A man di kenki grontapu
A man di kenki grontapu
Milyardmilyard sma libi èn dede na a grontapu disi. Furu fu den no du wan kefalek sani di meki taki trawan memre den. Ma wan tu sani di sma du fositen, abi krakti tapu yu libi te now ete.
YU E opo mamanten èn e sreka fu go na wroko. Yu e leti a faya te yu e sreka yusrefi. Yu e teki wan buku noso wan tijdschrift fu leisi na ini a bus. Yu e memre fu dringi na antibiotica di datra gi yu fu kon betre. Fa a dei fu yu bigin, yu e kisi wini fu sani di wan tu prenspari man ben du.
Michael Faraday Na Ingrisi sabiman disi di gebore na ini 1791, ben meki wan masyin di e wroko tapu stroom nanga wan wrokosani di e meki stroom. Den sani disi meki en moro makriki gi sma fu abi stroom.
Ts’ai Lun A man disi ben de wan heiheiman fu a gran kownukondre fu China. En ben de a sma di ben kon nanga wan nyun fasi fu meki papira na a pisi ten fu a yari 105. A sani disi ben abi leki bakapisi taki bun furu papira ben kan meki.
Johannes Gutenberg Na wan pisi ten fu a yari 1450, a Doisriman disi ben de a fosi sma di meki wan drukpers nanga lusu letter. Nanga yepi fu a drukpers disi a no ben diri moro fu druk buku. Na so fasi sma na ala sei ben man kon abi difrenti tori di den ben kan leisi.
Alexander Fleming Na ini 1928, na ondrosukuman disi fu Skotland, ondrosuku sani èn a kon feni wan antibiotica dresi di a kari penicilline. Now datra na ala sei e gebroiki antibiotica fu dresi siki.
A no de fu taki dati den sani di den man dati ondrosuku èn den sani di den meki, sorgu taki milyardmilyard sma kisi wini, noso wan moro bun gosontu.
Ma wán man de di de heri tra fasi leki ala tra sma. Sma no sabi a man disi fu di a meki kefalek sabidensi sani noso dresi. Èn a man disi no ben de wan gudu man, noso wan prenspari man. A man disi di dede pikinmoro 2000 yari pasa, libi wan boskopu na baka. Iya, a tumusi moi boskopu fu en e gi howpu nanga trowstu. Te yu ben o luku o furu krakti a boskopu fu en abi tapu sma na heri grontapu, dan furu sma ben o agri taki en na a man di kenki grontapu.
A man dati ben de Yesus Krestes. Sortu boskopu a ben e preiki? Fa a boskopu dati kan abi krakti tapu yu libi?