Se Jesus Ekekpepde Mme Owo Aban̄a Abasi

“N̄kukụre owo emi enen̄erede ọfiọk Ete edi Eyen. Edi Eyen oyom ndisian mbon en̄wen mban̄a Ete, man mmọ n̄ko ẹkpefiọk enye.”—LUKE 10:22, CONTEMPORARY ENGLISH VERSION.

IKPỌN̄-IKPỌN̄ edibon Eyen Abasi ama odu anana-ibat isua ke heaven onyụn̄ enen̄ede adiana ye Ete esie mbemiso ekedide isọn̄. (Colossae 1:15) Emi ama anam enye ọfiọk ekikere Ete esie, nte esitiede Ete esie ke idem, ye nte Ete esie esinamde n̄kpọ. Ke ini Eyen emi ekedide isọn̄, ẹkedifiọk enye nte Jesus. Ama enen̄ede ọdọn̄ enye ndikpep mbon en̄wen akpanikọ emi aban̄ade Ete esie. Imekeme ndikpep ekese n̄kpọ mban̄a Abasi edieke ikpan̄de utọn̄ ikop se Eyen emi eketịn̄de.

Enyịn̄ Abasi Jehovah, emi edide enyịn̄ Abasi, ekedi ata akpan n̄kpọ oro ekebehede Jesus. Edima Eyen emi okoyom mme owo ẹfiọk ẹsinyụn̄ ẹkot enyịn̄ Ete esie. Enyịn̄ Jesus akam ọwọrọ “Jehovah edi Edinyan̄a.” Ke okoneyo emi ekesierede usen emi ẹkewotde Jesus, enye ama ọbọn̄ akam ọnọ Jehovah ete: “[Mmanam] mmọ ẹfiọk enyịn̄ fo.” (John 17:26) Ikpaha nnyịn idem ndifiọk ke Jesus ama esikot enyịn̄ Abasi onyụn̄ anam mbon en̄wen ẹfiọk enyịn̄ emi. Se ise, mbon oro Jesus ọkọkwọrọde ikọ ọnọ ẹkpekesan̄a didie ẹfiọk akpanikọ emi aban̄ade Jehovah edieke mmọ mîkpọkọfiọkke enyịn̄ Abasi ye se enyịn̄ oro ọwọrọde? *

Akwa ima Abasi Jesus ama ọbọn̄ akam ini kiet ọnọ Abasi ete: ‘Ete, afo akamama mi mbemiso editọn̄ọ ererimbot.’ (John 17:24) Sia Abasi akamade Jesus ke ini enye okodude ke heaven, Jesus ama owụt mme owo ima emi ke ediwak usụn̄ ke ini enye okodude ke isọn̄.

Jesus ama owụt ke Jehovah amama kpukpru owo. Enye ọkọdọhọ ete: “Abasi ama enen̄ede ama ererimbot tutu enye ọnọ ikpọn̄-ikpọn̄ edibon Eyen esie, man owo ekededi eke ọbuọtde idem ye enye okûtak edi enyene nsinsi uwem.” (John 3:16) Ikọ Greek oro ẹkabarede “ererimbot” iwọrọke “isọn̄.” Se enye ọwọrọde ke itien̄wed emi edi mme owo—oro edi, ofụri ubonowo. Abasi enen̄ede ama ubonowo tutu enye ọnọ Eyen esie emi enye amade akan man anyan̄a mbon emi ẹnamde akpanikọ osio ke idiọkn̄kpọ ye n̄kpa onyụn̄ anam mmọ ẹnyene idotenyịn nsinsi uwem. Nnyịn ikemeke ndinen̄ede mfiọk nte ima emi okponde eketre.—Rome 8:38, 39.

Jesus ama ọsọn̄ọ etịn̄ akpanikọ emi ọdọn̄de owo esịt mi: Jehovah enen̄ede ama owo kiet kiet emi atuakde ibuot ọnọ enye. Jesus ekekpep mme owo ete ke Jehovah etie nte ekpemerọn̄ emi erọn̄ esie kiet kiet edide san̄asan̄a onyụn̄ ọsọn̄de urua. (Matthew 18:12-14) Jesus ọkọdọhọ ke baba akadan̄abasi kiet iduọhọ ke isọn̄ ke Jehovah mîfiọkke. Jesus ama ọdọhọ n̄ko ete: “Ẹbat kpa kpukpru idet ibuot mbufo.” (Matthew 10:29-31) Edieke Jehovah enyenede ukeme ndifiọk ke akadan̄abasi kiet idụhe ke efọk esie, adan̄a didie akan oro ke enye ese onyụn̄ ekere aban̄a owo kiet kiet ke otu mme andituak ibuot nnọ enye? Edieke Jehovah ekemede ndibat nnyụn̄ mfiọk kpukpru idet ke ibuot nnyịn, mmọn̄ọ, ndi odu n̄kpọ ke uwem nnyịn—oro edi, se inanade nnyịn, mfịna nnyịn, ye editịmede esịt nnyịn—emi enye mîkemeke ndifiọk?

Ete eke heaven Nte iketịn̄de ke ibuotikọ oro ebede, Jesus edi ikpọn̄-ikpọn̄ edibon Eyen Abasi.  Imosụk ise edima Eyen emi ekesinen̄erede awak ndikot Jehovah “Ete” imọ. Ke nditịm ntịn̄, akpa ikọ Jesus oro ẹwetde, emi enye eketịn̄de ke temple ke ini ekedide isua 12, enye okokot Jehovah “Ete mi.” (Luke 2:49) Ikọ oro “Ete” ekpere ndisịm utịm ike 190 ke mme Gospel. Jesus ama esikot Jehovah “Ete mbufo,” “Ete nnyịn,” ye “Ete mi.” (Matthew 5:16; 6:9; 7:21) Jesus ndikesikot Jehovah “Ete” ifụre ifụre ntre okowụt ke mme anana-mfọnmma owo emi ẹsinamde idiọk ẹkeme ndidi ata ufan Jehovah.

Atua owo mbọm onyụn̄ ama ndidahadedo Jesus ama ọfiọk ke mme anana-mfọnmma owo ẹyom Jehovah enen̄ede atua mmimọ mbọm. Ke uwụtn̄kpọ idiọk udọ oro Jesus ọkọnọde, enye ekemen Jehovah odomo ye ete emi atuade owo mbọm, adahadedo ọnọ owo, onyụn̄ amade nditara esịt mma eyen oro akabarede esịt. (Luke 15:11-32) Ke ntem, ikọ Jesus anam nnyịn ifiọk ke Jehovah esese m̀mê oyokụt nte anamidiọk akabarede esịt man atua enye mbọm. Jehovah enen̄ede enyene udọn̄ ndidahadedo nnọ anamidiọk oro akabarede esịt. Jesus ọkọdọhọ ete: “Ndọhọ mbufo nte ntem ke idatesịt edidu ke heaven aban̄a anamidiọk kiet emi akabarede esịt akan ndinen owo anan̄-ye-efịtenan̄ emi mînyeneke se ẹkabarede esịt ẹban̄a.” (Luke 15:7) Mmọn̄ọ, ndi odu owo emi mîkpasan̄ake ikpere Abasi oro esituade owo mbọm ntre?

Enye emi okopde akam Ke ini Jesus okodude ke heaven mbemiso edide isọn̄, enye ama okụt ke idemesie ke Jehovah edi ‘Enye emi okopde akam’ ye nte ke akam mbon oro ẹsọn̄ọde ẹda ẹtuak ibuot ẹnọ enye esidat enye esịt. (Psalm 65:2) Mmọdo, ke ini utom ukwọrọikọ esie, enye ama esikpep mme andikpan̄ utọn̄ nnọ enye nte ẹkpebọn̄de akam ye se ẹkpebọn̄de ẹban̄a. Enye eketeme ete: “Kûyịre ke nditịn̄ mfiak ntịn̄ n̄kpọ kiet.” Enye ama eteme mme andikpan̄ utọn̄ nnọ enye ete ẹbọn̄ akam ẹte uduak Abasi “ada itie, nte edide ke heaven, yak edi ke isọn̄ kpasụk ntre.” Imekeme ndibọn̄ akam n̄ko ite ẹnọ nnyịn udia eke ekemde nnyịn ke usen, ẹfen idiọkn̄kpọ nnyịn, ẹnyụn̄ ẹn̄wam nnyịn ikan idomo. (Matthew 6:5-13) Jesus ekekpep mme owo ete ke Jehovah esinam n̄kpọ aban̄a akam mme asan̄autom esie nte emi ete esinamde ye eyen, onyụn̄ ọbọrọ akam oro mmọ ẹdade mbuọtidem ẹbọn̄ ke ofụri esịt.—Matthew 7:7-11.

Edi akpanikọ ke Jesus ama esikpep mme owo aban̄a Jehovah ye orụk Abasi emi Jehovah edide. Edi odu n̄kpọ en̄wen emi Jesus ekenyenede ọkpọsọn̄ udọn̄ nditịn̄ nnọ mme owo mban̄a Jehovah—se Jehovah edidade ikpụhọde ofụri ererimbot man osu se enye aduakde aban̄a isọn̄ emi ye mme owo emi ẹdụn̄de ke esịt. Ke nditịm ntịn̄, ikpehe etop Jesus enye emi ekedi ibuotikọ ukwọrọikọ esie.

[Ikọ Idakisọn̄]