Rurasqanwanmi lliw runakunata yanaparqa

Millonnintin runakunam kay pachapi kawsarqaku, ichaqa tiempopa risqanman hinam yaqa llapallanku qonqasqa kanku. Pisi runakunallam kunan tiempopi vidanchik imayna kananpaq imapas rurasqankuwan reqsisqa karqaku.

PIENSARIY mayqan punchawpipas. Tutapayta hatarispaykim achkita ratachinki, hinaspam allichakunki llamkaq rinaykipaq. Tiempoykita allinta servichikuyta munaspaykim librota otaq revistata apanki carropi leenaykipaq. Ichaqa manaraq lloqsichkaspaykim kunka nanaynikipaq doctorpa nisusqayki hampita tomaykunki. Musyakuspaykiqa, hatarisqaykimantapacham agradecekunaykiña chay qallariypi rimasqanchik reqsisqa runakunata.

Michael Faraday. Kay yachaysapa runaqa Gran Bretaña nacionpim nacerqa 1791 watapi. Paymi rurarqa motorta chaymi luz kapuwanchik.

Ts’ai Lun. Payqa China nacionpi autoridadniyoqmi karqa. Ninkum 105 watapi achkanpi papel rurakunanpaq yanapakusqanta.

Johannes Gutenberg. Kay Alemaniamanta runaqa 1450 watapim qellqakunata ruranapaq maquinata aswan allintaraq rurarqa. Chaymi yanapakurqa qellqakuna ruray manaña llumpay qollqepaq kananpaq. Chayraykum kunanqa imaymana qellqakuna kapuwanchik.

Alexander Fleming. Escocia nacionmanta kay yachaysapa runam 1928 watapi penicilina niq hampi allin kasqanta yacharurqa. Chaymantapacham anchata servichikunku hampikunapaq.

Hinaptinqa, kunan tiempopi allinninchikpaq kaqkunaqa chaynataq hampikunapas kapuwanchikmi yachaysapa runakunarayku.

Ichaqa kanmi huk runa mana chay runakuna hina kaspanpas, astawanraq yanapawaqninchik. Chay runaqa, yaqa iskay waranqa wata ñawpaqtaraqmi wañukurqa. Rimasqankunam suyakuytawan consuelota lliw runakunaman qorqa. Chayna yachachisqankuna enteron pachapi allinpuni kasqanraykum, achka runakuna ninku rurasqanwan lliw runakunata yanaparusqanta.

¿Pimantataq rimachkanchik? Jesucristomantam. Qatiqnin yachachikuykunapim qawasun imakuna yachachisqanmanta hinaspa imayna yanapawananchikmantapas.