An Itinokdo ni Jesus Dapit sa Dios

“An solamenteng nakakamidbid talaga sa Ama iyo an Aki. Alagad gusto kan Aki na isabi sa iba an manongod sa Ama, tanganing mamidbid man ninda sia.”—LUCAS 10:22, CONTEMPORARY ENGLISH VERSION.

BAGO nagin tawo an panganay na Aki nin Dios, dayupot niang nakaibaiba an saiyang Ama sa laog nin halawigon na panahon. (Colosas 1:15) Sa siring, naaraman kan Aki an mga kaisipan, saboot, asin pamamaagi kan saiyang Ama. Dangan, kan an Aking ini magdigdi sa daga bilang an tawong si Jesus, gustong-gusto niang itokdo an katotoohan manongod sa saiyang Ama. Dakol an manonodan niato manongod sa Dios paagi sa paghinanyog sa sasabihon kan Aking ini.

An ngaran nin Dios An banal na ngaran na Jehova mahalagang marhay nanggad ki Jesus. Gusto kan namomotan na Aking ini na maaraman asin gamiton nin iba an ngaran kan saiyang Ama. An mismong ngaran ni Jesus nangangahulogan na “Si Jehova Kaligtasan.” Kan banggi bago sia magadan, masasabi ini ni Jesus sa saiyang pamibi ki Jehova: ‘Ipinamidbid ko an saimong ngaran.’ (Juan 17:26) Bakong makangangalas na ginamit ni Jesus asin ipinamidbid nia sa iba an ngaran nin Dios. Total, paano masasabotan kan mga naghihinanyog ki Jesus an katotoohan manongod ki Jehova kun dai ngani ninda aram an ngaran Nia asin an kahulogan kaiyan? *

An dakulang pagkamoot nin Dios Sinabi kaidto ni Jesus sa pamibi nia sa Dios: “Ama, . . . namotan mo ako bago pa kan pagkaestablisar kan kinaban.” (Juan 17:24) Huling naeksperyensiahan ni Jesus sa langit an pagkamoot nin Dios, pinagmaigotan niang ikapaheling digdi sa daga an dakol na magayon na aspekto kan pagkamoot na iyan.

Ipinaheling ni Jesus na an pagkamoot ni Jehova mahiwas an sakop. Si Jesus nagsabi: “An Dios namoot na gayo sa kinaban kaya itinao nia an saiyang Aking bugtong, tanganing an lambang nagtutubod sa saiya dai malaglag kundi magkaigwa nin buhay na daing katapusan.” (Juan 3:16) An Griegong tataramon na trinadusir na “kinaban” dai nanonongod sa “daga.” Arog kan pagkagamit digdi, nanonongod iyan sa mga tawo—an totoo, sa bilog na katawohan. Dakula nanggad an pagkamoot nin Dios sa pamilya nin tawo kaya itinao nia an saiyang pinakamamahal na Aki tanganing an maimbod na mga tawo makalda sa pagkaoripon sa kasalan asin kagadanan saka magkaigwa nin oportunidad na mabuhay nin daing katapusan. Dai nanggad niato marorop an kadakulaan kan siring na pagkamoot.—Roma 8:38, 39.

Pinatotoohan ni Jesus an sarong nakakaparigon nanggad na katotoohan: Namomotan na marhay ni Jehova an mga nagsasamba sa saiya bilang mga indibiduwal. Itinokdo ni Jesus na si Jehova siring sa sarong pastor na ibinibilang an lambang karnero nia na daing kapareho asin mahalagang marhay. (Mateo 18:12-14) Sinabi ni Jesus na mayo ni sarong dignos na mahuhulog sa daga na dai naaaraman ni Jehova. Idinagdag pa ni Jesus: “An mismong buhok kan saindong payo bilang gabos.” (Mateo 10:29-31) Kun naririsa ni Jehova na may nawawarang dignos sa sarong tataghan, bako daw na siertong mas ririsahon asin aatamanon nia an mga tawong nagsasamba sa saiya? Kun nabibilang asin naririparo ni Jehova an lambang buhok sa satong payo, kun siring igwa daw nin ano man na detalye sa satong buhay na dai nia kayang aramon—an satong mga pangangaipo, pinaglalabanan, asin ikinakahadit?

Langitnon na Ama Arog kan nasabotan niato sa naenot na artikulo, si Jesus an bugtong na Aki nin Dios. Bakong makangangalas na an namomotan na Aking ini parateng marhay na inaapod si Jehova, asin nagtataram manongod sa saiya, bilang saiyang “Ama.” Sa katunayan, sa enot na isinurat na mga tataramon ni Jesus, na sinabi nia sa templo  kan sia 12 anyos pa sana, inapod nia si Jehova na “sakong Ama.” (Lucas 2:49) An terminong “Ama” naglataw nin haros 190 beses sa mga Ebanghelyo. Sinambit ni Jesus si Jehova sa manlaenlaen na paagi—bilang “saindong Ama,” “Ama niamo,” asin “sakong Ama.” (Mateo 5:16; 6:9; 7:21) Paagi sa daing pag-alangan na paggamit ni Jesus kan terminong ini, ipinaheling nia na posible para sa makasalan asin bakong sangkap na mga tawo na magkaigwa nin mamomoton asin may pagtitiwalang relasyon ki Jehova.

Maheherakon asin andam na magpatawad Aram ni Jesus na kaipuhan nin bakong sangkap na mga tawo an abundang pagkaherak ni Jehova. Sa saiyang parabola dapit sa gastador na aki, ikinomparar ni Jesus si Jehova sa maheherakon asin mapagpatawad na ama na maogmang inako an saiyang nagsosolsol na aki. (Lucas 15:11-32) Sa siring, an mga tataramon ni Jesus nag-aasegurar sa sato na hinahanap ni Jehova an ano man na pagbabago sa puso nin makasalan na tawo na magigin basehan Nia tanganing pahelingan ini nin pagkaherak. Gusto nanggad ni Jehova na patawadon an nagsosolsol na parakasala. “Sinasabi ko sa saindo,” an paliwanag ni Jesus, “na huli kaiyan magkakaigwa nin orog na kagayagayahan sa langit huli sa sarong parakasala na nagsosolsol kisa sa nobenta y nuebeng matanos na dai nangangaipong magsolsol.” (Lucas 15:7) Siisay an dai mapaparani sa arog kaiyan kamaheherakon na Dios?

Paradangog nin mga pamibi Sa kalangitan bago si Jesus magdigdi sa daga, naobserbaran nia mismo na si Jehova iyo an “Paradangog nin pamibi” asin na Sia naoogmang marhay sa mga pamibi kan maimbod na mga nagsasamba sa saiya. (Salmo 65:2) Huli kaini, durante kan ministeryo ni Jesus, tinokdoan nia an mga naghihinanyog sa saiya kun paano mamibi asin kun ano an ipapamibi. “Dai pagparaorootrohon an iyo man sanang mga bagay,” an hatol nia. Sinadol nia an mga naghihinanyog sa saiya na mamibi na ‘magibo logod an kabotan nin Dios, kun paano sa langit, siring man sa daga.’ Puede man niatong ipamibi na kita tawan nin kakanon sa aroaldaw, patawadon sa satong mga kasalan, asin tabangan na malabanan an sugot. (Mateo 6:5-13) Itinokdo ni Jesus na dinadangog ni Jehova, siring sa sarong ama, an mga pamibi kan Saiyang mga lingkod, na sinisimbag an saindang sinsero asin may pagtubod na mga pakimaherak.—Mateo 7:7-11.

Totoo, hiningoa ni Jesus na itokdo an katotoohan manongod ki Jehova asin kun anong klaseng Dios sia. Alagad may saro pa na gustong-gustong sabihon ni Jesus manongod ki Jehova—an paagi ni Jehova tanganing magkaigwa nin mga pagbabago sa bilog na kinaban na maresulta sa kaotoban kan Saiyang katuyohan para sa dagang ini asin sa mga tawo digdi. Sa katunayan, an aspektong ini kan mensahe ni Jesus iyo an tema kan saiyang paghuhulit.

[Nota sa Ibaba]