Maglakat Suno sa Espiritu kag Tumana ang Imo Dedikasyon
Maglakat Suno sa Espiritu kag Tumana ang Imo Dedikasyon
“Padayon sa paglakat suno sa espiritu kag indi gid kamo magahimo sang undanon nga kailigbon.”—GAL. 5:16.
1. Ano nga pagbawtismo ang natabo sang Pentecostes?
SANG Pentecostes 33 C.E., ang mga sumulunod ni Jesus ginbawtismuhan sa balaan nga espiritu amo nga nakahambal sila sing lainlain nga lenguahe. Nagpasundayag sila sing milagruso nga dulot sang espiritu. (1 Cor. 12:4-10) Ano ang nangin epekto sining dulot kag sang pamulongpulong ni apostol Pedro? Madamo ang “napilasan [sa] ila tagipusuon.” Napahulag sila sa ginsiling ni Pedro amo nga naghinulsol sila kag nagpabawtismo. Ang rekord nagasiling: “Ang mga nagbaton sang iya pulong sing tinagipusuon ginbawtismuhan, kag sa amo nga adlaw mga tatlo ka libo ka kalag ang gindugang.” (Binu. 2:22, 36-41) Subong sang ginsiling ni Jesus, dapat sila magpabawtismo sa tubig sa ngalan sang Amay, sang Anak, kag sang balaan nga espiritu.—Mat. 28:19.
2, 3. (a) Ipaathag ang kinatuhayan sang bawtismo sa balaan nga espiritu kag bawtismo sa ngalan sang balaan nga espiritu. (b) Ngaa dapat magpabawtismo sa tubig ang tanan nga matuod nga Cristiano karon?
2 Apang, may kinatuhayan bala ang bawtismo sa balaan nga espiritu kag ang bawtismo sa ngalan sang balaan nga espiritu? Huo. Ang mga nabawtismuhan sa balaan nga espiritu nabun-ag liwat subong ginpanganak sang espiritu nga mga anak sang Dios. (Juan 3:3) Ginhaplas sila agod mangin kaupod nga mga hari kag mga saserdote sa langitnon nga Ginharian sang Dios, kag bahin sila sang espirituwal nga lawas ni Cristo. (1 Cor. 12:13; Gal. 3:27; Bug. 20:6) Gani, ini nga bawtismo—ang bawtismo sa balaan nga espiritu—ginahimo ni Jehova sugod pa sang Pentecostes, kon magpili sia sang mga indibiduwal nga mangin kaupod nga mga manunubli ni Cristo. (Roma 8:15-17) Apang kamusta naman ang bawtismo sa ngalan sang balaan nga espiritu nga ginahimo sing regular sa mga asembleya kag mga kombension sang mga Saksi ni Jehova sa karon?
3 Ang pagpabawtismo sa tubig isa ka tikang nga ginahimo sang matuod nga mga Cristiano subong simbulo sang ila tinagipusuon nga dedikasyon kay Jehova nga Dios. Ginahimo ini sang mga nakabaton sang langitnon nga pagtawag. Ang pagpabawtismo sa tubig importante man nga tikang nga dapat himuon sang minilyon ka lalaki kag babayi sining moderno nga tion nga may paglaum nga mabuhi sing walay katapusan sa duta. Ano man ang paglaum sang isa ka tawo, ang pagpabawtismo sa tubig sa ngalan sang Amay kag sang Anak kag sang balaan nga espiritu isa ka importante nga tikang nga dapat himuon sang isa agod batunon sia sang Dios. Gani ang tanan nga bawtismado nga Cristiano ginapaabot nga ‘padayon nga maglakat suno sa espiritu.’ (Basaha ang Galacia 5:16.) Nagalakat ka bala suno sa espiritu kag ginatuman ang imo dedikasyon?
Kon Ano ang Kahulugan sang “Paglakat Suno sa Espiritu”
4. Ano ang kahulugan sang “paglakat suno sa espiritu”?
4 Ang “paglakat suno sa espiritu” nagakahulugan sang pagtugot sa balaan nga espiritu nga magpanghikot kag magtuytoy sa imo kabuhi. Buot silingon, nagapatuytoy ka sa sini sa imo adlaw-adlaw nga mga hilikuton. Ginapakita sang Galacia kapitulo 5 ang kinatuhayan sang isa nga nagapatuytoy sa balaan nga espiritu kag sang isa nga nagapaimpluwensia sa unod.—Basaha ang Galacia 5:17, 18.
5. Ano nga mga buhat ang imo malikawan kon nagapatuytoy ka sa balaan nga espiritu?
5 Kon nagapatuytoy ka sa balaan nga espiritu, ginatinguhaan mo nga likawan ang mga buhat sang unod. Nalakip sa sini ang “pagpakighilawas, kahigkuan, lugak nga paggawi, idolatriya, espiritismo, pag-ilinaway, pinuyas, kaimon, pagsilabo sang kaakig, pagbaisay, pagbinahinbahin, mga sekta, kahisa, pagpahubog, magansal nga kinalipay.” (Gal. 5:19-21) Sa malaragwayon nga paagi, “ginapatay [mo] ang mga buhat sang lawas paagi sa espiritu.” (Roma 8:5, 13) Makabulig ini sa imo sa pagsentro sang imo hunahuna sa mga butang sang espiritu kag magkooperar sa panuytoy sini sa baylo nga magpakontrol sa mga kailigbon sang unod.
6. Iilustrar kon ano ang kinahanglan agod mapadayag naton ang mga bunga sang espiritu.
6 Kon ang balaan nga espiritu nagapanghikot sa imo, mapadayag mo ang diosnon nga mga kinaiya, “ang mga bunga sang espiritu.” (Gal. 5:22, 23) Apang, nagakinahanglan ini sang imo pagpanikasog. Binagbinaga ini nga ilustrasyon: Ang isa ka mangunguma nagakultibar sang iya uma. Siempre pa, kinahanglan niya ang silak sang adlaw kag ang tubig; kay kon wala ini, wala sia sing anihon. Mahimo naton ipaanggid ang balaan nga espiritu sa silak sang adlaw. Kinahanglan naton ang balaan nga espiritu agod mapadayag naton ang mga bunga sang espiritu. Apang, ano ang mapatubas sang mangunguma kon indi sia magpangabudlay? (Hulu. 10:4) Huo, kon luyag mo nga makapatubas sing de-kalidad nga mga bunga sang espiritu, dapat mo kultibahon sing maayo ang duta sang imo tagipusuon. Gani pamangkuta ang imo kaugalingon, ‘Ginatugutan ko bala ang balaan nga espiritu nga magpatubas sang mga bunga paagi sa akon pagpanghikot nahisuno sa sini?’
7. Ngaa importante gid ang pagtuon kag pagpamalandong kon luyag mo palambuon ang mga bunga sang balaan nga espiritu?
7 Agod makapatubas sing bugana nga ani ang mga mangunguma, kinahanglan nila ang tubig sa ila mga pananom. Sing kaanggid, agod makapalambo ka sang mga bunga sang espiritu, kinahanglan mo ang tubig sang kamatuoran nga masapwan sa Biblia kag matigayon paagi sa Cristianong kongregasyon sa karon. (Isa. 55:1) Ayhan madamo ka na sang nasugiran nga ang Balaan nga Kasulatan produkto sang balaan nga espiritu. (2 Tim. 3:16) Dugang pa, ang matutom kag mainandamon nga ulipon nag-aman sang kinahanglanon nga paathag tuhoy sa putli nga tubig sang kamatuoran sa Biblia. (Mat. 24:45-47) Maathag ang ginapahangop sini. Agod matuytuyan kita sang balaan nga espiritu, dapat naton basahon kag pamalandungan ang Pulong sang Dios. Kon ginahimo mo ina, ginailog mo ang mga manalagna nga ‘maukod nga nag-usisa kag mahalungon nga nagpanalawsaw’ sa mga impormasyon nga ginhatag sa ila. Talalupangdon gid nga bisan ang mga anghel nagpakita sing hanuot nga interes sa espirituwal nga mga kamatuoran tuhoy sa ginsaad nga Binhi kag sa hinaplas nga Cristianong kongregasyon.—Basaha ang 1 Pedro 1:10-12.
Gintuytuyan sang Espiritu—Paano?
8. Ngaa importante nga mangayo ka kay Jehova sang iya balaan nga espiritu?
8 Indi lamang pagtuon kag pagpamalandong sa Kasulatan ang dapat mo himuon. Kinahanglan nga padayon ka nga mangayo sang bulig kag panuytoy kay Jehova. Sarang sia “makahimo sing labaw gid sa tanan nga butang nga aton ginapangayo ukon ginahunahuna.” (Efe. 3:20; Luc. 11:13) Apang, ano ang imo isabat kon may mamangkot, “Ngaa dapat ako magpadayon sa pagpangamuyo kon nahibaluan na sang Dios ang ‘mga butang nga kinahanglan ko antes pa ako mangayo sa iya’?” (Mat. 6:8) Bangod ang pagpangayo sang balaan nga espiritu, nagapakita nga nagasandig ka kay Jehova. Halimbawa, kon may nagapabulig sa imo, indi bala nga himuon mo ang imo bug-os nga masarangan agod buligan sia? Ang isa ka rason bangod sia mismo ang nangayo sing bulig sa imo, kag nagapakita ina nga may pagsalig sia sa imo. (Ipaanggid ang Hulubaton 3:27.) Sing kaanggid, nahamuot si Jehova kon mangabay ka sa iya sang balaan nga espiritu, kag pat-od gid nga ihatag niya ini sa imo.—Hulu. 15:8.
9. Paano ang pagtambong sa Cristianong mga miting makabulig sa imo nga matuytuyan ka sang espiritu sang Dios?
9 Nahibaluan mo man nga ginatuytuyan kita ni Jehova sang iya espiritu paagi sa aton mga miting, asembleya, kag mga kombension. Importante gid nga panikasugan naton nga makatambong kag makakonsentrar sa mga programa. Ang paghimo sini makabulig sa imo nga mahangpan “ang madalom nga mga butang sang Dios.” (1 Cor. 2:10) May mga benepisyo man kon nagakomento ka sing regular sa mga miting. Kamusta ang mga miting nga gintambungan mo sang nagligad nga apat ka semana? Makapila ka magbayaw sang imo kamot para magkomento agod ipabutyag ang imo pagtuo? May nakita ka bala nga puede mo pauswagon sa sini? Kon may yara, tinguhai nga mahimo mo ini sa masunod nga mga semana. Makita ni Jehova ang imo kahanda sa pagpakigbahin sa sini kag hatagan ka niya sang iya balaan nga espiritu nga magabulig sa imo agod labi ka nga makabenepisyo sa mga miting.
10. Ang paglakat suno sa espiritu nagadalahig sang pagpaambit sang ano nga imbitasyon sa iban?
10 Ang paglakat suno sa espiritu nagalakip sa pagbaton sang pangagda nga mabasa naton sa Bugna 22:17: “Ang espiritu kag ang nobya padayon nga nagasiling: ‘Kari!’ Kag ang bisan sin-o nga nagapamati magsiling: ‘Kari!’ Kag ang bisan sin-o nga ginauhaw magkari; ang bisan sin-o nga luyag magkuha sang tubig sang kabuhi nga wala sing bayad.” Ang espiritu, nga nagapanghikot paagi sa hinaplas nga nobya nga grupo, amo ang nagapaambit sini nga imbitasyon nga magkuha sang tubig sang kabuhi. Kon ginbaton mo ang pangagda nga “kari!” determinado ka man bala nga magsiling, “Kari!”? Isa gid ka daku nga pribilehiyo nga makapakigbahin sa sining nagaluwas-kabuhi nga hilikuton!
11, 12. Paano ang balaan nga espiritu nadalahig sa pagbantala nga hilikuton?
11 Ining importante nga hilikuton ginahimo karon sa idalom sang panuytoy sang balaan nga espiritu. Nahibaluan naton kon paano ang balaan nga espiritu nadalahig sang unang siglo sa pagbukas sang bag-o nga mga teritoryo para sa mga misyonero. Si apostol Pablo kag ang iya mga kaupdanan “gindumilian . . . sang balaan nga espiritu nga magsugid sang pulong sa distrito sang Asia.” Wala man sila gintugutan nga magkadto sa Bitinia. Wala kita makahibalo kon paano sila ginpunggan sang espiritu sa pagkadto didto, apang maathag nga gintuytuyan si Pablo sang espiritu nga magkadto sa masangkad nga latagon sang Europa. Nakabaton sia sing palanan-awon tuhoy sa isa ka lalaki nga taga-Macedonia nga nagapangayo sing bulig.—Binu. 16:6-10.
12 Sa karon, ang espiritu ni Jehova nagatuytoy man sa pagbantala nga hilikuton sa bug-os nga kalibutan. Si Jehova wala na nagagamit sing milagruso nga mga palanan-awon sa karon, apang ginatuytuyan niya ang mga hinaplas paagi sa iya balaan nga espiritu. Kag ini nga espiritu ang nagapahulag sa mga kauturan nga lalaki kag babayi nga himuon ang tanan nila nga masarangan sa pagbantala kag pagpanudlo. Wala sing duhaduha nga nagapakigbahin ka na sa sining importante nga hilikuton. Apang, mapauswag mo pa bala ang imo pagpakigbahin sa sini?
13. Paano ka makapasakop sa panuytoy sang balaan nga espiritu? Maghatag sing halimbawa.
13 Mapakita mo nga nagapasakop ka sa panuytoy sang balaan nga espiritu kon ginaaplikar mo ang mga impormasyon nga gin-aman para sa katawhan sang Dios. Binagbinaga ang halimbawa sang pamatan-on nga si Mihoko nga taga-Japan. Subong bag-uhan nga payunir, nagbatyag sia nga indi sia kalipikado sa pagduaw liwat bangod indi sia makahibalo kon paano makuha ang interes sang tagbalay. Sa sina nga tion, Ang Aton Ministeryo sa Ginharian nag-aman sing epektibo nga mga panugda kon paano maghimo sing malip-ot nga mga pagduaw liwat. Sa sini man nga tion gin-imprinta ang brosyur nga Isa ka Makaalayaw nga Kabuhi—Kon Paano Ini Maagom kag epektibo gid ini sa Japan. Ginsunod ni Mihoko ang mga panugda kon paano gamiton ang brosyur, ilabi na kon paano maghimo sing malip-ot nga mga pagduaw liwat. Wala madugay nakahiwat na sia sang mga pagtuon sa Biblia pati sa mga wala anay nagbaton. Nagsiling sia, “Madamo na ako sing ginatun-an sa Biblia—nakalab-ot na sa 12—kag may iban pa nga nagahulat sa akon listahan!” Huo, kon maglakat ka suno sa espiritu kag iaplikar mo ang mga panuytoy nga ginahatag sa mga alagad ni Jehova, makatigayon ka sing madamo nga benepisyo.
Magsandig sa Espiritu sang Dios
14, 15. (a) Paano matuman sang di-himpit nga mga tawo ang ila dedikasyon? (b) Paano ka makatigayon sang pinakamaayo nga mga abyan?
14 Subong ordenado nga ministro, may yara ka ministeryo nga dapat tumanon. (Roma 10:14) Ayhan nagabatyag ka nga indi ka kalipikado sa pagtuman sang imo responsibilidad. Apang, pareho sa mga hinaplas, ang imo pagkakalipikado naggikan man sa Dios. (Basaha ang 2 Corinto 3:5.) Paagi sa paghimo sang imo bug-os nga masarangan kag sa pagsandig sa espiritu sang Dios, matuman mo ang imo dedikasyon.
15 Ang matuod, indi mahapos para sa aton nga di-himpit nga mga tawo nga tumanon ang aton dedikasyon sa aton himpit nga Dios, si Jehova. Mahimo nga ang pila sang imo mga kaupdanan anay matingala sa imo bag-o nga paagi sang pagkabuhi kag ‘magapakalain sa imo.’ (1 Ped. 4:4) Apang, dumduma nga ang imo bag-o nga mga abyan amo ang labing importante nga mga persona, si Jehova kag si Jesucristo. (Basaha ang Santiago 2:21-23.) Importante man nga makilala mo ang mga kauturan nga lalaki kag babayi sa inyo lokal nga kongregasyon nga bahin sang ‘bug-os kalibutan nga paghiliutod.’ (1 Ped. 2:17; Hulu. 17:17) Paagi sa iya espiritu, buligan ka ni Jehova nga makatigayon sang mga abyan nga mangin maayo nga impluwensia sa imo.
16. Ngaa mahimo ka ‘mahamuot sa mga kaluyahon’ kaangay ni Pablo?
16 Bisan pa may yara ka maayo nga mga abyan sa kongregasyon, indi ka gihapon hilway sa mga problema. Kon kaisa mahimo ka makaatubang sang mga kabudlayan nga makapaluya sa imo kag mahimo magbatyag ka nga daw wala na ini sing katapusan. Amo ina ang tion nga ilabi na nga dapat ka magdangop kay Jehova kag mangabay sang iya balaan nga espiritu. “Kon maluya ako,” sulat ni apostol Pablo, “nian mabaskog ako.” (Basaha ang 2 Corinto 4:7-10; 12:10.) Nahibaluan ni Pablo nga ang espiritu sang Dios makabulig sa tawo nga mabatuan ang iya mga kaluyahon. Gani, ang aktibo nga puersa sang Dios makapabaskog sa imo sa tion nga maluya ka kag nagakinahanglan sing bulig. Si Pablo nagsulat nga “nahamuot [sia] sa mga kaluyahon.” Sa mga tion nga maluya sia nabatyagan niya nga ang balaan nga espiritu nagapanghikot sa iya. Kaangay ni Pablo, mahimo mo man maeksperiensiahan ang bulig sang balaan nga espiritu!—Roma 15:13.
17. Paano ang balaan nga espiritu makabulig sa imo nga malab-ot ang imo tulumuron?
17 Kinahanglan naton ang espiritu sang Dios agod matuman naton ang aton dedikasyon sa iya. Hunahunaa nga isa ikaw ka kapitan sang de-layag nga barko. Ang imo tulumuron amo nga alagaron si Jehova sing walay katapusan. Ang balaan nga espiritu mapaanggid mo sa hangin nga ginapaayunan mo para makalab-ot ka sa imo destinasyon nga hilway sa katalagman. Pat-od gid nga indi mo luyag nga palidpaliron ka sang espiritu sang kalibutan ni Satanas. (1 Cor. 2:12) Dapat mo kilalahon kon ano ang husto nga hangin kag magpaayon ka sa sini. Ina amo ang balaan nga espiritu. Paagi sa Pulong sang Dios kag sa organisasyon nga ginatuytuyan sang iya espiritu, magiyahan ka sang balaan nga espiritu sa husto nga direksion.
18. Ano ang imo determinasyon sa karon, kag ngaa?
18 Kon nagatuon ka sang Biblia upod sa mga Saksi ni Jehova kag nagapakig-upod na sa ila apang wala ka pa nakahimo sing importante nga tikang sa pagdedikar kag pagpabawtismo, pamangkuta ang imo kaugalingon, ‘Ngaa nagapangalag-ag pa ako?’ Kon ginakilala mo ang papel sang balaan nga espiritu sa pagtuman sang kabubut-on ni Jehova sa karon kag ginaapresyar ang pagpanghikot sini, himua ang tikang nga nahibaluan mo nga husto. Si Jehova magapakamaayo sa imo sing bugana. Maalwan sia nga magahatag sang iya balaan nga espiritu sa imo. Kon madugay ka na nga nabawtismuhan, pat-od nga naeksperiensiahan mo na ang panuytoy sang balaan nga espiritu. Nakita mo kag nabatyagan kon paano ka ginapabakod sang Dios paagi sa iya espiritu. Huo, padayon mo ina nga maeksperiensiahan, tubtob sa walay katubtuban, kon determinado ka nga padayon nga maglakat suno sa balaan nga espiritu.
Madumduman Mo Bala?
• Ano ang kahulugan sang “paglakat suno sa espiritu”?
• Ano ang makabulig sa imo nga ‘magpadayon sa paglakat suno sa espiritu’?
• Paano mo matuman ang imo dedikasyon?
[Mga Pamangkot sa Pagtinuon]
[Retrato sa pahina 15]
Ang pagkultibar sa duta sang imo tagipusuon nagakinahanglan sing panikasog
[Retrato sa pahina 17]
Ginatuytuyan ka bala sang espiritu sang Dios?
