Imaña pasawaptinchikpas, Diospa favorecesqan kasun

¿HUKMANYANKICHU vidaykipi imapas pasasusqaykiwan? Haykapipas chayqa llapallanchiktam pasawasun. Chaymi allin kanman chaynakuna pasakusqanmanta Bibliapi yachayqa, qawachiwasunmi atipanapaq ima sumaq kayniyoqkuna kananchikmanta.

Rimayta qallarisun Davidmanta hinaspa tukuy ima pasasqanmanta. Warmachallaraq kaspa oveja michiq kachkaptinmi, hamuq tiempopi rey kananpaq Samuelwan Dios akllachirqa. Mozollaraq kachkaspanmi ofrecekurqa Filistea llaqtayoq hatunkaray Goliatwan peleananpaq (1 Sam. 17:26-32, 42). Chaymantañam Saul nirqa palaciopi yachananpaq hinaspa tropankunapa ñawpaqninpi churarqa. Davidqa manachá piensayllapas-piensarqachu chay tiempopi hinaspa tukuy vidanpi imakuna pasananmantaqa.

Saulwan allin kasqankum mana allinña rikurirurqa (1 Sam. 18:8, 9; 19:9, 10). Chaymi vidanta salvananpaq pakan-pakanlla achka watakuna karqa. Tiempo pasaptinpas, Israelpi rey kachkaptinmi vidan tukuy imapi cambiarurqa huchapakuruptin hinaspa huchanta pakananpaq runata wañurachiptin. Mana allin rurasqanraykum qatinasninpi ñakarirqa ayllullanpi. ¡Churin Absalonpas contranpim hatarirurqa! (2 Sam. 12:10-12; 15:1-14.) Davidmi ichaqa wanakururqa hatun huchakuna rurasqanmanta, chaymi Dios pampachaykuptin kaqmanta favorninta tarirqa.

Kunanpas vidanchikqa chayllam cambiarunman, onqoruptinchik, qollqe mana haypakuptin, familiapi sasachakuykuna kaptin otaq mana allinta ruraruptinchikpas. ¿Ima sumaq kayniyoqkuna kasqanchikmi yanapawasun sasachakuykuna kaptin atipanapaq?

Humilde kaymi yanapawasun

Humilde kaspapas kasukuqmi kana. Chaymi yanapawasun imayna kasqanchiktawan hukkunapa imayna kasqankuta yachanapaq. Hukkunapa allin kasqankutawan rurasqanku allinpi tukusqanta chaninchaspam, kusikunchik imayna kasqankumantawan rurasqankumantapas. Humilde kaspataqmi tukuy ima pasasqanmanta entiendesun hinaspa chaykunata atipasun.

 Chaynam karqa Saulpa churin Jonatan. Cuentatam qokurqa hukkunapa rurasqankuwan vidan cambiasqanta. Samuelmi Saulman willarqa rey kasqanta Jehová Dios qechurunanta, manam nirqachu rantinpi Jonatan rey kanantaqa (1 Sam. 15:28; 16:1, 12, 13). Davidmi Israelpa reynin kananpaq akllasqa karqa, chaymi mana huchayoq kachkaspanpas taytanpa huchanrayku Jonatanqa Saulpa rantinpiqa manaña reyqa kanmanchu karqa (1 Sam. 20:30, 31). ¿Imaynataq chaywan tarikurqa? ¿Piñakuspachu envidiakurqa? Manam. Davidmanta aswan experienciayoq hinaspa mayornin kaspanpas, tukuy sonqonmantam yanaparqa (1 Sam. 23:16-18). Humilde kasqanraykum, entienderqa Davidta Dios bendecisqanmanta, chaymi hatun tukuspaqa kikinmanta mana llumpayta piensarqachu (Rom. 12:3). Entienderqam paymanta Dios ima munasqanta hinaspa allinpaq qawarqa Paypa rurasqanta.

Vidanchikpi imapas cambiasqanqa sasachakuykunatam apamun. Ejemplopaq, Jonatanmi llumpay sasachakuykunapi tarikurqa, payqa kuyarqam taytanta hinaspa Davidtapas, manam mayqenmanpas sayapakurqachu aswanmi Diospa agradonpaq rurayta munarqa. Amistadnin Davidtam Dios nombrarurqa rey kananpaq. Taytantañataqmi Diosqa manaña favorecerqachu, ichaqa hinallaraqmi rey karqa. Kunanpas imakunapa pasakusqanwanmi llakikuchwan otaq manchakuchwanpas. Ima sasachakuytapas Jehová Dios hina qawaspaqa, kasukusunmi hinaspa ima pasakuptinpas atipasunmi.

Reqsikunanchikmi atisqanchikta otaq mana atisqanchiktapas

Humilde kayqa manam chaynallachu atisqanchikta otaq mana atisqanchikta reqsikuywanqa. Humilde kaspapas wakinpiqa manam reqsikuchwanchu atisqanchikta hinaspa mana atisqanchiktapas.

Davidmanta rimarisun. Rey kananpaq Dios nombraruptinpas achka watamantañam rey karqa. Bibliaqa manam niwanchikchu imanasqa unay tiempo suyasqantaqa. Llakikuspanpas chaywanqa manam hukmanyarqachu. Payqa yacharqam ima rurayniyoq kasqanta, chayna pasananta Dios saqesqanta hinaspa chaykunata allichanantapas. Chaymi wañuchinanpaq Saul qatikachaptinpas, Davidqa mana wañuchiyta munarqachu nitaq saqerqachu peleaqmasin Abisai wañuchinantapas (1 Sam. 26:6-9).

Wakinpiqa congregacionpim imapas kanqa mana entiendesqanchik, icha manapas allintachu rurakuchkan piensasqanchikman hinaqa. ¿Imatam rurasun? Imamantapas llapallanta mana yachasqanchikta reqsikuspaqa, cuentatam qokusun congregacionta pusaq Jesus kasqanta hinaspa ancianokunata diriginanpaq servichikusqantapas. Chaynataq, sasa kaptinpas suyasunmi Jehová Dios Churinwan allichananta. Reqsikuq kasqanchikmi  yanapawasun Diospa favorninta hinalla tarinapaq (Pro. 11:2, NM).

Manso runa kaymi yanapawasun allinta ruranapaq

Manso kaspaqa sasachakuykunatam aguantasun mana hukmanyaspa, mana piñakuspa, mana sientikuspa hinaspa mana vengakuspa. Chayna kay sasa kasqanraykum Biblia nin: “Kay pachapi llapallan humillakuqkuna [. . .] ama hatunchakuspa kawsakuytayá munaychik [otaq manso kaytayá maskaychik]”, nispa (Sof. 2:3). Manso kayqa tupanmi atisqanchikta otaq mana atisqanchikta reqsikuywan, humilde, kuyapayakuq hinaspa hawkalla kaywanpas, chayna kaspam iñiyninchikpi ñawparisun hinaspa yachachisqa kaytapas munasun.

¿Imaynatam manso kayqa yanapawanchik imapas sasachawaptinchik? Achka runakunam mana allintachu qawanku, mansokunam ichaqa piensanchik chaynata Dios yanapawasqanchikta, chaymantam Moisespa ejemplon qawachin.

Moisesqa 40 watanpiqa sumaq kayniyoq runañam karqa. Qawachirqañam hukkunapa allinninpaq kallpanchakusqanta hinaspa Diospa llaqtanpa necesitasqanmanta interesakusqantapas (Heb. 11:24-26). Ichaqa Egiptomanta Israel llaqtata horqomunanpaq manaraq kamachisqa kachkaspanmi, aswan manso kayta yachanan karqa. Egiptomanta ripuspanmi Madianpi 40 wata karqa, chaypiqa oveja michiqllam karqa. ¿Imapim chayqa yanaparqa? Aswan allin runa kananpaqmi (Num. 12:3, NM). Imamantapas puntapi Dios serviy kasqantam yacharurqa.

Ejemplopaq, manso kasqantam qawachirqa mana kasukuq israelitakunapa rantinpi mirayninmantaña aswan atiyniyoq nacionta rurananpaq Jehová Dios willaptin ima rurasqanpi (Num. 14:11-20). Mana kikillanpi piensaspanmi israelitakunapa favorninpi rimarqa. Chaywanmi qawachirqa Diosta hatunchaywan castamasinkunapa allinnin maskaypas aswan allin kasqanta. Israelitakunata pusananpaq hinaspa paynintakama Dios imatapas llaqtanman willananpaqqa manso runam kanan karqa, Bibliam nin: “Moisesmi karqa chay tiempopi llapallan runakunamantapas ancha humillakuq [otaq manso] runa”, nispa (Num. 12:1-3, 9-15). Bibliaqa chaynatam nin Mariawan Aaron paypa contranpi rimasqankumanta willaspa. Hinaptinqa, Moisesqa manso kaspanmi chay sasachakuyta atiparqa. Ichaqa, ¿imapim tukunman karqa mana chayna kaptinqa?

Huk kutipim iskay runakunaman chuya espiritu huntaykuptin Diosmanta willakuyta qallarirqaku. Chaymi Moisesta yanapaq Josuey piensarqa rurasqanku mana allin kasqanta. Moisesmi ichaqa Diospa piensasqanta hina piensarqa, chaymi mana  preocupakurqachu autoridadniyoq kasqanta pierderuymantaqa (Num. 11:26-29). Mana manso kaspanqa, ¿yaqachu allinta qawanman karqa Diospa chayna rurasqanta?

Manso kasqanraykum Moisesqa allinta cumplirqa Diospa kamachisqanta. Horeb orqoman llaqtapa rantinpi rinanpaq nispanmi angelnintakama rimapayarqa, hinaspanmi paynintakama contratota rurarqa. Manso kaspanmi rurayninta allinta cumplirqa hinaspa Diospa favorecesqan karqa.

¿Imatam nichwan ñoqanchikmanta? Manso kayqa ancha allinmi iñiyninchikpi ñawparinapaq. Chaynataqmi kananku congregacionpi punta apaqkuna otaq ima ruraykunata chaskiqkunapas. Chayna kasqanchikmi yanapawasun imapas pasaptin mana hatunchakunapaq hinaspa humildadwan sasachakuykunata atipanapaqpas. Yachamusqanchikman hinaqa, chayna pasakuptin imayna qawasqanchikqa ancha allinmi. Imapas pasawaptinchik, ¿allinninchikpaq kasqantachu qawasunchik? Ichapas chay pasakuptillan manso kayta yachasunchik.

Kawsakuyninchikpiqa tukuymi pasawanchik, ichaqa manam llapantachu entiendenchik imanasqa pasasqanta. Ichapas llapallanmanta mana entiendeyta atispa otaq llumpay hukmanyasqa tarikuspanchik sasachakuchwan Diospa piensasqanman hina piensanapaq. Ichaqa, atisqanchikta otaq mana atisqanchikta reqsikuy, humilde, manso hinaspa huk sumaq kayninchikkunam yanapawasun imapas pasawaptinchik mana llumpayta hukmanyanapaq hinaspa Dioswan amistadninchik hinalla kananpaqpas.

[4 kaq paginapi suti rikuylla kaq willakuy]

Humilde kaymi yanapawanchik imayna kasqanchikta reqsikunapaq

[5 kaq paginapi suti rikuylla kaq willakuy]

Manso kayqa ancha allinmi iñiyninchikpi ñawparinapaq

[5 kaq paginapi dibujo]

Sasachakuykunawanmi Moises yacharqa manso kayta