Thlarauva Awmin, I Inpumpêkna Milin Nung Rawh
Thlarauva Awmin, I Inpumpêkna Milin Nung Rawh
“Thlarauvah awm rawh u, tichuan tisa châkna chu in zâwm dâwn lo nia.”—GAL. 5:16.
1. Pentikost nî khân eng baptisma channa nge thleng?
PENTIKOST nî, C.E. 33-a Isua hnungzuitute ṭawng danga an ṭawng khân thlarau thianghlima baptisma chang zo hlim an ni a. Thlarau thilpêk mak tak an dawn chu an lantîr a ni. (1 Kor. 12:4-10) Chu thilpêk leh tirhkoh Petera thusawi chuan nghawng eng nge a neih? Mi tam tak chu “an thinlunga chhun ang an lo ni ta a.” Anni chuan Petera fuihna anga lo simin, baptisma an chang a ni. Hmân lai thil thleng chhinchhiah chuan: “A thu zâwm apiangin baptisma an chang ta a; chu mi niah chuan mi sângthum lai belhchhahin an awm,” tiin a sawi. (Tirh. 2:22, 36-41) Isua thupêk angin, anni chuan Pa leh Fapa leh thlarau thianghlim hmingin tuiah baptisma an chang ngei ang.—Mt. 28:19.
2, 3. (a) Thlarau thinghlima baptis tih leh thlarau thianghlim hminga baptis tih inan lohna sawifiah rawh. (b) Engvângin nge tûn laia Kristian dik lo ni ta apiangte chu tuia baptisma chang tûra beisei an nih?
2 Thlarau thianghlima baptis tih leh thlarau thianghlim hminga baptis tih hi thil inang a ni em? Ni lo ve. Thlarau thianghlima baptis-te chu Pathian thlarau lam fate ni tûra thlarauva hrin nawn an ni a. (Joh. 3:3) Nakina Pathian vân lam Lalrama lal leh puithiamte ni tûrin hriak thih an ni a, Krista thlarau lam taksa pêngte an ni. (1 Kor. 12:13; Gal. 3:27; Thup. 20:6) Chuvângin, chu baptisma—thlarau thianghlima baptis—chu Pentikost nî leh a hnua Pathian Jehova’n Krista ro luahpuitu tûrte a thlan ṭuma a baptis kha a ni. (Rom 8:15-17) A nih leh, tûn laia Pathian Jehova mite inkhâwmpuia neih ṭhîn thlarau thianghlim hminga tuia baptis hi eng tihna nge ni ve ta ang?
3 Tuia baptisma chan hi Kristian dikte’n Pathian Jehova hnêna an inpumpêk pumhlûmzia târ lanna a ni a. Van lam kohna dawngtute chuan tuiah baptisma an chang a ni. Mahse, tûn laia mi maktaduai tam tak, leia chatuana nun beiseina neitute tân pawh tuia baptisma chan chu a ṭûl bawk. Mi chuan vân lam beiseina a nei emaw, lei lam beiseina a nei emaw pawh ni se, Pathian pawm tlâka a rawng bâwl tûr chuan Pa leh Fapa leh thlarau thianghlim hminga baptisma a chan ngei a ngai a. Chutianga baptisma chang Kristian zawng zawngte chu “thlarauvah awm” reng tûra beisei an ni. (Galatia 5:16 chhiar rawh.) Thlarauva awmin, i inpumpêkna milin i nung em?
‘Thlarauva awm’ Tih Awmzia Chu
4. ‘Thlarauva awm’ tih awmzia chu eng nge ni?
4 ‘Thlarauva awm’ tihah chuan i chunga thlarau thianghlim hna thawh dân pawm a, i nuna inthununtîrna a tel a. Kawng danga sawi chuan, i nî tin thiltihah thlarau thianghimin a thunun che tihna a ni. Galatia bung 5-na chuan thlarau thianghlim kaihhruaia awm leh tisa kaihhruaia awm inan lohna a târ lang a ni.—Galatia 5:17, 18 chhiar rawh.
5. Thlarau lam thilte inkaihhruaitîrnaah chuan eng thil pumpelh nge tel?
5 Thlarau thianghlim kaihhruaina hnuaia i awm chuan tisa thiltihte pumpelh dân i zâwng ṭhîn. Tisa thiltihte zîngah chuan “inngaihna te, bawlhhlawhna te, hurna te, milem biakna te, dawithiamna te, huatna te, inhauna te, thîkna te, thinurna te, inkhinna te, awm hranna te, rin hranna te, îtsîkna te, zu ruihna te, zu hmun hlimna te,” a tel a ni. (Gal. 5:19-21) Tisa thiltihte pumpelh tih awmzia chu ‘taksa thiltihte thlarauvah i tihlum ṭhin’ tihna ang a ni a. (Rom 8:5, 13) Chu chuan i rilru chu thlarau lam thil ngaihtuah tûr leh tisa lam thilte ni lova, thlarau lam thilte inkaihhruaitîr zâwk tûrin a ṭanpui ang che.
6. Thlarau rah lan chhuahtîr tûra thil pawimawh chu sawi la, entîrna pe rawh.
6 Thlarau thianghlimin i chunga hna a han thawh chuan, Pathian mizia ang, “thlarau rah” chu i lantîr ta ṭhîn a. (Gal. 5:22, 23) Mahse, i thawhrim a ngai tih i hria a ni. Entîr nân: Lo neitu chuan a lovah thlai a chîng a. Ni êng leh tui a mamawh a ni; chu mi tel lo chuan thlai thar a beisei thei lo. Thlarau thianghlim chu ni êng nên kan tehkhin thei a. Thlarau rah târ lang tûr chuan thlarau thianghlim kan mamawh a ni. Mahse, lo neitu thawhrimna tel lo chuan eng thil nge thar thei ang? (Thuf. 10:4) Ni e, i thinlung lei i enkawl dân chuan nangmaha thlarau thianghlimin rah a chhuah ṭhat dân leh a chhuah tam lamah kawng ro a su hle. Chuvângin, ‘thlarau thianghlim kaihhruai dân ang zêla awmin, keimaha a rah chhuahtîr chu ka phal em?’ tiin inzâwt ang che.
7. Thlarau thianghlim rah chhuah tûrin engvângin nge chhiar leh chhût ngun a pawimawh êm êm?
7 Thlai thar ṭha tak seng tûr chuan, lo neitu chuan a thlaite chu tui a pêk a ngai bawk a. Thlarau rah nei tûr chuan Bible leh tûn lai Kristian kohhran kal tlanga hmuh thutak tui chu i neih a ngai a ni. (Is. 55:1) Mi tam tak hnênah Pathian Lehkha Thu Thianghlim chu thlarau thianghlim thâwk khuma pêk a nihzia i hrilh tawh pawh a ni thei. (2 Tim. 3:16) Chu bâkah, bâwih rinawm, fing tak pâwl pawhin kan mamawh êm êm Bible thutak tui thiang tak hriat thiamna min pe bawk. (Mt. 24:45-47) A kawh tum chu a chiang a ni. Thlarau thianghlim kaihhruaia awm tûr chuan Pathian Thu kan chhiarin, kan chhût ngun tûr a ni tih chu. Chutianga i tih chuan, thute ‘zawng a, ngun taka chhui ṭhîn,’ zâwlneite i entawn tihna a ni. Vântirhkohte pawhin thutiam Thlah leh hriak thih Kristian kohhranho chungchânga thlarau lam thutak chu an ngaihsak hle tih chu chhinchhiah tlâk tak a ni.—1 Petera 1:10-12 chhiar rawh.
Engtin Nge Thlarau Kaihhruaia Kan Awm?
8. Engvângin nge Pathian Jehova hnêna a thlarau i dîl chu a pawimawh?
8 Chu chu Pathian Lehkha Thu zir leh chhût ngunna mai a ni lo. Pathian Jehova ṭanpuina leh kaihhruaina i dîl chhunzawm zêl a ngai a. Ani chu “kan dîl leh kan ngaihtuah zawng zawng aia nasa zâwk titheitu” a ni. (Eph. 3:20; Lk. 11:13) Mahse, mi tuemawin, “Pathian chuan ‘amah ka dîl hmain engte nge ka mamawh tih’ a hriat reng si chuan, engvângin nge kan dîl zawm zêl ang?” ti ta se, engtin nge i chhân ang? (Mt. 6:8) Kawng khatah chuan, thlarau thianghlim i dîl hian, Pathian Jehova chunga i innghahzia i pawm tihna a ni. Entîr nân, mi tuemaw chu i ṭanpui ngaiin awm ta se; nangmah a rinchhanzia che târ langa, ṭanpuina a dîl che a nih chauhvin theih tâwp i chhuah ang. (Thufingte 3:27 nên khaikhin rawh.) Chutiang bawkin, Pathian Jehova chuan a thlarau i dîl chu a lâwm a, a pe bawk ang che.—Thuf. 15:8.
9. Engtin nge Kristian inkhâwma telna chuan Pathian kaihhruaia awm tûra a ṭanpui theih che?
9 Pathian thlarau kaihhruaia awmna kawng dang lehah chuan kan inkhâwmte leh inkhâwmpuite a tel tih kan hre thiam thei a. Chuta tel tûra theih tâwp chhuah leh thusawite ngun taka ngaihthlâk chu a pawimawh hle. Chutianga tihna chuan “Pathian thu ril” pawh hre thiam tûrin a ṭanpui ang che. (1 Kor. 2:10) Chhânna pêk ziah pawh a ṭangkai bawk. Chawlhkâr li kal taa i inkhâwm te chu han ngaihtuah lêt teh. Engtianga zingin nge kut i phar a, chhânna i pêk a, i rinna i sawi chhuah? He mi chungchângah hian hmasâwn i ṭûlna lai i hmu em? I hmuh chuan, chûng i thiltih tûrte chu chawlhkâr lo awm tûrahte hian tih tum tlat rawh. Pathian Jehova chuan tel i inhuamna chu a hmuin, a thlarau a pe ang che a, chu chuan inkhâwmna hlâwkpui lehzual tûrin a ṭanpui ang che.
10. Thlarauva awmnaah chuan mi dangte hnêna eng sâwmna pêk chhuah nge tel?
10 Thlarauva awmnaah chuan Thu Puan 22:17-a hmuh: “Thlarau leh mo chuan, ‘Lo kal rawh,’ an ti a. A hria apiangin ‘Lo kal rawh,’ ti rawh se. Tuihâl apiang lo kal rawh se; a duh apiangin nunna tui hi athlâwnin la rawh se,” tih sâwmna chhân lêtna a tel a ni. Thlarau chuan hriak thih mo pâwl kal tlangin nunna tui chungchânga sâwmna chu a sem chhuak a. “Lo kal rawh,” tih sâwmna chu i pawm tawh a nih chuan, mi dangte pawh “Lo kal rawh,” tia sâwm lehchhâwn chu i tum tlat em? He nun chhanhimna hnaa tel ve chu chanvo ropui a va ni êm!
11, 12. Engtin nge thu hrilh rawngbâwlnaah thlarau thianghlim a tel ve?
11 Chu rawngbâwlna pawimawh tak chu tûnah hian thlarau thianghlim kaihhruaina hnuaiah hlen chhuah mêk a ni a. Kum zabi khatnaa missionary-te tâna bial thar hawnnaah thlarau thianghlimin a ṭanpui dân chu kan hre tawh a. Tirhkoh Paula leh a ṭhiante chu “thlarau thianghlimin Asia rama thu [an] hril a khap” a; Bethunia rama an hril pawh a khap bawk a. Chu mi rama an kal tûr thlarauvin a dan dân chiah chu kan hre lo; mahse, thlarau chuan Paula chu Europe ram thu hrilh theihna hmun zau tak lamah a hruai zâwk tih chu a chiang hle a. Ani chuan inlârnain Makedonia mi pakhat ṭanpuina dîl chu a hmu a ni.—Tirh. 16:6-10.
12 Chutiang bawkin, tûn laiah pawh Pathian Jehova thlarau chuan khawvêl pum huap thu hrilhna chu a kaihruai a. Kaihhruaina pêk nân Pathian Jehova chuan inlârna a pe tawh lo va, hriak thihte chu a thlarau thianghlimin a kaihruai zâwk a ni. Tin, thlarau chuan unaute chu thuhrilh leh zirtîra siamnaa an theih apiang ti tûrin a chêttîr bawk. Nang pawh he rawngbâwlna pawimawh takah hian i tel ngei a rinawm. He rawngbâwlna phûrawm takah hian i tel tam lehzual thei ang em?
13. Engtin nge thlarau thianghlim kaihhruaina hnuaiah i intukluh theih? Entîrna pe rawh.
13 Pathian mite hnêna thu pêk chhuahte nunpuiin, thlarau thianghlim kaihhruaina hnuaiah i intulût thei a ni. Japan rama tleirâwl pakhat Mihoko-i chungchâng hi han ngaihtuah teh. Ani chu pioneer tîr a nih avângin tlawhkîr nei tûrin tling lo a inti a; in neitu tuina lâk dân thiam lo a inti a ni. Hun a kal zêl chuan tlawhkîr neih dân chungchânga thurâwn ṭangkai tak tak Kan Lalram Rawngbâwlna-ah tihchhuah a ni a. Chutah A Satisfying Life—How to Attain It tih brochure pawh tihchhuah a ni leh bawk a. Chûngte chu Japan ṭawng hmanna bialah chuan a ṭangkai hle a ni. Mihoko-i chuan brochure hman dân tûr chungchânga rawtna, a bîk takin tawi fel taka tlawhkîr neih dân chungchâng rawtna chu a zâwm a. Tichuan, atîra Bible zir hnâwl mai theite chu a zirpui ṭan ta a ni. Ani chuan: “Bible zirpui tam tak ka nei a—ṭum khatah mi 12 lai ka zirpui a—a ṭhen phei chu ka innghahtîr hial a ngai a ni,” tiin a sawi. Ni e, thlarauva i awm a, Pathian Jehova chhiahhlawhte hnêna kaihhruaina pêk i zawm chuan a rah tam tak i seng ngei ang.
Pathian Thlarau Rinchhan Rawh
14, 15. (a) Engtin nge mihring ṭha famkim lote chu an inpumpêkna thutiam mila an nun theih? (b) Engtin nge ṭhian ṭha ber i neih theih?
14 Rawngbâwltu nemngheh i nih angin, rawng bâwl tûr i nei a. (Rom 10:14) Chutiang mawhphurhna hlen tûr chuan tling famkim i inti lo mai thei. Mahse, hriak thihte ang bawkin, a tlintîrtu che chu Pathian a ni a. (2 Korinth 3:5 chhiar rawh.) Theih tâwp chhuah chung leh Pathian thlarau rinchhan tlat chungin, i inpumpêkna thutiam milin i nung thei a ni.
15 Keini mi ṭha famkim lo tân chuan, kan Pathian ṭha famkim Jehova hnêna kan inpumpêkna thutiam hlen chu thil awlsam a ni lo va. I ṭhian lo kawm ṭhin ṭhenkhat chuan i nun dân thar chu mak an tiin, “an sawichhe” mai thei che a ni. (1 Pet. 4:4) Mahse, nun dân thar i neih aṭang chuan, mi pawimawh ber Pathian Jehova leh Isua Krista nên inṭhianna thar i siam tih hre reng ang che. (Jakoba 2:21-23 chhiar rawh.) Tin, khawvêl puma “unau awmhote” zînga mi, in tualchhûng kohhrana unaute hriat chian pawh a pawimawh bawk. (1 Pet. 2:17; Thuf. 17:17) Pathian Jehova chuan a thlarau hmangin nangmah thunun ṭha thei zêltu tûr ṭhiante nei tûrin a ṭanpui ang che.
16. Engvângin nge Paula angin ‘chak lohnaahte kan lâwm’ theih?
16 Kohhrana ṭhian ṭha tam tak nei chung pawhin, nî tina harsatnate hmachhawn chu awlsam i la ti lo cheu thei a. Chûng i thil hmachhawn ngaite chuan nasa taka tihchauh châng che a nei thei a ni. Chu tak chu Pathian Jehova lam hawi a, a thlarau thianghlim dîl i ngaih hun lai tak a ni. Tirhkoh Paula chuan: “Ka chak loh apiangin a ni ka chak ṭhin ni,” tiin a ziak a. (2 Korinth 4:7-10; 12:10 chhiar rawh.) Pathian thlarau chuan mihring chak lohna eng ang pawh a tichak thei tih Paula chuan a hria a. Chuvângin, Pathian chakna thahrui che vêl reng chuan i chak loh hun apiang leh ṭanpui i ngaih hun apiangah a tichak thei che a ni. Paula chuan ‘chak lohnaahte a lâwm’ theih thu a ziak a. A chak loh lai takin thlarau thianghlimin a chungah hna a thawk ṭhîn niin a hria a ni. Nang pawhin chutiang bawk chu i tawng ve thei a ni.—Rom 15:13.
17. Engtin nge thlarau thianghlim chuan i tum ram i panna kawngah a ṭanpui theih che?
17 Pathian hnêna inpumpêkna nun kan neih theih nân a thlarau thianghlim kan mamawh a. Lawnglêng thli ringa kal chia captain angah han inchan teh. I thiltum ber chu chatuana Pathian Jehova rawng bâwl hi a ni a. Thlarau thianghlim chu i tum ram thleng thei tûra hman ṭangkai i duh thli ang a ni. Mahse, Setana khawvêl thlarauvin lehlam lehlama a vawrh kual vêl che chu i duh lo vang. (1 Kor. 2:12) Thli ṭha chu i hriat a, i hman ṭangkai a ngai a tih theih ang. Chu thli ṭha chu thlarau thianghlim hi a ni a. Chu chuan Bible leh Pathian thlarauva kaihhruai inawpna pâwl hmangin kawng dik lamah a hruai ang che.
18. Tûnah hian eng nge i tum tlat a, engvângin nge?
18 Jehova Thuhretute nêna Bible zir a, anmahni nêna inkawmna nuam tak nei si a, inpumpêkna leh baptisma channa ang chi rahbi pawimawh tak chu i la rap hreh a nih chuan, heti hian inzâwt ang che: ‘Engvângin nge ka hreh?’ tiin. Tûn laia Pathian Jehova duh zâwng hlen chhuahnaa thlarau thianghlim hnathawh dân i hriat a, i ngaihhlut bawk chuan, rahbi dik nia i hriat chu rap ngei ang che. Chutianga i tih chuan Pathian Jehova’n malsâwmnain a vûr ang chia, a thlarau thianghlim pawh phal takin a pe bawk ang che. Baptisma i channa a rei tawh a nih chuan, thlarau thianghlim kaihhruaina chu i tawng tawh ngei ang a. Pathianin a thlarauva a tihchak theih dân che chu i hmuin, i hre tawh ngei bawk ang. Chutiang chu i tân a ni kumkhua thei a ni. Chuvângin, thlarauva awm reng chu tum tlat ang che. (w10-E 03/15)
Kan Hre Chhuak Em?
• “Thlarauva awm” tih awmzia chu eng nge ni?
• Engin nge “thlarauva awm” reng tûrin ṭanpui thei che?
• Engtin nge i inpumpêkna thutiam mila i nun theih?
[Zirlai Atâna Zawhnate]
[Phêk 19-naa milem]
I thinlung lei enkawl tûr chuan thawhrim a ngai
[Phêk 20, 21-naa milemte]
Pathian Thlarau kaihhruaiin i awm em?