?Jisas i Tijim Wanem Long Saed Blong God?

“Wan man nomo i savegud Papa long heven, hemia Pikinini blong hem. Be Pikinini ya i wantem talemaot Papa blong hem long ol narafala, blong olgeta tu oli save hem.”—LUK 10:22, CONTEMPORARY ENGLISH VERSION.

BIFO we fasbon Pikinini blong God i kamdaon long wol ya, hem i bin stap klosap long Papa blong hem long heven blong plante bilian yia. (Kolosi 1:15) Taswe, Pikinini ya blong God i savegud ol tingting, filing, mo plan blong Papa blong hem. Biaen, Pikinini ya i kam man ya Jisas we i laef long wol. Taem hem i stap long wol, hem i wantem tumas blong tijim ol man long trutok long saed blong Papa blong hem. Yumi save lanem plante samting long saed blong God taem yumi lesin long wanem we Pikinini blong hem i talem.

Nem blong God Samting we i impoten tumas long Jisas, hemia nem blong Papa blong hem, Jeova. Jisas i lavem Papa blong hem tumas, taswe hem i wantem we ol man oli save nem blong papa blong hem mo oli yusum nem ya. Mining blong nem blong Jisas se, “Jeova i Sevem Ol Man.” Long naet bifo we Jisas i ded, hem i prea long Jeova mo i talem se: “Mi mi stap talemaot nem blong yu” long ol man. (Jon 17:6) I klia se Jisas i yusum nem blong God, mo i talemaot nem ya long ol narafala man tu. ?From wanem? From we sipos ol man we oli lesin long Jisas oli no save nem blong God mo mining blong nem ya, bambae oli no save trutok long saed blong Jeova. *

Bigfala lav blong God Wan taem, Jisas i prea long God se: “Papa, . . . yu lavem mi bifo olgeta, taem we wol ya i no stap yet.” (Jon 17:24) Taem Jisas i stap long heven, hem i harem gud long lav ya we Papa blong hem i soemaot long hem. Ale, taem hem i kam long wol, hem i soemaot lav ya long plante rod.

Jisas i soemaot se lav blong Jeova i bigwan olgeta. Hem i talem se: “God i lavem tumas ol man long wol, nao hem i givim mi, mi stret Pikinini blong hem, mi wan nomo we hem i gat, blong olgeta man we oli bilif long mi bambae oli no save lus, oli gat laef we i no save finis.” (Jon 3:16) Yes, God i lavem olgeta man long wol. Lav we God i gat long olgeta man i bigwan tumas, nao hem i givim stret Pikinini blong hem we hem i lavem tumas. From samting ya, olgeta man we oli bilif long hem, bambae oli save fri long sin mo ded, mo oli save kasem laef we i no save finis. Yumi no naf blong kasem save long bigfala lav ya blong God.—Rom 8:38, 39.

Jisas i talemaot klia wan trutok we i leftemap tingting blong yumi. Jeova i lavem ol wanwan man we oli wosipim hem. Jisas i tijim ol man se Jeova i olsem wan man blong lukaot long sipsip, we wanwan long ol sipsip blong hem oli defren mo oli impoten tumas long hem. (Matiu 18:12-14) Jisas i talem se Jeova i save long evri smol pijin we oli foldaon long graon. Jisas i gohed i talem se: “Ol hea blong hed blong yufala, be hem i kaontem evriwan.” (Matiu 10:29-31) Sipos Jeova i naf blong luk evri smol pijin we oli lus long bed blong olgeta, hem i mas kea moa long ol wanwan man we oli mekem wosip long hem. Sipos hem i kaontem evri hea long hed blong yumi mo i savegud namba blong olgeta, hem i mas savegud evri smosmol samting long laef blong yumi. Hemia ol nid blong yumi, ol hadtaem we yumi gotru long olgeta, mo ol wari blong yumi.

Papa long heven Olsem yumi tokbaot finis, Jisas i stret Pikinini blong God, wan nomo we Hem i gat. Yumi no sapraes we Pikinini ya i singaot Jeova mo i tokbaot Hem se, “Papa” blong hem. Faswan tok blong Jisas we oli raetem long Baebol, hemia taem hem i gat 12 yia blong hem. Long taem ya, hem i go  long haos prea mo i tokbaot Jeova se “Papa blong mi.” (Luk 2:49) Tok ya “Papa” i kamaot klosap 190 taem long ol fofala Gospel. Plante taem, Jisas i tokbaot Jeova se “Papa blong yufala,” “Papa blong mifala,” mo “Papa blong mi.” (Matiu 5:16; 6:9; 7:21) Fasin blong Jisas blong yusum ol tok ya oltaem i soemaot se, nating we ol man oli sinman mo oli no stret gud olgeta, be oli save trastem Jeova, mo oli save fren gud wetem Hem.

Hem i gat sore mo i rere blong fogivim man Jisas i save se ol man oli no stret gud olgeta, mo from samting ya oli nidim we Jeova i sore long olgeta. Long parabol blong Jisas long saed blong boe we i lusum rod, Jisas i tokbaot Jeova se hem i olsem wan papa we i gat bigfala sore, mo i stap fogivim ol pikinini blong hem we oli tanem tingting blong olgeta mo oli kambak long hem. Hem i openem han blong hem, i rere blong welkamem ol pikinini ya. (Luk 15:11-32) Ol tok ya blong Jisas oli leftemap tingting blong yumi se Jeova i stap lukaot enikaen jenis we wan sinman i mekem long hat mo tingting blong hem, ale Hem i soemaot sore long man ya. Jeova i wantem tumas blong fogivim sin blong man we i tanem tingting blong hem. Jisas i eksplenem se: “Mi mi talem long yufala. Bambae long heven i olsem nomo. Bambae oli glad moa long wan man nomo we i man nogud, be i tanem tingting blong hem from sin blong hem, i winim we oli glad long naenti naen stret man, we oli no mekem samting we oli mas tanem tingting blong olgeta from.” (Luk 15:7) !Ating yumi wantem tumas blong kam klosap long wan God olsem, we i gat sore long yumi ol sinman!

Man blong harem ol prea Bifo we Jisas i kamdaon long wol ya, hem i luk we Jeova i stap “harem prea” blong man, mo we Hem i glad tumas blong lesin long ol prea blong ol gudfala man we oli mekem wosip long hem. (Ol Sam 65:2, NW) From samting ya, taem Jisas i stap prij long wol ya, hem i tijim ol man blong hem blong oli prea. Hem i tijim olgeta tu long wanem samting we oli save prea from. Hem i givim advaes ya se: “Taem yufala i prea, yufala i no mas talem semfala toktok bakegen mo bakegen.” Hem i pulum ol man blong oli prea from samting we God i wantem se bambae “i kamaot long wol, olsem we i kamaot long heven.” Yumi save prea tu from ol samting we yumi nidim long laef evri dei, mo blong hem i fogivim ol sin blong yumi, mo blong yumi winim ol samting we oli traem yumi. (Matiu 6:5-13, NW) Jisas i tijim ol man se Jeova i olsem wan gudfala papa, from we hem i ansa long ol prea blong ol man blong Hem, taem oli askem samting long hem wetem fulhat blong olgeta mo wetem bilif.—Matiu 7:7-11.

Tru ya, Jisas i tijim ol man long trutok long saed blong Jeova mo ol fasin blong hem. Be i gat wan narafala samting yet long saed blong Jeova we Jisas i wantem tumas blong talemaot. Hemia tul we Jeova bambae i yusum blong mekem stamba tingting blong Hem i kamtru long wol mo long ol man we bambae oli stap long hem. Tul ya nao i stamba samting we Jisas i talemaot taem hem i prij.

[Futnot]