Jesus Kristus​—A Klemechel Ngua Ngera Klisichel er a Klengar er a Rechad

“A kot el mle ungil el rolel a longesuseu er a rechad ngika el mellomes a rengul el chad er a Kapernaum, a ngii el melemolem el mengelaod a rengrir me a uldesuir a rechad el ousbech er a ungil el klumech.” *​—AUTHOR GREGG EASTERBROOK.

A TEKOI a ngar er ngii a klisichel. A ungil el rolel a cheldecheduch a sebechel mengelaod a reng, e melisiich a uldasu, e dirrek el ngmodech a rolel a klengar. Ngdiak a ngii di el chad el ungil el mengedecheduch el ua Jesus Kristus. A ta el chad el ulerrenges er sel merael a chisel el Cheldechedechal el ngar er a Rois a dilu el kmo: “Ma Jesus ra le merekong el mengedecheduch a ikal tekoi, e a seked a kmal kilebetiekl er chosisecheklel.”​—Matteus 7:​28.

Sel taem el me lmuut er a chelechang, e a rebetok el chad a mla mo medengei a tekingel a Jesus. Ka momtab a bebil er a tekingel el kmal meklou a belkul.

“Ngdiak el sebechiu el siungii a Dios ma kerruul.”​—Matteus 6:​24.

“Misei e a ikel ngiidi le ngerang el somiu a lruul ar chad lekor kemiu, dilerrek el moruul el uaisei el morar chad.”​—Matteus 7:​12.

“A kloklel a kaiser le bora kaiser, ma kloklel a Dios le bora Dios.”​—Matteus 22:21.

“A dorous e ngbai ngeltengat ra dolai.”​—Rellir 20:35.

A tekoi el lullekoi a Jesus a kmal mle meklou a belkul. E le a klumech el lulemerk er ngii a mla er ngii a klisichel el olecholt a klemerang el kirel a Dios, e osisecheklterir a rechad el mo medengelii a mera el moktek er a klengar, e dirrek el ulechotii a rolel e a klechad a mo mimokl er a rokui el ringel me a chelebuul, el ngii a Rengedel a Dios. Me a bo dorriter a klemechel el ngar er aika el ongingil el suobel, e kede mo mesa sel uchul me a Jesus a melemolem el mengelaod a “rengrir me a uldesuir a rechad el ousbech er a ungil el klumech.”

[Footnote]