E Hòmber Ku A Kambia Mundu

Míles di miónes di hende a yega di biba riba e tera akí, pero nan a muri. Mayoria di nan no a hasi nada asina sobresaliente ku hende ta keda kòrda nan. Nan nòmber a pasa pa olvido mes lihé ku marka di pia den santu ta disparsé. Sinembargo, tabatin algun hende ku sí a influensiá historia humano, i probablemente, nan a asta influensiá bo bida di tur dia.

ORA bo lanta mainta pa prepará pa bai trabou, bo ta sende lus. Promé ku bo sali kas, bo ta kohe un buki òf revista pa lesa den bùs òf konvoi. Bo ta kòrda bebe e antibiótika ku bo a haña di dòkter pa yuda bo kombatí un infekshon. Apénas bo dia a kuminsá, i ya bo a benefisiá kaba di vários invento i deskubrimentu di algun hòmber famoso.

Michael Faraday E hòmber ingles akí, nasí na aña 1791, tabata un spesialista riba tereno di físika. El a inventá motor eléktriko i dinamo. Su invento- i deskubrimentunan a hasi posibel ku hopi hende por benefisiá di elektrisidat awe.

Ts’ai Lun E tabata un ofisial di korte den servisio di e emperador di China. Rònt di aña 105 di nos era, el a desaroyá un proseso pa traha papel ku a hasi produkshon masal di papel posibel.

Johannes Gutenberg Rònt di aña 1450, e inventor aleman akí a traha e promé mashin di imprenta ku a usa un sistema di lèter ahustabel. Esaki a pone ku hende por a imprimí literatura mas barata. Di e manera ei, rònt mundu hende por tin akseso na informashon riba un gran variedat di tópiko.

Alexander Fleming Na 1928, e sientífiko eskoses akí a deskubrí un antibiótika ku el a yama penisilina. Awor, na tur parti di mundu hende ta usa antibiótika pa trata infekshonnan bakterial.

No tin duda, e inovashon- i deskubrimentunan di algun hende a pone ku míles di miónes di hende por disfrutá di algun benefisio òf un mihó salú.

Sinembargo, tin ún hòmber ku a sobresalí riba tur otro hende. E no ta konosí pa ningun deskubrimentu sientífiko òf médiko. Al kontrali, e hòmber akí, kende no tabata riku ni prominente i ku a muri kasi 2000 aña pasá, a laga un mensahe poderoso atras ku ta duna konsuelo i speransa. Ora nos konsiderá e efekto ku su mensahe tabatin i ainda tin riba bida di hende rònt mundu, hopi hende lo bai di akuerdo ku e hòmber akí realmente a kambia mundu.

E hòmber ei tabata Hesukristu. Ki mensahe el a prediká? I ki efekto e mensahe ei por tin riba bo bida?