Jesu Kristo—Mulumbe Wakwe Mbowakabagwasya Bantu

“Makani ngaakaamba muntu umwi musongo waku Kapernauma acibagwasya bantu banji.” *—SIKULEMBA GREGG EASTERBROOK.

MAJWI alijisi nguzu. Majwi mabotu aabusongo alakonzya kubanjila mumoyo bantu, kubapa bulangizi akubapa kuti bacince bukkale bwabo. Kunyina muntu iwakali kumwiinda Jesu Kristo kujatikizya zyintu nzyaakali kwaamba. Muntu uumwi iwakamumvwa Jesu kapa Mulumbe Wakwe waa Cilundu wakalemba kuti: “Lino Jesu naakamana kwaamba majwi aya oonse, makamu aabantu akakankamana kukwiisya kwakwe.”—Matayo 7:28.

Kusikila sunu, zyintu nzyaakali kwaamba Jesu zilizyibidwe abantu nyika yoonse mboizulwa. Amulange-lange majwi amwi aagwasya ngaakaamba.

“Taakwe muntu uukonzya kumanina bami bobile milimo.”—Matayo 6:24.

“Nkaambo kaako zintu zyoonse zili buti nzimuyanda kuti bantu bamucitile, anywebo amubacitile nzizyonya.”—Matayo 7:12.

“Amupe Kaisara zintu zya-Kaisara, akwa-Leza zintu zya-Leza.”—Matayo 22:21.

“Kupa kuli coolwe kwiinda kupegwa.”—Incito 20:35.

Jesu wakali kwaamba majwi aagwasya akucita zyintu zinji. Mulumbe ngwaakali kukambauka wakabagwasya bantu kuzyiba kasimpe kajatikizya Leza, kuzyiba mbobakonzya kuzyiba ncobaponena alimwi acikonzya kumana mapenzi—Bwami bwa Leza. Notulanga-langa mulumbe ooyu mumapeeji aatobela, tulabona ikaambo ikapa kuti mulumbe wa Jesu uzumanane “kubagwasya bantu banji.”

Bupanduluzi buyungizidwe