Si Jesu-Kristo—Kon Unsay Epekto sa Iyang Mensahe

“Dayag nga ang labing lig-ong pamatuod bahin sa maalamong tawo gikan sa Capernaum mao nga ang iyang gitudlo padayong nakaimpluwensiya sa kasingkasing ug hunahuna sa mga tawo.” a—MAGSUSULAT NGA SI GREGG EASTERBROOK.

ANG mga pulong adunay gahom. Ang maayong pagkapili nga mga pulong makatandog sa kasingkasing, makahatag ug paglaom, ug makapabag-o sa kinabuhi. Walay laing tawo nga nakasultig mga pulong nga may dakong impluwensiya kay kang Jesu-Kristo. Usa ka tawo nga nakadungog sa pakigpulong ni Jesus nga nailhan karong Wali sa Bukid misulat sa ulahi: “Sa dihang nahuman na si Jesus pagsulti niining mga pulonga, ang epekto mao nga ang mga panon sa katawhan nahingangha sa iyang paagi sa pagpanudlo.”—Mateo 7:28.

Bisan sa atong panahon, daghan sa gipamulong ni Jesus pamilyar sa mga tawo sa tibuok kalibotan. Tagda ang pipila ka pananglitan sa makahuloganon niyang mga pulong.

“Dili kamo mahimong ulipon sa Diyos ug sa Bahandi.”—Mateo 6:24.

“Busa, ang tanang butang nga buot ninyo nga pagabuhaton sa mga tawo nganha kaninyo, kinahanglang pagabuhaton usab ninyo sa ingon ngadto kanila.”—Mateo 7:12.

“Ibayad . . . kang Cesar ang mga butang ni Cesar, apan ang mga butang sa Diyos ngadto sa Diyos.”—Mateo 22:21.

“Adunay labaw nga kalipay sa paghatag kay sa pagdawat.”—Buhat 20:35.

Apan si Jesus wala lang magbungat ug halandomong mga pulong. Ang mensahe nga iyang gisangyaw adunay gahom tungod kay kini nagpahayag sa kamatuoran bahin sa Diyos, nagtudlo kon sa unsang paagi makaplagan ang tinuod nga kahulogan sa kinabuhi, ug tin-awng nagpadayag sa solusyon sa tanang pag-antos sa tawo—ang Gingharian sa Diyos. Samtang atong susihon kini nga mensahe sa mosunod nga mga artikulo, atong masabtan kon nganong ang gitudlo ni Jesus padayong nakaimpluwensiya sa kasingkasing ug hunahuna sa minilyon.

[Footnote]