Le Tagata na Suia le Lalolagi

E faitau piliona tagata na soifua i lenei lalolagi ma maliliu. Ae e toʻatele e leʻi faia ni gaoioiga taʻutaʻua e manatua ai i latou. Ae peitaʻi, e iai ni nai tagata na taaʻina ai le faagasologa o le talafaasolopito, ma atonu foʻi o loo taaʻina ai lou olaga i aso faisoo.

UA E ala aʻe i le taeao ma sauni e alu i le galuega. Ua e ki le moli a o sauni. Ua e ave se tusi po o se mekasini e faitau i luga o le pasi. Ua e manatua foʻi e inu au fualaau tui mai i le fomaʻi, e fesoasoani e faateʻa ai lou maʻi. Ua faatoʻā amata lou aso, ae ua e maua aogā mai i mea na faia e ni nai tagata taʻutaʻua.

Michael Faraday O lenei saienitisi mai i Peretania na fanau i le 1791, ma na ia faia se afi e alu i le eletise. O mea na ia maua ma fausia na fesoasoani ina ia maua ai e le toʻatele o tagata le malosiaga faaeletise.

Ts’ai Lun O se tagata aloaʻia i le maota o le emeperoa o Saina, ua lauiloa i le mauaina o le auala e fai ai pepa i le pe tusa o le 105 T.A., ma iʻu ai ina faia le tele o pepa.

Johannes Gutenberg Pe tusa o le 1450, na fausia ai e lenei tagata poto Siamani le uluaʻi masini lomitusi e gaoioi. O lenei masini na faaitiitia ai le tau o le lomiaina o tusi, ma mafai ai ona maua e tagata faamatalaga e uiga i le tele o mataupu eseese.

Alexander Fleming I le 1928, na maua ai e lenei tagata suʻesuʻe mai i Sikotilani se fualaau tui na ia faaigoa o le penisini. Ua tele ina faaaogā fualaau tui i aso nei e togafiti ai maʻi e māfua i siama.

E lē taumatea, o mea na maua ma mea na faia e ni nai tagata, ua mafai ai e le faitau piliona o tagata ona maua ni aogā patino pe maua ai foʻi le soifua mālōlōina lelei.

Ae peitaʻi, e iai se tagata e matuā iloga mai i isi tagata uma. E lē o lauiloa o ia i le mauaina o ni mea faasaienitisi po o ni faiga fou faafomaʻi. Ae o lenei tagata na soifua aʻe i se olaga faatauvaa, ma na maliu e toetoe lava 2,000 tausaga ua mavae, na ia tuua se feʻau malosi o le faamoemoe ma faamāfanafanaga. Pe a fua i le tele ua aafia ai ola o tagata i le lalolagi atoa i lana feʻau, e ioe le toʻatele o ia moni o le tagata na suia le lalolagi.

O lenā tagata o Iesu Keriso. O le ā le feʻau na ia talaʻia? Ma e faapefea ona aafia lou olaga i lenā feʻau?