A Zezi Kirist koɛɛgã talla pãng wʋsgo
A Zezi Kirist koɛɛgã talla pãng wʋsgo
Seb-gʋlsd a ye yeela woto: “Kapɛrnaum yam soabã tʋʋm la a goam sẽn ket n be neb wʋsg sũyẽ la b yamẽ wã wilgda vẽeneg t’a sɩd yɩɩ nin-kãsenga.” *—A GREGG EASTERBROOK.
GOAM tara pãnga. Yam soab goam tõe n kẽe sũuri, tõe n kɩtame tɩ ned gũ bũmb pidsg ne tẽebo. Tõe n toeema ned vɩɩm. A Zezi goamã sẽn tar pãng to-to wã ka to ye. Ned a ye sẽn kelg sõsg ning a sẽn sõs tãngã zug tɩ wʋsg ket n gomd a yellã yeela woto: “A Zezi sẽn togs bõn-kãens n sɛ, kʋʋngã yɛɛsa bãmb karengã yĩnga.”—Matɩe 7:28.
Hal ne rũndã, dũniyã gill zugu, neb wʋsg tẽra a Zezi goamã kẽere. Ad bãmb b wãn bala:
“Yãmb ka tõe n pʋg Wẽnnaam la y pʋg ligd ye.”—Matɩe 6:24, Sebr Sõngo.
“Yãmb sẽn dat tɩ nebã maan yãmb bũmb ningã, bɩ yãmb me maan bãmb boto.”—Matɩe 7:12.
“Bɩ y kõ a Sezaar bũmb ninga sẽn yaa a Sezaar dẽndã, la y kõ Wẽnnaam bũmb ninga sẽn yaa Wẽnnaam dẽndã.”—Matɩe 22:21.
“Sẽn kõt-a sũ-noog yɩɩda sẽn deegd-a.”—Tʋʋma 20:35, Sebr Sõngo.
La a Zezi goamã pa goam sẽn tar pãng bal ye. Yaa goam sẽn sõngd tɩ d bãng sɩdã Wẽnnaam zugu, tɩ d bãng d sẽn segd n maan to-to tɩ d vɩɩmã tall barka. Leb n yaa goam sẽn wilgd vẽeneg tɩ ninsaalbã zu-loees tɩɩm yaa Wẽnnaam Rĩungã bala. Sõss nins sẽn pʋgdã pʋgẽ, d na n goma a sẽn zãms nebã bũmb ninsã yelle. Rẽ na n kɩtame tɩ y bãng bũmb ning sẽn kɩt tɩ hal ne rũndã, a Zezi zãmsgã ket n kẽed neb milyõ rãmb ‘sũy la b yamã.’
[Tẽngr note]