Ohl me Kamwakid Sampah Pwon

Aramas lik kei mourier oh pil mehla nin sampah wet. Pali laud en irail sohte wiahda mehkot me aramas pahn tamankin irail. Ahpw mie ekei me wia soahng kan me kamwakid poadopoad en aramas oh e pil kamwakid omw mour.

KE PWOURDA nimenseng oh onopada en kohla doadoahk. Ke kapirada dengkio ni omw wie kaukaunop. Ke ale pwuhk de makasihn ehu pwehn wadek nan daksio. Ke tamanda en ale wiliepen dok pwehn sewese omw soumwahwo. Rahno ahpwtehn tepida a ke paiekidahr doadoahk en ekei aramas ndand kan.

Michael Faraday: Saintis menet sang England ipwidi nan pahr 1791 oh ih me wiahda misihn en lioal. Eh doadoahk kan sewese aramas tohto en kak doadoahngki lioal.

Ts’ai Lun: Emen kaun sang tehnpas en kaunen China me aramas kin nda me ih me medewehda wiepen wiahda doaropwe mpen pahr 105 oh met sewese wiawihdahn doaropwe tohto.

Johannes Gutenberg: Mpen pahr 1450, ohlen Semen menet wiahda misihn en wiahda pwuhk kan. Misihn wet kahrehiong en pwei tikitik wiahda pwuhk kan, kahrehda aramas kak alehdi soangsoangen ire kan.

Alexander Fleming: Nan pahr 1928, soun roporop menet sang Scottland diarada wiliepen dok me adaneki penicillin. Met wiliepen dok kin kadoadoahk nan sahpw tohto pwehn kamwahwihala mwahs me kin kahrehda soumwahu.

Dahme aramas pwukat wiahda kin kahrehiong aramas lik kei en paiekihda soahng kan de ahneki roson mwahu.

Ahpw mie ohl emen me siksang irail koaros. E sohte ndandki eh doadoahk en palien sains de palien wini. Ohl menet sohte kepwehpwe de ndand oh e mehla mpen sounpar 2,000 samwalahro, oh e ketikihda mahsen kesempwal kan. Mahsen pwukat me manaman oh kin ketikihong aramas koapworopwor oh kamweit. Ni atail pahn medewe ia uwen sapwellime mahsen eh kamwakid mouren aramas nin sampah pwon, tohto me pahn pwungki me ih ohl men me keieu kamwakid mouren tohnsampah.

Ohl menet iei Sises Krais. Mahsen dah kan me e ketin padahngki? Oh ia duwen mahsen pwukat eh kak kamwakid omw mour?