Mane ida neʼebé naran-boot liu hotu

Iha ema nia istória, ema neʼebé moris no mate iha mundu neʼe la bele sura. Sira barak la halo buat ruma neʼebé espesiál no ema haluha sira hanesan ain-fatin iha rai-henek neʼebé lalais deʼit lakon. Maibé, ema balu halo buat ruma neʼebé espesiál, neʼebé kona ema barak nia moris, no karik kona mós Ita-nia moris.

HANOIN toʼok, Ita hadeer dadeer-saan nakukun no loke lampu. Tanba Ita moras, Ita hemu ai-moruk antibiótiku neʼebé doutór fó. Depois, Ita foti livru ida atu lee halimar iha kama leten. Maski Ita-nia loron foin komesa, maibé Ita uza ona buat diʼak balu husi buat neʼebé ema matenek inventa.

Michael Faraday Sientista neʼe moris iha tinan 1791 iha rai-Inglaterra. Nia inventa dínamu no mákina eletrisidade nian. Ninia invensaun ajuda ema atubele hetan eletrisidade toʼo ohin loron.

Tsʼai Lun Señór neʼe funsionáriu ba imperadór husi rai-Xina, no ema rekoñese nia nuʼudar ema neʼebé inventa prosesu atu halo surat-tahan maizumenus iha tinan 105. Liuhusi prosesu neʼe ema bele halo surat-tahan barak kedas.

Johannes Gutenberg Maizumenus iha tinan 1450, señór neʼe husi rai-Alemaña, inventa mákina primeiru atu halo livru. Liuhusi mákina neʼe ema bele halo livru barak, no ida-neʼe ajuda ema barak atu hetan informasaun kona-ba buat oioin.

Alexander Fleming Iha tinan 1928, sientista neʼe husi rai-Eskósia, neʼebé estuda kona-ba ai-moruk, hetan antibiótiku ida neʼebé nia hanaran penisilina. Ohin loron, ema iha mundu tomak uza antibiótiku oioin atu kura infesaun husi baktéria.

La iha dúvida katak buat neʼebé ema uitoan deʼit inventa, ajuda ema barak atu moris diʼak liután no atu iha saúde neʼebé diʼak.

Maski nuneʼe, iha mane ida neʼebé kona ema hotu-hotu nia moris. Nia laʼós sientista neʼebé hetan ai-moruk ruma ka inventa buat ruma. Tuir loloos, ema neʼe mai husi família neʼebé kiak no nia mate besik tinan 2.000 liubá. Maibé, nia husik mensajen neʼebé fó esperansa no fó kmaan ba ema hotu. Kuandu ita hanoin kona-ba oinsá mak ninia mensajen book ema iha mundu tomak, ita bele haree katak nia mak mane ida neʼebé iha naran boot liu hotu.

Mane neʼe mak Jesus Kristu. Mensajen saida mak nia haklaken? No oinsá mak mensajen neʼe kona Ita-nia moris rasik?