Yesu Kreste—Ndlela Leyi Rungula Rakwe Ri Va Khumbeke Ha Yona Vanhu

“Testamente leyi se yi nga ni malembe yi ri kona leyi nga tsariwa hi wanuna wa le Kapernawume hi leyi yi yaka emahlweni yi khumba timbilu ni miehleketo ya vanhu.” *—AUTHOR GREGG EASTERBROOK.

MARITO ma ni matimba. Marito ya vutlhari lama hlawuriweke kahle ma nga khumba timbilu, ma nyika ntshembo ni ku cinca vutomi bya vanhu. A ku na munhu loyi rungula rakwe ri khumbeke vutomi bya vanhu ku fana ni ndlela leyi rungula ra Yesu Kreste ri va khumbeke ha yona. Munhu un’wana loyi a a ri kona loko Yesu a nyikela Dyondzo ya le Ntshaveni leyi tiviwaka swinene u tsale a ku: “Loko Yesu a heta ku vula leswi, mintshungu yi hlamarisiwa hi ndlela yakwe yo dyondzisa.”—Matewu 7:28.

Ninamuntlha vanhu emisaveni hinkwayo va ma toloverile marito ya Yesu. Xiya swikombiso swi nga ri swingani swa marito yakwe lama nga ni tinhlamuselo ta nkoka.

“A mi nge vi hlonga ra Xikwembu ni ra Rifuwo.”—Matewu 6:24.

“Hikokwalaho, swilo hinkwaswo, leswi mi lavaka vanhu va swi endla eka n’wina, na n’wina mi fanele mi swi endla eka vona.”—Matewu 7:12.

“Tlheriselani swilo swa Khezari eka Khezari, kambe swilo swa Xikwembu eka Xikwembu.”—Matewu 22:21.

“Ku nyika swi tisa ntsako lowukulu ku tlula ku amukela.”—Mintirho 20:35.

Yesu u endle swilo swo tala ku tlula leswi a nga swi vula naswona marito yakwe a ma rivaleki. Rungula leri a a ri dyondzisa a ri ri ni matimba hikuva a ri hlamusela ntiyiso malunghana ni Xikwembu, ri dyondzisa vanhu ndlela yo hanya vutomi lebyi nga ni xikongomelo nileswaku Mfumo wa Xikwembu hi wona lowu nga ta herisa ku xaniseka hinkwako ka vanhu. Loko hi ri karhi hi kambisisa rungula leri eka swihloko leswi landzelaka, hi ta vona leswaku ha yini leswi Yesu a nga swi vula swi hambete swi khumba “timbilu ni miehleketo” ya timiliyoni ta vanhu.

[Nhlamuselo ya le hansi]