Mbaʼépa heʼivaʼekue Jesús ijehe?

“Jesús oikuaa porã vaʼekue mávapa haʼe, moõguipa ou, maʼerãpa ou ko yvy ape ári ha mbaʼépa ohaʼarõ chupe koʼápe.”(HERBERT LOCKYER, ESKRITÓR)

JAJEROVIA hag̃ua Jesúsre ha umi mbaʼe omboʼevaʼekuére tekotevẽ jaikuaa raẽ chupe. Pór ehémplo jaikuaavaʼerã mávapa haʼe, moõguipa ou ha maʼerãpa. Mateo, Marcos, Lucas ha Juan kuatiañeʼẽme oñembohovái koʼã mbaʼe, ha iñimportanteveha Jesús voi ombohovaipaite ñandéve.

Haʼe oikomavaʼekue ou mboyve ko yvy ape ári Peteĩ jey Jesús heʼi: ‘Añetehápe haʼe peẽme che Abrahán mboyve guaréma’ (Juan 8:58, BNP). Mbaʼére piko Jesús heʼi upéicha ko haʼe onaséva 2000 áño rupi Abrahán onase rire? Haʼe jey omyesakã heʼívo: “Che ajúgui yvágagui” (Juan 6:38, BNP).

Ñandejára Raʼy Umi ánhel ningo Jehová raʼy memete, upéicharõ jepe Jesús idiferénte chuguikuéra. Haʼe voi heʼi ijehe haʼeha ‘Ñandejára Raʼy peteĩetéva’ (Juan 3:18). Haʼe ningo pe taʼýra peteĩete, Ñandejára añoite ojapo rupi chupe. Opa mbaʼe oĩva upe rire Jesús oipytyvõ Itúvape ojapo hag̃ua (Colosenses 1:16).

‘Yvypóra Raʼy’ Ko ñeʼẽ hína upe haʼe oiporuvéva oñeʼẽ hag̃ua ijehe (Mateo 8:20). Upéicha haʼe omyesakã yvyporaha, ndahaʼéi peteĩ ánhel oiporúva yvypóra rete térã Ñandejára oñembohete kuimbaʼéva. Ipytu marangatu rupive Ñandejára oguerova Itaʼýra rekove peteĩ vírhen retepýpe hérava María. Jesús oikomavaʼekue yvágape ou mboyve ko yvy ape ári peteĩ yvypóra perféktoicha térã ndojavýiva (Mateo 1:18; Lucas 1:35; Juan 8:46).

Pe Mesías oñehaʼarõvaʼekue Peteĩ kuña Samariaygua heʼírõ guare Jesúspe “che aikuaa ouvaʼerãha pe Mesías”, haʼe ombohovái chupe: “Upe Cristo niko che, añeʼẽvaʼaína ndéve” (Juan 4:25, 26). Pe ñeʼẽ mesías ha cristo heʼise “upe ojeporavovaʼekue”. Upéva heʼise Ñandejára oiporavo hague chupe okumpli porã hag̃ua Hembipota.

Hembiapo iñimportantevéva Jesús heʼi: ‘Amombeʼuvaʼerã umi mbaʼe porã Ñandejára rréino ojapótava. Upearã ningo añembouvaʼekue’ (Lucas 4:43, NM). Haʼe ojapóramo jepe heta mbaʼe porã, omotenonde Ñandejára Rréino ha omombeʼu umi héntepe umi mbaʼe porã ojapótava. Péro tenonde gotyove jahecháta mbaʼérepa ko tembiapo iñimportanteve chupe g̃uarã opa mbaʼégui.

Koʼã mbaʼe jahechavaʼekue ohechauka porãiterei Jesús ndahaʼéi hague peteĩ yvypóra reínte. * Upe rire jahecháta haʼe oporomboʼe porãiterei hague oikóma rupi yvágape ou mboyve ko yvy ape ári. Upévare umi mbaʼe omboʼéva opokoiterei opaichagua héntere.

[Nóta]