Sepela ka Moya Gomme o Phelele Boineelo bja Gago

“Tšwelang pele le sepela ka moya gomme le ka se ke la phetha kganyogo ya nama le gatee.”—BAGAL. 5:16.

1. Ke dikolobetšo dife tšeo di bilego gona ka letšatši la Pentekoste?

GE BALATEDI ba Jesu ba be ba bolela ka maleme ka letšatši la Pentekoste ya 33 C.E., e be e le ka morago ga ge ba be ba kolobeditšwe ka moya o mokgethwa. Ba ile ba bonagatša mpho ya moya ya mohlolo. (1 Bakor. 12:4-10) Mafelelo a mpho ye le a polelo yeo Petro a e neilego e bile afe? Ba bantši ba ile “ba hlabega dipelo.” Ka kgothatšo ya Petro, ba ile ba itshola gomme ba kolobetšwa. Pego ya histori e re: “Bao ba amogetšego lentšu la gagwe ka pelo ka moka ba ile ba kolobetšwa, gomme ka letšatši leo gwa okeletšwa meoya e ka bago dikete tše tharo.” (Dit. 2:22, 36-41) Bjalo ka ge Jesu a be a laetše, ba be ba tla kolobetšwa meetseng leineng la Tate, la Morwa le la moya o mokgethwa.—Mat. 28:19.

2, 3. (a) Hlalosa phapano magareng ga go kolobetšwa ka moya o mokgethwa le go kolobetšwa leineng la moya o mokgethwa. (b) Ke ka baka la’ng go letetšwe gore bohle bao e bago Bakriste ba therešo ba kolobetšwe meetseng?

² Lega go le bjalo, na go na le phapano magareng  ga go kolobetšwa ka moya o mokgethwa le go kolobetšwa leineng la moya o mokgethwa? Ee. Bao ba kolobetšwago ka moya o mokgethwa ba tswalwa lefsa e le barwa ba Modimo bao ba tloditšwego ka moya. (Joh. 3:3) Ba a tlotšwa gore e be dikgoši-gotee tša nakong e tlago le baperisita ba tlasana Mmušong wa Modimo wa legodimong gomme ke karolo ya mmele wa moya wa Kriste. (1 Bakor. 12:13; Bagal. 3:27; Kut. 20:6) Ka gona kolobetšo ye—ya go kolobetšwa ka moya o mokgethwa—ke seo Jehofa a se dirilego ka letšatši la Pentekoste le ka morago ga moo, ge a be a kgetha batho gore e be bajabohwa gotee le Kriste. (Baroma 8:15-17) Eupša go thwe’ng ka go kolobetšwa meetseng leineng la moya o mokgethwa, moo ka mehla go diregago dikopanong tše dinyenyane le tše dikgolo tša batho ba Jehofa mehleng ya rena?

³ Go kolobetšwa meetseng ke kgato yeo e tšewago ke Bakriste ba therešo e le pontšho ya boineelo bja bona bjo bo feletšego go Jehofa Modimo. Bao ba biletšwago legodimong le bona ba dira bjalo. Eupša go kolobetšwa meetseng go a nyakega le go banna le basadi ba dimilione ba mehleng yeno, bao ga bjale ba nago le kholofelo ya go phela ka mo go sa felego mo lefaseng. Go sa šetšwe kholofelo yeo motho a nago le yona, go kolobetšwa meetseng leineng la Tate le la Morwa le la moya o mokgethwa ke mogato wo o nyakegago wo motho a swanetšego go o gata e le gore a amogelwe ke Modimo. Go letetšwe gore Bakriste ka moka bao ba kolobetšwago ka tsela ye ba ‘tšwele pele ba sepela ka moya.’ (Bala Bagalatia 5:16.) Na o sepela ka moya gomme ka go rialo wa phelela boineelo bja gago?

Seo se Bolelwago ke go “Sepela ka Moya”

4. Ge e le gabotse, go “sepela ka moya” go bolela’ng?

⁴ Go “sepela ka moya” go akaretša go amogela seo moya o mokgethwa o se dirago go wena, go dumelela moya o mokgethwa gore o go tutuetše. Ka mantšu a mangwe, ke go hlahlwa ke moya o mokgethwa medirong ya gago ya letšatši le letšatši. Bagalatia kgaolo 5 e tšweletša phapano magareng ga go tutuetšwa ke moya o mokgethwa le go tutuetšwa ke nama.—Bala Bagalatia 5:17, 18.

5. Go tutuetšwa ke moya o mokgethwa go akaretša go phema mediro efe?

⁵ Ge o tutuetšwa ke moya o mokgethwa, o nyaka go phema mediro ya nama. Yona e akaretša dilo tše bjalo ka “bootswa, go se hlweke, boitshwaro bjo bo hlephilego, borapedi bja medimo ya diswantšho, go dirišana le meoya, bonaba, tshele, lehufa, go tlalelana ka bogale, diphenkgišano, dikarogano, dihlotswana tša bokgelogi, mona, dikgobokano tša botagwa, menyanya ya mašata.” (Bagal. 5:19-21) Ka kgopolo e itšego, o “bolaya ditlwaelo tša mmele ka moya.” (Baroma 8:5, 13) Seo se tla go thuša go bea monagano wa gago dilong tša moya le go dumelelana le tlhahlo ya wona, go e na le go dumelela gore o hlahlwe ke dikganyogo tša nama.

6. Bontšha seo se nyakegago e le gore re kgone go bonagatša dienywa tša moya.

⁶ Ge moya o mokgethwa o dutše o šoma go wena, o bonagatša dika tšeo di bontšhago gore o boifa Modimo, “dienywa tša moya.” (Bagal. 5:22, 23) Lega go le bjalo, o a lemoga gore seo se nyaka gore o dire boiteko. Ka mohlala: Molemi o a lema. Ke therešo gore mahlasedi a letšatši le meetse di a nyakega; ka ntle le tšona, a ka se ke a buna selo. Re ka swantšha moya o mokgethwa le mahlasedi a letšatši. Moya o mokgethwa o a nyakega gore re bonagatše dienywa tša moya. Lega go le bjalo, ke’ng seo se ka tšweletšwago  ntle le ge molemi a ka šoma ka thata? (Die. 10:4) Ee, tsela yeo ka yona o hlagolelago mobu wa pelo ya gago e bohlokwa tabeng ya mohuta wa dienywa tša moya o mokgethwa le bontši bja tšona ka go wena. Ka gona ipotšiše gore, ‘Na ke dumelela moya o mokgethwa gore o tšweletše dienywa tša wona ka go dirišana le wona?’

7. Ke ka baka la’ng go ithuta le go naganišiša go tloga go le bohlokwa ge e ba o nyaka go hlagolela dienywa tša moya o mokgethwa?

⁷ Le gona, balemi ba swanetše go nošetša dibjalo tša bona gore ba tle ba hwetše puno e botse. E le gore o hlagolele dienywa tša moya, o nyaka meetse a therešo ao a hwetšwago ka Beibeleng le ao a hwetšagalago ka phuthego ya Bokriste lehono. (Jes. 55:1) Go ka direga gore o šetše o boditše batho ba bantši gore Mangwalo a Makgethwa a tšweleditšwe ke moya o mokgethwa. (2 Tim. 3:16) Le gona, sehlopha sa mohlanka yo a botegago le wa temogo se nea kwešišo yeo e tlogago e nyakega ya meetse ao a sekilego a therešo ya Beibele. (Mat. 24:45-47) Seo se hlaloswago mo se a kwagala. E le gore re tutuetšwe ke moya o mokgethwa, re swanetše go bala le go naganišiša ka Lentšu la Modimo. Ge e ba o dira bjalo, o ekiša mehlala e mebotse ya baporofeta bao ba ilego “ba botšišiša ka mafolofolo le go nyakišiša ka tlhokomelo” tsebišo yeo e bego e neilwe. Se re se hlokomelago ke gore gaešita le barongwa ba ile ba bontšha kgahlego e tseneletšego ditherešong tša moya mabapi le Peu e holofeditšwego le phuthego ya Bokriste ya batlotšwa.—Bala 1 Petro 1:10-12.

Go Tutuetšwa ke Moya—Bjang?

8. Ke ka baka la’ng go le bohlokwa go kgopela Jehofa gore a go nee moya wa gagwe?

⁸ Ga se feela taba ya go ithuta Mangwalo le go naganišiša. O swanetše go tšwela pele o kgopela thušo le tlhahlo ya Jehofa. A ka “dira go feta kudu-kudu ka kua ga tšohle tšeo re di kgopelago goba re di naganago.” (Baef. 3:20; Luka 11:13) Lega go le bjalo, o ka araba bjang ge yo mongwe a ka go botšiša gore, “Ke ka baka la’ng ke swanetše go tšwela pele ke kgopela ge e ba Modimo a šetše a tseba ‘gore ke dilo dife tšeo ke di nyakago le pele ke mo kgopela’?” (Mat. 6:8) Ge e le gabotse, lebaka le lengwe ke gore ge o rapelela moya o mokgethwa, o a lemoga gore o ithekgile ka Jehofa. Ka mohlala, ge motho a ka tla go wena gomme a go kgopela thušo, o ka dira sohle seo o ka se kgonago gore o mo thuše, lebaka le lengwe ke gore o go kgopetše go mo thuša a bontšha gore o a go bota. (Bapiša le Diema 3:27.) Ka mo go swanago, Jehofa o a thaba ge o mo kgopela moya wa gagwe gomme o tla go nea wona.—Die. 15:8.

9. Go ba gona dibokeng tša Bokriste go ka go thuša bjang gore o tutuetšwe ke moya wa Modimo?

⁹ O tseba gabotse gore tsela e nngwe yeo ka yona re ka tutuetšwago ke moya wa Modimo e akaretša diboka tša rena, dikopano tše dinyenyane le tše dikgolo. Go dira maiteko a go ba gona le go theetša lenaneo go bohlokwa kudu. Go dira bjalo go go thuša go kwešiša ‘dilo tše di tseneletšego tša Modimo.’ (1 Bakor. 2:10) Le gona go a hola go dula o araba. Nagana ka diboka tšeo o bilego go tšona dibekeng tše nne tše di fetilego. O emišitše letsogo gakae, o nyaka go araba e le gore o bolele ka tumelo ya gago? Na o bona mo o ka kaonefatšago gona tabeng ye? Ge e ba go le bjalo, dira phetho mabapi le seo o tla se dirago dibekeng tše di tlago. Jehofa o tla bona boikemišetšo bja gago bja go tšea karolo gomme o tla go nea moya wa gagwe o mokgethwa woo o tlago go go thuša go holwa kudu ke diboka tšeo o bago go tšona.

10. Go sepela ka moya go akaretša go fetišetša taletšo efe go ba bangwe?

 ¹⁰ Go sepela ka moya go akaretša go arabela taletšong yeo re balago ka yona go Kutollo 22:17, e rego: “Moya le monyadiwa ba tšwela pele ba re: ‘Tlaa!’ Mang le mang yo a kwago a re: ‘Tlaa!’ Mang le mang yo a nyorilwego a a tle; mang le mang yo a ratago a tle a tšee meetse a bophelo ka ntle le tefo.” Moya, wo o šomago ka sehlopha sa monyadiwa sa batlotšwa, ke wona o dirago taletšo ye ya mabapi le meetse a bophelo. Ge e ba o amogetše taletšo ya gore “tlaa!” na le wena o ikemišeditše gore, “Tlaa!”? Ruri ke tokelo go tšea karolo modirong wo wo o phološago maphelo!

11, 12. Moya o mokgethwa o kgatha tema efe modirong wa boboledi?

¹¹ Ga bjale modiro wo o bohlokwa o phethwa ka tlhahlo ya moya o mokgethwa. Re bala mabapi le kamoo moya o mokgethwa o ilego wa akaretšwa ka gona lekgolong la pele la nywaga ge go be go thongwa ditšhemo tše difsa tša baromiwa. Moapostola Paulo le bašomi-gotee le yena ba be “ba ileditšwe ke moya o mokgethwa go bolela lentšu seleteng sa Asia”; e bile ga se ba dumelelwa le go ya Bithinia. Ga re tsebe gabotse gore moya o ba thibetše bjang gore ba se ye mafelong ao, eupša go molaleng gore moya o ile wa hlahla Paulo gore a ye tšhemong e kgolo ya Yuropa. O ile a bona pono ya monna wa Matsedonia a kgopela thušo.—Dit. 16:6-10.

¹² Le lehono, moya wa Jehofa o hlahla modiro wa boboledi wa lefase ka bophara. Ga go na dipono tša mohlolo tšeo di dirišetšwago go nea tlhahlo; go e na le moo Jehofa o hlahla batlotšwa ka moya o mokgethwa. Le gona, moya o hlahla bana babo rena le dikgaetšedi gore ba dire sohle seo ba ka se kgonago modirong wa boboledi le wa go ruta. Ga go pelaelo gore le wena o tšea karolo modirong wo o bohlokwa. Na o ka oketša lethabo la gago modirong wo o thabišago?

13. O ka ikokobeletša tlhahlo ya moya o mokgethwa ka tsela efe? Nea mohlala.

¹³ O ka ikokobeletša tlhahlo ya moya o mokgethwa ka go diriša tsebišo yeo e newago batho ba Modimo. Ela hloko mofsa yo a bitšwago Mihoko wa kua Japane. Ge a thoma go ba mmulamadibogo, o be a thatafalelwa ke go dira maeto a go boela; o be a nagana gore ga a kgone go bolela ka tsela yeo e ka tsošago kgahlego ya mong wa ntlo. Mo e ka bago ka nako yeo, go ile gwa newa ditšhišinyo ka go Tirelo ya Rena ya Mmušo tša kamoo go ka dirwago maeto a go boela a makopana. Ke moka go ile gwa gatišwa poroutšha ya A Satisfying Life—How to Attain It. E ile ya ba sedirišwa se segolo kudu tšhemong ya Japane. Mihoko o ile a diriša ditšhišinyo tšeo di neilwego mabapi le go dirišwa ga poroutšha yeo, kudu-kudu tša kamoo go ka dirwago maeto a go boela a makopana ka gona. Go se go ye kae o ile a thoma dithuto tša Beibele le bao mathomong ba ilego ba gana go swarelwa thuto. O re: “Ke ile ka ba le dithuto tše dintši—tše dintši mo ke bego ke swara tše 12 ka nako e tee—moo ke ilego ka swanelwa ke go beela tše dingwe ka thoko bakeng sa nako e tlago. Ke therešo gore ge o sepela ka moya le go diriša tlhahlo yeo e newago bahlanka ba Jehofa, o tla putswa.

Ithekge ka Moya wa Modimo

14, 15. (a) Go ka kgonega bjang gore batho bao ba sa phethagalago ba phelele boineelo bja bona? (b) O ka hwetša bjang bagwera ba kaone-kaone?

¹⁴ Bjalo ka mohlanka yo a kgethilwego, o na le bodiredi bjoo o swanetšego go bo phetha. (Baroma 10:14) O ka ikwa o sa swanelege ka mo  lekanego go rwala boikarabelo bjoo. Lega go le bjalo, go swana le batlotšwa, go swanelega ga rena go tšwa go Modimo. (Bala 2 Bakorinthe 3:5.) O ka phelela boineelo bja gago ka go dira sohle seo o ka se kgonago le go ithekga ka moya wa Modimo.

¹⁵ Ke therešo gore ka ge re le batho bao ba sa phethagalago, ga go bonolo go phelela boineelo bja rena go Modimo wa rena yo a phethagetšego, Jehofa. Selo se sengwe seo se ka dirago gore go se be bonolo ke gore batho bao o kilego wa tlwaelana le bona ba ka makatšwa ke tsela ya gago e mpsha ya bophelo gomme ba ‘bolela ka wena ka go go goboša.’ (1 Pet. 4:4) Lega go le bjalo, o se ke hlokomologa taba ya gore o thomile go ba le bagwera ba bafsa, ba bohlokwa kudu ke Jehofa le Jesu Kriste. (Bala Jakobo 2:21-23.) Le gona, ke gabohlokwa go tlwaelana le bana babo rena le dikgaetšedi ka phuthegong ya geno, karolo ya “mokgatlo wohle wa bana babo rena” wa lefase ka bophara. (1 Pet. 2:17; Die. 17:17) Jehofa ka moya wa gagwe o tla go thuša gore o be le bagwera bao ba tlago go ba le tutuetšo e botse go wena.

16. Ke ka baka la’ng o ka “thabišwa ke mafokodi” go swana le Paulo?

¹⁶ Gaešita le ge o e-na le bagwera ba babotse ka phuthegong, o sa dutše o ka hwetša go le thata go lebeletšana le ditlhohlo tša letšatši le letšatši. Dilo tšeo o swanetšego go lebeletšana le tšona ka dinako tše dingwe di ka go fetša matla, moo o ikwago eka mathata a gago ga a fele. Yeo ke nako e swanetšego kudu ya gore o retologele go Jehofa, o kgopele moya wa gagwe o mokgethwa. Moapostola Paulo o ngwadile gore: “Ge ke fokola, ke gona ke lego matla.” (Bala 2 Bakorinthe 4:7-10; 12:10.) Paulo o be a tseba gore moya wa Modimo o ka fenya mafokodi a batho, go sa šetšwe gore ke a mohuta mang. Ka gona, matla a Modimo a šomago a ka go matlafatša ge o ikwa o fokola gomme o nyaka thušo. Paulo o ngwadile gore a ka “thabišwa ke mafokodi.” O kwele moya o mokgethwa o šoma go yena nakong ya ge a be a fokola. Le wena o ka ikwa ka tsela e swanago!—Baroma 15:13.

17. Moya o mokgethwa o ka go thuša bjang gore o fihle mo o yago gona?

¹⁷ Re nyaka moya wa Modimo gore re kgone go phelela boineelo bja rena go yena. Inagane o le mosesiši wa sekepe. Pakane ya gago ke go hlankela Jehofa ka mo go sa felego. Moya o mokgethwa o swana le moya o fokago wo o o nyakago bakeng sa go kgorometša sekepe gore o kgone go fihla moo o yago o bolokegile. Ga o nyake go išwa kua le kua ke moya wa lefase la Sathane. (1 Bakor. 2:12) O swanetše go lemoga gore mohuta wa moya wo o lokilego ke ofe gomme o o amogele. Woo ke moya o mokgethwa. Ka Lentšu la Modimo le mokgatlo wa gagwe wo o hlahlwago ke moya, moya o mokgethwa o tla go bontšha tsela e swanetšego.

18. Ke’ng seo o ikemišeditšego go se dira gona bjale, gona ka baka la’ng?

¹⁸ Ge e ba o be o dutše o ithuta le Dihlatse tša Jehofa, o thabela segwera sa moya le tšona eupša o se wa hlwa o tšea kgato e swanetšego ya go ineela le go kolobetšwa, ipotšiše gore, ‘Ke ka baka la’ng ke swanetše go dika-dika?’ Ge e ba o bona tema yeo e kgathwago ke moya o mokgethwa go phethagatšeng thato ya Jehofa lehono gomme o thabela tsela yeo o šomago ka yona, gona o tseba kgato e nepagetšego yeo o swanetšego go e tšea. Jehofa o tla go putsa kudu. O tla go tšhollela moya wa gagwe o mokgethwa ka seatla se se bulegilego. Ge e ba o kolobeditšwe nywageng e sego kae e fetilego goba o e-na le nywaga-some o kolobeditšwe, ga go na pelaelo gore o bone tutuetšo ya moya o mokgethwa. O bone le go kwa kamoo Modimo a ka go matlafatšago ka gona ka moya wa gagwe. O ka tšwela pele o thabela seo—ee, ka mo go sa felego. Ka gona, ikemišetše go tšwela pele o sepela ka moya o mokgethwa.

Na o a Gopola?

• Go “sepela ka moya” go bolela’ng?

• O ka thušwa ke’ng gore o ‘tšwele pele o sepela ka moya’?

• O ka phelela boineelo bja gago bjang?

[Dipotšišo tša Thuto]

[Seswantšho go letlakala 15]

Go hlagolela mobu wa pelo ya gago go nyaka maiteko

[Diswantšho go letlakala 16, 17]

Na o tutuetšwa ke moya wa Modimo?