Indi Ntañishilu YaYesu Kristu—Yashikili Ñahi Antu Hanyichima?

NSONEKI GREGG EASTERBROOK wahosheli nindi, “Mwalala mazu anashimbuli akutena iyala wamaana [Yesu] wakuKaperinawu akwila nawu mazu indi achidi kushika chikupu hanyichima nihayitoñojoka yawantu.” *

MAZU akweti wanta. Mazu amawahi amaana anateli kusañumuna nyichima, kuleta kuchiñeja, nikuhimpa yihandilu. Kwosi iyala wahoshahu dehi mazu akweti wanta akubadika Yesu Kristuku. Muntu watiyili Yesu nakuhana Mpanji yindi yaya mpuhu wasonekeli nindi: “Chelili Yesu nakumishi dehi mazu awa, mazaza awantu hiyakuhayama kuleja kwindi.”—Matewu 7:28.

Nimakonu antu amavulu mukaayi kejima eluka mazu ahosheliyi Yesu. Talenu yakutalilahu yantesha yamazu alema nankashi.

“Himukutwesha kukalakela niNzambi nimahetaku.”—Matewu 6:24.

“Dichi yejima yimunakeñi antu kuyililenu, ninenu nawa yililenu mwomumu.”—Matewu 7:12.

“Yuma yaKesari inkenu Kesari; yuma yaNzambi inkenu Nzambi.”—Matewu 22:21.

“Chikweti kukooleka yowu kuhana, kutambula chakuminamu.”—Yililu 20:35.

Ilaña kudi yuma yakoñeliyi Yesu yabadika mazu amawahi ahosheliyi. Nsañu yashimwineñayi yadiña yabadika muloña yadiña nakushimuna nsañu yalala hadi Nzambi, yadizishileña antu chakuwana muzañalu walala muchihandilu, nawa yashimwineña chikupu nawu Wanta waNzambi diwu wakamanisha makabi awantu ejima. Chitukushinshikaña hansañu yidi hamafu analondeluhu, tukwiluka chaleñela mazu aYesu atwalekeñahu kushika “hanyichima yawantu amavulu niyitoñojoka.”

[Tumazu twaheshina]