e dowef rok Kristus ngar ilalgad i yan.’ (Efe. 4:11, 12) Yugu ra ke denen be’, ma Jesus ni ir e Pilung u  Gil’ilungun Got u tharmiy e bayi rin’ e tin nib  t’uf ni nge rin’ ngak ko ngiyal’ nge rogon ni  baadag. Ba mich u wan’um ni aram rogon, fa?

15. Faanra dawor mu taufe, mang tow’ath e rayog ni ngam nameg u tomuren ni kam taufe?

¹⁵ Boch e girdi’ e dawor ra ognaged yad ngak Jehovah maku dawor ra uned ko taufe. Rayog ni ngam nang ni rib ga’ fan ni ngam nang e en Fak ma ga felfelan’ ko n’en ni bay ni ngam rin’. Faanra ngam taufe nga fithingan Fak ma rayog ni ngam felfelan’ me yib e tow’ath ngom.​—Mu beeg e John 10:9-11.

Nga Fithingan Gelngin Got nib Thothup

16, 17. Mang fan u wan’um ni ngan taufenagey nga fithingan gelngin Got nib thothup?

¹⁶ Mang e be yip’ fan ni ngan taufe nga gelngin Got nib thothup? Kan weliy faram ni piin ni ur motoyilgad ngak Peter u nap’an e Pentekost e yad manang ko mang gelngin Got nib thothup. Ma kar guyed nga owcherad e mich riy ni be fanay Got gelngin nib thothup. Peter e ir bagayad e piin ni yib ‘gelngin Got nib thothup ngak me tabab ni nge non nlungun boch e nam.’ (Acts 2:4, 8, NW) Fare thin ni nga “fithingan” e gathi kemus ni yima yog nga fithingan be’. Ngiyal’ ney e boor ban’en ni yima rin’ “nga fithingan e am,” ma gathi nga fithingan be’. Yad ma rin’ ni fan nga mat’awun fare am. Ere ku taareb rogon nra ngan taufe nga fithingan gelngin Got nib thothup ma gathi be yip’ fan fithingan be’, machane thingari nang ko mang gelngin Got nib thothup ni aram gelngin Jehovah ni ma maruwel ngay. Ma taufe ni ke un ngay e ra nang ni ma fanay Got gelngin nib thothup ni nge rin’ e tin nib m’agan’ ngay.

 ¹⁷ Gathi kam fil murung’agen gelngin Got nib thothup u nap’an ni kam fil e Bible? Sana kam felfelan’ ni kam nang ni ke pi’ Got gelngin nib thothup ngak boch e girdi’ ni ngar yoloyed e thin rok nga Bible. (2 Tim. 3:16) Nap’an ni ga be mon’og ko tirok Got ban’en ma aram e kam nang ni riyul’ ni ma pi’ e ‘Chitamangiy nu tharmiy gelngin nib thothup ngak e piin ni yad be ning ngak,’ ni ka gab muun ngay. (Luke 11:13) Sana kam nang ni be ayuwegem gelngin Got nib thothup. Faanra dawor ni taufenagem nga fithingan gelngin Got nib thothup, ma thin ni ke micheg Jesus nra pi’ Got gelngin e be yip’ fan ni bay e tow’ath nra yog ngom boch  nga m’on u nap’an nra pi’ Got gelngin ngom.

18. Mang boch e tow’ath ni ma yib ngak e piin ni kan taufenagrad nga fithingan gelngin Got nib thothup?

¹⁸ Be m’ug e mich riy e ngiyal’ ney ni be fanay Jehovah gelngin nib thothup ni nge pow’iy me gagiyegnag e ulung rok. Gelngin e ku ma ayuwegdad u gubin ban’en ni gad ma rin’ u gubin e rran. Taufe ni kad ted nga fithingan gelngin Got nib thothup e be yip’ fan ni kad nanged rogon ni be gagiyegnag gelngin Got e yafas rodad u gubin e rran ma gad ba felfelan’ ni gad be fol rok Got. Sana boch e girdi’ e yad ra lemnag ko uw rogon ni gad ra fol ko n’en ni kad micheged ngak Jehovah ma uw rogon nra ayuwegdad gelngin nib thothup. Ereray e pi n’en ni gad ra fil ko bin migid e thin.

[Footnote]

Ka Ga Manang?

• Mang ni ngam taufe nga fithingan e Chitamangiy e bay fan ngom?

• Mang e be yip’ fan ni ngan taufe nga fithingan Fak?

• Uw rogon ni rayog ni ngam dag ni ga be tayfan ni kam taufe nga fithingan e Chitamangiy nge Fak?

• Mang e be yip’ fan ni ngan taufe nga fithingan gelngin Got nib thothup?

[Study Questions]

[Picture on page 12]

Uw rogon e tha’ u thilin e tin nib beech i gachalpen Jesus nge Chitamangin u tomuren e Pentekost ko 33 C.E.?

[Credit Line]

Kan fek e re sasing ney ko Museum u Israel u Jerusalem