Jesu Kreste—Lushango Lwa Hae mo ne lu Amezi Batu

“Kaniti, taba ya niti ye inelela ka za Jesu muuna ya butali wa kwa Kapernauma ki ya kuli u zwelapili ku fita kwa lipilu ni minahano ya batu ni ku ba hohela ku yena kabakala bunolo bwa hae.” *—MUÑOLI GREGG EASTERBROOK.

MANZWI a na ni maata. Manzwi a mande a butali a fitanga kwa lipilu, a fanga sepo, ni ku cinca mipilelo ya batu. Ha ku na mutu ya kile a bulela manzwi a maata ku fita Jesu Kreste. Mutu yo muñwi ya na utwile Jesu ha fa ngambolo ya fa lilundu ye zibahala hahulu cwale, hamulaho na ñozi kuli: “Jesu haa felize ku bulela, buñata bwa komoka tuto ya hae.”—Mateu 7:28.

Ni kacenu, lika ze ñata za na bulezi Jesu za zibahala kwa batu mwa lifasi kaufela. Mu nyakisise mitala i sikai ya lika za butokwa za na bulezi Jesu.

“Ha ku konahali kuli mu sebeleze ni Mulimu, ni Mamona, (kikuli Bufumu).”—Mateu 6:24.

“Mi cwale linto kamukana ze mu lata kuli batu ba mi ezeze, mu ba ezeze zona ni mina.”—Mateu 7:12.

“Mu kutiseze Sesare ze li za Sesare; mi mu kutiseze Mulimu ze li za Mulimu.”—Mateu 22:21.

“Ku na ni mbuyoti mwa ku fana, ye fita ye mwa ku fiwa.”—Likezo 20:35.

Kono Jesu na si ka bulela feela manzwi a sa koni ku libalwa. Lushango lwa na kutaza ne lu na ni maata kakuli ne lu bulela niti ka za Mulimu, ne lu lutile batu mwa ku fumanela tabo ya niti mwa bupilo, mi ne lu bonisize hande tatululo kwa manyando kaufela a batu—mi tatululo yeo ki Mubuso wa Mulimu. Ha lu nze lu nyakisisa lushango lo mwa makepe a latelela, lu ka bona libaka Jesu ha zwelapili ku fita kwa “lipilu ni minahano ya batu ka nzila ye bunolo.”

[Litaluso za kwatasi]