Ki Zezi ti ansennyen lo Bondye?

“Personn pa konn mon Papa eksepte son Garson ek bann ki son garson in swazir pour revel li.”—LIK 10:22.

ZEZI, premye Garson Bondye ti pas en kantite letan avek son Papa dan lesyel avan vin lo later. (Kolosyen 1:15) Sa Garson in alor arive konn panse ek santiman son Papa e lafason i azir. Kan i ti vin lo later konman en zonm apele Zezi, i ti enpasyan pour ansenny laverite lo son Papa. Nou kapab aprann bokou lo Bondye zis par ekout sa ki sa Garson ti annan pour dir.

Non Bondye Zeova, non Bondye, ti vreman enportan pour Zezi. Sa Garson byenneme ti anvi ki lezot i konn e servi non son Papa. Sa non Zezi i vedir, “Zeova i delivre.” Sa zour swar avan son lanmor, dan son lapriyer, Zezi ti kapab dir avek Zeova: “Mon’n fer tou bann ki ou’n tir dan lemonn e ki ou’n donn mwan, konn ou non.” (Zan 17:6) I pa sirprenan ki Zezi ti servi non Bondye e fer lezot konn sa non. Apre tou, ki mannyer bann ki ti ekout Zezi ti kapab konpran sa ki i ti pe dir lo Zeova si zot pa ti ni menm konn Son non e ki sa non i vedir? *

Gran lanmour Bondye En fwa kan Zezi ti pe priye i ti dir: “Papa . . . ou’n kontan mwan avan ki lemonn ti ganny kree.” (Zan 17:24) Lefet ki i ti’n eksperyans lanmour Bondye dan lesyel, ler i ti lo later i ti fer tou pour revel sa lanmour dan diferan fason avek lezot.

Zezi ti montre ki Zeova i annan en gran lanmour. Zezi ti fer sa remark: “Bondye in telman kontan lemonn ki i’n donn son sel Garson, pour ki nenport ki, ki krwar dan li, pa pou mor, me i a ganny lavi eternel.” (Zan 3:16) Sa mo Grek ki’n ganny tradwir “lemonn” pa vedir “later.” Parey i ganny servi dan sa verse, i refer avek imen an zeneral, andotmo limanite an antye. Son lanmour i sitan gran pour bann imen ki i’n donn son Garson byenneme pour ki bann imen ki fidel i kapab ganny libere dan lesklavaz pese ek lanmor e annan sa lespwar pour ganny lavi eternel. Nou pa pou zanmen kapab mezir larzer ek profonder sa gran lanmour ki i annan pour nou.—Romen 8:38, 39.

Zezi i asir nou ki Zeova i kontan en kantite son bann serviter personnelman. Zezi ti ansennyen ki Zeova i parey en berze ki vwar sak son bann mouton inik e presye. (Matye 18:12-14) Zezi ti dir ki napa enn sa bann pti sren ki tonm ater san ki Zeova i konnen. Zezi ti azoute: “Menm bann bren seve lo zot latet in konte.” (Matye 10:29-31) Si Zeova i annan sa abilite pour konnen kan en pti sren i manke dan en nik, pa nou annan plis rezon pour krwar ki i vey e pran swen avek sak son bann serviter? Si Zeova i kapab kont sak bren seve lo nou latet e konnen konbyen i annan, alor eski i annan okenn detay lo nou lavi, setadir nou bezwen personnel, difikilte ek traka ki i pa okouran?

Nou Papa dan lesyel Parey nou’n fer resorti dan lartik avan, Zezi i sel Garson byenneme Bondye. I pa sirprenan alor ki tre souvan sa Garson byenneme ti refer avek Zeova e koz lo Li konman son “Papa.” Annefe, premye parol Zezi ki ti ganny rikorde, i ler i ti dan tanp e i ti annan zis 12 an. I ti refer avek  Zeova konman “mon Papa.” (Lik 2:49) Sa mo “Papa” i aparet preski 190 fwa dan Levanzil. Zezi ti plizyer fwa refer avek Zeova konman “ou Papa,” “nou Papa” e “mon Papa.” (Matye 5:16; 6:9; 7:21) Zezi ti santi li alez pour servi sa tit e par fer sa i’n montre nou ki i posib pour bann imen peser e enparfe annan en bon relasyon avek Zeova e ki nou kapab annan konfyans dan li.

Demontre mizerikord e pare pour pardonnen Zezi ti konnen ki bann imen enparfe i bezwen mizerikord Zeova en kantite. Dan son parabol garson perdi, Zezi ti konpar Zeova avek en papa ranpli avek konpasyon, ki pare pour pardonnen e i ouver son lebra gran pour resevwar son garson ki’n repantir. (Lik 15:11-32) Parol Zezi i donn nou sa lasirans ki Zeova i get dan leker pour vwar si en dimoun in repantir e sa i vin en baz pour Li demontre son mizerikord. Zeova i vreman anvi pardonn en dimoun ki’n repantir. Zezi ti eksplike: “Mon dir zot, dan menm fason, i pou annan plis lazwa dan lesyel pour en sel peser ki sanz son lavi ki pour 99 dimoun zis ki pa bezwen sanz son lavi.” (Lik 15:7) Lekel ki pa pou santi li atire avek en Bondye mizerikord?

Sa Enn ki ekout lapriyer Kan i ti dan lesyel avan vin lo later, Zezi ti vwar pour li menm ki Zeova i sa Enn ki “ekout lapriyer” e I pran plezir pour ekout lapriyer son bann serviter fidel. (Psonm 65:2) Alor pandan son minister, Zezi ti ansenny sa bann ki ti ekout li lo lafason pour priye e lo kwa pour priye. I ti konsey zot: “Pa servi en kantite parol parey bann payen.” I ti ankouraz zot pour priye ki lavolonte Bondye “i ganny akonplir lo later parey dan lesyel.” Nou kapab osi priye pour ki nou ganny nou dipen sak zour, ganny pardonnen e pour nou kapab reziste tantasyon. (Matye 6:5-13) Zezi ti ansennyen ki Zeova i azir parey en papa kan Son bann serviter i priy avek li. I reponn lapriyer senser ki zot fer dan lafwa.—Matye 7:7-11.

Sa i kler, Zezi ti fer tou pour ansenny laverite lo Zeova e lo sa kalite Bondye ki i ete. Me i annan en lot keksoz lo Zeova ki Zezi ti kontan koz lo la. Sa i sa mwayen atraver ki Zeova pou anmenn sanzman pour li akonplir Son plan lo later e pour bann imen. Annefe, kan Zezi ti prese sa ti en laspe enportan dan son mesaz.

[Not anba lo paz]