Jesus Kristu Omalongeso ae Avatela Ovanthu

“Onkhalelo yomuenyo wa Jesus pano pohi nkhele itualako okuvatela ovanthu hono, otyo tyilekesa okuti Jesus omulume umwe omunene.” a—OMUHONEKI GREGG EASTERBROOK.

ONONDAKA mbuna epondolo. Okuholovona nawa onondaka tyipondola okulunda omitima, okuavela ekevelelo, nokupilulula omuenyo. Petupu omunthu nawike wapopile nga Jesus Kristu. Omunthu umwe watehelele Jesus okulinga Elongomona lio Komphunda wahoneka okuti: “Etyi Jesus amana okupopia onondaka ombo, ovanthu aveho avakala tyahuva nonkhalelo yae yokulongesa”—Mateus 7:28.

Hono, onondaka ononyingi mba Jesus mbuiwe novanthu ounye auho. Tala onongeleka mbumwe mbo nondaka mbuna ehangununo enene.

“Kamupondola okukala ovapika va Huku no Vomalumono”—Mateus 6:24.

“Ovipuka aviho muhanda ovanthu vemulingile, tupu nonue ovio muvelingila”—Mateus 7:12.

“Fetei ku Sesale ovipuka via Sesale, mahi via Huku viavei ku Huku.”—Mateus 22:21.

“Okuava tyieta vali ehambu tyipona okupewa.”—Atos 20:35.

Mahi, Jesus walinga vali tyipona vala okupopia onondaka. Onondaka Jesus aivisile ankho mbuna epondolo mokonda mbupopia otyili konthele ya Huku, mbulongesa ovanthu oñgeni mavavasi ehongolelo liotyotyili momuenyo, nokulekesa neyandyuluko okuti Ouhamba wa Huku oo mauya okumanako ononkhumbi mbovanthu aveho. Putyina tutala onondaka ombu pomafo alandulako, matukatala omokonda yatyi Jesus atualako okuvatela ovanthu ovanyingi.

[Onondaka Poutoi]