Alamiyaa Laammida Yesuusa

Biilooniyan qoodettiya asay ha saˈan deˈidi hayqqiis. Etappe dariya baggay daro asaa goˈˈiyaabaa oottibeenna. SHin amaridaageeti taarikiyan gitabaa, ubba qassi galla galla deˈuwan nena goˈˈiyaabaa oottidosona.

WONTTAARA denddada oosuwau baanau giigettaasa. Giigettiyo wode korinttiyaa pooˈissaasa. Kaame giddon nabbabanau maxaafaa woykko maxeetiyaa oyqqaasa. Sahuwau haakimee azazido antibayotike xaliyaa hassayada mittaasa. Saˈay wonttosaara, erettida amarida asati oottidoban goˈˈettadasa.

Mikaaˈel Faraday Yelettidoy 1791na; i Inggilize biittaa asa gidida piizikisiyaa erancha; elekttirike motoriyaanne jenereteriyaa i medhiis. I medhidobay daro asay korinttiyaa goˈettanaadan maaddiis.

Tsi Lun I CHayna biittan kawo keettan oottiya asa gidishin, 105 M.L. heeran woraqataa giigissiyo ogee diccanaadan oottiis; hegee daro woraqataa issi kutti giigissanaadan maaddiis.

Yohaanis Gutenberg Jarmane asa gidida ha bitanee 1450 heeran qaaxxiyaabi deˈiyo attamiyo maashiniyaa medhiis. He maashinee hiraysuwan attamanau maaddiis; yaatiyo gishshau, daro huuphe yohuwan xaafettidabaa ubbasan demmanau maaddiis.

Aleksandder Fleming Iskkotllandde biitta asa gidida ha saynttisttee baktteeriyaa woriya pensiliine giyo antibayotikiyaa demmiis. Antibayotikee baktteeriyaappe oyqqiya sahuwau asay ha wodiyan darosan goˈettiyo xale.

Amarida asati demmidobay biilooniyan qoodettiya asaa goˈˈiyaaba woykko eta payyatettau maaddiyaaba gididoogee qoncce.

Gidoppe attin, issi uri haratu ubbaappe dumma. I erettidoy saynisiyan woy akkamuwan oorattabaa demmidoogaana gidenna. Hegaappe dumma hanotan, 2,000 gidiya layttappe kase hayqqida, xoqqu oottidi xeelliyo asa gidenna ha bitanee asau hidootay deˈanaadan oottiyaabaanne minttettiyaabaa yootiis. I tamaarissidobay kumetta saˈan asaa deˈuwaa ay keena goˈˈidaakko akeekiyo wode, daroti he uri tumuppe alamiyaa laammidoogaa maayoosona.

Hegee Yesuus Kiristtoosa. I aybaa xeelliyaagan sabbakidee? Hegee ne deˈuwaa waatidi goˈˈana danddayii?