Qullan ajayurjam sarnaqañäni

“Ajayun munañaparjam sarnaqapxam, ukhamatxa janiw janchin munañaparjam sarnaqkxapxätati.” (GÁL. 5:16.)

1. ¿Pentecostés fiestanxa kuna pä kasta bautismonakas utjäna?

 KUNAPACHATÏ Jesusan arkirinakapax 33 marana, Pentecostés fiestan qullan ajayumpi bautisatäpxäna ukhaxa, yaqha arunakat parlañwa qalltapxäna (1 Cor. 12:4-10). Uk uñjasasa ukat Pedron arunakap istʼasasa, ¿kunjamsa jaqinakax jikxatasipxpachäna? “Chuymanakapan wali llaktʼataw uñjasipxäna”. Pedron arunakap istʼasinxa waljaniw juchanakapat arrepentisisax bautisasipxäna. “Jaysapkän ukanakaxa, Diosaruw kutikipstanxapxäna bautisasisina. Ukürusti mä kimsa waranq jaqinakjamaw iyawsirinakarux yapxattäna.” (Hech. 2:22, 36-41.) Pedron arunakap istʼasinxa, Jesusan arunakaparjamaw Awkina, Yuqana ukat qullan ajayun sutipxaru uman bautisasipxäna (Mat. 28:19, MT).

2, 3. 1) ¿Qullan ajayumpi bautisasiñasa ukat qullan ajayun sutipxaru bautisasiñas pachpakiti? 2) ¿Diosar kusisiyañatakix kunatsa uman bautisasiñax wakisi?

² ¿Qullan ajayumpi bautisasiñasa ukat qullan ajayun sutipxaru bautisasiñas pachpakïpachati? Janiwa. Khitinakatix qullan ajayumpi bautisasipki ukanakaxa, Diosan wawapäñatakiw machaqat yuripxi (Juan 3:3). Jupanakaw  alaxpachar sarapxani. Diosan ajllitjamaxa, Jesucristomp chikaw sacerdotenakjam alaxpachat apnaqanipxani, jupanakaw tamjamax Criston cuerpopa satäpxaraki (1 Cor. 12:13; Gál. 3:27; Apo. 20:6). Ukhamasti, Jehová Diosaw Pentecostés urut aksarux qullan ajayumpi bautisañ qalltawayi, ukhamata Jesucristompi chika mä apnaqäwi katuqapxañapataki (Rom. 8:15-17). Ukampis Jehová Diosan Qhanañchirinakapax apapki uka jachʼa tantachäwinakan qullan ajayun sutipxaru uman bautisasipki ukaxa, ¿kamsañs munpacha? Uka tuqit jichhax parltʼarakiñäni.

³ Uman bautisasisaw mä cristianox Diosar taqi chuyma katuyasitapxa uñachtʼayi. Khitinakatï alaxpachar sarapkani ukanakasa ukat aka Uraqin wiñay jakañ suyapki ukanakasa ukhamaw bautisasipxi. Diosar kusisiyañatakixa, taqi luqtirinakapaw ‘Awkina, Yuqana, qullan ajayumpina sutipxaru bautisasipxañapa’. Ukampis bautisatäxi uka qhipatxa, mä cristianox ‘qullan ajayun munañaparjam sarnaqaskañapakiwa’ (Gálatas 5:16 liytʼasiñapawa). Ukhamax sapa maynis akham jisktʼasiñasawa: “¿Qullan ajayurjamat sarnaqasktxa ukat Diosar katuyasisax kuntï arsuwaykta uk phuqaskti?” sasa.

¿Kunjamatsa qullan ajayurjam sarnaqsna?

4. ¿Kunjamatsa qullan ajayurjam sarnaqsna?

⁴ Kunapachatï qullan ajayumpix taqi kunansa sapüru yanaptʼayastan ukhaw uka qullan ajayurjamax sarnaqtanxa. Kunas qullan ajayurjam sarnaqañaxa ukat kunarakis jañchin munañaparjam sarnaqañaxa ukanakaw Gálatas 5 jaljan qhanañchasi (Gálatas 5:17, 18 liytʼasiñapawa).

5. ¿Qullan ajayumpi yanaptʼayasiñatakix kunanak apanukuñas wakisi?

⁵ Khitinakatix qullan ajayurjam sarnaqapki ukanakaxa, jañchin munañanakapar atipañatakiw chʼamachasipxi. Uka jan wali luräwinakax akanakawa: “wachuqa jucha lurañanaka, qʼañu lurañanaka, vicionaka, idolonakaru yupaychañanaka, layqasiñanaka, uñisisiñanaka, quejanakan sarnaqañanaka, celasiñanaka, colerasiñanaka, jupa pachpatak munañanaka, tʼaqaqtasin yaqha tamanaka tukuñanaka, envidiasiñanaka, [...] machañanaka, jiljas manqʼañanaka” (Gál. 5:19-21). Cristianonakax jañchin uka munañanakapxa ‘jiwayapkaspas’ ukhamawa. Ukampis ¿kunjamatsa jiwayapxi? ‘Qullan ajay tuqiw jiwayapxi’ (Rom. 8:5, 13). Jañchin munañanakap apanukusaxa, kunanakatix qullan ajayurjam sarnaqañ yanaptʼki ukanakaruw chuym uchapxi ukat ukarjam sarnaqañatakiw chʼamachasipxaraki.

6. ¿Qullan ajayun achup uñachtʼayañatakix kunas wakisi? Mä uñachtʼäwimpi uk qhanañchtʼma.

⁶ Ukhamasti, ‘qullan ajayun achupa’ uñachtʼayañatakixa, mä arunxa, Diosar kusisiykir sarnaqañatakixa uka qullan ajayumpi yanaptʼayasiñasawa (Gál. 5:22, 23, MT). Ukampis ukham sarnaqañatakixa sapa mayniw chʼamachasiñasaraki. Uk amuytʼañatakixa mä yapuchirit parltʼañäni. Yapupan achuñapatakixa umampi lupimpiw munasi; janitï umas lupis utjkaspa ukhaxa, janiw kunas achkaspati. Jiwasampix niya ukhamarakiwa, qullan ajayux lupimpi sasiwa, uka qullan ajayuw Diosatakjam sarnaqañ yanaptʼistani. Ukat yapupan sum achuñapatakixa, yapuchirix wal chʼamachasiñaparakiwa (Pro. 10:4). Ukhamasti, qullan ajayun achup sum uñachtʼayañ  munasaxa, chuymas wakichañasawa, kunjamtï maynix yapuchañataki uraq wakichki ukhama. Ukatakix akham jisktʼasiñasawa: “¿Qullan ajayumpi yanaptʼayasisax achup uñachtʼaytti?” sasa.

7. Qullan ajayumpi yanaptʼayasiñatakixa, ¿kunatsa Diosan Arupat yatxatañasa ukat lupʼiñasa?

⁷ Ukat kunjamatix yapun sum achuñapatakixa umax wal munaskixa, ukhamarakiw qullan ajayun achuparjam sarnaqañatakixa Diosan markapan utjki uka umax munasi, ¿kunäspas uka umaxa? Biblian yatichäwinakapawa (Isa. 55:1). Ukatxa, Bibliax qullan ajayu tuqi amuytʼayatawa sasaw jaqinakar yatiyaraktanxa (2 Tim. 3:16). Ukatsti yatichäwinakap amuytʼañatakixa, Amuyasiri Chiqapa Uywataw wal yanaptʼarakistu (Mat. 24:45-47, MT). Ukhamasti, qullan ajayumpi yanaptʼayasiñatakixa, Diosan Arupat yatxatañasawa ukat lupʼiñasarakiwa. Nayra profetanakaxa, ukhamarakiw uka urunakan utjiri qillqatanakat “wali [sum] yatxatapxäna”. Ukatxa angelanakas ukhamarakiw jutaniw sat Wawat chiqa yatichäwinaksa ukat alaxpachar sarir cristiano tamatsa wal yatiñ munapxäna, jupanakat yatiqasiñasawa (1 Pedro 1:10-12 liytʼasiñapawa).

¿Kunjamsa qullan ajayux yanaptʼistu?

8. ¿Kunatsa Diosarux qullan ajayu mayiñasa?

⁸ Qullan ajayumpi yanaptʼayasiñatakixa, Bibliat yatxatasin lupʼiñasawa. Ukampis yanaptʼita sasin Diosar mayisiñasarakiwa, “Jupax chʼamaniwa kuntix mayktan, lupʼkaraktan ukanakata jukʼampi lurañataki” (Efe. 3:20; Luc. 11:13). Ukat inas yaqhipax akham sapxarakchispa: “Niyakixay Diosax kuntï maykañäni ukanak janïräkipan yatxchixa, ¿jukʼampi mayiñax wakisiskakispati?” sasa (Mat. 6:8). Nayraqatxa, qullan ajayu mayisax Diosar atinisitaswa uñachtʼaytanxa. Amuytʼañäni, ¿kunatsa jiwasax mayninakar yanaptʼañ muntanxa? Kunapachatï maynix yanaptʼita sasin maykistu ukat jiwasar atinisitap uñachtʼayaraki ukhaxa, taqi chuymaw yanaptʼañ muntanxa (Proverbios 3:27 uñxattʼarakismawa). Ukat jiwasatix qullan ajayu churita sasin Jehová Diosar mayisiñäni ukhaxa, Jupax ukhamarakiw taqi chuyma yanaptʼistani (Pro. 15:8).

9. ¿Kunjamsa Jehová Diosax tantachäwinakan qullan ajayupampi yanaptʼistaspa?

⁹ Ukatsti, taman utjki uka tantachäwinakana ukat jachʼa tantachäwinakanwa Jehová Diosax qullan ajayupampi yanaptʼistu, ukatwa uka tantachäwinakan sum istʼañataki jan qhiparas sarañatakisa chʼamachʼasiñasaxa. Ukham lurañäni ukhaxa, “Diosan jan amuytʼkay amtatanakapsa yatiraki[ñäni]wa” (1 Cor. 2:10). Ukat tantachäwinakan sapa kuti arstʼañax wali askirakiwa. Uka tuqit sapa maynis akham jisktʼasiñasawa: “Aka qhipa phaxsinxa, ¿qhawqha kutis arstʼañatakix ampar ayttxa, ukhamat Diosar yupaychañataki? ¿Jukʼampi chʼamachasiñajat wakisispa?” sasa. Wakisini ukhaxa jutïr tantachäwinakan arstʼañataki chʼamachasiñamawa. Ukat uk uñjasinxa Jehová Diosax qullan ajayupampiw yanaptʼätamxa, ukhamatwa tantachäwinakan jukʼampi yatiqäta.

10. Qullan ajayurjam sarnaqirinakaxa, ¿kunsa lurapxi?

¹⁰ Maysa tuqitxa, qullan ajayurjam sarnaqañatakixa, kuntï Apocalipsis 22:17 jiskʼa tʼaqax siski ukar istʼañasarakiwa, ukan akham siwa: “Qullan Ajayumpi Corderon esposapampisti  siwa: ‘Jutam’. Istʼirïki ukasti sarakpan ‘jutam’ sasa. Khititix umat pharjayaski, ukat um munkaraki ukax jutpan, jakañ umat inak umtʼarakpan” sasa. Qullan ajayusti Jesucriston ‘esposapa’ tuqiwa, mä arunxa, alaxpachar sarañataki ajllita cristiano tama tuqiw “jakañ umat inak umtʼa[pxam]” sasin taqinir jawsaski. ¿Jumax uka arunakar istʼtati ukat yaqhanakarus “jutam” sasin jawsaraktati? Chiqansa, ¡jiwasatakix ukar yanaptʼañax wali askipuniwa, ukhamatwa yaqhanakax qhispiyasipxaspa!

11, 12. ¿Kunjamsa qullan ajayux Diosan arunakapat yatiyañ yanaptʼistu?

¹¹ Qullan ajayun yanaptʼatawa aka urunakanxa jaqinakar wal yatiyasktanxa. Kunjamtï Bibliax siskixa, uka qullan ajayun irpataw nayrïr cristianonakax yaqha markanakar yatiyir sarapxatayna. Khä urunakansti, “Qullan Ajayux [Pablompiru ukat jupamp chik saririnakarux] Tatitun arunakapxa janiw Asia markan parlayañ munkänti”, ukat janirakiw Bitinia tuqirus sarayañ munkänti. Kunjamsa jarkʼäna ukxa janiw yatktanti. Ukampis Europa tuqinkir markanakaruw uñtayäna. Uksar sarapxañapatakixa, Pablorux mä unañchäwi uñjayäna, “uka unañchäwinsti Macedonia tuqinkiri mä chacharuw uñjäna saytʼata, jupar akham achiktʼasiri: ‘Macedoniar pastʼanisin yanaptʼapxita’ sasa” (Hech. 16:6-10).

¹² Jichhaxa, Jehová Diosax janiw milagronak tuqix kawkir sarañsa uñachtʼayxistuti. Ukampis uka qullan ajay tuqiw Bibliat taqi chuyma yatiyañatakisa ukat yatichañatakisa yanaptʼistu. Nayraqatxa, alaxpachar saririnakaruw yanaptʼi. Ukat jumatix Jehová Diosatak niy irnaqasksta ukhaxa, ¿janit jukʼampi irnaqañ munkasma?

13. ¿Kunjamatsa qullan ajayurjam sarnaqatas uñachtʼayaraksna? Mä uñachtʼäwimpi qhanañchtʼma.

¹³ Maysa tuqitxa, kuntï Diosax markap tuqi yatichkistu ukar istʼasarakiw qullan ajayurjam sarnaqatas uñachtʼaytanxa. Uk amuytʼañatakixa, Japón markan qamasir Mihoko sat mä kullakat parltʼañäni. Precursorjam irnaqañ qalltäna ukhaxa, yatiqañ munirinakan ukaru kuttʼañ wal axsarayasirïna, “janiw istʼañ munapkitaniti” sasaw llakisirïna. Uka tuqit yanaptʼayasiñatakixa, Diosan Apnaqäwipat Yatiyañataki satäki uka qillqat liytʼatayna. Ukatsti Kunjamatsa wali kusisit jakassna satäki uka qillqat katuqarakitayna, uka qillqatampi yatiyañax uka markan wali askïnwa. Kunjamsa uka qillqatampix yatiyasiñapäna ukat yatiqañ munirinakan ukar kuttʼasin kuna tuqinakat parltʼañas wakisispa, uka tuqinakatwa uka kullakax yatxatatayna ukat ukarjamaw lurarakïna. Ukat khitinakatix nayrax jan yatiqañ munapkäna ukanakasa yatiqañ munxapxänwa; ukhamax waljaniruw Bibliat yatichañ qalltäna. Jupax akham siwa: “Waljaniruw Bibliat yatichayäta, awisax tunka payanir kunaw yatichayäta” sasa. Ukat jan tiemponïxasaxa, “qhipat yatichäma” sasaw yaqhipar satayna. Jïsa, kunapachatix Jehová Diosan iwxanakaparjam phuqañataki chʼamachasktan ukhaxa, qullan ajayurjam sarnaqataswa uñachtʼaytanxa, ukatxa walja bendicionanak katuqaraktanxa.

Diosan qullan ajayupar atinisiñäni

14, 15. 1) ¿Pantjasirïkasas kunjamatsa Diosar katuyatjamax sum sarnaqsna? 2) ¿Kunjamatsa suma amigonak jikxatsna?

¹⁴ Diosan luqtirinakapjamaxa, kuntï Jupax  luram siskistu ukanakxa phuqañasawa (Rom. 10:14). Inas jiwasatakix Diosar luqtañax chʼamächispa, ukampis kunjamtï alaxpachar sarir cristianonakar yanaptʼkixa, ukhamarakiw Diosax jiwasar yanaptʼistani (2 Corintios 3:5 liytʼasiñapawa). Ukatxa Diosar katuyasisax kunanaktï arsuwayktan ukanak phuqañatakixa, taqi chuyma luqtañasawa, ukatsti qullan ajayumpi yanaptʼayasiñasarakiwa.

¹⁵ Ukampis niyakixay pantjasirïstanxa, qullan Diosar katuyasisin arsuwayktan ukanak phuqañax chʼamakïspawa. Inas cristianjam sarnaqiri uñjasax nayra masinakas mayjtʼasipxchispa, ukatwa “jan walinaka parla[pxaspa]” (1 Ped. 4:4). Ukampis yaqha suma amigonakaw utjxistu. Ukat Jehová Diosampis Yuqapampis sum apasiraktanxa (Santiago 2:21-23 liytʼasiñapawa). Ukatsti tamasankir jilat kullakanakar sum uñtʼañataki chʼamachasiñasarakiwa. Taqi jilat kullakanakar ‘sum uñjapxam’ sasaw Bibliax amtayistu (1 Ped. 2:17; Pro. 17:17). Ukatsti suma amigonak jikxatañatakixa, Jehová Diosaw qullan ajayupamp yanaptʼistani.

16. ¿Kunatsa “tʼukhasiñanakaxat kusist[wa]” sasin saraksna?

¹⁶ Awisax amigonakan yanaptʼatpachas sinti llakinakan uñjastanxa, janiw kunas kamachañjamäkiti. Janis kawkir jaltañas utjkaspa ukham amuyastanxa. Ukampis ukham jan walinakan jikxatasisaw Jehová Diosar jukʼamp jakʼachasiñasa ukat qullan ajayup mayisiñasa. Pablox akham sänwa: “Kunapachatï tʼukha uñjasta ukkhasti, jukʼampi chʼamanjamaw amuyastxa” sasa (2 Corintios 4:7-10 ukat 12:10 liytʼasiñapawa). Kunjamsa qullan ajayux aynachtʼat mä cristianor yanaptʼaspa ukat waytarakispa ukxa Pablox sum yatïna. Ukampis ¿kunatsa “tʼukhasiñanakaxat kusist[wa]” sispachänxa? Kunattix aynachtʼat jikxatasïna ukhaxa, kunjamsa qullan ajayux yanaptʼäna ukxa sum amuyasïna. Ukhamarakiw qullan ajayux jiwasar yanaptʼistaspa (Rom. 15:13).

17. Diosar wiñay luqtañatakixa, ¿kunjamsa qullan ajayux yanaptʼistu?

¹⁷ Kunjamtï uñjtanxa, Diosar katuyasisin arsuwayktan ukanak phuqañatakixa, qullan ajayumpi yanaptʼayasiñasawa. Uk amuytʼañatakixa, mä bote apnaqirit parltʼañäni. Kunjamatix thayan nuktʼatax quta thiyar mistuxa, ukhamarakiw qullan ajayux Diosar wiñay luqtañatakix yanaptʼistaspa. Ukampis quta lakar chiqaki mistuñatakixa, boten velapax yäpar uchatäñapawa. Ukatxa janirakiw Supayan apnaqat akapach thayampix apayasiñ munktanti (1 Cor. 2:12). Uka jan wali thayampi jan apayasiñatakixa, Diosan Arupampi ukat markapampi irpayasiñasawa.

18. ¿Kunatakis chʼamachasiñasa, ukat kunatsa?

¹⁸ Jumatï Jehová Diosan Qhanañchirinakapampi Bibliat yatiqaskta ukat tantachäwinakarus sarxaraksta, ukampis janïr bautisatäksta ukhaxa, akham jisktʼasiñamawa: “¿Kunas Diosar katuyasisin bautisasiñat jarkʼaskitu?” sasa. Ukat Diosan munañapax kunjamsa qullan ajayu tuqix phuqasi uk amuysta ukat ukax jumataki askïchi ukhaxa, janiw pächasiñamäkiti, kuntï yatkta ukarjam phuqañamawa. Ukhamatwa Jehová Diosax wal bendicïtamxa, ukat taqi chuymaw qullan ajayu churätamxa. Ukampis jumax bautisatästa ukat walja maranak luqtaskta ukhaxa, kunjamsa Jehová Diosax qullan ajayu tuqix yanaptʼawaytam ukat jan walinakansa wayxäsiwaytam ukxa wal amuyaspachätaxa. Ukampis qullan ajayurjam sarnaqaskakïta ukhaxa, wiñayapuniw Jehová Diosax uka qullan ajayu tuqix sum uñjaskätamxa. Ukhamasti, ¡Dios Awkisan qullan ajayuparjam sarnaqaskakiñäni!

¿Kuns yatiqawaytanxa?

• ¿Kunjamatsa qullan ajayurjam sarnaqsna?

• Qullan ajayurjam sarnaqaskakiñatakixa, ¿kunas yanaptʼistaspa?

• Diosar katuyasisin arsuwayktan ukanakxa, ¿kunjamatsa phuqsna?

[Jisktʼanaka]

[15 janan fotopa]

Mä yapuchirjamaw chuymas wakichañasa

[16, 17 jananakan fotonakapa]

Diosan qullan ajayupampix yanaptʼayasisktanti?